Gospul ma ‚Lucas‛

KAPIT: I

Bi mödikans esteifüloms ad lautön konoti dö dins, kels ejenons timü obs,
baiädü utos, kelosi utans, kels ebinons primao logatemunans e dünans vöda, eloveükons obes,
i ob ecedob, posä evestigob primao kuratiko vali, gudiki, ad penetön leodiko osi pro ol, o ‚Theophilus‛ süperik!
dat seivolös fümo dinis, kelis etidoy ole!
Timü el ‚Herodes‛ : hireg Yudäna, hikultan labü nem: ‚Zacharias‛ älifom, se kultana-dafamül: ‚Abia‛; jimatan omik äbinof jilicinan de dauts ela ‚Aaron‛, e pänemof ‚Elisabeth‛.
Bofikans äbinons ritiks lo God, bi äkondötons neblamabiko ma büdeds e büdüls valiks Söla.
No älabons cili, bi ‚Elisabeth‛ äbinof nefluköfik; e bofikans äbinons ya tibäldiks.
Seimna, ven älabom ma jäfotataib turni ad kultön lo God,
ed om, ma kösömot kultanefa, pijonädom dub tired ad blinön bovälasakrifoti, änügolom demü atos ini tem,
du menamödot timü bovälasakrif äplekon plödo.
Us silanan Söla äpubom lo om, stanölo detü bovälalatar.
Ven ‚Zacharias‛ älogom omi, äbluvikom, e pö om dred äsüikon.
Ab silanan äsagom lü om: «No dredolöd! o ‚Zacharias‛! ibä plek olik pelilidon. Jimatan olik omotof ole soni, keli onemol eli ‚Ioannes‛.
Obinom pro ol fred e lefred, e mödikans ofredons dö moted oma.
Ibä obinom gretik lo Söl. No odrinom vini, ni spitini, e ya de vüm mota okik ofulom me Saludalanal.
Olüälükom mödikanis sonas Yisraeläna lü Söl: God omas,
ed om it ofogolom lo om in lüäl e nämäl ela ‚Elias‛, ad lüälükön ladälis fatas lü cils, e nelobedanis lü meug ritanas, ed ad blümükön Söle pöpi beno pelüälüköli».
‚Zacharias‛ äsagom silanane: «Dub kis osevob-li atosi? Ibä ob binob bäldik e jimatan obik binof vemo tibäldik».
Silanan ägespikom ome: «Binob ‚Gabriel‛, kel stanob lo God, e pelesedob ad spikön lü ol, ed ad lenunön ole atosi.
Benö! obinol müätik e no okanol spikön, jü del, tü kel atos ojenon, bi no ekredol vödis, kels pofölons pötatimo».
Pöp ästebedom eli ‚Zacharias‛, ed ästunon, das äblibom so lunüpo in tem.
E ven äsekömom se on, no äkanom spikön. Sekü atos äsuemons, das ilabom visioni in tem. Äjästom te, ed äblebom müätik.
Ven litur omik äfinon, ägolom domio.
Pos atos ‚Elisabeth‛: jimatan omik ägrodikof, ed äklänedof oki dü muls lul, sagölo:
«So Söl edunom pro ob, dü tim, das eküpedom obi, ad moükön lunofi obik bevü mens».
Ün mul mälid silanan: «Gabriel‛ pälesedom lü zif in Galileyän labü nem ‚Nazareth‛,
lü jivirgan, kel imatirajanof ko man labü nem: ‚Ioseph‛, se dafamül ela ‚David‛. Jivirgan pänemof: ‚Maria‛.
Ven silanan inükömom, äsagom ofe: «Paglidolöd! o jibenädäb! Söl binomös lä ol! Pebenedol bevü voms».
Ven älogof omi, äbluvikof dö vöds omik, ed ävätälof ninälo, kisi lüspikot at äsinifonöv-li?
E silanan äsagom ofe: «No dredolöd, o ‚Maria‛! ibä etuvol göni lä God.
Ogrodikof, ed omotof soni, keli mutol nemön Yesusi.
Obinom gretik, e ponemom Son Mulöpala. God ogevom ome troni ela ‚David‛: büröletan omik.
Obinom laidüpio reg dö dafamül ela ‚Iacob‛; reig omik no olabon fini».
‚Maria‛ äsagof silanane: «Lio atos kanon-li jenön, bi no labob himatani»?
Silanan ägesagom ofe: «Saludalanal okömon pö ol, e nämäd Mulöpala olovejadon oli; sekü atos Saludan pomotöl ponemom Son Goda.
Ed ekö! ‚Elisabeth‛: jiröletan ola egrodikof ün bäld okik de son; of, kel pilecedof nefluköfik, binof ün mul mälid.
Ibä vöd nonik, kel kömon de God, kanon binön nennämik».
Täno ‚Maria‛ äsagof: «Ekö! binob jidünan Goda, pö ob jenosös ma vöd olik»! E silanan älüvom ofi.
Ün dels et, ‚Maria‛ ädetevof ed ägolof spido lü belem, lü zif in Yudän.
Äkömof ini dom ela ‚Zacharias‛ ed äglidof eli ‚Elisabeth‛.
Ven ‚Elisabeth‛ älilof glidoti ela ‚Maria‛, cilil in bälid ofik älöbunom, ed ‚Elisabeth‛ äfulikof me Saludalanal,
ed ävokädof ko vög loadik: «Pebenedol bevü voms, e pebenedom cil in vüm olik.
Kiöpao jenos-li pö ob, das mot Söla obik kömof lü ob?
Ibä ekö! ven ton glidota olik ädranon ini lils obik, cilil in bälid obik älöbunom sekü fred.
Leläbof jiutan, kel elekredof, das utos, kelos pesagon lü of nemü Söl, pofölon».
Tän ‚Maria‛ äsagof: «Lan obik glorükon Söli,
lanöf obik fredon in God: Beatükal obik;
bi edemom bapi jidünana okik. Ibä ekö! denu menäds valik obeatükons obi,
bi Nämädal edunom gretikosi pö ob. Nem omik binon saludik,
e miseri utans ojuitons, kels dredons omi de menäd jü menäd.
Ejonom nämi lama okik, espearükom utanis, kels pleidälons in ladäl oksik;
edetronom nämädanis, ed elöpükom donätanis.
Utanes, kels älabons faemi, elegivom bundano, e liegikanis emosedom me nams vagik.
Ekudilom Yisraeläni: hidünan okik, betikölo
utosi, kelosi esagom fates obsik, das ömiserom eli ‚Abraham‛ e posbinükäbefi omik laidüpio».
‚Maria‛ äblibof zao dü muls kil lä of ed ägegolof täno lü lom okik.
Ven pö ‚Elisabeth‛ tüp motama ikömon, ämotof soni.
Nilädans e röletans ofik, kels älelilons, miseri vio gretiki Söl ijonülom ofe, äfredons ko of.
E ven äkömons tü del jölid demü säprepüdam hicila, ävilons nemön omi, ma nem fata omik, eli ‚Zacharias‛.
Ab mot oma ägesagof: «Nö! ponemom ‚Ioannes‛.
Äsagons ofe: «Nek in famül olik dabinom, kel panemon so».
Ävinegons nu fati omik ad sagön, lio mutom panemön.
Äbegom penamaboedili, ed äpenom sui on: ‚Ioannes‛ binon nem omik. E valans ästunons.
Tän süpiko mud e lineg omiks älivikons, ed äspikom lobölo Godi.
E dred äfaneton nilädanis valik onsik. In belem lölik Yudäna dins valik et päbespikons.
Ed alan, kel älilon atosi, äkälälon osi ninälo, ed äsagon: «Kis cil at ovedom-li? ibä nam Söla äbinon i pö om».
Fat omik: ‚Zacharias‛ äfulikom me Saludalanal, ed äspikom profetölo:
Söl: God Yisraeläna palelobomöd. bi edemom pöpi okik, ed elelivükom oni!
Ekoedom löädön Sanali nämädik in dafamül ela ‚David‛: hidünan okik,
soäsä espikom vönao dub mud profetanas saludik okik.
Esavom obis se nämäd neflenas obsik, e se nams utanas valik, kels hetons obis;
emiserom büröletanis obsik, betikölo diateki saludik okik,
yuli, keli eyulom lo ‚Abraham‛: fat obsik, das ögivom obes garani,
das obs, se nams neflenas pulibüköls, okultobs nendredo omi,
relöfo e gido laidüpio lo om.
Ed ol, o cil obik! ponemol profetan Mulöpala; bi obügolol bü Söl ad kulön ome vegi,
ad gevön pöpe omik sevi dabena dub pard sinodas onik,
dub miser Goda, dub kel lit xänöl ostralon löpao love obs,
ad litastralön sui utans, kels binons in dag e jad deada, ad dugön futis obsik lü veg püda».
Cil äglofom, ed ädagetom lanöfi nämik; äblibom in däsärt, jüs ädajonom oki Yisraeläne.

KAPIT: II

Ün tim et nu büd fa lampör: ‚Augustus‛ pänotükon, das volanef sevädik lölik ämuton paregistarön.
Atos äbinon registaram balid; äjenon, ven ‚Quirinus‛ äbinom guveran Suriyäna.
E valans ädetevons ad paregistarön; alan lü zif lönik okik.
I ‚Ioseph‛ ädetevom se Galileyän, se zif ‚Nazareth‛, lü Yudän, lü zif di ‚David‛, kel panemon ‚Bethlehem‛, bi älicinom se dafamül ä tribüt ela ‚David‛,
ad paregistarön ko el ‚Maria‛: jimatirajanan okik, kel ägrodof.
Ven äbinons us, tüp, tü kel ömotof, äkömon.
Ämotof balidsoni okik, ävilupülof omi ini flabs, ed äseitof omi ini krib; bi in lulotidöp pro ons plad no ädabinon.
Ün neit et in topäd et nu galedans anik äbinoms su fel, ed ägalädoms demü jep omsik.
Ed ekö! silanan Söla ästanom lä oms, e glor Söla ästralon love oms, sodas dred gretik äfaneton omis.
Ab silanan äsagom omes: «No dredolsöd! ibä ekö! lenunob oles fredi gretik, kel jonidon pro pöp lölik;
ibä adelo pro ols in zif di ‚David‛ Sanal pemotom, sevabo Kristus: Söl.
Osevols omi dub atos: otuvols cili, kel pevilupülom ini flabs, e seatom in krib».
E süpo lä silanan lemödot milita sülik äbinon, kel älobon Godi ed äsagon:
«Stim binonöd löpo lü God, e püd su taled; leplüd in menef»!
E ven silanans idegoloms de oms lü sül, galedans äsagoms odes: «Golobsös lü ‚Bethlehem‛, e logobsös utosi, kelos ejenon, kelosi Söl elenunom obes»!
Tän ägoloms spido usio, ed ätuvoms eli ‚Maria‛, eli ‚Ioseph‛ e cili in krib äseatöli.
E ven älogoms omi, äkonoms utosi, kelos pisagon omes tefü cil at.
E valans, kels älilons atosi, ästunoms dö utos, kelosi galedans äsagoms ones.
‚Maria‛ ämemidof vödis valik et, ed ävätälof onis ninälo.
Galedans ägegoloms, älobölo ed älelobölo Godi, demü alutos, kelosi ililoms ed ilogoms, soäsä atos pilenunon omes.
Ven del jölid, tü kel pösäprepüdom, ikömon, ägetom nemi: Yesus, kel pigivon ome fa silanan, büä idavedom in motavüm.
E ven klinikamadels onsik ipasetikons ma lonem ela ‚Moyses‛, äblinons omi lü ‚Hierusalem‛, ad dajonön omi Söle,
soäsä pelonos in lonem Söla: ‚Alutan manik kel maifükom motavümi, ponemom saludik lo Söl‛,
ed i ad sakrifön utosi, kelos pebüdülom in lonem Söla: pär turturapijunas, u pijunüls tel.
Ed ekö! in ‚Hierusalem‛ man äbinom, kela nem äbinon: ‚Simeon‛; man at äbinom ritik ä relöfik, ed äspetom trodami Yisraeläna; e Saludalanal äbinom pö om.
Dub Saludalanal nu igetom dasevädükami, das no ölogom deadi, büä ülogom Leüledäbi Söla.
Dub Lanal äkömom ini tem, e ven pals änüblinons cili: Yesus, ad dunön ko om ma kösömot dub lonem pibüdülöl,
äsumom omi ini brads okik, ed älobom Godi äsagölo:
«Nu leadol mogolön hidünani olik, o Söl! in püd ma vöd olik;
ibä logs obik elogons dabeni olik,
keli eblümükol lo nets valik:
lit ad dasevädükam paganes ed ad glorükam pöpa olik Yisraeläna».
E ‚Ioseph‛ e mot omik ästunons dö utos, kelos pisagon tefü om.
‚Simeon‛ äbenedom omi, ed äsagom lü ‚Maria‛: mot cila: «Ekö! atan jonidom ad fal e dönulifikam mödikanas in Yisraelän, ed ad mal, kel ponoädon,
si! i da lan olik gläv odaikon, dat se ladäls mödikanas tikods osevädikons».
Us i jiprofetan: ‚Anna‛ ädabinof, daut ela ‚Phanuel‛ se dafamül ‚Aser‛. Äbinof ya bäldik, ed ilifof de virg okik ko himatan okik dü yels vel,
ed iblebof nu jiviudan jü yel jöldegfolid okik. No älüvof temi, kö äkultof Godi me cun e plek dü del e neit.
Tü düp ot änilikof, älekoefof leigo lo Söl, ed äspikof dö cil lü valans, kels äspetons libükami ela ‚Hierusalem‛.
Posä iledunons vali ma lonem Söla, ägegolons lü Galileyän, lü zif onsik ‚Nazareth‛.
Cil nu ädaglofom, ed ävedom nämik ä go sapik, e benäd Goda äbinon pö om.
Pals omik ätevons alyeliko demü zäl pajada lü ‚Hierusalem‛.
Ven ivedom bäldotik mö yels degtel, ed itevons ma kösömot zäla lü ‚Hierusalem‛,
iblibons us jü fin zäladelas; pö gegol onas, cil: Yesus ipoblibom in ‚Hierusalem‛. ‚Ioseph‛ e mot omik no äsevons atosi.
Äcedölo, das äbinom lä tevanef, älaitevons dü del bal, ed äsukons täno omi bevü röletans e sevädans oksiks.
Ven no ätuvons omi, ägegolons dönu lü ‚Hierusalem‛ ad sukön omi.
Pos dels kil ätuvons in tem omi äseadöl zänodü tidals, ädalilöli omis, ed omes äsäköli.
E valans, kels äliloms omi, äbluvoms dö dasev omik e gespikots omik.
Ven älogons omi, ästunikons vemo, e mot omik äsagof ome: «O cil! Kikodo eblinädol-li obes atosi? Fat olik ed ob esukobs dredo oli».
Ab äsagom ones: «Lio ekanols-li sukön obi? No äsevols-li, das ämutob binön in dom Fata obik»?
Ab no äsuemons utosi, kelosi äsagom ones.
Äkegolom ko ons lü ‚Nazareth‛ ed äbinom sumätälik kol ons. Mot omik ämemidof in ladäl okik sagodis valik et.
E Yesus äprogedom in sap, in daül, ed in benäd lä God e mens.

KAPIT: III

Ün yel deglulid reiga lampöra: ‚Tiberius‛, ven ‚Pontius Pilatus‛ äbinom guveran Yudäna, e ‚Herodes‛ folplinan Galileyäna, e blod omik: ‚Philippus‛ folplinan topädas di ‚Ituraea‛ e di ‚Trachonitis‛, e ‚Lysanias‛ folplinan topäda di ‚Abilene‛,
timü dalekultans ‚Annas‛ e ‚Caiphas‛, vöd Goda äkömon lü ‚Ioannes‛: son ela ‚Zacharias‛ in däsärt.
Tän ägolom ad predön in topäd lölik di ‚Iordanis‛ blunedi lecena ad dagetön pardi sinodas,
soäsä pepenos in penäd ela ‚Isaias‛: ‚In däsärt vög balana otonon: Blümükolsöd vegi pro Söl! kamükolsöd vegis omik!
Gur alik pofulükon; bel e lubel aliks ponivädons; luvegs krugik postedükons, e vegs nesmufik posmufükons,
e menef lölik ologon benädi Goda‛.
Äsagom täno menamödotes, kels äsegolons ad pablunedön fa om: «O luvipärem! kin esevädükon-li oles, das öskeapols de cödetam lätik?
Pololsöd täno flukis, kels pötons lä lecen, e no primolsöd ad sagön ninälo: Labobs eli ‚Abraham‛ as fat! Ibä sagob oles, das God kanom davedükön se stons at cilis ele ‚Abraham‛.
Cüd ya seaton lä vul bimas, klu bim alik, kel no polon fluki gudik, podocöpon e pojedon ini fil».
Tän menamödots äsäkons ome: «Kisi mutobs-li täno dunön»?
Ägespikom ones: «Utan, kel labon niklotis tel, kegivonöd de ats utane, kel no labon onis, ed utan, kel labon zibi, dunonöd leigo»!
I tolädans äkömoms ad pablunedön, ed äsagoms ome: «O mastan! kisi mutobs-li dunön»?
Äsagom omes: «No flagedolsöd mödikumosi, ka ut, kel pelonon»!
I soldats äsäkoms ome: «Ed obs-li, kisi mutobs-li dunön»? Ägesagom omes: «Böladolsöd neki, kusadolsöd neki dobiko, e kotenolsöd ko soldatamesed olsik»!
Ven nu pöp äspetäton, e valans ävätälons ninälo, va el ‚Ioannes‛ bo no äbinom-la Kristus,
‚Ioannes‛ ägespikom valanes: «Blumedob fe olis me vat, ab balan okömom, kel binom nämädikum ka ob, kela küiredis sandalas omik no digädob ad livükön. Oblunedom olis me Saludalanal e me fil.
Viän binon in nam omik, oklinükom cepagluni oka, obarakom greni ini grenabarak okik, ofilükom lebräni me fil nekvänovik».
So nog ko meibs votik mödik älenunom pöpe gospuli.
Ab ven folplinan ‚Herodes‛ päblamom fa om demü el ‚Herodias‛: jimatan bloda omik, e demü dins badik votik valik, kelis ‚Herodes‛ idunom,
äläükom lä ats nog atosi, das äfanäbükom eli ‚Ioannes‛.
Ven nu menamödot lölik, ed i Yesus, päblunedons, äjenos, das sül ämaifikon,
e Saludalanal änexänon in maged kopik, as pijun, sui om, du se sül vög ätonon: «Binol son fa ob pelöföl, leplüdob oli».
Yesus at, nu älabom, ven äbitikom, bäldoti yelas zao kildegas, ed äbinom, soäsa cedoy, son de ‚Ioseph‛: son de ‚Eli‛,
son de ‚Mathat‛, son de ‚Levi‛, son de ‚Melchi‛, son de ‚Ianne‛, son de ‚Ioseph‛,
son de ‚Mathathias‛, son de ‚Amos‛, son de ‚Nahum‛, son de ‚Esli‛, son de ‚Nagga‛,
son de ‚Mahath‛, son de ‚Mathathias‛, son de ‚Semei‛, son de ‚Ioseph‛, son de ‚Iuda‛,
son de ‚Ioanna‛, son de ‚Resa‛, son de ‚Zorobabel‛, son de ‚Salathiel‛, son de ‚Neri‛,
son de ‚Melchi‛, son de ‚Addi‛, son de ‚Cosan‛, son de ‚Elmadan‛, son de ‚Her‛,
son de ‚Iesus‛, son de ‚Eliezer‛, son de ‚Iorim‛, son de ‚Mathat‛, son de ‚Levi‛,
son de ‚Simeon‛, son de ‚Iuda‛, son de ‚Ioseph‛, son de ‚Iona‛, son de ‚Eliacim‛,
son de ‚Melea‛, son de ‚Menna‛, son de ‚Mathatha‛, son de ‚Nathan‛, son de ‚David‛,
son de ‚Isai‛, son de ‚Obed‛, son de ‚Booz‛, son de ‚Salmon‛, son de ‚Naasson‛,
son de ‚Aminadab‛, son de ‚Aram‛, son de ‚Esron‛, son de ‚Phares‛, son de ‚Iuda‛,
son de ‚Iacob‛, son de ‚Isaac‛, son de ‚Abraham‛, son de ‚Thare‛, son de ‚Nachor‛,
son de ‚Sarug‛, son de ‚Reu‛, son de ‚Phaleg‛, son de ‚Heber‛, son de ‚Sale‛,
son de ‚Cainan‛, son de ‚Arphaxad‛, son de ‚Sem‛, son de ‚Noa‛, son de ‚Lamech‛,
son de ‚Mathusala‛, son de ‚Henoch‛, son de ‚Iared‛, son de ‚Malaleel‛, son de ‚Cainan‛,
son de ‚Enos‛, son de ‚Seth‛, son de ‚Adam‛, son Goda.

