Godikos

GÖTHE
(Pelovepolöl se deutapük fa G. C. Hodgson, Melbourne, Talop.)

Nobik binomöd men

Yuflik e gudik!

Bi atos soalo

Omi distinom

De valiks sibinels,

Kelis vo sevobs.

Sani nepesevikes

Sibinales geilikum,

Kelis blesenobs!

Omes men sümomöd:

Samad ata tidomöd

Klödön tefü oms.

Ibo nesenälik

Binom nat ai;

Sol litom love mens

Badik e gukik;^[1]

E klimadunele,

Äs gudikünanes,

Nidoms mun e stels.

Vien e lebluk,

Töt e jod letepoms

Ve kul bösetik;

E dagleipoms,

Bei mospidöl,

Balani pos votan.

I läb somiko

Lugolom in lemöd,

Gleipom sun' pula

Nedebik helemi,

I suno kapüni

Sinela bäledik.

Ma lons tenüpik,

Lätenik, mayedik,

Mutobs valikans

Fegonis sibina

Obas dafulön.

Te men ga kanom

Dunön nemögikosis:

Te om distinom

Välom, cödätom;

E kanom timile

Dulöfi begivön.

Om dalom soalo

Mesedön gudikanis,

Pönön badikanis,

Sanön e savön,

Pölölosi valik

Al pöfüd fetanön.

Lestimobs leigo

Nedeilikanis,

Äsif ats binoms mens,

E dunoms lögleto,

Äs gudikünan detülo

Dunom u mägom.

Men nobik binomöd

Yuflik e gudik!

Lujaföl nefeno

Gebikosi, gitikosi,

Blünöl ülmagi

Sibinalas blesenik!

NOETS. (Vükifonät)

1. Bükapök; pla: gudik.

Se Kosmopolan 1894, Nüm: 15, Pad: 171.