Gospul ma ‚Marcus‛

KAPIT: I

Prim gospula Yesusa : Kristus, Son Goda, äbinon so:
Soäsä pepenos in penäd profetana : ‚Iesaias‛: «Ekö! lesedob bü ol nunani obik ad preparön ole vegi».
In däsärt vög vokon: «Preparolsöd Söle vegi, kamükolsöd vegis omik»!
‚Ioannes‛ äbitikom in däsärt, ed äblunedom ed äpredom blunedi lecena demü pard sinodas.
E valans se Yudän e se ‚Hierusalem‛ ätevons lü om, ed ons valik päblunedons fa om in flumed ‚Iordanis‛, du äkoefons sinodis oksik.
‚Ioannes‛ nu piklotom me klot jamodaherik, e zönül küirik zü loin, ed äfidom caradis e mieli natädik.
Ed äpredom: «Pos ob balan kömom, kel binom nämädikum ka ob, tefü kel no binob digädik ad dokienön fo om ad livükön küiredis sandalas omik.
Ob eblunedob olis me vat, ab om oblunedom olis me Saludalanal».
Ün dels et Yesus äkömom de ‚Nazareth‛ in Galileyän, e päblunedom in ‚Iordanis‛ fa ‚Ioannes‛.
E sunädo ven äxänom se vat, äloegom slitön sili, e donikön Lanali äsä pijuni sui ok.
E vög se sül äkömon : «Binol Son fa ob palöföl, in kel labob leplüdi».
E sunädo pos atos Lanal ämofon omi lü däsärt.
Ed äbinom in däsärt dü dels foldeg, kö päblufodom fa diab, zänodü nims, du silanans ädünoms omi.
Ven ‚Ioannes‛ pifanäböpom, Yesus ägolom lü Galileyän, ed äpredom gospuli regäna Goda,
äsagölo, «das tim ikömon, e das regän Goda äbinon nilik. Lecenolsöd e konfidolsöd gospuli»!
E ven ägolom ve lak Galileyäna, älogom, das ‚Simon‛ ed ‚Andreas‛ : blod ela ‚Simon‛, äsejedoms filäti ini lak; ibä äbinoms päskarans.
E Yesus äsagom omes: «Sökolsöd obi! ed ovedükob olis päskaranis menas».
Sunädo äzedoms filätis oksik ed äsökoms omi.
Posä ilaigolom boso fagikumo, älogom eli ‚Iacobus‛ : son ela ‚Zebedaeus‛ ed eli ‚Ioannes‛ : blod omik, i in naf, äjäfölis me nätükam filätas.
Sunädo ävokom omis, ed äzedoms fati oksik : ‚Zebedaeus‛ ko dünans omik in naf, ed äsökoms omi.
Nu ägoloms ini ‚Capharnaum‛, e sunädo ätidom ün jabat in sünagog.
Ästunikoy dö tid omik; ibä ätidom as nämätan, e no äsä bibinolavans.
In sünagog onsik nu men labü milanan ädabinon, kel ävokädon:
«He! demü kis mutobs-li jäfön me ol? o Yesus di ‚Nazareth‛! Kömol-li ad päridükön obis? Sevob, kim binol : Saludan Goda».
Ab Yesus äpönom oni, ed äsagom : «Seilö! Segololöd se on»!
E milanan, äkonvulükölo oni, äsegolon ko luvokäd laodik se on.
E valans älestunons, sodas äsäkons odes : «Kis atan binom-li? Kis lejon nulik at binon-li? das büdom nämädo milananis, ed atans lobedons omi».
Sagäd tefü om äpakon suno love züöp lölik Galileyäna.
Ed ilüvölo sunädo sünagogi, ägoloms lü dom elas ‚Simon‛ ed ‚Andreas‛, kobü ‚Iacobus‛ e ‚Ioannes‛.
Lümot ela ‚Simon‛ kel äfifof äseatof in bed: sunädo änunoy ome atosi.
Ägolom lü of, ägleipom nami ofik, ed äkoedom löädön ofi; e sunädo fif älüvon ofi, ed äbötof omis.
Ven soar ikömon, e sol ämodonikon, äblinoy ome malädanis e diabäbis valikis.
Zifanef lölik äkobikon nilü yan.
Ed äsanom mödikanis, kels äsufons malädis valasotik, ed äsejedom milananis, ed äneletom onis ad spikön, bi äsevons omi.
Ün göd gölik, ven nog äbinos dagik, älöädom, äsegolom se zif, ed ägolom lü top soalöfik, ed äplekom us.
Ab ‚Simon‛ e kekompenans omik äsökoms omi.
Ven ituvoms omi, äsagoms ome : «Valans sukons oli».
Ed äsagom omes : «Golobsöd lü vilags nilik, ad predön i us! ibä demü atos esegolob».
So ägolom äpredölo e milananis äsejedölo da Galileyän lölik.
E lepradan äkömom lü om, ed ädofalölo sui kiens okik, älebegom ome: «If vilol, kanol klinükön obi».
Yesus nu ämiserom omi, älenükom nami okik, ädoatom omi ed äsagom ome: «Vilob osi; peklinükolöd»!
E ven isagom atosi, sunädo leprad ämoikom de om, e piklinükom.
E posä iproibom seväriko ome, äleadom sunädo mogolön omi,
äsagom ome: «Prüdolöd, das sagol neke bosi atosa! ab dajonolöd oli kultane, e sakrifolöd demü klinükam ola uti, keli ‚Moyses‛ ebüdülom asä temunodi ones»!
Ab sosus äplödom, äprimom ad nunön valöpo, ed ad notükön dini, sodas Yesus no plu äkanom kömön notidiko ini zif, ab ästebom plödo in tops soalöfik. Ab valöpao äkömoy lü om.

