Eneide, liber 1
Francesco Bellati
Eneide, liber 1
Démm, sciori, a trà, che vuj cantav l'istoria
de quand che la bon'anema de Eneja,
vedend che in Troja i Gregh faven baldoria
l'ha tolt su el duu de copp con la fameja;
E per quant che per rompegh la zuccoria
la fass Giunona, che l'era ona deja
per tegnill via d'Italia, per lu in somma,
el gh'è rivaa a pientagh el regn de Romma.
Bosin del Borgh di Goss, mè car messee,
avii de tramm in ment che per reson
quella dea la voreva a tucc i stee
tirà el pover Eneja in del merdon;
e che motiv la gh'aveva colee
de tœù a perzipità quell scior tant bon:
che i donn sien pienn de rabbia l'è de fed;
ma rabbia d'ona deja, s'hal de cred?
In de l'Affrega gh'era veggiament
Cartagena postada in riva al mar,
ricca assossenn e pienna aras de gent
che no ghe n'era on'oltra de stà al par;
ghe calava de fatt quell gran nient,
asca el sô quand nol lus e nol fa ciar,
talchè podeven dì che in sta cittaa
gh'eva dent ligaa i sces de cervellaa.
[...]