KAPIT: IV

Yesus fulik de Saludalanal ädegolom de ‚Iordanis‛ e pädugom fa Lanal lü däsärt,
kö päblufodom dü dels foldeg fa diab. Äfidom ün dels et nosi, e posä ats ipasetikons, äfaemom fino.
Tän diab äsagom ome: «If binol Son Goda, sagolöd stone at ad vedön bod»!
Ab Yesus ägespikom ome: «Epenoy: ‚Das men no olifon te de bod, ab de vöds valik Goda‛».
Pos atos diab ädugom omi lü bel geilik, ed äjonom ome ünü timül regänis valik vola.
E diab äsagom ome: «Ogivob ole nämädi lölöfik dö ats valik e glori onas; ibä atos pelegivon obe, e givob oni utane, kele vilob.
If leplekol obi, ats valik oledutons lü ol».
Ab Yesus ägespikom ome: «Epenoy: ‚Oleplekolöd Söli: God ola, e te omi okultolöd‛»!
Tän äblinom omi lü ‚Hierusalem‛, ed äpladom omi sui kren tema, ed äsagom ome: «If binol Son Goda, stürolöd oli täno isao donio!
ibä epenoy: «das okomandom omi silananes okik ad jelön oli,
e das opoloms oli su nams, dat no joikol futi olik ta ston‛».
Ab Yesus ägespikom ome: «Esagoy: ‚No sötol blufodön Söli: God ola‛»!
Ven diab ifigebom blufodis valik, älüvom omi büfiko.
Yesus ägegolom sekü näm Lanala lü Galileyän; e sagäd tefü om äpakon oki love züamöp lölik.
Älejonom in sünagogs omsik, e pälelobom fa valans.
Seimna äkömom ini ‚Nazareth‛, kö pidugälom, e ma kösöm okik ägolom tü jabatadel lü sünagog. Älöädom ad komoreidön,
buk de profetan: ‚Isaias‛ päblinon ome, ämaipadom oni, ätuvom topi, kö pipenos:
‚Lanal Söla binon pö ob, sekü atos eleüledom obi ad blinön gospuli pöfikanes, elesedom obi ad sanön utanis, kelas ladäl ebrekon,
ad lenunön fanäbes libükami, bleinanes dönulogami, ad givön libi utanes, kels petroivons, ad predön yeli plidik Söla‛.
Posä ifärmükom buki, ed igegivom oni hidünane, äseadikom, e logs valanas in sünagog älüodons lü om.
Nu äprimom ad sagön omes: «Adelo vöd biba, keli elilols, pefölon».
Valans älobülons omi, ed ästunölo dö vöds löfidik, kels äkömons se mud omik, äsagons: «No binom-li son ela ‚Ioseph‛»?
Ed äsagom omes: «Nendoto osagols obe: O sanan! sanolöd oli it! Utosi valik, kelos ma sagäd ejenon in ‚Capharnaum‛, dunolöd i in lomazif olik»!
Ab äsagom: «Vö! sagob oles, das profetan no binom plitik in lomän oka.
E sagob oles verato, das jiviudans mödik ädabinofs timü ‚Elias‛ in Yisraelän, ven sil äfärmon dü yels kil e muls mäl, sodas faemaditret gretik ädavedon su taled lölik;
e lü nek ofas ‚Elias‛ pälesedom, ab sio lü jiviudan in ‚Sarephtha‛ in topäd ela ‚Sidon‛.
Timü profetan: ‚Elisa‛ lepradans mödik ädabinons in Yisraelän, e nek onas päklinükons, ab sio Süriyänan: ‚Naaman‛».
E valans in sünagog äzunikons, ven älilons atosi.
Älöädons, äjedons omi se zif, ed ädugons omi lü siem bela, su kel zif onsik pibumon, ad dejedön omi de at.
Ab ämogolom zänodo da ons.
Ven ikömom ini ‚Capharnaum‛: zif Galileyäna, ätidom onis ün jabatadels,
ed äbluvons dö lejon omik, ibä äspikom ko nämät.
Seimna in sünagog men äbinon, kel älabon milanani neklinik, ed äluvokädom me vög laodik:
«Ha- Sekü kis mutobs-li demön oli? O Yesus di ‚Nazareth‛! Kömol-li ad päridükön obis? Sevob, kim binol: Saludan Goda»!
Yesus äblamom omi, ed äsagom: «Seilolöd e segololöd se om»! e diab äjedom omi ini zänod menas, ed ägolom se om, nes dämükön omi.
Stun äfaneton valanis, ed äsagons odes: «Kis vöd at binon-li, me kel büdom ko nämät e näm so mödiks milanane ad segolön»?
E sagäd tefü om ästäänikon lü tops valik züamöpa.
Nu älüvom sünagogi ed äkömom ini dom ela ‚Simon‛. Lümot ela ‚Simon‛ äsufof fifi vemik, ed äbegoy ome yufi pro of.
Äblegikom love of, ed äblamom fifi. Fif älüvon ofi, ed älöädof sunädo, ed äbötof omis.
Tüi solamadonikam valans äblinons malädanis oksik, kels äsufons malädis valasotik, lü om; äseitom nami okik sui balan pos votikan onas, ed äsanom onis.
I de mödikans milanans äsegolons luvokädölo: «Binol Son Goda»! Ab äproibom ones ad spikön, bi äsevons, das äbinom Kristus.
Ven idelikos, äsegolom ed ägolom lü top soalöfik. Menamödots äsukons omi, äkömons lä om ed ästöpädons omi, das no degolomös de ons!
Ab äsagom omes: «I zifanes votik mutob lenunön gospuli regäna Goda, bi ad dunön atosi pelesedob».
So äpredom kludo in sünagogs Galileyäna.‛PP ON

KAPIT: V

Seimna, ven menamödot ädränon omi, ad dalilön vödi Goda, äbinom len lak di ‚Genesareth‛.
Äloegom seatön nafis tel len jol laka; nafans igoloms se ons, ed älavüloms filätis.
Ägolom ini bal nafas, kel äduton lü ‚Simon‛, ed äbegom ome ad fagikön boso de jol. Äseidom oki sui naf, ed älejonom de us menamödoti.
Posä ifinükom spikädi okik, äsagom ele ‚Simon‛: «Fagikolöd de jol, e sädolöd filätis ad päskarön»!
‚Simon‛ ägesagom ome: «O Mastan! do evobobs töbido dü neit lölik, efanobs nosi; ab ad büd olik osejedob filätis».
E ven idunoms atosi, älöpiotiroms filätis me fits so mödiks fulikis, das filäts äsleatons.
Ävinegoms kompenanis okik in naf votik ad yufön omis. Atans äkömoms, ed äfulükoms nafis so vemo, das ats tio äsadons.
Ven ‚Simon Petrus‛ älogom atosi, ädofalom foi futs Yesusa, ed äsagom: «Mogololöd de ob! o Söl! ibä binob man sinik».
Ibä lejek ifaneton omi ed utanis, kels äbinoms ko om, demü lemöd fitas, kelis ifanoms.
Leigo elis ‚Iacobus‛ e ‚Ioannes‛: sons ela ‚Zebedaeus‛, kels i äbinoms bevü kompenans ela ‚Simon‛. E Yesus äsagom ele ‚Simon‛: «No dredolöd! denu obinol päskaran menas».
Tän äblinoms nafis leni jol, älüvoms vali ed äsökoms omi.
Ed ekö! ven ästebom in bal zifas et, man äbinom, kel äbinom löliko lepradik. Sosus älogom Yesusi, ädofalom lo om, ed älebegom: «O Söl! if vilol, kanol klinükön obi».
E Yesus ätenükom nami okik, ädoatom omi, ed äsagom: «Vilob osi, paklinükolöd»! E sunädo leprad ämoikon de om.
Yesus äproibom ome ad konön eke atosi, ab «dajonolöd oli kultane, e blinolöd sakrifoti demü klinikam olik, soäsä ‚Moyses‛ ebüdülom, as temunod omes».
Ab plüo sagäd tefü om ästäänikon, e menamödots mödik äkömons ad lilön omi, ed ad pasanön fa om de maläds oksik.
Äsoalükom oki ini soalöp ed äplekom.
Tü del seimik äjäfom me tidam, lä atos i äseadoms farisetans e bibinolavans, kels ikömoms se tops valik Galileyäna e Yudäna, e se ‚Hierusalem‛, e God igevom ome fägi ad sanön.
Ed ekö! mans anik äblinoms su bed meni, kel äbinom lemik. Ästeifoms ad nüblinön e seitön omi lo om.
Ven nu äküpoms, das sekü menamödot no äkanoms nüblinön omi, äxänoms sui nuf, ed äleadoms donikön omi su bedil vü teins zänodü mens foi Yesus.
Ven älogom lekredi omsik, äsagom: «O men! sinods olik pepardons ole».
E bibinolavans e farisetans äprimoms ad säkön ninälo: «Kim atan binom-li, kel sagom blasfämis somik? Kim fägom-li ad pardön sinodis, plä God»?
Ab Yesus, kel äküpom utosi, kelosi äbetikoms, ägesagom omes: «Kisi vätälols-li ninälo?
Kis binon-li fasilikum ad sagön: Sinods olik pepardons, ud ad sagön: Löädolsöd e gololöd?
Dat osevolsös, das Son mena labom nämädi ad pardön, (äsagom lü lemikan): Sagob ole: Löädolöd, lasumolöd bedili olik, e gololöd lü dom olik».
Sunädo älöädom lo valans, älasumom bedili, su kel iseatom, ed ägolom, lelobölo Godi, lü dom okik.
Valans älejekons, älelobons Godi, ed äsagons mu ädredölo: «Elogobs adelo dinis nekredovik».
Pos atos äsegolom seimna, ed äloegom seadön in tolädöp tolädani labü nem: ‚Levi‛; ed äsagom ome: «Sökolöd obi»!
Ed atan älüvom vali, älöädom, ed äsökom omi.
Tän ‚Levi‛ ämeikom in dom okik daifafidedi gretik pro om, pö kelos tolädans mödik e votikans i älenseatoms ko oms.
E farisetans e bibinolavans omsik ämuroms ed äsagoms tidäbes omik: «Sekü kis fidols-li e drinols-li ko tolädans e sinans»?
E Yesus ägesagom omes: «Utans, kels saunons, no neodons sanani, ab kels malädons.
No ekömob ad vokön ritanis, ab sinanis ad lecen».
Äsagoms ome: «Sekü kis tidäbs ela ‚Ioannes‛ cunoms-li suvo, e dunoms-li plekis, leigoäsä utans farisetanas; ab olikans fidoms e drinoms»?
Yesus ye äsagom omes: «No kanols ga koedön cunön matedizelanis, du higam binom lä ons!
Dels okömons, dü kels higam pumosumom, tän, ün dels et, ocunoms».
Tän äkonom omes parabi: «Nek odesleiton diledi se klot nulik, ed opladon oni sui klot bäldik, voto bo usleitom nuliki, e diled se klot nulik bo no pöton ad klot bäldik.
I nek gifon vini yunik ini saks bäldik, voto vin yunik sleiton sakis, on it omoflumon, e saks onosikons.
Ab vini yunik mutoy gifön ini saks nulik, e bofiks padakipons.
I nek, kel kösömon ad drinön vini bäldik, odesiron ad drinön yuniki; ibä osagon: Vin bäldik binon süperik».

KAPIT: VI

Ven ägolom ün jabat seimik da grenaläned, tidäbs omik äplökoms spigis, ädäröboms onis in nams oksik ed äfidoms onis.
Farisetans anik äsagoms omes: «Kikodo dunols-li us bosi, keli no dalols dunön ün jabats»?
E Yesus ägesagom omes: «No ereidols-li utosi, kelosi ‚David‛ ädunom, ven om ed omikans äfaemoms?
Vio ägolom ini dom Goda, äsumom jonetabodedis, äfidom de ons, ed ägivom onis kompenanes okik; do nek ädalon fidön de ons plä teiko kultans»?
Äsagom i omes: «Son mena binom Mastan jabata».
Ven tü jabat votik äkömom ini sünagog ed ätidom, us men ädabinom, kela nam detik omik äsigon,
e bibinolavans e farisetans älükoms, va ösanom tü jabat; ad tuvön kusadi ta om.
Ed äsevom utosi, kelosi ävätäloms ninälo, ed äsagom mane, kel älabom nami isigiköl: «Löädolöd e kömolöd ad stanön is in zänod»! Atan älöädom.
Tän Yesus äsagom omes: «Säkob oles: Pedälos-li ad benodunön u midunön tü jabat? ad dakipön u nosükön lifi-li»?
Ed älogedölo valanis, äsagom ome: «Tenükolöd nami olik»! Ädunom atosi, e nam änäton, leigoäsä votik.
Ed ävedoms go fopiks, ed äbespikoms ko ods, kisi kanomsöv dunön ta om.
Ün tim et ägolom seimna lü bel ad plekön, älifädom neiti lölik in plek lü God.
Ven idelikos, ävokom tidäbis okik, ed ävälom se oms degtelis, kelis änemom paostolanis:
Simon, keli i änemom eli ‚Petrus‛, e blod omik: ‚Andreas‛, ‚Iacobus‛ e ‚Ioannes‛, ‚Philippus‛ e ‚Bartholomaeus‛,
‚Matthaeus‛ e ‚Thomas‛, ‚Iacobus‛: son ela ‚Alphaeus‛ e ‚Simon‛ labü näinem: lezilan,
‚Iudas‛: son ela ‚Iacobus‛ e ‚Iudas‛: elan di ‚Kariot‛, kel evedom trätan.
Änexänom ko oms, ed äblibom su plen kobü trups mödik tidäbas e mödot gretik pöpa se Yudän lölik, se ‚Hierusalem‛ e se topäd jolik di ‚Tyrus‛ e ‚Sidon‛, kels ikömoms ad lilön omi ed ad pasanön de maläds oksik.
E ven utans, kels pitomons fa lanans neklinik, päsanons,
menamödot lölik ästeifon ad doatön omi, ibä näm äsegolon se om, ed äsanom valanis.
Älöükom logis okik, älüodükom onis lü tidäbs okik ed äsagom: «Beatiks ols: pöfikans binols, ibä regän Goda duton lü ols.
Beatiks ols binols, kels nu faemons, ibä posatükols. Beatiks ols binols, kels nu drenols, ibä osmilols.
Beatiks binols, if mens hetons olis, if lesoelükons e lunofons olis, e no vilons lilön nemis olsik, bi lecedons onis mifätikis, demü Son mena.
Ün tim et dalols löbunön fredo, bi mesed olsik obinon gretik in sül; ibä büröletans onsik ga edunons otosi profetanes.
Ab vi! lü ols: liegans, ibä egetols bläfodi olsik.
Vi! lü ols, kels nu satols, ibä ofaemols. Vi! lü ols, kels nu smilols, ibä olügols ed odrenols.
Vi! lü ols, if mens valik spikons gudiko tefü ols, ibä büröletans onsik edunons otosi tefü luprofetans.
Ab oles, kels lilols obi, sagob: Löfolsöd neflenis olsik; benodolsöd utanis, kels hetons olis;
benedolsöd utanis, kels maleditons olis; plekolsöd pro utans, kels tädons olis!
Lüflekolöd utane, kel flapon oli sui cüg olik, i votiki, e no neletolöd utane, kel mosumon mänedi olik, ad sumön i nikloti!
Givolöd alane uti, keli begon, e no geflagolöd uti, kel leduton lü ol, de utan, kel emosumon oni!
E soäsä vilols, das mens dunons oles, leigo, so dunolsöd ones!
Ed if löfols utanis, kels löfons olis, meritabi kinik atos labon-li? ga sio sinans löfons utanis, kels löfons onis.
Ed if benodols utanis, kels benodons olis, meritabi kinik atos labon-li? Sinans i dunons otosi.
Ed if prünols utanes, de kels spetols ad getön bosi, meritabi kinik atos labon-li? I sinans prünons ad gegetön leigikosi.
Nö! löfolsöd neflenis olsik, benodolsöd e prünolsöd, nes spetön ad gegetön bosi! Tän mesed olsik obinon gretik, ed obinols cils Mulöpala; ibä binom benädik kol nendanans e badans.
Binolsöd miseriks, soäsä Fat olsik binom miserik!
No cödetolsöd! tän i ols no pocödetols! No micödolsöd! tän i ols no pomicödols. Pardolsöd! tän i oles opardoy.
Givolsöd! tän i oles ogivoy: maf beno pefulüköl, pepedöl, pelemufüköl ä tufulik povagükon ini vüm olsik; ibä me maf, me kel mafols, omafoy i oles».
Äsagom omes parabi sököl: «Bleinan kanon-li dugön bleinani in veg? Bofikans no ofalons-li üfo ini sep?
Tidäb no pluon tefü tid okik, ab alutan, kel go epreparon oki, leigon ko tidan okik.
Liö! logol cipi, kel binon in log bloda olik, e no küpol bemi in log lönik olik!
Lio kanol-li sagön: O blod! dälolös obe, ad setirön cipi se log olik! du no logol bemi in log olik? O simulan! Setirolöd büikumo bemi se log olik! tän kanol logön ad setirön cipi se log bloda olik.
I no bim saunik dabinon, kel polon flukis malädik, ed i no bim malädik, kel polon flukis saunik.
Klu bim alik paseivon ma fluk lönik okik. De tils ga no plökoy figis, e de bramarubud no klopoy vitidabälis.
Men gudik süramenon se divöp gudik ladäle okik gudikosi, e men badik süramenon se divöp badik ladäle okik badikosi, ibä me kelos ladäl fulon, dö utos mud spikon.
E kikodo sagols-li lü ob: O Söl! o Söl! e no dunols utosi, kelosi sagob?
Alutan, kel kömon lü ob, e lilon vödis obik, e dunon ma ons, osagob oles, ko kin leigon.
Binon äsä men, kel äbumon domi, e äsebon, ed ai dibikumo äsebon, jüs äseiton stababumädi sui klif. Ven nu tuvatam äkömon, e flum äleflapon ta dom et, no äfägon ad koedön vakulön oni, bi pistabükon sui klif.
Ab utan, kel lilon, ab no dunon ma utos, kelosi lilon, binon äsä men, kel bumon domi sui glun nen stababumäd, e ta kel flum leflapon; sunädo dästuron, e failot gretik doma davedon».

