Erudizion

Speri Della Chiesa Jemoli (1865-1946)

Erudizion

- El sa che incoeu n'ho sentuu voeuna bella
dopo d'avè insegnaa per tanti mes?!
(gh'ha ditt on dì, incontrandes per la strada,
el maester al sindech d'on paes).
Per cercà de cognoss a che portada
eren rivaa, ghe ciammi al sò Gioanella:
- La Divina Commedia, chi l'ha scritta?
"Mì, già, sont minga staa!" (el m'ha risponduu)
e el se quattava intant con la man dritta
come a schivà on coppon o on pè-in-del-cuu!...
Me volti in quella al fioeu del Segretari,
e anca lu - prima anmò ch'avess parlaa
el me dis, piangiorent, coi man per ari:
"Nanca mi, nanca mi sont minga staa!"
Ghe par che la sia bona?,... "Sansessia,
(l'ha rispost seri el Magistraa)
i bagaj, se sà ben che fann inscì...
ma 'l mè Giovann, gh'el garantissi mì,
el pò stà cert ch'el ghe dis nò bosìa...
putost quell'alter... l'è tant mal levaa,
e on tal bosard, ch'el vanza temp anmò
d'avella fada, e de giuragh de nò!"