En ocajion de le noze de Tita de Maria con Orsola Ciadina
EN OCAJION DE LE NOZE DE TITA DE MARIA CON ORSOLA CIADINA
- Ai chinesc de november 1904
I
Canche l Segnoredìo l'à vedù Adam
Jir ntorn con n mus desche na scartacia
L'à dit: "Jesses na, Che burta facia!"
Chel pere om ló soul desche n pal
Corpo de baco, chel con star mal.
II
Che al fat? L'à spetà che Adam fajesse nane
E po en scapin per far più pian,
Ge tol fora a chist pere Adam
Na costa, n pech de ciarn e n pech de pel
E mesceida sta roba ensema e fa n pastel.
III
E tol sta pasta e dai e dai
Fage so ciaf e si ciavìe,
E le so man e si pie,
Le ombie, i denz, l nas e tol na piva
E sofiege ite e fala viva.
IV
Te chela Adam se desceida e l Segnoredìo:
«Eco Adam che te é dat la compagnìa
Parete via la malinconìa.
Vardala! te la é fata bona e bela
La é fata per te e te per ela.
V
Valgugn pensarà che io fosse n asen
A troar fora sta storia che duc jà sà.
Lasciave dal temp - spetà!
Se no ve pae con piena rejon
Dijeme pura gran asenon.
VI
La fémena la é stata touta for dal cher
E no fora dal ciaf e chist l'é n endizie
Che se ela l'à giudizie
No l'à mai da sdotorar
Ma demò da piajer e da amar.
VII
Ma no la é stata touta niencie for dai pie
E se se abada chist vel dir
Che se pureta la cogn obedir
Per chest no la é po schiava de so om
Ma so amica, so compgnìa, e po l'é bon.
VIII
Sposc voleve ben un co l'auter
Vardave da le beghe, assà pazienza,
Usave semper bela prudenza
Che chista l'é na virtù tan nezesciaria
Che se la mencia n l'outa la ciasa é n aria.
IX
Ma ve! Scusame po se ve die coscì
Scusalo po chist mat Pavarìn
Saede ben che no son n cetin
Ma chist tant no l'é mia de mal
Chist toch de pardicia mez scioldo [l] la val.
X
Che volede mai dir? Son fat coscì,
Canche se marida n amich
No i me fasc tajer nience col pich
Se ge posse dir na parola,
É la lenga che cor desche na mola.
XI
Ades per finirla ve augure de dut
E ve augure de cher, chel soraldut:
Scioldi e roba e ciampes e pré
Posole e vete e ciauze e ciuzé.
XII
Vacie e vedìe, giai e gialine
Garmiai e feide, ciaure e ponjine
Formai desche mole
Ciuzé con trei sole.
XIII
Denz sche zapins
Patac sche lumins
E biava e po siala
Da sterder pien stala.
XIV
Se sà che aede gust
Ve augure e l'é giust
Pien cambra e pien stua
De chezene e (de) pua.
XV
Salute e fortuna
Da empienir mez mondo e duta la luna
Na vita scì longia e scì laria
Da viver cent egn dò da chi de Ciaria.
XVI
Ca donca la taza: Eviva i sposc!
Viva voscia mare! viva vosc pare!
Viva vosc fioces! viva l premessare!
Viva i testamonesc! Viva duc!
Viva! Cridà! no siede mia muc!
XVII
Viva i vives e po [viva] ence i morc!
Pardon! no i morc (ma) chi che à da nascer
Chi sà te nef meisc - no son bon de tajer -
Son proprio curious
De veder se l'é puta o proprio n bel tous.