Gira....
No, no.... l'è minga vera
Che te me vœuret ben!
Mett pur la berta in sen,
Cont mi gh'è nient de fà.
Gira.... hoo mangiaa la fœuija....
Soo coss te vœut.... n'hoo assee!....
Va pur fœura di pee,
Lasset vedè mai pù.
Te pias, eh, mandà inanz
El carr prima di bœu?
Te set sbagliaa, el me fiœu,
Stavolta gh'è su 'l gatt!
Cont mi ghe vœur el sindech,
Per mi ghe vœur l'anell,
E se gh'è minga quell,
Voj, te me cocchet no.
Gira.... n'hoo assee di ciaccer....
L'amor!.... te gh'ee di ball!
L'amor vœuri trovall
Senza cercall inscì!