KAPIT: VII

Posä Yesus ifisagom atosi valik lo pöp, ägolom lü ‚Capharnaum‛.
Hidünan malädik kapitena semik, keli ädigidom vemo, ägaonom.
Ven nu älilom dö Yesus, älesedom bäldikünanis yudanas lü om, ko beg ad kömön e sanön hidünani omik.
Ven atans ikömoms lä Yesus, äbegoms ome fefiko, sagölo: «Digädom, das dunol atosi ome,
ibä löfom pöpi obsik, ed om it ebüedom bumön sünagogi pro obs».
Yesus nu äkegolom ko oms. Ab ven ädabinom no fago de dom, kapiten älesedom flenis anik oka, ad sagön ome: «O Söl! no töbidolös! ibä no digädob, das kömol disi nuf obik.
Sekü atos i no ecedob obi it digädiki ad golön lä ol. Sagolös te vödi bal, e hidünan obik osaunikom.
Ibä i ob binob ek, kel pepladob sumätöfü votan, e labob sumätöfü ob soldatis. If sagob balane: Gololöd! tän golom; votane: Kömolöd! tän kömom; e hidünane: Dunolöd atosi! tän dunom osi».
Ven Yesus älilom vödis at, ästunom dö om, ed äflekölo oki lü menamödot, kel isökon omi, äsagom: «Sagob oles, igo in Yisraelän no etuvob lekredi so gretiki».
E ven lesedäbs ägekömoms ini dom, ätuvoms hidünani malädik isauniköli.
Brefüpo pos atos Yesus ägolom lü zif ‚Naim‛ penemöl, e tidäbs mödik oma e menamödot gretik äkegolons ko om.
Ven änilikom nilü leyan zifa, äsepoloy ebo ideadölani, soni balik mota omik; äbinof jiviudan; mödot gretik zifanefa ädugädon ofi.
Ven Söl älogom ofi, kelied daladöfik äsüikom pö om, ed äsagom ofe: «No drenolöd!».
Ed änilikölo, ädoatom sarki, polans ästopoms, ed äsagom: «O hiyunan! sagob ole, galikolöd!‛
Tän ideadölan älöädom ed äprimom ad spikön, ed ägivom omi mote omik.
Dred äfaneton valanis; äglorükons Godi, ed äsagons: «Profetan gretik esüikom bevü obs! e God eküpälom ad pöp okik»!
E sagod utosa, kelosi ädunom, äpakon oki in Yudän lölik, e valöpo in züamöp.
Tidäbs ela ‚Ioannes‛ änunoms ome atosi valik.
Tän ‚Ioannes‛ ävokom telanis tidäbas okik, ed älesedom omis lü Söl ko säk: «Binol-li utan, kel ökömom, u mutobs-li stebedön votani»?
Ven mans et ikömoms lä om, äsagoms: «‚Ioannes‛: blunedan lesedom obis ko säk: Binol-li utan, kel ökömom, u mutobs-li stebedön votani»?
Ün düp et äsanom mödikanis de maläds, de döfs, e de milanans, ed ägevom bleinanes mödik juiti logama.
Ägesagom omes: «Nunolsöd ele ‚Ioannes‛ utosi, kelosi elogols ed elilols: bleinans logons dönu, lemikans golons, lepradans paklinükons, sudans lilons, deadans palelifükons, pöfans getons gospuli.
Beatik utan binon, kel no skanon dö ob».
Posä nunans ela ‚Ioannes‛ idegoloms, äprimom ad spikön menamödotes dö ‚Ioannes‛: «Ad logön kisi egolols-li ini däsärt? Ridi-li mo e ge pemuföli dub vien?
Ad logön kisi egolols-li? Meni-li me klots deköfik pedeköli? Ekö! utans, kels lifons in klots feinik e lüxüödiks, binons in ledoms.
Ab ad logön kisi egolols-li? Profetani-li? Si! sagob oles: Binom igo gretikum ka profetan.
Binom utan, dö kel pepenos in penäd profetanas: «Ekö! lesedob bü ol nunani obik ad preparön ole vegi‛.
Sagob oles, bevü utans, kels pemotoms fa voms, nek binom profetan gretikum, ka ‚Ioannes‛: blunedan; ab pülikünan in regän Goda binon gretikum ka om».
Pöp lölik, kel älilon atosi, e tolädans ädasevons, das God ägidetom, bi piblunedons me bluned ela ‚Ioannes‛,
ab farisetans e bibinolavans änedemoms konsäli Goda tefü ons, bi no ikoedoms blunedön okis fa om.
«Ko kin oleigodob menis menäda et? ed ad kins sümons-li?
Sümons ad cils, kels seadons su maket, e lüvokädons odes: Eflutobs oles, ab no edanüdols; eviobs pro ols, ab no edrenols.
Ibä ven ‚Ioannes‛: blunedan äkömom, e no äfidom bodi, e no ädrinom vini, äsagols: Diabäbom.
Ven Son mena äkömom, ed äfidom ed ädrinom, äsagols: Ekö! lufidan ä ludrinan, flen tolädanas e sinanas!
E sap pegidükon fa cils valik okik.
Ven seimna farisetan ivüdom omi, ad fidädön, äkömom ini dom farisetana ed älenseatom.
Ed ekö! vom, kel äsevädof in zif as jisinan, e kel ilelilof, das äbinom len fidatab farisetana, äkömof ko fladil laabatik ko benosmelaleül,
äpladof oki drenölo poi om lä futs omik, äprimof ad luimöfükön futis omik me drens okik, äsägükof onis me hers kapa okik, äkidof onis, ed äleüledof onis me benosmelaleül.
Ven farisetan, kel ivüdom omi, älogom atosi, äsagom ninälo: «If atan binomöv profetan, tän sevomöv men kifik ä kisotik vom et, kel doatof omi, binof, ibä binof jisinan».
E Yesus äsagom as gespik ome: «O Simon‛! mutob sagön ole bosi». Äsagom: «Sagolös osi! o Mastan»!
«Moniprünan semik älabom debanis tel: balan ädebom ome dinaris lultum, e votan luldegi.
Ven no äfägoms ad gepelön ome debis, ästiamom omes onis. Sagolöd obe: Kim omas olöfom omi mödiküno»?
‚Simon‛ ägespikom: «Cedob: utan, kele estiamom mödikünosi. Äsagom ome: «Ecödol so gideto».
Tän äflekom oki lü vom, ed äsagom ele ‚Simon‛: «Logol-li vomi et? Äkömob ini dom olik, no egifol vati sui futs obik, ab of eluimöfükof me drens okik futis obik, ed äsägükof onis me hers okik.
No ägivol obe kidi, ab of de timül nügola ofik ekidof nenropo futis obik.
No äleüledol kapi obik me leül, ab of äleüledof futis obik me benosmelaleül.
Sekü atos, sagob ole, sinods mödik ofik pepardons ofe, bi elelöfof mödiko; kele papardos nemödiko, utan löfom nemödiko».
Ed ofe äsagom: «Sinods olik pepardons ole».
E fidädakompenans äprimoms ad sagön ninälo: «Kim atan binom-li, kel igo pardom sinodis»?
Äsagom vome: «Lekred esavon oli. Gololöd in püd»!

KAPIT: VIII

Ven ätävom pos atos de zif e vilag bal lü votik, predölo e lenunölo gospuli regäna Goda, ädugädoms omi degtelans,
e voms anik, kels pisanofs de milanans e maläds: ‚Maria‛ penemöl: jielan di ‚Magdala‛, se kel milanans vel pisejedons,
‚Ioanna‛: jimatan ela ‚Chusa‛: guvan ela ‚Herodes‛, ‚Susanna‛ e jivotans mödik; jiatans äkälofs omis me dalabots lönik okas.
Ven menamödot gretik ikobikon, e mens se tops valasotik ikömons lü om, äspikom in parab.
«Sovan äsegolom ad sovön sidi okik. Ven äsovom, dil äfalon sui veg, e pädästepon, e böds lutema äfidons oni.
Dil votik äfalon sui klif, e ven äsproton, äsigikon, bi no älabon flumoti.
Dil votik äfalon zänodü tils, e tils, kels ädaglofikons leigüpiko, äteifons oni.
Dil votik äfalon sui tail gudik, ädaglofon ed ägivon prodi tumnaik. Täno äsevokom: «Kel labon lilis ad lilön, utan lilonöd»!
Tidäbs omik äsäkoms ome, kisi parab at ga äsinifon.
Äsagom: «Oles pegevos ad suemön müsteris regäna Goda. Lü votans spikob in parabs, ‚dat logölo no logons, e lilölo no suemons‛.
Sinif paraba nu binon atos: Sid binon vöd Goda.
Ut, kel falon sui veg, tefon menis, kels lilons oni, e täno diab kömom, e mosumom vödi se ladäl onsik, dat no posavons dub lekred onsik.
Ut, kel falon sui klif, tefon utanis, kels, ven lilons vödi, lüsumons fredo oni, ab bi no labons vulis, lekredons oni te dü tim semik, e zedons oni ün tim blufoda.
Ut, kel falon ini tils, tefon utanis, kels lilons oni, ab lailifölo, pateifons sekü kuds, lieg e juits lifa, e no daseivons oni.
Ut, kel falon sui tail gudik, tefon utanis, kels lilons vödi, e dakipons oni in ladäl klinik gudik oksik, e flukons in laidäl.
Nek filidon lampadi, e tegon oni me gef, u pladon oni disi bed, ab pladon oni sui litikipian, dat utans, kels nükömons logons liti.
Ibä nos peklänedon, kel no onotikon, nos klänik, kel no posäklänädon ed osevädikon.
Küpolsöd kludo, vio lilols; ibä, kel dalabon, utane pogivos, e kel no dalabon, utos, tefü kelos cedon, das dalabon, pomosumon de on».
Seimna mot e blods omiks äkömons lü om, e no äkanons rivön omi dub menamödot.
Änunoy ome: «Mot e blods olik stanons plödo, vilons logön oli».
Ab ägesagom ones: «Mot e blods obiks utans binons, kels lilons vödi Goda, e dunons ma on».
Tü bal delas et, äboidom oki ko tidäbs okik ini naf, ed äsagom omes: «Lovenafobsöd! Ädenafoms,
e dü nafam äslipikom. Ab su lak tep süpik äsüikon, sodas naf äfulikon me vat, ed äreafoms ini ditret.
Äkömoms lü om, ägalükoms omi, ed äsagoms: «O Mastan! Mastan! päridikobs». Ägalikom, ed äleblamom vieni e vefaflapis vata, ed ätakikons, ed ävedos stilik.
Tän äsagom omes: «Kiöpo lekred olsik binon-li»? Ab ädredikoms, ed ästunikoms, ed äsagoms odes: «Kim atan ga binom-li, das igo büdom vienis e vati, ed ons lobedons omi»?
So änafoms lü län elanas di ‚Gadara‛, visü Galileyän.
Ven ästepom sui jol, se zif äkosgolom omi man, kel ädiabäbom dü lunüp. No äpolom klotis, e no ästebom in dom, ab in sepüls.
Ven atan älogom Yesusi, ädofalom foi om, ed äluvokädom lelaodiko: «Demü kis mutob-li jäfikön me ol? o Yesus! Son Goda mulöpikün! Lebegob ole, no tomolös obi»!
Ibä ibüdom milanani ad segolön se man. (Ibä atan igleipon suvo omi; tän demü sef, päjänom e päjänädom; ab ädäbreikom jänädis, e pämofom fa diab lü däsärts).
Yesus äsäkom ome: «Lio panemol-li»? Äsagom: «Legion; ibä diabs mödik inügoloms ini om.
Älebegoms ome ad no büdön omis ad golön ini gufur.
Nu us jep gretik svinas ädabinon, kels äyebidons su bel. Ädälom osi omes.
Ab ven diabs äsegoloms se men et, ed äninikons ini svins, jep äjutedon ve jol skapik ini lak ed änoyon.
Ven galedans älogoms utosi, kelos äjenon, äfugons, ed äkonoms osi in zif e züamöp.
Mens nu äsegolons ad logön utosi, kelos ijenon, e ven ikömons lä Yesus, ed älogons, das men, se kel diabs isegoloms, piklotom, älabom tikäli nätik, ed äseadom len futs Yesusa, ädredikons.
Logamatemunans äkonons ones, vio diabäb pisavom.
Tän pöp lölik läna elanas di ‚Gadara‛ äbegon ome ad mogolön, ibä dred vemik ifaneton onis. Pos atos äboidom oki ed ägevegom.
Man, se kel diabs isegoloms, äbegom ome ad dalön blibön lä om. Ab äleadom golön omi ed äsagom:
«Gegololöd lü dom olik, e konolöd utosi valik, keli God edunom ole»! So ägolom ad lenunön in zif utosi valik, kelosi Yesus idunom ome.
Pö geköm Yesusa, menamödot ägetedon omi; ibä valans ästebedons omi.
Ed ekö! man ‚Iairus‛ panemöl, kel äbinom löpal sünagoga, äkömom, ädofalom foi futs Yesusa, ed älebegom ome ad kömön ini dom omik,
ibä älabom dauti balik, kela bäldot äbinon yels zao degtel, e kel ädeadikof. Ven ägolom usio, menamödot ädränon omi.
E vom, kel äsufof dü yels degtel sekü bludaflum, kel zuo igebädof moni e getotis valik okik, e keli nek äfägom ad sanön,
änilikof, ed ädoatof pödao simi klota omik; e sunädo bludaflum äfinikon.
E Yesus äsagom: «Kin edoaton-li obi»? Ven valans änoons atosi, ‚Petrus‛ ed utans, kels äbinons lä om äsagons: «O Mastan! mens züons nabiko oli, e dränons oli; e sagol: Kin edoaton-li obi»?
Ab Yesus äsagom: «Ek edoaton obi, ibä eküpob, das näm äsegolon de ob».
Ven vom nu äküpof, das no iblebof klänedik, änilikof dremölo, ädofalof foi om, ed äkonof lo pöp lölik, sekü kod kinik idoatof omi, e vio isaunikof sunädo.
Äsagom ofe: «Binolöd fredöfik! o daut obik! lekred olik esavon oli. Degololöd in püd»!
Du nog äspikom, ek äkömom se dom löpala sünagoga, ed äsagom ome: «Daut olik edeadof. No töbolös Mastani»!
Yesus, kel älilom atosi, äsagom ye ome: «No dredolöd! Lekredolöd te! e posavof».
Ven ikömom lä dom, äleadom nügolön neki kobü ok, plä ‚Petrus‛, ‚Ioannes‛ e ‚Iacobus‛, e fat e mot jipula.
Valans ädrenons, ed älenoidons lügodo demü of. Ab äsagom: «No drenolsöd! no edeadof, ab slipof.
Äbesmilons omi, bi äsevons, das ideadof.
Posä imofom valanis plödio, ägleipom nami ofik, ed ävokädom: «O cil! löädolöd»!
Tän lanöf ofik ägekömon, ed älöädof sunädo. Pos atos äbüdom ad givön ofe bosi ad fidön.
Pals ofik äbluvons, ed äproibom ones ad konön eke utosi, kelos ijenon.

