El Castiel de Ruvèigno/08
Ruveîgno zuta la Rapoûbrica de San Marco, dal 1283 al 1797.
L'ustinatissa, curasion nu sento, n
e de vulì quil ca la vol s'usteîna
zì tastarda a li vuolte çierta zento
ca s'inpugnesso a tuorto e sa ruveîna.
L'istisso uò fato el vis'cuo de Parenso
ca supierbia loû a praputensa viva,
el s'uò puntilgià ca 'l vol el cunsenso
del patriarca a quil ca loû vuliva.
E stando in su panser senpro loû saldo
d'iessi de Ruveîgno paron e cumandà;
stoûfo el supariur de stu ribaldo
in Ursieri, al su castiel fogo el g'uò dà.
Dastroûto ca 'l s'uò veîsto el su castiel,
ch'i suldati d'Aquiliéa g'uò bruzà,
ben mazido loû zì stà cum'oûn agniel
c'oûna lission spisso froûto al mal uzà.
Quando a Veniessia, Rubeîn sa viva dà
el patriarca anche in Eîstria cumandiva,
e sti dui nu sa pudiva cumudà
cume da doûti alura sa bramiva.
Ma apena quil ca la tuogna intrighiva
da banda el s'uò tirà, zì stà giustada
ugni cuntisa ca fra luri i viva
cun biessi, c'a pioûn d'oûn ga fa la strada.
Par giluseîa de mar zì nato guiére
fra Giénua pioûn vuolte e i vinissiani,
e i ginuvisi cu li su galiere,
Parenzo i uò bruzà e culmà d'afani.
Spazamo l'uò pruvà e timur nu puoco
sta tiera, cu anche a Umago i g'uò dà fogo
e la fluota del Duoria alura el bluoco
del nostro mar l'uò fato in ogni logo.
El su dulur Rubeîn l'uò boû pioûn grando
cu in li su aque Duoria soûn e zù el ziva
senpro de qua de là loû burdizando,
alfeîn dà fondo in puorto qua el sbarchiva.
E broûti zì stà i zuorni par loû alura;
l'uò boû sachiegi e dagni formisoûra,
fore arbandunade doûte in malura
e oûna veîta puoi in tiera in mar ben doûra,
Cun doia gran de cor d'i ruvignisi,
loû, Sant'Ufiemia, veîa el uò purtada;
e duopo c'uò passà veînt'ani e misi,
dai dai ch'i vinissiani nda l'uò dada.
Doûta la zento nuoto e deî in pagoûra
nà quiti suni mai ningoûn li fiva,
senpro in tramasso puoi a nuoto scoûra
da vidi qualcu casa ca bruziva.
Rameîngo el pascadur visteî de strasse,
invileî in alto mar, pascà el nu ziva,
ma su gruota santà, sfineî, cu l'asse
o cu la tuogna là pissi el ciapiva.
Sulse pioûn manculeîn, loû nu fa in tiera,
li fore a bariè li stà da bando
in squiero barche stà parch'in crusiera
in gulfo i ginuvisi sta spiando.
Ben ciulto sa vido el sapadur, ca stà
cu zù tanpesta ven a rabaguosso,
ma sa fa ciaro, el dagno ca g'uò purtà
in brivo scuorda s'anche grando el fuosso.
Cusseî uò fato Giénua cu' i vinissiani,
ca pache i sa n'uò dà nu puoche in guiéra,
i uò fato pas, pioûn nu s'uò boû afani
e doûto zì stà quità in mar e in tiera.
E ani oûn mondo uò passà sensa duluri,
la tiera la frutiva in abundansa;
bona la pisca gira e i pascaduri
cul pascà pioûn s'uò richeî bastansa.
E puoi anche d'ugni banda zento nuva
purassiè zì qua vignoûda e l'uò rastà,
nu manchiva lavur da poûpa a pruva,
ca 'l lavur sa doûti, ca 'l fa ben stà.
Pioûn da duzent'ani gira passadi
nà da guiéra mai sa viva favalà,
ma doût'int'oûn sintoû s'uò ca zì stadi
zà d'i paisi darubadi in qua e in là.
Cume chi zì scutà da l'aqua calda
anche de la giassada l'uò pagoûra,
Rubeîn, cusseî, ca la su moûra salda
puoco la gira el l'uò riduota doûra.
Oûna fanduogna çierto nu zì stada
cu mutigà sa viva de la guiéra,
ca muolto n'uò passà c'oûna masnada
de gran ladroni uò darubà sta tiera.
Ben uotosento gira sti ranboni
e armadi chint'i denti sti briganti,
doûto el pais uò svalizà i magnoni
e in Rubeîn nu zì rastà ca oûrli e pianti.
Uscuochi i ga diziva a sta gianeîa,
ca tante in Eîstria uò fato barbantade
d'i cruvati fradai doûto ben veîa
i sgranfigniva i biessi e anche l'intrade.
C'uò savisto Vaniessia ca 'l deseîo
i fiva d'ugni banda intu 'l su stato,
svielto el fuorto Lion cume fa 'l beîo
cu li su nave guiéra loû g'uò fato.
Ma n'uò bastoû quil ca pateî sa viva
d'i uscuochi ca 'l pais viva dazulà,
ca i suldati ch'in sta tiera stiva
gran praputense i fiva da qua e da là.
Dai dai zì nato oûna baroûfa granda
cosa c'oûn paisan zì stà maltratà
d'oûn suldà da stripa cusseî nafanda
ca cum'oûna bies'cia aduosso g'uò saltà.
E pache in San Damian, e s'ciafi e poûgni
e padisse i s'uò dà da dasparadi,
suldadi e zento s'uò misso cu' i groûgni
chi pastadi zì rastà e chi massadi.
Dasgrassie a baloûchi n'uò boû sta tiera:
e sachiegi, e daspieti d'ugni banda,
e dai fradai e da zento da galiera
ladra, magnona, pierfida e nafanda.
Ma in mieso ai su duluri e ai su malani
g'uò vussioû del gran ben senpre sta zento
a la Rapoûbrica d'i vinissiani
e a dafendala pronti ugni mumento.
E del su grand'amur nda conta stuoria,
ca g'uò dà i vieci nostri e veîta e biessi,
e pioûn d'oûn uò lagà biela mamuoria
cume de patria el vivo amur diev'iessi.
Bravi e valurusi zì stà i Binoûssi,
i Narenta, i Garzuoto e i Baluvardo,
i Fachiniti ancura cu i Caloûssi
del curaio grando i uò boû e brasso saldo.
Squasi qualcuosa qua meî deî vuravi
da doûti sti omi grandi e valurusi,
ma puiéta nu son, e de sti bravi
cantà pol sul savì chi zì studiusi;
Ma poûr l'amur del logo ula son nato
e l'unur grando ca fato g'uò sti fioi,
ma spenzo e par ca loû ma deîgo in fato:
de sti ma fioi, deî del ben pioûn ca ti puoi.