En ocajion de la noza de Teodoro Cloch con Oliva Deluca
En ocajion de la noza de Teodoro Cloch con Oliva Deluca
- Poza ai ot de jené 1907
Permeteme voi duc chenc
Gregn e pìcoi, larc e strenc
Joegn e veies, bienc e rosc
Rufianar mìngol coi sposc.
Per no esser mai ngrac
E no se far veder musac
Ge auguron chel che più pel
Se sion bogn valch de bel.
Prum de duc l'é l segnor conte
Che dal ciaf fin ja le ponte
Da via dò fin al boton
L'é par dut valif toron.
Con na man te la moscheta
L se peissa maladeta
Nience chest no se cardea,
Reste soul te la contea.
A menarme via mia Oliva
Mpiantarme sche na piva
Mio diletto bel Teodoro
Tu es stat più che maloforo.
Pur ve augure de vif cher
La fortuna sun n taer.
E l ge disc dut belebon
Chist canaa de mi non.
Sanità, amor e pasc
Zenza numer desche i sasc
Scioldi più che pien stradoa,
Ve augura la veia Coa
E i se grigna chisc doi veies
Co le lagrime ti eies
Ge pisando a chi defunti
Che a chist dì no i é più giunti.
Valantin gran testamonech
Ence chel ge met n conech
Augurandove vint giai
Trenta ciaure e trei stivai
E Gostin de le ciavate
Che l tabaca desche n frate
L ve slizia col biscegol
Voscia vita più che n frégol.
E Maria de Bertolorum
Dal paìsc dei musciatorum
La ve augura strada strenta
A frelar demez la stenta.
Tita Cursio mi no sai
L sauta n pe desche i giai
L ve crida: "Viva e ciuhui.
Su cridà no fajé i mui.
E so fémena ence ela
Che ogne tant la pert la bela:
"Bec a fulgor tempestate!"
La ve augura e amò patate.
"Trenta pasc de legna sfessa
Ogne an la levaressa
Mile giac no me mporta n cazo",
disc Pieruc chel omenazo.
Seence ben che la é gialina
Anché se mef ence Catina:
"Cari sposc bona fortuna,
Fertech noze e ca la cuna"
Barba Àngiol dal penel
L depenc set oute l ciel
E l ve disc: "jìvene ite
Fin tinsom e amò più n ite".
Jefa pronta desche fech
La disc: "Chest l'é massa pech"
Auguronge n sté de vache
Per saziar chi da le cache.
E Francesco fera zòcoi
L ve augura cent binocoi
Per poder jà da lontan
Sdarmolarve via l malan.
pagina:391
La Teluza so moier
La prejenta n gran scuier
E dijendo: "Mie bogn sposc
Chist l'é chel che concia i osc".
Con n mescol da polenta
Giovanin l se prejenta:
"Fin che chist amò laora
Cara Oliva tu es segnora".
Angelina de Mariana
La sutassa fin te fana
Per cridar: "Vivé ben sposc
Zenza goba e zenza gosc.
Chel Romedio de la crocia
L'é ben ló che con so bocia
L ve augura più che l pel:
"Mile beches e n vedel".
Chela Amalia de Felize
La dirà (senó la stize):
"Eviva chi che se à sposà
Eviva e ciuhui e sa sa. (=Jodler)
E de Paltador chel Tito
Nience chel no vel star zito
L ve disc: "Vivé mile egn
Grasc e mic e semper segn".
Maria Gross chist sul moment
La ve augura: "N bastiment
De gregn ciuces, drapedìe
E gialine con trei pie".
E Roberto da Mazin:
"Duta l'aga da vejin
Da poder con bela fiaca
Lavar i zeivres da la caca".
"Na pazienza desche Giobe
N camel con doudesc gobe",
La ve augura per far bel
Voscia serva da la vèl. (= Obertal)
E la nona da la sposa
La ve tira jù na strosa
Te chel desche vec
De chi piens de pisc e bec.
Per fin ló chi pìcoi bec
No i é bogn de star cec;
I ve prea da Sènta Grama
Pien ucé e tobià de brama.
E Tita con Cristina
I ve prea molta farina,
Òr, incens e mira e più
Tanche al Bambin Gejù
E Don Anderle l piovan
Che l'à mez l ciel te man
L ve mpetra per dut l'an
Felizità più che Sèn Jan.
"Madre Santa! Ieches na!
Ades son soul che no é parlà
Che che mai diré pa gio
Se no voi restar ndò:
"Al paradis n duta freta
Ge fae ite na maneta
E vel mene desche n raf
A duc doi ntorn al ciaf".