Glidö!
Glidobs studelis, flenis e züpelis Vpa. in vol lölik e pato in fatän at. Beginam obsik binom smalik e fibik ab spelobs yufü boneds, laltügs e nuns plo kolüms obsik, se uts penitedöl in desän obas komunik, mostep püka bevünetik „Volapüka,“ das okanobs gudumön bledi obsik fovo e mekön omi digikum flenöfa e yufa. Volapük emostepom so vifiko in län at äyelo, das mulapenäd pato Vpka. panedom nedotiko. Tim ojonom va epölobs. Sagobs te das emekobs kopladamis zeladik, al pübön timapenädi at in fom nuik no luumo ka yel bal. Yuf monik e penädik flenas obsik osludom va okanobs fovön publügami oma. If ogetobsla yufi sätik omekobs gasedili gletikum e bevüo osteifobs mekön omi valika yufa e benoda mögik bonedels omik e mufe.
Liladel alik oyufom obis mödiko potölo obes lisedi lefulnik ladetas kuladik e klilik pösodas valik kelis sevoms e kels panitedoms in Volapük. Demü nat patik gasedila at ninsäds kösömik äbinomsöv nemödo pöfüdik e demü delids publügama zelado no konsilik. Dalobs sükön bonedelis dub samads glatik pepotöl kautiko. Liladels valik obas li-oyufoms obis yilölo bege obsik? Also dunöl ogetoms benodis gudumamas kelis bonedelalised gletikum okodom.
Vipobs getön laltügis u spodamis tefü dins nitedöl liladelis, al publügön in kolüms obsik. Vipobs mekön „VOLAPÜKI“ nogani valikas.
Opotobs viliko aikeles kadis sembal kelis ebükobs al nitedön pösodis nesevöl volapüki.
Se Volapük: Gasedil mulik püka bevünetik 1888, Nüm: 1, Pads: 4-5.