KAPIT: IX

Posä Yesus ikobovokom degtelanis, ägevom omes fägi e nämädi löpü milanans valik, ed ad sanön malädis.
Ed älesedom omis ad predön regäni Goda, ed ad saunükön malädanis.
Äsagom omes: «Kesumolsöd nosi dü vegam, ni stafi, ni tävasakädi, ni bodi, ni moni; i no labolsöd niklotis tel!
If kömols ini dom, blibolsöd us, e degolsöd usao!
Ed if no getedoy olis, delemufükolsöd, ven mogolols se zif, püfi de futs olsik as temunod ta ons»!
Tän ädetävoms ed ägoloms da vilags, du valöpo älenunoms gospuli, ed äsanoms malädanis.
Ven folplinan: ‚Herodes‛ älilom dinis valik at, äbluvikom, bi semans äsagons, das ‚Ioannes‛ ilelifikom se deadans;
votans, das ‚Elias‛ ipubom, e dönu votans, das balan profetanas vönädik ilelifikom.
‚Herodes‛ äsagom ninälo: «Ebüedob säkapön eli ‚Ioannes‛; kim üfo atan binom-li, dö kel lilob dinis valik at»? Sekü atos ästeifom ad logön omi.
Ven paostolans igekömoms, änunoms ome utosi valik, kelosi idunoms. Äkesumom omis, ed ädegolom soeliko ko oms lü zif ‚Bethsaida‛ penemöl.
Ab ven menamödot älelilon atosi, äsökon omi. Ägetedom onis, ed äspikom ones dö regän Goda, ed äsanom utanis, kels äneodons sani.
Ven ävedos soar, degtelans äsagoms ome: «Leadolös degolön menamödoti! Tän kanons golön lü vilags e tops züöls ad dagetön lotidi e viktuali, ibä binobs is in topäd soalöfik».
Ab äsagom omes: «Givolsöd ols it omes bosi ad fidön»! Äsagoms: «No labobs mödikumo ka bodedis lul e fitis tel; ud obs it mutobsöv remön zibi pro pöp valik et».
Ga mans zao lulmil ädabinoms. Äsagom tidäbes okik: «Koedolsöd seadön omis in grups pösodas luldeg»!
Ädunoms atosi, e mens valik äseidons okis.
Tän äsumom bodis lul e fitis tel, älöpiologom äl sül, äbenedom onis, äbreikom onis, ed ägivom onis tidäbes ad foseidön onis menamödote.
Äfidons, e valans päsatükons; utos, kelos piretükon, pälasumon, mö bäsets degtel breikotas.
Seimna ven äplekom soeliko, tidäbs äbinoms lä om. Äsäkom omes: «Kim, mens sagons-li, das binob»?
Ägespikoms: «‚Ioannes‛: blunedan; votans: ‚Elias‛, votans: das balan profetanas vönädik elelifikom».
Ed äsagom omes: «Ed ols, kim, sagols-li, das binob»? ‚Petrus‛ ägespikom: «Kristus Goda».
Äproibom japäliko omes ad sagön eke atosi.
«Ibä», äsagom, «Son mena omutom sufön mödiko, podeimön e podeidön fa bäldikünans, lekultans e bibinolavans, ed olelifikom tü del kilid».
Tän äsagom valanes: «Kel vilon slopön obi, utan noädonöd oki, lasumonöd aldeliko krodi okik, e sökonöd obi!
Ibä utan, kel vilon dakipön lifi okik, operon oni; ed utan, kel operon lifi okik demü ob, odakipon oni.
Ibä fruti kinik men labonöv-li, if gaenonöv voli lölik, e peronöv oki it, u padämükonöv?
Ibä, kel jemon demü ob e demü vöds obik, demü utan i Son mena ojemom, ven ukömom ini glor oka, ini ut Fata e silananas saludik.
E sagob oles verato: Anans utanas, kels binons is, no odeadons, büä ulogons regäni Goda».
Latikumo mö dels zao jöl, posä ispikom vödis at, äkesumom eli ‚Petrus‛, eli ‚Ioannes‛ ed eli ‚Iacobus‛, ed äbexänom beli ad plekön.
E ven äplekom, logod omik äcenodon, e klot omik ävedon nidiko vietik.
Ed ekö! mans tel äspikoms ko om; äbinoms ‚Moyses‛ ed ‚Elias‛,
kels äjonoms okis in glor, ed äspikoms ko om dö finikam, kel äspetidon pro om in ‚Hierusalem‛.
‚Petrus‛ e kekompenans omik nu pifanetoms dub slip vemik; ven ägalikoms, älogoms glori omik, e manis tel, kels äbinoms lä om.
E ven atans äleditoms de om, ‚Petrus‛ äsagom Yesuse: «O Mastan! binos gudik, das binobs is. Omeikobs tänedis kil, bali pro ol; bali pro ‚Moyses‛, e bali pro ‚Elias‛». No äsevom utosi, kelosi äsagom.
Du nog äspikom, lefog ädavedon, kel älovejadon omis. Tidäbs ädredikoms, ven älogoms, das änügoloms ini lefog.
E se lefog vög ätonom: «Atan binom Son palöföl obik. Dalilolsöd omi»!
Ven vög at ätonon, te Yesus iretom. Äbeseiloms jenoti, ed änunoms neke bosi utosa, kelosi ilogoms.
Ven änexänoms tü del sököl de bel, menamödot gretik äkosgolon omis,
e man se menamödot ävokädom: «O Mastan! lebegob ole, logolös lü son obik, binom cil balik obik.
Ekö! lanan gleipon omi, luvokädon süpiko, tiron omi mo e ge, sodas sköm kömon su mud omik, e töbo finikon ad tomön omi.
Ebegob tidäbes olik ad sejedön oni, ab no ekanoms dunön atosi».
E Yesus ägespikom: «O menäd nelekredik ed emivedöl! kilunüpo obinob-li nog lä ols, ed osufälob-li olis? Blinolöd soni olik isio»!
E du änilikom, milanan äsleiton omi, ed ätiron omi mo e ge. Ab Yesus äblamom oni, äsanom hipuli, ed ägivom omi dönu fate omik.
Valans äbluvikons dö mayed Goda. Ven nu valans ästunikons dö utos valik, kelosi ädunom, Yesus äsagom tidäbes okik:
«Memidolsöd gudiko atosi! ibä Son mena polovegivom ini nams menas».
No äsuemoms ye sagodi at, piklänedon pro oms, sodas no äsuemoms oni, ed äplafoms ad säkön ome dö at.
Seimna säkäd äsüikon pö oms, kim omas äbinom gretikün.
E Yesus, kel äsevom, kisi ävätäloms in ladäls oksik, äsumom cili, ed äpladom oni lä ok,
ed äsagom omes: «Kel ogetedon cili at nemü ob, utan getedon obi, ed utan, kel getedon obi, getedon Lesedani oba; ibä kel binon pülikün bevü ols valik, utan binon gretik».
Tän ‚Ioannes‛ ägespikom: «O Söl! elogobs eki, kel äsejedom milananis nemü ol, ed eproibobs ome atosi, bi no sökom oli kobü obs».
Ab Yesus äsagom: «No proibolsöd osi! ibä utan, kel no binon ta obs, binon pro obs».
Ven tim, kel ämuton pasetikön bü süliovegam oma, äpaseton tio, äsludom ad golön lü ‚Hierusalem‛.
Älesedom fo ok nunanis. Atans ädegoloms, ed äkömoms ini vilag Samaritänanas ad blümükön lotidi pro om.
Ab no ägetedoy omi, bi ätävom lü ‚Hierusalem‛.
Ven tidäbs ‚Iacobus‛ e ‚Ioannes‛ älogoms atosi, äsagoms: «O Söl! vilol-li, das sagobs, das fil odonikon de sil, ed onosükon onis, soäsä i el ‚Elias‛ edunom»?
Ab äflekom oki lü oms, ed äblamom omis: «No sevols lani kisotik labols,
ibä Son mena no ekömom ad päridükön lanis menas, ab ad savön onis». Ed ägoloms lü vilag votik.
Äjenos, ven ätävons, das dü vegam balan äsagom ome: «Osökob oli, alutöpio golol, o Söl»!
E Yesus äsagom ome: «Renars labons nimanästis, e böds sila nästis, ab Son mena no labom topi, sui kel kanom seitön kapi okik».
Votane äsagom: «Sökolöd obi»! Atan äsagom: «O Söl! Dälolös obe ad sepülön büikumo fati obik»!
Ab Yesus äsagom ome: «Leadolöd deadanis sepülön deadanis onsik! Ab gololöd ol ad predön regäni Goda»!
Dönu votan äsagom: «Osökob oli, o Söl! ab dälolös obe ad leditön de lomakompenans»!
Ome Yesus äsagom: «Ek, kel primon ad plaudön, e logon plödio, no pöton pro regän Goda».

KAPIT: X

Pos atos Söl äcälom nog veldeganis votik, ed älesedom omis a tel fo ok lü zif e top aliks, lü kels ävilom golön.
Äsagom omes: «Klopot binon sio gretik, ab num vobanas binon smalik, plekolsöd kludo Söle klopota ad lesedön vobanis pro klopot omik!
Degololsöd! Ekö! lesedob olis, äsä jipülis, zänodü lups.
No pololsöd ko ols böbi, ni tävasakädi, ni sandalis! Glidolsöd neki dü vegam!
If nütridols ini dom, sagolsöd bü val: Püd dabinonös in dom at!
If us man püda lödom, tän püd olsik odabinon lä om; if no, tän gekömon lü ols.
Blibolsöd in dom ot, fidolsöd e drinolsöd utis, kelis bötoy oles! ibä voban digädon mesedi okik. No gololsöd de dom bal lü votik!
If kömols ini zif, kö getedoy olis, fidolsöd uti, keli bötoy oles!
Sanolsöd malädanis, kels binons us, e sagolsöd ones: Regän Goda binon nilik.
Ab ven kömols ini zif, kö no getedoy olis, gololsöd lü piad ona, e sagolsöd:
I püfi zifa olik, kel klebon len futs obsik, delemufükobs ta ols; ab sevolsöd gudiko, regän Goda binon nilik!
Sagob oles, obinos pro lödans ela ‚Sodoma‛ sufovikum, ka pro zif et.
Vi! lü ol, o ‚Chorazin‛! vi! lü ol, o ‚Bethsaida‛! ibä if in ‚Tyrus‛ e ‚Sidon‛ milags ijenons, kels ejenons in zifs olsik, mens iseidonsöv okis ya lunüpo ini sak e zen, ed ilecenonsöv.
Obinos pro ‚Tyrus‛ e ‚Sidon‛ sufovikum pö Godacödetam, ka pro ols.
Ed ol, o ‚Capharnaum‛! kel petovälol ini sül, odoniovegol ini höl.
Kel dalilon olis, utan dalilon obi; kel deimon olis, utan deimon obi, e kel deimon obi, utan deimon utani, kel elesedom obi».
Fredo veldegans ägekömoms, ed äsagoms: «I milanans äsumätikons lü obs demü nem olik».
Äsagom omes: «Äloegob falön diabi äsä leklärastrali se sül.
Ekö! gevob oles nämädi ad stepön su sneks e skorpions, e tefü näm valik neflena; e no odämükons olis.
Ab no fredolsöd, das milanans sumätikons lü ols! Fredolsöd, das nems olas pepenetons in sül»!
Ün timül et Yesus äfredom in Lanäl Saludik ed äsagom: «Dasevob, o Fat: Söl süla e tala! das eklänädol dinis at sapanes e täläktanes, ed edasevädükol onis balugälanes. Si! o Fat! ibä so plid olik äbinon».
Ed äflekölo oki lü tidäbs äsagom: «Val pelovegivon obe fa Fat obik; e nek sevon, kim binom Son, plä Fat, e kim binom Fat plä Son ed utan, kele Son vilom sevädükön osi».
E täno äflekölo oki teiko lü tidäbs, äsagom: «Beatiks logs binons, kels logons utosi, keli logols!
Ibä, sagob oles, das profetans e regs mödiks eviloms logön utosi, kelosi elogols, ab no älogoms osi, e das eviloms lilön utosi, kelosi elilols, ab no äliloms osi».
Ekö! gitavan älöädom ad blufön omi; äsagom: «O Mastan! Kisi mutob-li dunön ad gerön lifi laidüpik»?
Ägespikom ome: «Kis pepenon-li in lonem? Kisi reidol-li us»?
Ägesagom: «Sötol löfön Söli: God olik go ladöfo, ko lan lölik olik, ko nämäd valik olik e täläkt valik olik, e nilikünani olik äsä oli it»!
Ed äsagom ome: «Egespikol verätiko. Dunolöd so, tän olifol»!
Ed atan, kel ävilom gidükön oki, äsagom Yesuse: «E kin binon-li nilikünan obik»?
Ad atos Yesus äsagom dönu: «Seimna ek ätävom de ‚Hierusalem‛ lü ‚Iericho‛, äreafom ini nams ravanas. Atans äberavoms omi, äflapoms omi vemo, e ven ämogoloms, äleadoms seatön omi tio deadiki.
Fädo kultan ävegom vei veg et; älogom omi, ab äbeigolom omi.
Sümo i levitan ädunom; äkömom sui top et, älogom omi, ab äbeigolom omi.
Ab Samaritänan, kel äbinom pö täv, äkömom usio, älogom omi, ed äkeliedikom.
Ägolom lü om, äflabülom vunis omik, ed ägifom leüli e vini ini ons. Ätovom omi sui monitanim lönik okik, ädugom omi lü lulotidöp, ed äkälom omi.
Ven ädegolom ün del fovik, äsumom denaris tel, ägivom onis lotidane ed äsagom ome: Käledolöd omi, ed uti, keli bo ugebädol pro om, ogegivob ole, ven gekömob.
Kim manas kil et nu, cedü ol, ebinom nilikünan utana, kel ireafom ini nams ravanas»?
Ägesagom: «Utan, kel ejonülom ome miseri». Yesus äsagom täno ome: «Gololöd e dunolöd sümo»!
Dü täv okik äkömom seimna ini vilag seimik. Us vom seimik pänemöl ‚Martha‛ ägetedof omi ini dom okik.
Jiatan älabof söri pänemöl: ‚Maria‛. Äseidof oki leni futs Söla, ed ädalilof vödis omik.
‚Martha‛ güo äjäfof ziliko me böt mödik; änilikof lä ons ed äsagof: «O Söl! no demol-li, das sör obik letof obe ad bötön? Sagolös üfo ofe ad yufön obi»!
Ab Yesus ägesagom ofe: «O ‚Martha‛! kudol e jäfol me dins valasotik;
te din bal zesüdon. ‚Maria‛ evälof dili verätikün, kel no podesumon de of».

KAPIT: XI

Seimna äjäfom me plekam, e ven äfinom, balan tidäbas omik äsagom ome: «O Söl! tidolös obes ad plekön, soäsä el ‚Ioannes‛ etidom tidäbes okik»!
Äsagom omes: «If plekols, sagolsöd täno: O Fat obas! kel binol in süls! Nem olik pasaludükonöd! Regän olik kömonöd! Vil olik jenonös, äsä in sül, i su tal!
Givolös obes aldeliko bodi aldelik obsik!
E pardolös obes sinodis obsik! ibä i obs pardobs utanes valik, kels edöbons kol obs. E no blufodolös obis, ab livükolös obis de bad»!
Äsagom i omes: «If ek olas labom hifleni, e golom zänodo ün neit lü om, e begom ome: O flen! prünolös obe bodedis kil!
ibä flen obik, kel äbinom pö täv, ekömom lä ob, e labob nosi ad bötön ome,
ogespikom-li täno ninao ome: No töbolöd obi! yan nu pefärmükon, e cils obik, leigoäsä ob, binons in bed. No kanob löädön ad givön onis ole.
Sagob oles, if no löädomöv e givomöv onis ome, bi binom flen omik, ga olöädom ad fölön begi miflagälik omik, e givön ome utosi, kelosi neodom.
So i ob sagob oles: Plekolsöd, ed ogivoy oles! Sukolsöd, ed otuvols! Nokolsöd, ed omaifükoy oles!
Ibä alan, kel plekon, ogeton; utan, kel sukon, otuvon; ed utane, kel nokon, omaifükoy.
Fat kimik bevü ols dabinom-li, kel ogivom sone okik stoni, if begom bodedi, ud ogivom ome sneki, if begom fiti?
Ud if begom nögi, ogivom-li ome skorpioni?
If üfo ols, kels binols mens sinik, sevols ad givön ciles olsik givotis gudik, plüo mödikumo Fat olsik ogivom Saludalanali utanes, kels plekons ome».
Seimna äsejedom milanani sudamüätik. E ven milanan pisejedon, sudamüätan äspikom, e menamödot ästunon.
Ab semans onas äsagons: «Medamü ‚Beelzebub‛: cif milananas sejedom milananis».
Votans äbegons, ad blufodön omi, mali se sül.
Om, äsevöl tikodis onsik, äsagom ones: «Regän alik, kel komipon ta ok it, podistukon, dom bal sturon sui votik.
So i if diab komipom ta ok it, lio üfo reigän omik obleibon-li dabinön? ibä ga sagols, das sejedob milananis dub ‚Beelzebub‛.
Ed if ob sejedob milananis dub ‚Beelzebub‛, dub kin üfo sons olsik sejedoms onis? Sekü atos atans obinoms cödals olas.
Ab if ob dub doat Goda sejedob milananis, tän regän Goda ya ekömon lü ols.
If man nämik pevaföl, galedom dalaboti okik, tän val, keli dalabom, dabinon in püd;
ab if balan, kel binom nämikum ka om, tatakom omi, e vikodom omi, tän odesumom ome vafemi, keli ekonfidom, ed odilom ravoti.
Utan, kel no binon ko ob, binon ta ob; e kel no kobükon ko ob, utan spearükon.
If lanan neklinik segolon se men, zitevon da topäds sigik ad sukön takädöpi, ed if no tuvon oni, sagon: Ogegolob lü dom obik, de kel esegolob.
If kömon us, tän tuvon oni pesvipöli ä peleodüköli.
Tän segolon ad kesumön ko ok lananis votik vel, kels binons badikums ka on; nükömons ini dom, e blibons us. So finod mena et vedon badikum ka ün prim».
Du so äspikom, vög voma se menamödot ätonon laodiko: «Beatik vüm binon, kel epolon oli, e beatiks dögs binons, len kels esugol».
Ab äsagom: «Lesi! beatiks utans binons, kels dalilons vödi Goda, e dakipons oni».
Ven pöp äkobikon draniko, äprimom ad sagön: «Menäd at binon menäd badik; sukon mali, e mal nonik pogivon one, ka mal ela ‚Ionas‛.
Ibä, soäsä ‚Ionas‛ äbinom mal pro elans di ‚Ninive‛, so Son mena obinom ut pro menäd at.
Jireg sulüdäna polelifükof pö cödetam lätik leigüpü mans menäda at, ed okoedof micödetön omis, ibä äkömof de finots taleda ad lilön sapi ela ‚Salomon‛; ed ekö! balan, kel binom gretikum ka ‚Salomon‛, binom is.
Mans di ‚Ninive‛ olelifikoms pö cödetam lätik leigüpü menäd at, ed okoedoms micödetön oni; ibä älecenoms ad predam ela ‚Ionas‛; ed ekö! balan, kel binom gretikum ka ‚Ionas‛, binom is.
Nek filidon lampadi e pladon oni ini top klänedik u disi grenimaf; ab pladon oni sui litikipian; dat valans, kels nükömons logons liti.
Log olik binon lampad koapa. If log olik binon saunik, tän koap lölik olik pelitükon, ab sosus binon nesaunik, koap olik binon in dag.
Kälolöd kludo, das lit ninälik olik no binon dag!
If täno koap olik pelitükon löliko, e no labon dili dagik anik, tän löl obinon so litik, leigo äsä lampad, kel litükon oli me strals okik».
Ven äspikom, farisetan ävüdom omi ad fidedön lä om. Änükömom, ed älenseitom oki.
Ven farisetan älogom atosi, ästunikom, das no ilavom büiko namis okik demü fided.
Ab Söl äsagom ome: «Ols: farisetans vo klinükols plödaflani köpa e bova; ab ninäl olsik fulon de labiäl e bad.
O fopans! utan, kel emekom plödaflani, no emekom-li i ninäli?
Givolsöd buikumo utosi, kelos binon in ols, asä givoti, tän val binon klinik pro ols!
Ab vi! lü ols, o farisetans! ibä givols degdilatripi de mäntaplan, de rutad e de härbats valasotik, ab nekälols gidi e löfi Goda. Sötoy dunön dinis at, e no nedunön etis.
Vi! lü ols, o farisetans! ibä löfols ad seadön su stimaseadöps in sünagogs, ed ad paglidön su makets.
Vi! lü ols, ibä sümols ad sepüls klänedik; mens golons love ons, nes sevön atosi».
Nu balan bibinolavanas äsagom ome: «O Mastan! Me utos, kelosi sagol, nofol i obis».
Äsagom: «Vi! i lü ols, o bibinolavans! ibä fledols menis me fleds töbo poloviks, nes ols it doatols me doat bal olas fledis et.
Vi! lü ols, ibä löbumols mebamalis profetanes, e büröletans olas edeidoms omis!
Dub atos temunols, das baivögols ko duns büröletanas olas: oms ädeidoms omis, ols bumols.
Sekü atos i sap Goda ätonon: Olesedob omes profetanis e paostolanis; e de oms odeidoms ananis, ed omomofoms votanis,
dat menäde at pavinditon blud profetanas valik, kel pespilon de stabükam levala,
de blud ela ‚Abel‛ jü blud ela ‚Zacharias‛, kel pedeidom vü latar e tabär. Si! sagob oles, povinditon menäde at.
Vi! lü ols, o bibinolavans! ibä emosumols kiki nola. Ols it no enügolols, ed utanis, kels änügolons, eneletols».
Ven äsagom dinis valik at omes, bibinolavans e farisetans äprimoms ad töbön vemo omi, ed ad dasäkön ome dinis valasotik,
älükölo ad lilön se mud omik bosi, demü kel ökanomsöv kusadön omi.