KAPIT: II

Ven ikömom pos dels anik dönu ini ‚Capharnaum‛, äliloy, das äbinom lomo.
Sunädo mens so mödiks äkobikons, das igo nilü yan plad no plu ädabinon, du äspikom lü ons.
Nu lü om lemikan fa mans fol pipolöl äkömom.
E bi dub menamödot no äkanoms kömön lü om, ädesumoms nufi sus plad, kö äbinom, ämekoms us maifodi, ed äsädoms bedi, su kel lemikan äseatom.
Ven nu Yesus älogom lekredi omsik, äsagom lemikane : «O son obik! Sinods pepardons ole».
Nu us bibinolavans anik äseadoms; atans ävätäloms ninälo:
«Lio künom-li ad sagön atosi? Spikom blasfämi. Kim kanom-li pardön sinodis plä God»?
E Yesus, sekü natäl okik, kel äküpom sunädo utosi, kelosi ävätäloms ninälo, äsagom omes: «Kisi vätälols-li ninälo?
Kis binon-li fasilikum, ad sagön lemikane: Sinods olik pepardons ole? ud ad sagön: Löädolöd, lasumolöd bedili olik e zigololöd!
Das nu sevolsös, das Son mena labom su taled gitodi ad pardön sinodis»! (äsagom lemikane:)
«Sagob ole: Löädolöd, lasumolöd bedili olik, e gololöd lü dom olik»!
Ed älöädom sunädo, älasumom bedi okik, ed äsegolom lo valans, sodas valans äbluvikons, älelobons Godi, ed äsagons: «Somikosi neai elogobs»!
Ven ägolom dönu lü lak, menamödot lölik äkömon lü om, ed ätidom ones.
Beigolölo äloegom seadön eli ‚Levi‛ : son ela ‚Alphaeus‛ in tolädöp, ed äsagom ome: «Sökolöd obi‛! Älöädom, ed äsökom omi.
Ed äjenos, ven Yesus älenseatom in dom okik, das tolädans e sinans mödiks älenseatons ko om e tidäbs omik; ibä mödikans ädabinons, kels äsökons omi.
E bibinolavans e farisetans, kels älogoms, das älenseatom ko sinans e tolädans, äsagoms lü tidäbs : «Kikodo fidom-li e drinom-li ko sinans e tolädans»?
Yesus älilom atosi ed äsagom omes : «Utans, kels binons sauniks no neodons sanani, ab malädans. No ekömob ad vokön ritanis, ab ad vokön sinanis».
Seimna tidäbs ela ‚Ioannes‛ e farisetans äcunoms. Nu äkömoy lü om ed äsäkoy ome : »Kikodo tidäbs ela ‚Ioannes‛ e farisetans cunoms-li, e tidäbs olik no-li»?
E Yesus äsagom ones : «Matedakompenans ga no kanons-li cunön, du higam binom lä ons? Dü tim, das higam binom lä ons, no kanons cunön.
Dels okömons, ün kels higam omoom; ün dels et ocunons.
Nek nägon diledi stöfa no pefulöla sui klot bäldik; voto diled nulik penüpladöl odetiron bosi de klöf bäldik, e sleatod ovedon gretikum.
I nek gifon vini yunik ini saks bäldik; voto vin yunik osleiton sakis, e vin omoflumon, e saks onosikons. Mutoy gifön vini yunik ini saks nulik».
Seimna ägolom ün jabat da grenaläned, e tidäbs omik äprimoms ad mekön luvegi dub setirön spigis.
Tän farisetans äsagoms ome : «Ekö! us dunoms utosi, kelos no dalon padunön».
Ab äsagom omes : «Ereidols-li neai utosi, kelosi ‚David‛ edunom, ven äditretom, ed om e kompenans omik äfaemoms?
Vio ägolom ini Godadom timü lekultan ‚Abiathar‛ ed äfidom de jonetabodeds, kels te dalons pafidön fa kultans, e de ats i ägivom utanes, kels äbinoms ko om»?
I äsagom omes: «Jabat pestidon demü men, no men demü jabat:
Sekü atos Son mena i binom Söl jabata».

