Epigramy (Zejler)

nadpis	Epigramy
awtor	Handrij Zejler
lěto
žórło	http://texty.citanka.cz/
licenca	public domain

        I. Wotrodźencam

    Wótcny kraj a narodnosć
    zynk žadyn prózdny njeje,
    njewidźiš tu stwjelca rosć
    na honach Łužiskeje?
    Zemja, kiž će skubłała,
    lubosće je dostojna.

        II. Lubosć

(Hrónčko.)

    Lubosć je štom žiwjenja,
    wěčnje zeleny a młódny,
    wichory jom' nješkodźa;
    je ćim bóle tehdy płódny
    a će zbóžnje wokřewi,
    hdyž će wšitko wopušći.

        III. Serbskim wótčincam

    Haj, we cyłosći přezjednosć,
    we wosobnosći swobodnosć
    njech pola nas přec' knježi!