KAPIT: XII

Vüo, du degmilats menas äkobikons dranölo, sodas ästepons sui futs odik, äprimom ad sagön lü tidäbs okik: «Bü val prüdolsöd demü lefapest farisetanas, sevabo demü simul!
Ibä petegölos nonik dabinon, kel no posätegon, peklänedölos nonik, kel no posevon.
Klu alutos, kelosi sagols in dag, polilon in lit, ed utos, kelosi ninü privatacems spikols nelaodiko ini lil, polenunon de nufs.
Ab lü ols: flens obik sagob: No dredolsöd demü utans, kels deidons koapi, ab kels no kanons dunön mödikumosi!
Ojonob oles, demü kim mutols dredön. Dredolsöd demü utan, kel fägom, ven udeidom eki, ad jedön oni ini höl! Si! sagob oles, dredolsöd demü om!
No seloy-li späris lul tä fenigs tel? E no bal onas peglömon pö God.
Si! i hers valik kapa olsik penumons. No dredolsöd! völadols mödikumo ka spärs mödik.
Sagob oles: Alan kel lekoefon obi lo mens, oni Son mena olekoefom lo silanans Goda,
e kel noädon obi lo mens, utan ponoädon lo silanans Goda.
E ven ek sagon bosi ta Son mena, atos popardon one, ab kel slänon Saludalanali, utane atos no popardon.
Ven kludo pablinols in sünagogs lo cifodans e nämädans, no kudolsöd, vio ojelodols olis, u tefü utos, kelosi osagols!
ibä Saludalanal otidon oles utosi, kelosi mutols sagön».
Se menamödot ek äsagom ome: «O Mastan! Sagolös blode obik, das dilomöd geroti ko ob»!
Ab äsagom ome: «O men! Kim ecälom-li obi as cödal u dilan tefü ols»?
Tän äsagom ones: «Prüdolsöd e galedolsöd demü labiäl; ibä if laboyöv igo bundani, no laboy in at garani, das okanoyöv lifön de dalabots oka».
Äsagom ones parabi at: «Län liegana seimik iprodon klopi bundanik.
Tän ävätälom ninälo: Kisi odunob-li, ibä no labob spadi ad kipedön prodoti läna obik?
Ed äsagom: Atosi odunob. Odebreikob barakis obik, ed obumob gretikumis, tän oblinob ini ons greni valik e dinis gudik votik obik,
e sagob lü ob it: Labol nu dinis gudik mödik pekipedölis pro yels mödik, takädolöd, fidolöd, drinolöd, e fredolöd!
Ab God äsagom ome: o fopan! Ün neit at oflagoy lifi olik, ed uts, kelis edagetol, pro kin obinons-li?
So obinos pro utan, kel konleton divis pro ok it, e no binon liegik in dins Goda».
Tidäbes okik äsagom: «Demü atos sagob oles: no kudolsöd dö lif olsik, kisi ofidols; ni dö koap olsik, me kins oklotols olis!
Lif olsik völadon plu ka nulüdot, e koap plu ka klotem.
Küpolsöd rabis! no sovons, ni fodons; no labons stokacemi, ni baraki; e God nulüdom onis. Kio mödikumo völadols ka böds!
Kim olas ofägom-li me kud lüükön louni bal lunote okik?
If kludo no fägols ad duinön pülikünosi, sekü kis okudols-li üfo dö dins retik?
Küpedolsöd lelis, vio glofons! No töbidons, no spulons. Sagob oles, das igo ‚Salomon‛ in glor valik oka, no piklotom, äsä bal atas.
If nu God so dekom yebi, kel lifon adelo su län, e pojedon odelo ini furnod, vio mödikumo okälom täno olis, o smalalekredans!
Klu no säkolsöd kisi ofidols, kisi odrinols; no binolsöd dredäliks!
Ibä dinis valik at nets vola desirons. Fat olas sevom, das neodols dinis at.
Sukolsöd buikumo regäni Goda, e dins valik at olüdutons lü ols!
No dredolöd, o jep smalik! ibä binos plid Fata ad givön oles regäni.
Selolsöd dalabotis olsik, e seagivolsöd onis as limuns! Mekolsöd oles sakädis nevorikovik, divi nevagükovik in süls, utöpo, kö tifan no kanon kömön, tien no dämükon.
Ibä utöpo, kö div olsik binon, us i ladäl olsik obinon.
Loins olsik pezönonsöd e lampads filonsöd!
Binolsöd äsä mens, kels stebedons söli oksik, ven gekömom lomio de mated, ad maifükön sunädo ome yani, sosus kömom e lennokom.
Beatiks hidünans binoms, kelis söl tuvom galölis. Vö! sagob oles, ozönom oki, okoedom lenseatön omis, ed obötom omis.
Üf kömom ün neitogal telid, u kilid, ed otuvom omis so, tän binoms beatiks.
Suemols sio, das söl doma, if isevomöv tü düp kinik tifan ökömomöv, das igalädomöv, e no iletomöv, das önübreikoyöv.
Blümolsöd i ols! ibä ün düp, kü no üspetols, Son mena kömom».
‚Petrus‛ äsagom ome: «O Söl! Sagol-li parabi at demü obs, u demü valans»?
Ed äsagom Söl: «Kim binom-li üfo domiguvan fiedik ä tälänik, keli söl omik ocälom löpü hidünans okik ad givön omes pötatimo dilodi pötik omsik kosida?
Beatik hidünan binom, keli söl tuvom so dunöli.
Verato sagob oles, das ocälom omi asä guvani dalabotas valik oka.
Ab if hidünan sagomöv ninälo: Söl obik ozögom ad kömön, ed om primomöv ad flapön hidünanis e jidünanis, ad fidön e drinön, ed ad tudrinön,
söl hidünana et okömom tü del, kü no spetom omi, e tü düp, keli no sevom, ed odäcöpom omi, ed osufükom omi fäte nelekredanas.
Hidünan et, kel sevom vili söla okik, e no eblümom, e no edunom ma vil omik, odagetom flapis mödik.
Ab utan, kel no sevölo dunon bosi, kel binon pönabik, odageton flapis nemödik. De alan, kele mödikos pegivon, mödikos poflagon, e de utan, kele mödikos pelükonfidon, odesiroy plüo mödikumo.
Ekömob ad jedön fili sui taled, e vio vemo iviloböv, das ya pifilidon!
Mutob sufön blunedi, e kio padränälob, büä atos upaseton.
Cedol-li, das ekömob ad blinön püdi sui tal? Nö! sagob oles, ab büikumo teläli.
Ibä denu in dom bal pösods lul obinons ta ods. Kil obinons ta tel, e tel ta kil.
Fat obinom ta son, e son ta fat; mot obinof ta daut, e daut ta mot; lümot ta lüdaut, e lüdaut ta lümot».
Äsagom i menamödote: «If loegols löpikön lefogi in vesüd, tän sagols sunädo: oreinos, ed atos jenon.
Ed if sulüdavien lebladon, sagols: obinos vamik, ed atos jenon.
O simulans! Sevols sio ad cödön tefü pubods su taled ed in sil; sekü kod kinik üfo no cödols-li tefü tim at?
Kikodo no cödols-li ols it, va bos binon gidik?
Ibä if golol ko tapalet lü cifod, steifolöd täno dü vegam ad rajanön dini; voto oloveblinoy oli bo cödale, e cödal olovegivom oli gitädane, ed atan ojedom oli ini fanäböp.
Sagob ole, no segolol usao, büä upelol fenigi lätik».

KAPIT: XIII

Ün tim ot anans äkomons, kels änunons ome dö Galileyänans, kelas bludi ‚Pilatus‛ imigom ko ut sakrifanimas onsik.
Yesus ägespikom omes: «Cedols-li, das Galileyänans et äbinoms sinans gretikum ka Galileyänans votik valik, bi atos ereifon omis?
Sagob oles: Nö! Ab if no lecenols, ols valik opäridikols leigo.
U cedols-li, das degjölans, kels pedeidons dub dästur tüma in ‚Siloam‛, äbinons döbikums, ka lödans votik ela ‚Hierusalem‛?
Sagob oles: Nö! Ab if no lecenols, ols valik opäridikols leigo».
Äkonom ones parabi sököl: «Ek älabom figabimi, kel piplanon in vitidagad omik. Ven äkömom ad sukön flukis len on, no ätuvom onis.
Tän äsagom vitidagadane: Ekö! Dü yels kil nu ekömob ad sukön flukis len figabim at, e no tuvob onis. Docöpolöd oni! Sekü kis olabülon-li nenfrutiko gluni?
Ab ägesagom: O söl! Leadolös dabinön oni nog dü yel at! tän oliviocöpob züo gluni, ed odönob oni.
Ba olabon flukis ün oyel. If no, docöpolös täno oni»!
Seimna ätidom ün jabat in bal sünagogas.
Ed us vom ädabinof, kel ädiabäbof dü yels degjöl me malädalanan. Äblegof, ed äkanof no plu löükön oki.
Ven Yesus älogom ofi, ävokom ofi, ed äsagom ofe: «O vom! pelibükol de maläd olik»!
Äseidom namis sui of, e sunädo älöstanof, ed älelobof Godi.
Ab cif sünagoga, kel äbadocedom, das Yesus äsanom eki ün jabat, äsagom menamödote: «Dels mäl dabinons, ad vobön ün ons. Klu kömolsöd ün dels et ad pasanön, ab no tü jabatadel»!
Ab Söl ägesagom ome: «O simulans! alan olas no livükom-li tü jabat bubi u cuki okik de krib, ad modugön ed ad drienön oni?
Vom at: daut ela ‚Abraham‛, kel ya pemütof dü yels degjöl fa diab, no ädalof-li üfo palibükön de müt at tü jabatadel»?
Ven äsagom atosi, taans valik oma äjemons, ab menamödot lölik äfredon dö dins glorik, kelis ädunom.
Äsagom dönu: «Ad kis regän Goda sümon-li? Lä kis oleigodob-li oni?
Sümon ad mutarakeril, keli ek äsumon ed äsovon ini gad okik. Ädaglofon ed ävedon bim gretik, e böds sila änidons ini tuigs onik».
E dönu äsagom: «Lä kis oleigodob-li regäni Goda?
Sümon ad lefapest, keli vom äsumof ed ämigof ini böjulets kil meila, jüs at ivedon löliko lefik».
Ed älaitevom de zif lü zif, de vilag lü vilag, ai ävegölo lüodü ‚Hierusalem‛.
Ed ek äsagom ome: «O Söl! Utans, kels pasavons, binons-li nemödiks»? Äsagom ones:
«Komipolsöd ad nügolön da leyan nabik! ibä, sagob oles, mödikans osteifons ad nügolön, e no ofägons.
Posä söl doma elöädom, ed efärmükom yani, ed ols stanols plödo e nokols len yan, vokädölo: O Söl! Söl! maifükolös obes yani! tän ogesagom oles: No sevob, kiöpao kömols.
Ed oprimols ad sagön: Efidobs ed edrinobs komü ol, ed etidol su süts obsik.
Ab osagom: Sagob oles, no sevob, kiöpao kömols. Blibolsöd fagü ob, ols valik, kels dunols negidi!
Viam e knir tutas odabinons, ven ologols eli ‚Abraham‛, eli ‚Isaac‛, eli ‚Iacob‛ e profetanis valik in regän Goda, ed ols pusejedols.
I utans, kels ukömons de lofüd e vesüd, de nolüd e sulüd, olenseatons in regän Goda.
Ed ekö! Lätikans odabinons, kels obinons balidans, e balidans, kels obinons lätikans».
Ün tim ot farisetans anik äkömoms lü om, ed äsagoms: «Mogololöd e degololöd isao! ibä ‚Herodes‛ vilom deidön oli».
Ed äsagom omes: «Gololsöd ad sagön renare et: Ekö! sejedob milananis, ed osaunükob adelo ed odelo, e tü del kilid odeadob.
Ab adelo, odelo e tü del fovik mutob tävön; ibä no mögos, das profetan padeidom plödü ‚Hierusalem‛.
O ‚Hierusalem‛, ‚Hierusalem‛! Ols, kels deidols profetanis, e stonols utanis, kels pelesedoms lü ols. Vio suvo evilob kobükön cilis olsik, äsä böd konleton bödülis disi flitäms okik, e no evilols.
Ekö! Dom olsik obleibon binön as failot. Sagob oles, no ologols obi, büä sagols: Pabenedomös utan, kel kömom nemü Söl»!

KAPIT: XIV

Seimna ikömom ün jabat ini dom cifa farisetanas ad fidön bodi, ed äküpedoy omi.
Ed ekö! men dropik ästanon lo om.
Yesus äprimom spikami ed äsäkom bibinolavanes e farisetanes: «Pedälos-li ad sanön ün jabat»?
Äseiloms. Ed ägleipom oni, äsanom oni, ed äsägleipom oni,
ed äsagom omes: «Kim olas, if son u bub olik falon ün jabat ini fonäd, no osetirol-li oni sunädo»?
Ad atos no äkanoms taspikön ome bosi.
Ven äküpom, das lotans äsukons pladis löpikün, äsagom ones parabi sököl:
«If pevüdol fa ek ad matedazäl, no seidolöd oli sui plad löpikün! mög dabinon, das bo ek pevüdom, kel binom cädikum ka ol.
Ön jenet at, man, kel evüdom oli ed omi, kömomöv lä ol e sagomöv: Givolös ome pladi olik! ed ol labülolöv jemo pladi donikum.
Ab if pevüdol, seidolöd oli täno sui plad donikün, dat hidaifidan, ven kömom, sagomös ole: «O flen! seidolöd oli löpikumo! Tän atos obinon stim ole lo fidädakompenans valik.
Ibä alan, kel löpükon oki, podonükon, ed utan kel donükon oki, polöpükon».
Äsagom i hidaifidane oka: «If gevol fidedi u sänedi, vüdolöd täno no flenis u blodis olikis, i no röletanis olik u nilädanis liegik! Voto oms pö turn oksik ovüdoms i oli, e dagetol bläfodi.
Ab if gevol daifafidedi, vüdolöd täno pöfanis, mifomäbis, lemikanis, bleinanis!
Tän obinol beatik, bi no labons bosi, me kel kanons bläfön ole; ibä atos pobläfon ole pö lelifikam ritanas».
Ven balan tabakompenanas älilom atosi, äsagom ome: «Beatik utan binon, kel kompenon pö fided in regän Goda».
Ab äsagom ome: «Man seimik ämeikom daifafidedi gretik, pö kel ivüdom mödikanis.
E ven tüp fideda ikömon, älesedom hidünani, ad sagön vüdäbes: Kömolsöd, ibä val nu binon blümik!
Ab valans äprimons ad säkusadön baläliko okis. Balidan äsagom ome: Eremob länedi, e mutob zesüdiko logön oni. Begob ole, säkusadolös obi!
Votikan äsagom: Eremob fimädis lul bubas, ed oblufob onis. Begob ole, säkusadolös obi!
Dönu votikan äsagom: Ematikob änu, sekü atos no kanob kömön.
Hidünan äkömom ad nunön atosi söle okik. Tän söl äzunikom, ed äsagom hidünane okik: Gololöd suno lü piads e süts zifa, e blinolöd pöfanis, mifomäbis, bleinanis e lemikanis isio!
Hidünan äsagom: O söl! utos, kelosi ebüdol, pedunon; ab tops nog dabinons.
Tän söl äsagom hidünane: Segololöd lü lesüts e buids, e mütolöd onis ad nükömön, dat dom obik fulikonös!
Ibä sagob oles, das no balan utanas, kels büiko pivüdons, oguton de daifided»!
Seimna, ven menamödot gretik äkegolon ko om, ägüflekom oki ed äsagom one:
«Utan, kel kömon lü ob, e no heton fati e moti oka, blodis e söris oka, si! igo lifi lönik oka, no kanon binön tidäb obik.
Alutan, kel no polon krodi okik, e kömon po ob, no kanon binön tidäb obik.
Kim olas, kel vilol bumön tümi, no oseidol-li oli büiko, ad kalkulön frädis, ed ad vätälön, va labol saidikosi ad fimekön voboti?
Voto okanosöv jenön, das, if übumolöv stababumädi, e no öfägolöv ad fibumön bumoti, valans, kels logons atosi, öbesmilonsöv oli,
ed ösagonsöv: Man et eprimom ad bumön, ab no kanom fimekön bumoti.
U hireg kimik, if tevom krigio ta hireg votik, no oseidom-li oki büiko ad konsälön, va okanom kolgolön benoseko ko soldats degmil balani, kel koskömom ko soldats teldegmil ?
If no, tän lesedom legätanefi, ven votikan nog binom fagik, e lofom püdamamobis.
Leigoso i nek olas, kel no klemon dalabotis valik okik, kanon binön tidäb obik.
Klu, sal binon gudik, ab if sal vedon nensmekik, me kin povedükon-li benosmekik?
Gudon ni pro län, ni pro dönakum. Mojedoy oni. Kel labon lilis ad lilön, utan lilonöd»!

