Duu spos
Giovanni Chiverny (1812-1900)
Duu spos
Mò, per tœu su el consens, duu fidanzaa
hinn andaa in del curatt. Segond se usa,
j'ha quest sul catechismo interrogaa;
ma el spos, che 'l g'ha la ment tutta confusa
per 'vè bevuu, el fa citto; e, alora, indree
je manda indree el pret, disendegh brusch "Tornee!".
Tornaa de lì a vott dì, quell bravo spos
l'è ciocch anmò, nè el sa rispond nïent.
Je descascia el curatt pussee rabbios!
Vegnen la terza volta queitament:
ma el spos, segond el solit, l'è in gaina,
e nient el sa dì su de la dottrina.
El curatt, montaa in furia, "E tì", el ghe dis
volt alla sposa, "O bestia che te see,
perchè te 'l menet chì quand l'è inscì gris?"
E s'cioppand fœura a piang, la rispond lee:
"Ma, car Signor! A ghe n'impodi mì,
se, quand l'è minga ciocch, no 'l vœur vegnì?"