Dute cuante ca in Anpezo
Dute cuante ca in Anpezo
Dute cuante ca in Anpezo
śoin, vece, pize e grei
el par proprio par dispeto
dute cuante i poetes i vó fei.
Ogni di vien fora una satira noa
Dio mio agnó śirone a fenì
se i no bete ripiego a sta roa
ra śente i se stufa che mai pì.
Poetes 'l é deentà i sartore
caligare e inpiegate
e ultimamente anche i dotore
magare con verse na fre ingrate.
I ghin à betù śo d'ogni sorte,
non é proprio tanto polito,
i à ciatà fora anche dei morte
ma ormai chel che 'l é dito, 'l é dito.
Beśen dì che ghin ea anche de sporche
'l é stà chi outre a i dà r'inbocadura
e zerte non à vorù esse da manco porche
e i à respondù co ra stessa mesura.
I parla anche de difete de natura
zerto chi no ocore i menzonà
dute cuante ra vede ra sventura
e chi che vó i pó i mesurà.
Chesta por Aida ra me fesc pecà
r'é proprio veramente perseguitada
ma a dì el vero 'l é stà era a scomenzà
e ra stentarà un toco a esse desmenteada.
I se lamenta forte de ra nostra toses
che da ra festes 'es va in costume
no digo che see proprio duto ruoses
ma no 'l é po gnanche chel marzume.
Ghin ea d'ogni sorte, ce voreo fei,
s' i n à preśentà de mal zapatades
dute cuante no podea esse biei
ma chera meores es ea dutes pagades.
I à fato fotografies a ra granda;
i fotografes i fesc proprio del ves
i ghin à mandà anche in Nuova Zelanda
'l é inutile che i ra capisce del traes.
Fotografies i ghin à fate de prezioses
a fascistes, a parsoi e a inbroioi
credo che i ghin pode fei anche a ra nostra toses
senza proprio che i passe par coioi.
I se lamenta che mancia el sfondo
proprio a Cortina, che chel 'l on par natura
e par el vede i vien da duto el mondo
e se i no crede, che i domande a r'Azienda de Cura.
Sarae ora de ra fenì de ofende
Tanto da una parte che da r'outra;
i ra capisce anche chi che no s'intende
a guera finida, voreo ghin fei un'outra?
Un proverbio vecio talian parla ciaro
"Scherza coi fante ma no coi Sante"
Chesto el porte e se 'l tiene pura caro
Va ben poesies ma no massa ignante.
1° agosto 1945
- El mato de Cojana