KAPIT: XV

Tolädans e sinans valik nu äkömons lü om, ad lilön omi.
Farisetans e bibinolavans ämuroms ed äsagoms: «Man et getedom sinanis e fidom ko ons».
Tän äsagom omes parabi at:
«Kim de ols, if dalabol jipis tum, e perol bali onas, no olüvol-li züldegzülis in däsärt, ed osukol-li uti, kel peperon, jüs utuvol oni?
Ed if tuvol oni, tän oseitol oni sui jots olik,
ed ekömölo lomio okobovokol flenis e nilädanis ola, ed osagol ones: Fredolsöd ko ob! ibä etuvob jipi iperöl obik.
Sagob oles: So in sül fred mödikum obinon dö sinan bal, kel elecenon, ka dö ritans züldegzül, kels no neodons leceni.
U vom kifik, kel dalabof dragmadis deg, e perof dragmadi bal, no ofilidof-li lampadi, osvipof-li domi, ed osukof-li kälöfiko oni, jüs utuvof oni?
Ed if tuvof oni, tän okobovokof jiflenis e jinilädanis, ed osagof ofes: Fredolsöd ko ob! ibä etuvob dragmadi, keli iperob.
Leigo so, sagob oles, fred odavedon pö silanans Goda dö sinan bal, kel elecenon».
Tän äsagom: «Seiman älabom sonis tel.
Yunikünan omas äsagom fate okik: O fat! givolöd obe dili dalabota, kel duton lü ob! Ed äseagivom monemi bevü oms.
Pos brefüp, son yunikün äkobosumom vali, ed ädetävom lü län fagik. Us änespälom monemi okik in lif nestönik.
Posä ifegebom nespälölo vali in län et, faemaditret vemik ädavedon, ed äprimom ad defädön.
Nu äcalikom lä balan sifanas läna, ed atan älesedom omi lü fel ad galedön svinis.
Ed ädesirom ad fulükön stomägi okik me nulüdot, kel päfidon fa svins; ab nek ägivon ome oni.
Ven isevälöfikom, äsagom ninälo: Loatäbs kiomödik fata obik labons bundano bodi! ed ob päridikob is sekü faem.
Olöädob ad golön lü fat obik, ed osagob ome: O fat! esinob kol sül e kol ol,
no digädob plu ad panemön son ola, vedükolöd obi balan loatäbas olik!
Älöädom kludo, ed ägolom lü fat okik. E ven nog äbinom fagik, fat omik älogom omi, ed ämiserom. Äjutedom lü om, äbradom omi, ed äkidom ladöfiko omi.
E son äsagom ome: O fat! esinob kol sül e kol ol; no digädob plu ad panemön son ola.
Ab fat äsagom lü hidünans okik: Ramenolsöd vifiko kloti gudikün, e lenükolsöd oni ome, lenükolsöd lini leni doat omik e jukis leni futs omik!
Ramenolsöd bubüli pepinädüköl, e pugolsöd oni! Fidobsöd e fredobsöd!
Ibä son at oba ädeadom, ed elifikom, piperom e pegetuvom. Tän äprimons ad zälizelön.
Son bäldikün omik nu äbinom su feled, e ven ägegolom lomio ed änilikom nilü dom, älilom kaniti e danüdi.
Ävokom balani hidünanas ed äsäkom, kis atos äbinon.
Atan äsagom ome: Blod olik egekömom, e fat olik epugom pinädabubüli, bi egegetom omi sauniko.
Tän äzunikom, e no ävilom nügolön. Fat omik äkömom plödio, ed ästigädom omi ad nükömön.
Ab ägespikom fate okik: Ekö! edünob oli dü yels so mödiks, e neai enefölob büdi olik, ab neai egivol obe kaperili ad zälizelön ko flens obik.
Nu ye son at ola, kel efegebom monemi olik ko jinepuedans, egekömom, pugol ome pinädabubüli.
Äsagom ome: O cil! binol ai lä ob, e val, kel duton lü ob, i duton lü ol.
Sötol kludo zälizelön e fredön; ibä blod ola äbinom deadik, ed elifikom; piperom e pegetuvom».

KAPIT: XVI

Äsagom i tidäbes okik: «Seimna man liegik ädabinom, kel älabom guvani; atan päkusadom pö om, das äfegebom nespälölo dalabotis omik.
Ävokom omi lü ok ed äsagom ome: Kisi lilob-li tefü ol? Gidükolöd guvi olik! ibä no kanol binön lunüpikumo guvan.
Tän guvan äsagom ninälo: Kisi odunob-li? Söl obik esädünükom obi as guvan. No fägob ad feilön, e jemob ad lubegön.
Sevob utosi, kelosi odunob, dat, ven pusädünükob as guvan, olesumoms obi ini doms oksik.
Äkoedom kömön lü ok debanis söla okik balani pos votikan, ed äsagom balidane: Liomödiki debol-li söle obik?
Äsagom: Tubetis tum leüla. Ed äsagom ome: Sumolöd debazöti olik, seidolöd oli sunädo e penolöd: luldeg!
Pos atos äsagom votikane: Ed ol, liomödiki debol-li? Atan äsagom: Böjulis tum grena. Ed äsagom ome: Sumolöd debazöti olik, e penolöd: jöldeg!
E söl älobom guvani negidik, bi idunom vätälo; ibä cils vola at binons prüdikums pö kosäd ko menäd okik, ka cils lita.
E sagob oles: Davedükolsöd oles flenis me lieg negidik! dat, ven at finedikon, lasumoy olis ini tänads laidüpik.
Kel binon konfidovik in din pülikün, utan i binon konfidovik in din gretik; kel binon negidik in din pülikün, utan i binon negidik in din gretik.
If kludo ne ebinolöv konfidovik dinü lieg negidik, kin okonfidon-li ole verätiki?
If no ebinolöv konfidovik tefü dalabot votikane, kin bevü obs ogivon-li oles obsiki?
Domadünan nonik kanon dünön sölis tel; ibä ud oheton balani, ed olöfon votani, ud oslopon balani, ed onestümon votani. No kanols kultön Godi e monalugodi».
Atosi valik farisetans, kels binoms moniäliks, äliloms, ed äkofoms omi.
Ed äsagom omes: «Bitikols lo mens, äsva binols ritiks, ab God sevom ladälis olsik; ed utos, kelos binon löpik pro mens, binon lenaud lo God.
Lonem e penäds profetanas lonöfons jü tim ela ‚Ioannes‛. De tim et regän Goda palenunon, e valans runädons desirölo ad on.
Binos fasilikum, das sül e tal opasetikons, kas malül bal lonema omoikon.
Alutan, kel dejoikom jimatani okik, e matikom ko jivotan, dulterom, ed utan, kel matikom ko jiutan, kel pedejoikof fa himatan okik, dulterom.
Seimna man liegik ädabinom, piklotom me klots purpurik e binü linumastof feinik, ed äjuitom aldeliko lifi lüxüödik.
E man pöfik luukik ‚Lazarus‛ penemöl, äseatom lä föfaleyan doma omik,
ädesirölo ad nulüdön oki me bodabreküls de tab liegana pidefalöls; i dogs äkömons ad läkön luukis omik.
Ab pöfan ädeadom, e päpolom fa silanans lü vüm de ‚Abraham‛. I liegan ädeadom, e päsepülom.
E ven om labü dols in höl älölogom, älogom fago eli ‚Abraham‛, ed eli ‚Lazarus‛ in vüm omik.
Ed ävokädom: O fat: ‚Abraham‛! miserolös obi! lesedolös eli ‚Lazarus‛! kodolös, das blunülom tipoti doata okik ini vat e koldülükom linegi obik! ibä sufob doli in lefil at.
Ab, ‚Abraham‛ äsagom: O cil! memolöd, das egetol gudikosi dü lif olik, e ‚Lazarus‛ leigüpo egetom badikosi! Nu patrodom, ed ol sufol doli.
Zuo gur vidik dabinon vü obs ed ols, sodas utans, kels vilonsöv lovegolön isao lü ols, no kanons dunön atosi, ed oy i no kanoy lovekömön usao lü obs.
Tän äsagom: Lebegob täno ole, o fat! ad lesedön omi lü dom fata obik;
ibä labob blodis lul; büedolös omi nunedön omes, dat no i oms kömoms ini datomöp at!
‚Abraham‛ äsagom ome: Laboms penädis ela ‚Moyses‛ e profetanas: dalilomsöd omis!
Äsagom: Nö! o fat: ‚Abraham‛! te if ek edeadölanas kömonöv lü oms, olecenomsöv.
Ab äsagom ome: If no daliloms eli ‚Moyses‛ e profetanis, tän i no olobedoms, if ek olelifonöv se deadans».

KAPIT: XVII

Äsagom tidäbes okik: «Binos nevitovik, das skäns okömons; ab vi lü men, dub kel kömons.
Binosöv gudikum pro on, if mülaston palägonöv zü särvig onik, e pajedonöv ini mel, kas skänon balani smalikanas at.
Küpälolsöd! If blod olik sinom, blamolöd omi, ed if lepidom, pardolöd omi!
Ed üf igo sinomöv velna dü del ta ol, e gekömomöv velna ad sagön: lepidob osi, opardolöd ome»!
Paostolans äsagoms Söle: «Mödükumolös obes lekredi»!
E Söl äsagom: «If labolsöv lekredi äs ker mutara, sagolsöv lü murbabim at: Säplanolöd oli, e planolöd oli ini mel! e lobedonöv olis.
Kim bevü ols, kel labom hidünani ad plaudön, ud ad galedön jepi, osagom-li ome, ven gekömom domio de läned: Nükömolöd e lenseitolöd oli! ?
No osagom-li buikumo ome: Mökolöd bosi ad fidedön, zönolöd oli, bötolöd obi, jüs ufidob ed udrinob; pos atos ol it kanol fidön e drinön! ?
No obinom ga danöfik kol hidünan, bi edunom utosi, kelos pibüdon ome. Cedob: nö!
So i ols mutols sagön, if edunols vali, kel pebligädon oles: Binobs hidünans nenfrutik, edunobs te utosi, kelosi äsötobs dunön».
Dü täv lü ‚Hierusalem‛, ätevom da Samaritän e Galileyän.
E ven äkömom ini vilag seimik, hilepradans deg äkosgoloms omi. Äbleiboms stanön fago,
ed ävokädoms laodiko: «O Yesus! Mastan! miserolös obis»!
Ven älogom omis, äsagom omes: «Gololsöd ad dajonön olis kultanes! Dü vegam äklinikoms.
Balan omas, älogölo, das äbinom saunik, ägekömom laodiko Godi älelobölo,
ed ädofalom ädanölo sui logod okik foi futs omik. Atan äbinom Samaritänan.
Nu Yesus ägespikom: «No degans valik eklinikoms-li? Kitopo votans zül binoms-li?
E no balan omas egekömom-li ad stimön Godi, äsä foginänan at»?
Tän äsagom ome: «Löädolöd e degololöd! Lekred olik esavon oli».
Ven päsäkos ome fa farisetans, kitimo regän Goda ökömon, ägesagom omes: «Regän Goda no kömon paküpedölo;
No osagoy: Ekö! is binon; ekö! us binon, ibä regän Goda binon zänodü ols».
Tän äsagom tidäbes: «Dels okömons, ün kels ovipols ad logön tü del seimik Soni mena, e no ologols omi.
Osagoy oles: Ekö! is binom, ud ekö! us binom; no segololsöd demü atos, no sökolsöd omi!
Ibä leigoäsä leklär stralon flamülölo de horit bal jü horit votik, leigoso Son mena obinom tü del okik.
Ab büikumo omutom sufön mödiko, e padeimön fa menäd at.
E leigoäsä äjenos ün tim ela ‚Noe‛, leigoso ojenos ün tim Sona mena.
Äfidons ed ädrinons, ämatikons e pämatükons jü del, ün kel ‚Noe‛ ägolom ini rak, e letuvatam äkömon, ed äpäridükon valanis.
U leigoäsä äjenos ün tim ela ‚Lot‛. Äfidons, ädrinons, äremons, äselons, äplanons, äbumons;
ab tü del, kü ‚Lot‛ älüvom eli ‚Sodoma‛, fil e sulfin äreinons se sil, ed äpäridükons onis valik.
I so ojenos tü del, kü Son mena opubom.
Tü del et utan, kel binon su nuf, du konömöm binon ninü dom, no degolonöd, ad kesumön oni; leigo utan, kel binon su fel, no gülogonöd uti, keli posbinükon!
Betikolsöd jimatani ela ‚Lot‛!
Utan, kel osteifon ad dakipön lifi okik, operon oni; utan, kel operon oni, odakipon oni.
Sagob oles, ün neit et pösods tel oseatons su bed bal, balan polasumon, votan poposblibükon;
voms tel ograinofs len grainöm ot, jibalan polasumof, e jivotan poposblibükof.
(Pösods tel obinons su läned, balan polasumon, votan poposblibükon)».
Ägespikoms ome: «Kiöpo-li? o Söl! Äsagom omes: «Uto, kö karot dabinon, i vulturs okobikons».

KAPIT: XVIII

Äsagom omes parabi sököl, ad lejonön omes, das ai ämutoms plekön, e no läsikön:
«In zif semik cödal ädabinom, kel no ädredom demü God, e no ädemom meni.
In zif et i jiviudan ädabinof, kel ägolof lü om, ed äsagof: Gidükolös obi ta taan obik!
Dü tim semik no ävilom osi; ab pos atos äsagom ninälo: Do no dredob demü God, e no demob meni,
ogidükob ofi, bi jiviudan et töbof obi, e bo fino zuo oflapoföv obi in logod obik».
E Söl äsagom: «Lilolsöd utosi, kelosi cödal negidik sagom!
God üfo no ogidükomöv-li väläbis okik, kels begons ome dü dels e neits, do labom lunasufäli kol ons?
Sagob oles, das ogidükom suniko onis. Ab Son mena otuvom-li lekredi su taled, ven kömom»?
Demü semans, kels älecedons okis ritikis, ed äludigidons votanis, äsagom parabi at:
«Mans tel ägoloms lü tem ad plekön; balan äbinom farisetan e votan tolädan.
Farisetan ästanom ad plekön ninälo: O God! danob oli, das no binob äsä mens votik, ravans, nesnatans, dulterans, ud i äsä tolädan et;
cunob telna a vig, e givob degdili de val, keli dalabob.
E tolädan äbleibom stanön fagoto, e no ävilom lölogön äl sül, ab äflapom oki sui blöt ed äsagom: O God! benädolös obi: sinan!
Sagob oles, atan ägegolom lü dom okik plu pegidükölo ka votan; ibä alan, kel löpükon oki, podonükon, ed alan, kel donükon oki, polöpükon».
Seimna äblinoy cilis lü om ko beg ad doatön onis; ven tidäbs älogoms atosi, äblamoms onis.
Ab Yesus ävokom onis lä ok ed äsagom: «Letolsöd kömön cilis lü ob, e no neletolsöd onis! Ibä lü somans regän Goda duton.
Vö! sagob oles, utan, kel no lasumon regäni Goda äsä cil, no oninikon ini on».
Cädan seimik äsäkom ome: «O Mastan gudik! Kisi mutob-li dunön ad dagetön lifi laidüpik»?
Yesus äsagom ome: «Liö! nemol-li obi gudiki? Nek binon gudik plä Balan, sevabo God.
Sevol büdedis: ‚No sötol dulterön, no deidön, no tifön, no temunön dobiko‛! ‚Stimolöd fati e moti olikis‛»!
Äsagom: «Atosi valik edunob ai yunao».
Ven Yesus älilom atosi, äsagom ome: «Nog din bal defon pö ol. Selolöd vali, keli dalabol, e seagivolöd ati pöfanes, ed odalabol divi in sül; kömolöd täno, e sökolöd obi»!
Ab ven älilom atosi, ävedom vemo lügik, ibä äbinom vemo liegik.
Ven Yesus nu älogom, das ivedom vemo lügik, äsagom: «Vio töbik binos pro utans, kels dalabons dalabotis, ad nügolön ini regän Goda!
Ibä binos fasilikum pro jamod ad golön da hog nada, ka pro liegan ad nügolön ini regän Goda».
Ad atos lilans äsagons: «Ab kin üfo okanon-li binön sefik»?
Äsagom: «Utos, kelos binon nemögik pö mens, binon mögik pö God».
Tän ‚Petrus‛ äsagom: «Ekö! elüvobs vali, ed esökobs oli».
Ed äsagom omes: «Vö! sagob oles, no balan dabinon, kel elüvon domi, u palis, u blodis, u jimatani u cilis demü regän Goda,
kel no odageton mödo mödikumo in vol at, ed in vol fütürik lifi laidüpik».
Seimna äkobükom degtelanis lä ok, ed äsagom omes: «Detevobs lü ‚Hierusalem‛, e val, kel pepenon fa profetans, podadunon pö Son mena;
ibä polovegivom paganes, pokofom, pomiträitom e pobespukom;
olebatoms ed odeidoms omi; e tü del kilid olelifikom».
Äsuemoms nosi de atos; pisagölos äbinon pro oms klänöfik; no äsuemoms pisagölosi.
Ven änilikoms nilü ‚Iericho‛, bleinan lubegöl äseadom len veg.
Ven älielom beigolön menamödoti, äsäkom, kis atos äbinon.
Änunoy ome, das Yesus: elan di ‚Nazareth‛ äbeigolom.
Tän ävokädom: «O Yesus! Son ela ‚David‛! miserolös obi»!
Ed utans, kels äföfogoloms äbüdoms ome ad seilön. Ab ävokädom plüo laodikumo: «O Son ela ‚David‛! miserolös obi»!
Yesus ästopom, äbüdom ad blinön omi lü om, ed äsäkom ome, ven inilikom:
«Kisi vilol-li, das dunob pro ol»? Äsagom: «O Söl! Kodolös, das logob dönu»!
E Yesus äsagom ome: «Kanolöd logön dönu! Lekred olik esavon oli».
Sunädo ägegetom logami okik, ed äsökom omi, Godi älelobölo. E pöp lölik, atosi älogölo, älelobon Godi.

