Fluors sün las fossas

by Gian Fadri Caderas

[ 55 ]

Fluors sün las fossas.

Cur prümavaira richamaing s'ornescha,
Cur chaunt da gloria suna dutsch al cour,
Allur' il spiert gugent pellegrinescha
Nel vast, nel liber, nel immens dad our
Ed üna brama chera, incontschainta
Vers l'ot l'alvainta.

El tuorn' als chers chi nun sun pü aquia,
Chi vöd immens laschettan co tar nus;
Our d'la regiun da pêsch ed armonia
Udins gugent lur dir usche bandus
Ed üna brama chera, incontschainta
Vers l'ot movainta.

Allur' la pia algordaunz' ans clama
Al quaid sunter', al tömbel dels amos;
Chi tscherch' il bap, la sour, la chera mamma
Ed üna vusch ans disch: els sun beos!
Orné da fluors, las fossas, lur dimora
A nouv' aurora.

Usche a nair vestidas vezzast uossa
Pellegriner las pias al sunter';
Orner da bellas fluors la chera fossa,
Da chi partind fet greiv il separer;
Ün craunz da fluors, sco raz d'solagl chi moura,
La tomb' indora.

[ 56 ]

Ün di gnaro, darcho la giuvintschella,
La prümavaira con sorrirs e fluors;
A tuots giavüschs daro buns pleds la bella,
Leidezza, rösas semneron sieu cuors,
Profüm d'violas, chaunt ed armonia
Sün ogni via.

Ed in quel di, cha terr' am saro staunza,
E fraida tschendra saro'l cour arsaint;
Avro qualchün d'me pia algordaunza,
Da qualche fluors, ma fossa fand preschaint?
O bagna d'larmas chera dutsch' amia
La tomba mia.

25 Meg 1871.