KAPIT: XIX

Yesus nu äkömom ini ‚Iericho‛ ed ätevom da on.
Ed ekö! us man ädabinom, kel pänemom ‚Zachaeus‛; äbinom letolädan e liegik.
Ävilom logön, kis Yesus äbinom, ab dub menamödot no äkanom atosi, bi älabom magedi smalik.
Ad logön omi, äbüogolom föfio, ed ägrämom ini murbabim; ibä us ämutom beigolön.
Ven Yesus ikömom tö top et, älölogom, älogom omi, ed äsagom: «O ‚Zachaeus‛! Kömolöd suniko donio, ibä mutob lotädön adelo ini dom olik».
Änexänom spido se bim, ed ägetedom fredo omi.
E valans, kels älogons atosi, ämurons, ed äsagons: «Elotom lä sinan».
E ‚Zachaeus‛ älügolom lü Söl, ed äsagom: «Ekö! legivob lafi dalabotas obik pöfanes, o Söl! ed if ecütob flagedo eki, ogegivob ome foliko atosi».
Tän Yesus äsagom ome: «Daben eledutikon lü dom at; i om binon ga son ela ‚Abraham‛;
ibä Son mena ekömom ad sukön ed ad savön utosi, kelos pipäridikon».
Ven älilons atosi, äläükom parabi, bi äbinons nilü «Hierusalem» ed äniludons, das regän Goda öpubon sunädo.
Äsagom kludo: «Man lemotedik ätävom lü län fagik, ad dagetön diniti regik, ed ad gegolön pos atos.
Tän ävokom hidünanis deg okik, ägivom omes pounis deg ed äsagom omes: Tedolsöd me ats, jüs gekömob.
Kesifans omik ähetons omi, ed älesedons legätanefi poso po om ko zötam: No vilobs, das vedom reg obas.
Ven ägekömom, posä idagetob diniti regik, äbüedom kömön hidünanis, keles igivom moni, ad lelilön büsidi kinik alan omas idunom.
Balidan äkömom, ed äsagom: O söl! poun olik eprodon gaenodi pounas deg.
Äsagom ome: Gudö! o dünan ritik! Bi ebinol fiedik in büsid vemo smalik, olabol nämädi tefü zifs deg.
I telidan äkömom ed äsagom: poun olik, o söl! eprodon pounis votik lul.
I atane äsagom: Labolöd i ol nämädi tefü zifs lul!
E votan äkömom ed äsagom: O söl! ekö! is poun olik binon. Ekipedob oni in särvätül,
ibä ädredob demü ol, bi binol men sevärik: sumol uto, kö no ekipidol, e klopol uto, kö no esovol.
Äsagom ome: Ko vöds lönik olik omicödob oli, o dünan badik! Äsevol-li, das binob men sevärik, kel sumob uto, kö no ekipidob, das klopob uto, kö no esovob?
Sekü kis üfo no ekipidol-li moni ini banköp? Tän ögesumob oni ko fien, ven ügekömob dönu.
Tän äsagom züstanölanes: Desumolsöd de om pouni, e givolsöd oni ome, kel labom pounis deg!
(Äsagons ome: O söl! labom pounis deg).
Ibä sagob oles: Alane, kel dalabon, pogivos; de on, kel no dalabon, utos podesumon, keli dalabon.
Ab neflenis ut oba, kels no ävilons, das övedob hireg onas, dugolsöd isio, e deiflapolsöd onis lo ob»!
Posä isagom atosi, äfövom tävi okik lü ‚Hierusalem‛.
Ven ikömom nilü ‚Bethphage‛ e ‚Bethania‛ len bel, kel panemon Learabel, älesedom teli tidäbas okik,
äsagölo: «Gololsöd lü vilag visü obs; ven nügolols ini on, otuvols us cuküli pefimatanöl, su kel neföro men eseadon. Livükolsöd oni, e dugolsöd oni isio!
Ed if ek säkonöv oles: Sekü kis livükols-li oni? mutols sagön: Söl neodom oni».
Lesedäbs ädegoloms, ed ätuvoms osi, soäsä isagom osi omes.
E ven älivükoms cuküli, dalabans äsagons omes: «Sekü kis livükols-li cuküli?
Äsagoms: «Söl neodom oni».
Tän ädugoms oni lü Yesus, äjedoms klotis oksik sui cukül, ed äseidoms Yesusi sui on.
Ven älaimonitom, äseatenükoms klotis oksik sui veg.
Töbo ikömom tö degolöp Learabela, e mödot lölik tidäbas äprimon ad lelobön ko vög laodik Godi, demü milags valik, kelis ilogons.
Äsagoms: «Pabenedomös utan, kel kömom: reg sekü nem Goda! püd binonös in sül, e stim in top löpikün»!
Farisetans semik se menamödot äsagoms ome: «O Mastan! blamolöd tidäbis olik»!
Ab ägesagom: «Sagob oles, if atans seilomsöv, tän stons ovokädonsöv».
Ven änilikom zifi, ed älogom oni, ädrenom dö on,
ed äsagom: «Dasevolös i ol ün del ola utosi, kelos dünon ad püd olik! Ab nu atos peklänedon pro logs olik.
Ibä dels okömons pro ol, ün kels neflens olik olöbumons zü ol daemi, onüfärmükons oli, ed odränälons oli;
opäridükons oli e cilis in ol, e no oletons stoni bal su votik; bi no edasevol timi, ün kel God evisitom oli».
Ven ikömom ini tem, äprimom ad semofön se on utanis, kels äselons ed äremons.
Äsagom ones: «Epenoy: ‚Dom oba obinon plekadom‛; ab ols emekols oni ravanaspadädi».
Aldeliko älejonom in tem, e lekultans e bibinolavans ästeifoms ad päridükön omi; ed i veütikans pöpa;
ab no ätuvoms medi ad dunön bosi; ibä pöp lölik äslopikon omi, if älilon omi.

KAPIT: XX

Ün bal delas et, ven älejonom pöpe in tem, ed äpredom gospuli, lekultans e bibinolavans äkömoms ko bäldikünans lü om,
ed äsagoms ome: «Sagolöd obes: Sekü gitod kinik dunol-li atosi, u kim egevom-li ole gitodi at»?
Ägesagom omes: «Osäkob oles i bosi, gespikolsöd obe!
Bluned ela ‚Ioannes‛, äbinon-li se sül u se mens»?
Äkonsäloms ninälo: «If sagobs: se sül, tän osäkom: kikodo üfo no ekredols-li omi?
Ed if sagobs: se mens, tän pöp lölik ostonon obis, ibä lecedon, das ‚Ioannes‛ äbinom profetan».
Klu ägespikoms: «No sevobs osi».
E Yesus äsagom omes: «Tän i ob no sagob oles, sekü gitod kinik dunob atosi»!
Tän äprimom ad konön pöpe parabi sököl: «Ek ämeikom vitidagadi, äbailom oni feilanes, ed äblibom lunüpo in foginän.
Ed ün tim pötik älesedom lü feilans hidünani, dat ögivoms ome dili klopota vitidagada, ab äflapoms omi, ed ämolesedoms omi nen dil klopota.
Nu älesedom nog hidünani votik, ab i atani äflapoms ed älukofoms, ed ämolesedoms omi nen dil klopota.
Kilidnaedo älesedom lü oms lesedäbi, ab i atani ävunoms, ed äsejedoms omi.
Nu söl vitidagada äsagom: Kisi odunob-li? Olesedob soni palöföl obik; if logoms omi, bo ospaloms omi.
Ven feilans älogoms omi, ävätäloms ko ods, ed äsagoms: Atan binom geran. Deidobsöd omi, dat gerot ledutikonös lü obs!
Äsejedoms omi se vitidagad ed ädeidoms omi. Kisi täno söl vitidagada odunom-li?
Okömom, odeidom feilanis et, ed ogivom vitidagadi votanes». Ven äliloms atosi, äsagoms: «Atos no jenonös»!
Älülogom omis, ed äsagom: «Kisi täno bibavöd at sinifon-li? ‚Ston, keli bumans emojedoms, evedon gulaston‛».
Alan, kel falon sui ston et, otrovon; utani, sui kel falon, otroivon».
Tü düp et lekultans e bibinolavans ästeifoms ad bemastikön omi, ab ädredoms pöpi; ibä äsuemoms, das isagom parabi at demü oms.
Älükoms kludo omi, ed älesedoms lükanis, kels äbitoms as ritans, ad küpodön sagodi miplitik da om, dat ökanoms lovegivön omi cifode e nämäde guverala.
Äsäkoms ome: «O Mastan! sevobs, das spikol stedälo, e lejonol no demölo pösodi, ab tidol ma verat vegami lü God;
pedälos-li, u no pedälos-li obes ad pelön tripi lampöre»?
Ädaseivom diseini lukäfik omsik, ed äsagom omes: «Kikodo blufodols-li obi?
Jonolöd obe denari! Magoti kima, e supenädi kinik, at labon-li»? Äsagoms: «Lampör».
Tän äsagom omes: «Givolsöd täno lampöre uti, kel duton lü om, e Gode uti, kel duton lü God»!
So no äfägoms ad küpodön lo pöp sagodi miplitik de om; ed ästunölo dö gesagod omik, äseiloms.
Tän anans sadukanas, kels nooms lelifikami, äkömoms lü om, ed älonüloms säki at:
«O Mastan! «Moyses» ebüdülom obes: ‚If ek kel labom jimatani deadom nencilo, tän blod omik mutom matikön ko vom et, e fatön posbinanis blode okik‛.
Seimna blods vel ädabinoms; balidan isumom jimatani, ed ädeadom nencilo;
e telidan, kel älabom vomi at, ädeadom nencilo;
i kilidan elabom ofi; e leigoso velans valik; no äposbinükoms cilis, ven ädeadoms.
Fino i vom ädeadof.
Pö lelifikam, kim omas täno olabom ofi as jimatan? Ibä velans valik elaboms vomi at».
Yesus äsagom omes: «cils vola at matikons e pamatükons;
ab utans, kels palecedons digädiks ad kompenön in vol votik, e pö lelifikam se deadans, no matikons e no pamatükons.
Ibä kanons i no deadön; ibä sümedons silanans; e bi binons cils lelifikama, binons cils Goda.
E das deadans olelifikons, i ‚Moyses‛ ejonädom lä fotül bramarubudas, ven sagom: ‚Söl: God ela ‚Abraham‛, God ela ‚Isaac‛ ä God ela ‚Iacob‛!
God ga no binom God deadanas, ab lifölanas: ibä valans lifons pro om».
Tän bibinolavans semik ägesagoms: «O Mastan! esagol verätiko».
E no plu äkünoms ad säkön ome bosi.
Nu äsagom omes: «Lio kanoy-li sagön, das Kristus binom Son ela ‚David‛?
E ‚David‛ it sagom in buk psamas: ‚Söl esagom söle obik: Seadolöd detü ob,
jüs useitob neflenis olik äsä futabami pro futs olik‛.
‚David‛ nemom kludo omi söli; lio üfo binom-li son omik»?
Lilamü pöp lölik äsagom tidäbes okik:
«Prüdolsöd demü bibinolavans, kels löfiloms ad zispatön in klotem gravik, ed ad paglidön su maket, ad seadön föfo in sünagogs, ed ad labülön pladis löpikün pö fideds,
kels luslugoms domis jiviudanas, e jino plekoms lunüpo. Odagetoms cödeti plüo gretikumi».

KAPIT: XXI

Ven älölogom, älogom lieganis, kels änüjedons legivotis oksik ini sakrifamonabog,
ed i jiviudani pöfik, kel änüjedof ini on fenigis tel.
Tän äsagom: «Vö! sagob oles, jiviudan et enüjedof mödikumo ka votans valik;
ibä atans valik egivons ini monabog asä legivoti Gode bosi de bundan oksik, ab of egivof de pöf okik vali, keli älabof, monemi lölik okik».
Ven semans äsagons dö tem, das pidekon me stoins jönik e lepromalegivots, äsagom:
«Tefü uts, kelis logols us, dels ökömons, das ston no bal oblibon su votik, das ston nonik oreton, kel no podebreikon».
Ad atos äsäkoy ome: «O Mastan! kitimo atos ojenon-li? e kis obinon-li mal, das tim ekömon, das atos ojenon»?
Ed äsagom: «Küpälolsöd, das no pabätodols! ibä mödikans okömoms ko nem obik, ed osagoms: ob binob utan, kel ökömom, e tim binon nilik! No sökolsöd omi!
Ven olilols dö krigs e voluts, no vedolsöd dredäliks! ibä dins valik at mutons jenön büfiko, e nog fin no okömon sunädo».
Tän äsagom ones: «Net ovolutikon ta net, e regän ta regän.
Taladrems vemik odabinons in tops mödik, e päst e faemaditret; pubods dredabik e milagamals gretik in sil ojenons.
Ab büä atos valik jenon, ogleipoy olis, opöjutoy olis, oloveblinoy olis lü sünagogs e fanäböps, ed odugoy olis lo regs e proviniguverans, bi labols nemi obik.
Fino omutols sagön lekoefi.
Desinolsöd täno, ad no kudön büo ninälo, vio ojelodols olis!
ibä ogevob oles fägi e sapi ad jelodön olis, sodas nek taanas olsik oplobon ta atos, ed okanon taspikön oles.
Sio polovegivols fa pals, blods, röletans e flens, ed anans olas podeidols,
e pohetols fa valans, bi labols nemi obik.
Ab her no bal kapa olsik omoikon;
dub laidäl olsik odakipols lifi olsik.
Ven logols, das ‚Hierusalem‛ pazüon dub milits, tän sevols, das distuk ona binon nilik.
Täno utans, kels binons in Yudän fugonsöd lü bels; utans, kels binons in zif setevonsöd, ed utans, kels binons in länäd no nütevonsöd ini on!
Ibä ats binons dels vindita, dat val pafölonöd, kel pepenon in bibapenäds valik!
Vi! lü voms grodik e sügöls ün dels et! Ibä ditret vemik obinon su taled, e zun dö pöp at.
Ofalons dub köted gläva, e pomodugons as krigafanäbs lü nets valasotik, e ‚Hierusalem‛ podästepon fa pagans, jüs tims paganas upasetikons.
Mals opubons in sol, in mun, in stels; e su taled pö pagans dredäl obinon, e däsper dub lenoid mela e levefas,
du mens lienetikons sekü dred e spets utosa, kelos odrefon volanefi; ibä näms süla ovakulons.
Tän oloegoy kömön Soni mena su lefog ko nämäd e glor mödiks.
Ven dins at primons ad jenön, logolsöd täno löpio, e tovülolsöd kapis olsik, ibä libükam olas binon nilik».
I äsagom ones parabi: «Logolsöd lü figabim e bims votik valik!
Sosus loegols sprötön onis, suemols ito, das hitüp binon nilik.
Leigo if logols, das dins et jenons, osevols, das regän Goda binon nilik.
Vö! sagob oles, menäd at no pasetikon, büä val ujenon.
Sil e tal opasetikons, ab vöds obik no opasetikons.
Demolsöd olis it! No belodolsöd ladälis olsik me dajuit, briet e kuds taledik, das del et no kömonöd no pespetölo pro ols!
Ibä okömon äsä träpakäfod pro mens valik su taled lölik.
Galedolsöd kludo laiduliko, e plekolsöd, das binolsös digädiks ad skeapön se val at, kel okömon, ed ad dajonön olis lo Son mena»!
Delo älejonom in tem; neito äsegolom ed ästebom su bel, kel panemon Learabel.
E pöp valik äkömon gödo lü om in tem ad lelilön omi.

KAPIT: XXII

Zäl bodas no pefemükölas, kel panemon pajad, änilikon.
E lekultans e bibinolavans äsukoms medi, vio ödeidoms omi; ibä ädredoms demü pöp.
Nu diab änügolom ini ‚Iudas‛, kel pänäinemom: di ‚Iscariot‛, balan degtelanas.
Äkömom lü lekultans e cifs tema ad bespikön ko oms, vio ölovegivom omi omes.
Äfredoms dö atos, ed äsludoms ad givön ome moni.
Äbaivögom ko atos, ed äsukom pöti, ad lovegivön omi nensevü menamödot.
Ven del bodas no pefemükölas ikömon, tü kel pajadajipül ämuton pasakrifön,
älesedom eli ‚Petrus‛ ed eli ‚Ioannes‛, ed äbüdom omes: «Gololsöd ad mökön obes pajadi, dat kanobsös fidön»!
Äsagoms ome: «Kiöpo vilol-li, das blümükobs oni»?
Äsagom omes: «Ekö! ven nügolols ini zif, ek okosgolom olis, kel polom vatalufladi. Sökolsöd omi lü dom, ini kel nügolom,
e sagolsöd söle doma: Mastan säkom ole: Kitopo fidalecem binon-li, kö kanob fidön pajadi ko tidäbs obik?
Ed ojonom oles us löpalecemi peblümüköl. Preparolsöd oni us»!
Ägoloms, ed ätuvoms osi, soäsä isagom osi omes.
Ven äbinos düp pötik, älenseitom oki, e tidäbs ko om.
Tän äsagom omes: «Edesirob vemo ad fidön pajadi at ko ols bü suf obik.
Ibä sagob oles, das no plu ofidob osi, büä pufölon in regän Goda».
Tän äsumom köpi, ädanisagom dö at, ed äsagom: «Sumolsöd ati, e seagivolsöd oni bevü ols!
Ibä sagob oles, das no plu odrinob denu de vaet vitidabäla, jüs regän Goda ukömon».
Pos atos äsumom bodi, äsagom dani dö at, äbreikom oni, ägivom oni omes, ed äsagom: «At binon koap obik, kel pagivon pro ols; dunolsöd atosi, ad mebön obi»!
Leigo äsumom köpi, posä ifidoms, ed äsagom: «Köp at binon diatek nulik in blud obik, kel paspilon pro ols.
Ab ekö! nam utana, kel trätom obi, binon ko ob len tab.
Son mena omogolom sio ma utos, kelos pesludon, ab vi! pro men et, fa kel palovegivom».
Ed äprimoms ad säkön odes, kim omas ödunom atosi.
Nu bevü oms feit ädavedon tefü säk, kim omas äbinom gretikün.
Ed äsagom omes: «Regs netas reigoms onis, ed utans, kels laboms nämädi tefü ons, panemons benodans.
Pö ols no binos so; ab utan, kel binom gretikün bevü ols, binomöd smalikün! e cif binomöd äsä utan, kel bötom!
Kim binom-li gretikum; utan-li, kel seatom len tab, ud utan-li, kel bötom? Utan, kel lenseatom, vo-li? Ab ob binob bevü ols äsä utan, kel bötom.
Binols utans, kels ai eblibols lä ob pö blufods obik.
Gerükotob oli me reig, leigoäsä Fat obik egerükotom obi me on;
dat dalols fidön e drinön len tab obik in regän obik, e, seadölo su trons, dalols cödön tefü tribüts degtel Yisraeläna».
E Söl äsagom: «O ‚Simon‛, ‚Simon‛! Ekö! diab esteifom ad sibön olis äsä vuiti;
ab eplekob pro ol, das lekred olik no leläsikonös, e ven seimna uninälikol, nämükolöd täno svistis olik»!
Äsagom ome: «O Söl! klienob igo ad fanäbikön e deadön ko ol».
Ab äsagom ome: «Sagob ole, o ‚Petrus‛! higok no okravom adelo, büä unool kilna, das sevol obi».
Fovo äsagom omes: «Ven älesedob olis nen böb, nen tävasakäd, nen juks, enelabols-li bosi»? Äsagoms: «Nosi».
Tän äsagom omes: «Ab nu, if labol böbi, kesumolöd oni, leigo tävasakädi, ed if no labol glävi, selolöd kloti olik, e remolöd bali!
Ibä sagob oles, das utos, kelos pepenon, muton pafölön pö ob: ‚Pedütedom bevü midunans‛. Ibä pö ob fin kömon».
Atans äsagoms: «O Söl! ekö! is glävs tel dabinons». Äsagom omes: «Ats saidons».
Äsegolom se zif, ed ägolom ma kösöm lü Learabel; i tidäbs omik äsökoms omi.
E ven ikömom us, äsagom omes: «Plekolsöd ad no pablufodön»!
Om it äfagikom de oms zao mö fagot stonijeda, äkienom, ed äplekom:
«O Fat! If vilol atosi, leadolös beigolön köpi at de ob! ab no vil obik, ab vil olik jenonös»!
Tän silanan se sül äpubom lo om, kel äkuradükom omi.
Pädrefölo dub dadredäl, äplekom ai lefäkälikumo, e suet omik ävedon äsä bludatofs, kels äfalons sui glun.
Ven älöädom pos plekam, ed äkömom lä tidäbs, ätuvom omis äslipölis sekü lüg,
ed äsagom omes: «Lio slipols-li? Löädolsöd, e plekolsöd ad no pablufodön»!
Du nog äspikom, ekö! menamödot älükömon, e man labü nem: ‚Iudas‛: balan degtelanefa, äfogolom, ed älüstepom lü Yesus, ad kidön omi.
E Yesus äsagom ome: «O ‚Iudas‛! trätol-li Soni mena me kid»?
Ven utans, kels äbinoms ko om, älogoms utosi, kelos äjenon, äsagoms: «O Söl! odaflapobs-li me glävs»?
E balan omas ädrefom hidünani dalekultana, ed ädecöpom lili detik omik.
Ab Yesus ägespikom: «Stopolsöd! no dunolsöd fovo»! Ädoatom lili ed äsanom oni.
Lü lekultans, cifs tema, e bäldikünans, kels älügoloms lü om, äsagom: «Esegolols-li ko säbs e klöbs äsä ta ravan?
Ven äbinob aldeliko lä ols in tem, no etenükols nami ad gleipön obi. Ab at binon düp pötik olas e nämäd daga»!
Ägleipoms omi, ämodugoms omi, ed äblinoms omi lü dom dalekultana, du ‚Petrus‛ äsökom fago omis.
Ven ifilidoms fili in yad, ed iseidoms okis lä at, i ‚Petrus‛ iseidom oki bevü oms.
Jipul, kel äloegof seadön omi lä fil, älülogof omi japäliko, ed äsagof: «I atan äbinom lä om».
Ab änoom osi, ed äsagom: «No sevob omi, o vom»!
Pos brefüp, votan, kel älogon omi, äsagon: «I ol binol balan omas». Ab ‚Petrus‛ äsagom: «O men, no binob utan».
Latikumo zao mö düp bal, votan älesiom: «Veratö! atan äbinom lä om, ibä binom i Galileyänan».
E ‚Petrus‛ äsagom: «O men! no sevob utosi, kelosi sagol». E sunädo, du nog äspikom, higok äkravom.
Söl ägüflekom oki, ed älülogom eli ‚Petrus‛. Tän ‚Petrus‛ ämemom sagodi Söla, kel isagom: «Büä higok kravom, unoädol adelo kilna obi».
Ägolom plödio, ed ädrenom biedäliko.
Mans, kels ädakipoms Yesusi, äkofoms ed äflapoms omi.
Ätegoms omi me klot, äflapoms sui logod omik, ed äsagoms: «Profetolöd! Kim eflapom-li oli»?
Ed äsagoms omes slänis votik mödik.
E ven del ivedon, bäldikünans pöpa, lekultans e bibinolavans äkobikoms, ädugoms omi ini sanhedrin,
ed äsagoms: «If binol Kristus, sagolöd osi obes»! Äsagom omes: «If sagob osi oles, no okredols obi,
ed if säkob oles bosi, no ogespikols obe, u no olivükols obi.
Denu Son mena oseadom tö flan detik nämäda Goda».
Tän valans äsagoms: «Binol-li üfo Son Goda»? Äsagom omes: «Sagols osi; binob utan».
Tän äsagoms: «Sekü kis neodobs-li nog temunodi? Obs it elilobs ga osi se mud lönik oma».

KAPIT: XXIII

Pos atos, menamödot lölik älöädon ed ädugon omi lü ‚Pilatus‛.
Äprimoms ad kusadön omi; äsagoms: «Eküpodobs, das pöladugom pöpi, das neletom oni ad pelön tripi lampöre, sagölo, das binom Kristus, reg».
‚Pilatus‛ nu äsäkom ome: «Binol-li reg yudanas»? ed ägespikom: «Sagol osi».
‚Pilatus‛ äsagom tän lekultanes e menamödote: «No küpob döboti in man at».
Ab älesioms nog dranikum_-o «Volutükom pöpi dub lejon omik in Yudän lölik, eprimölo in Galileyän jü top at».
Sosus ‚Pilatus‛ älilom dö Galileyän, äsäkom, va äbinom Galileyänan.
E ven älelilom, das äbinom se ziläk ela ‚Herodes‛, älesedom omi lü ‚Herodes‛, kel äbinom ebo ün tim et in ‚Hierusalem‛.
Ven ‚Herodes‛ älogom Yesusi, äfredom vemo; ibä ya lunüpo idesirom ad logön omi, demü utos valik, kelosi ilelilom dö om, ed äspelom ad loegön duinön omi milagi seimik.
Älonülom kludo ome säkis mödik, ab no ägespikom ome.
Lekultans e bibinolavans ästanoms us, ed äkusadoms omi vemo.
E ‚Herodes‛, ko soldats okik, äkofom ed älukofom omi, ädekom omi me klot nidik, ed ägelesedom omi lü ‚Pilatus‛.
Tü del et ‚Herodes‛ e ‚Pilatus‛ ävedoms flens, ibä ibinoms büikumo nefleniks ta od.
Nu ‚Pilatus‛ äkobovokom lekultanis, cifodanis e pöpi,
ed äsagom ones: «Eblinols mani at lü ob, asä eki, kel epöladugom pöpi, ab ekö! edasäkob lo ols omi, ab no cedob omi döbiki demü utos, kelosi kusadols ome.
I no ‚Herodes‛, ibä elesedob olis lü om, ed ekö! nos pedunon fa om, demü kel döbom ad padeidön.
Klu posä getom flapemi, ostadükob libio omi».
(Timü zäladel ämutom gevön plidü pöp libi balane).
Ab menamödot ävokädom: «Moükolöd omi! Gevolöd demü obs libi ele ‚Barabbas‛!
kel äbinom utan, kel demü volut in zif ijenöl, e demü sasen, pifanäböpom.
‚Pilatus‛, kel äklienom ad stadükön libio Yesusi, älüvokädom kludo dönu omes,
ab ävokädoms: «Krodolöd! krodolöd omi»!
Kilidnaedo äsagom omes: «Badikosi kinik edunom-li üfo? Eküpob döboti nonik in om, sekü kel meritom ad padeidön. Klu posä ugetom flapemi, ostadükob libio omi».
Ab äflagoms aiplu lelaodiko, das ämutom pakrodön, e vokäd omas e lekultanas ävedon levemik.
Tän ‚Pilatus‛ äsludom, ad fölön flagi omsik.
Ästadükom libio mani, kel pifanäböpom demü volut e sasen, e kela libükami iflagoms, ed älovegivom Yesusi ma desir omas.
Ven äsedugoms omi, ägleipoms eli ‚Simon‛ seimik se ‚Cyrene‛, kel äkömom de läned, ed ämütoms omi ad polön krodi po Yesus.
Mödot gretik pöpa äsökom omi, bevü kel voms äbinofs, kels äflapofs okis sui blöt, ed äplonofs omi.
E Yesus äflekom oki lü ofs ed äsagom: «O dauts di ‚Hierusalem‛! no drenolsöd dö ob, ab drenolsöd dö ols it e dö cils olsik!
Ibä ekö! dels okömons, ün kels osagoy: beatiks atans binons, kels binons nefluköfiks; bälids kels no emotons; dögs, kels no esügons.
Tän osagoy beles: Falolsöd sui obs! e lubeles: Fegolsöd obis!
Ibä, if dunoy atosi ko boad grünik, ad kis oreifoy-li täno boadi sigik»?
Nog midunans tel pämodugoms ko om ad padeidön.
Ven ikömoms tö top, kel panemon kranatop, äkrodoms us omi e midunanis tel; balani detaflanü, e votani nedetaflanü om.
E Yesus äsagom: «O Fat! Pardolös omes atosi! ibä no sevoms, kisi dunoms». Äseadiloms kübädamo klotis omik.
Pöp ästanon ad lülogön atosi, e ko on i cifs äkofoms omi, sagölo: «Votanis esavom, savomöd nu oki it! if binom-la Kristus Goda, Väläb».
I soldats äkofoms omi, ägoloms lü om, ed äblinoms ome vinigi,
ed äsagoms: «If binol reg yudanas, savolöd oli it»!
E sus om nüpenäd ädabinon, pepenöl me tonats Grikänik, Romänik e hebreyik: ATAN BINOM REG YUDANAS.
Balan midunanas pikrodöl äsagom slänölo ome: «If binol Kristus, savolöd täno oli it ed obis»!
Ab votan äblamom omi, ed ägesagom: «No dredol-li Godi, nu sufol pönodi ot?
Ed obs gideto; ibä edagetobs mesedi pemeritöl, ab om edunom nosi negidöfik».
I äsagom Yesuse: «Memidolös obi, ven ukömol ini regän olik»!
Ed äsagom ome: «Vö! sagob ole, adelo obinol ko ob in parad».
Äbinos zao düp mälid, e dag ädavedon love taled lölik, jü düp zülid,
sol ädagikom, e körten in tem äsleaton zänodo telio.
E Yesus ävokädom me vög laodik: «O Fat! ini nams olik lovegivob lani obik». E me vöds at ädeadom.
Ven kapiten älogom utosi, kelos äjenon, älelobom Godi ed äsagom: «Jenöfö! man at äbinom ritik».
E posä menamödot lölik, kel ikobokömon ad logön atosi, elogon utosi, kelos ijenon, ägegolon oki sui blöt äflapölo.
Sevädans valik omik, ed i voms, kels isökofs omi de Galileyän, ästanons fagoto ad logön atosi.
Ed ekö! man, ‚Ioseph‛ penemöl, liman konsälalefa, man gudik ä ritik,
(kel no ikompenükom konsälami e dunis omsikis) se ‚Arimathaea‛: zif yudanas, ädabinom; äbinom man, kel i äspetom regäni Goda.
Atan ägolom lü ‚Pilatus‛, ed äbegom ome koapi Yesusa.
Ädesumom oni, ävilupom oni ini diled linumastofa, ed äseitom oni ini sepül ini klif pesecöpöl, in kel nog nek iseiton.
Äbinos fridel; jabat äprimon.
Voms, kels ikömofs ko Yesus se Galileyän, äsökofs, älogofs sepüli, e vio koap omik pänüseiton.
Posä igegolofs, ämökofs stöfis benosmelik e miri; e tü jabat ätakädofs ma büded.

KAPIT: XXIV

Tü del balid viga, ägolofs, ko votans anik, mugödo lü sepül ko stöfs benosmelik, kelis imökofs.
Ätuvofs stoni pidetülöli de sepül,
e ven inügolofs ini on, no ätuvofs koapi Söla: Yesus.
Ed ekö! du nog vätälofs ninälo, kisi ämutofs tikön tefü atos, mans tel in klotem nidik ästanoms lä ofs.
Ven ädredikofs vemo, ed äblegükofs logodis oksik taledio, äsagoms ofes: «Lio sukols-li lifölani bevü deadans.
No binom is, ab elelifikom. Memolsöd utosi, kelosi esagom oles, ven nog äbinom in Galileyän!
Son mena mutom palovegivön ini nams menas sinik, e pakrodön, ed olelifikom tü del kilid».
Nu ämemofs vödis omik.
Ven igegolofs de sepül, änunofs atosi valik degbalanes e votanes valik.
Jiatans äbinofs ‚Maria‛ di ‚Magdala‛, ‚Ioanna‛ e ‚Maria‛: mot ela ‚Iacobus‛; e jiutans, kels äbinofs ko ofs änunofs osi paostolanes.
Älecedoms utosi, kelosi äsagofs, luspikoti vagöfik, e no äkredoms ofis.
(Ab ‚Petrus‛ älöädom ed ägolom lü sepül, äbiegädom, ed äloegom seatön te flabis linumik; ädegolom ed ästunom ninälo dö utos, kelos ijenon).
Ab ekö! Tel omas ägoloms ün del ot lü vilag ‚Emmaus‛ penemöl e topöl fagotü hols tel de ‚Hierusalem‛.
Äspikoms ko od dö dins valik, kels ijenons.
E du äspikoms so, ed äcänoms tikodis, Yesus it äkömom lä oms, ed äkegolom ko oms.
Ab logs omsik no äfägons ad memosevön omi.
Ed äsagom omes: «Dö kis spikols-li vegamo so jäfädiko ko od? e sekü kis binols-li lügiks»?
Balan omas, kela nem binon: ‚Cleophas‛, äsagom ome: «Binol-li soelan, kel stebol in ‚Hierusalem‛, e no sevol utosi, kelos ejenon us ün dels at»?
Äsagom omes: «Kis-li üfo»? Ed äsagoms ome: «Dins tefü Yesus di ‚Nazareth‛, kel äbinom profetan, e nämöfik me vöds e duns lo God e pöp lölik;
e jenot, vio lekultans e bäldikünans obsik ecödetoms omi ad deadön, ed ekrodoms omi.
Äspelobs, das äbinom man, kel ölibükom Yisraeläni. E nu ya dels kil epasetikons, das atos valik ejenon.
I voms anik se sogod obsik ebluvükofs obis; ebinofs agödo lä sepül,
no etuvofs funi omik, ed ekömofs ad konön obes, das elabofs igo pubodi silananas, kels äsagoms, das lifom.
Anans obas egoloms täno lü sepül, ed etuvoms dinis, soäsä voms isagofs; ab omi no elogoms».
Tän äsagom omes: «O nentäläktans! kels labols ladäli trögik pö lekred utosa, kelosi profetans esagoms.
Kristus no ämutom-li sufön atosi ad nügolön ini glor okik»?
Nu äprimom ad plänön omes de ‚Moyses‛ e de profetans valik utosi, kelos pepenon tefü om in penäds valik.
Somo änilikoms lä vilag, lü kel ägoloms, ed ädunom, äsva ävilom fövön vegami okik.
Ab ävüdoms omi draniko, sagölo: «Blibolös lä obs! ibä binos tio soar; del ya finikon». Tän ägolom ninio ad blibön lä oms.
E ven älenseatom, äsumom bodi, äbenedom oni, äbreikom oni, ed älovegivom oni omes.
Nu logs omsik pämaifükons, ed ämemosevoms omi. Ab änepubom se logam omsik.
Äsagoms ode: «Ladäl obsik no päfäkükon-li ven äspikom dü vegam ko obs, ed äplänom bibapenädis»?
Sunädo älöädoms, ed ägegoloms lü ‚Hierusalem‛, kö ätuvoms degbalanis, ed utanis, kels iläikoms lä oms, du ikobikoms.
Äsagoms: «Jenöfö! Söl elelifikom ed epubom lo ‚Simon‛».
Ed äkonoms utosi, kelos ijenon dü vegam, e vio pämemosevom fa oms dub breik boda.
Ven äspikoms dö atos, äbinom zänodü oms, ed äsagom: «Püd binonös lü ols»!
Äjekoms, ed äcedoms dredo, ad logön späki.
Ab äsagom omes: «Kio ebluvikols! e sekü kis dots valasotik süikons-li in ladäl olsik?
Logolsöd namis e futis obikis! Binob utan. Doatolsöd obi, e lülogolsöd obi! Ibä späk no labon midi e bomis, äsä logols, das ob labob».
E ven äsagom atosi, äjonom omes namis e futis.
E ven sekü fred no nog äkredoms, ed ästunikoms, äsagom omes: «No labols-li bosi ad fidön»?
Ägivoms ome täno diledi fita pibaköl, e mieli mielaziöbema.
Äsumom onis ed äfidom onis lo oms.
Nu äsagom omes: «Atos binon utos, kelosi esagob oles, ven nog äbinob lä ols, das val, kel pepenon tefü ob in lonem ela ‚Moyses‛, in penäds profetanas, ed in psams, muton pafölön».
Tän äkleilükom dasevi omas, sodas äsuemoms bibapenädis,
ed äsagom omes: «So epenoy, das Kristus ösufom,ed ölelifikom tü del kilid se deadans,
e das ölenunoy stabü nem omik netes valik, leceni e pardi döbotas valik, äprimölo elanes di ‚Hierusalem‛,
ols binols temunans atosa.
Ed ekö! sedob oles promi Fata obik: Oblibols in zif, jüs udagetols löpao nämädi».
Tän äsedugom omis jü ‚Bethania‛, ätovom namis okik ed äbenedom omis.
Du äbenedom omis, äleditom de oms, e pälasumom ini sül.
Äleplekoms omi, ed ägegoloms ko fred gretik dönu lü ‚Hierusalem‛,
ed äbinoms ai in tem, danölo e lelobölo Godi.

---------- oOo ----------

Ninädalised