KAPIT: III

Tü del votik äkömom ini sünagog, ed us man äbinom, kel älabom nami isigiköl.
Älükoy omi, va ösanom ün jabat, dat äkanoyöv kusadön omi.
Ed äsagom lü man labü nam isigiköl: «Kömolöd ad stanön is in zänod»!
Tän äsagom omes: «Pedälos-li ad dunön gudiko u badiko, ad savön lifi eka ud ad deidön oni»? ab äseiloms.
E posä izülogetom zuniko omis, älügom dö düfäl ladöfa omsik, ed äsagom mene: «Tenükolöd nami olik»! Ätenükom oni, e nam omik isaunikon.
E sunädo farisetans ägoloms ad dakonsälön ko elans di ‚Herodes‛, vio äkanomsöv deidön omi.
Nu Yesus äleyilom ko tidäbs okik lü lak, e menamödots gretik se Galileyän ed i se Yudän äsökons omi,
ed i se ‚Hierusalem‛, se ‚Idumaea‛, se län votaflanü ‚Iordanis‛ e se züamöps di ‚Tyrus‛ e di ‚Sidon‛ menamödots gretik, sekü sagäd utosa, kelosi ädunom, äkömons lü om.
Tän äbüdom tidäbes okik ad blümükön ai nafili pro om, demü menamödot, dat no ödränon omi.
Ibä äsanom mödikanis, sodas utans valik, kels älabons döfis, äjutedons lü om, ad doatön omi.
E milanans, sosus älogons omi, ädofalons foi om, ed ävokädons: «Binol Son Goda».
Ab äproibom omes seväriko ad sevädükön kim äbinom.
Tän äxänom sui bel, ed ävokom utanis, kelis ävilom, ed äkömoms lü om.
Ed äcälom manis degtel, ad sogön okis lä om, ed ad palesedön fa om ad predön,
ed ad labön fägi ad sanön malädis, ed ad sejedön milananis,
sevabo, eli ‚Simon‛, kele ägivom näinemi : ‚Petrus‛,
eli ‚Iacobus‛ : son ela ‚Zebedaeus‛, eli ‚Ioannes‛ : blod ela ‚Iacobus‛, keles ägivom näinemi : els ‚Boanerges‛, kelos sinifon: sons tonära,
eli ‚Andreas‛, eli ‚Philippus‛, eli ‚Bartholomaeus‛, eli ‚Matthaeus‛, eli ‚Thomas‛, eli ‚Iacobus‛ : son ela ‚Alphaeus‛, eli ‚Thaddaeus‛, eli ‚Simon‛ : Kanaänan,
e ‚Iudas‛ di ‚Kariot‛, kel eträtom omi.
Ägoloms domio. E dönu menamödot so gretik äkobikon, das no äkanoms igo fidön bodi oksik.
E ven omikans äliloms atosi, äsegoloms ad dakipön omi; ibä äsagoms : «Binom lienetik».
E bibinolavans, kels ikömoms se ‚Hierusalem‛ äsagoms : «Labom ninälo eli ‚Beelzebul‛, e dub cif diabas sejedom diabis».
E posä ivokom omis lü ok, äspikom omes in parabs : «Lio diab kanom-li sejedön diabis?
If regän komipon ta ok it, tän regän no kanon bleibön dabinön.
Ed if dom komipon ta ok it, tän dom no kanon bleibön dabinön.
Ed if diab volutom ä komipom ta ok it, tän no kanom bleibön dabinön, ab ofinikom.
Nek kanom nügolön ini dom mana nämik ad ravön möbemi omik, if no jänom büikumo mani nämik; pas täno kanom beravön domi omik.
Vö! sagob oles : Val popardon ciles menas; sinods e blasfäms valiks, kelis usespikons,
ab if ek slänon Saludalanali, atan laidüpio no odageton pardi, ab döbon sinodi laidüpik.
Ibä äsagoms : Labom lani neklinik».
Nu mot omik e blods omik äkömons, äblebons plödo, ed älesedons eki lü om, ad vokön omi.
Zü om menamödot äseadon, ed äsagons ome : «Ekö! plödo mot, blods e sörs ola stanons, sukons oli».
Ab ägesagom ones : «Kif binof-li mot obik? Kims binoms-li blods obik»?
Ed äzülogedölo love utans, kels äseadons züo zü om, äsagom : «Ekö! Is mot obik, blods obik binons.
Ibä utan, kel dunon utosi, kelosi God vilom, binon blod, sör e mot obiks».

KAPIT: IV

Ven ägolom dönu lü lak ad predön, menamödot gretik äkobikon lä om, sodas ägolom sui naf in lak ad seidön us oki, du mödot menas äbinon su jol laka.
Älejonom ones dinis mödik in parabs, ed ätidom ones so:
«Lilolsöd! Ekö! sovan äsegolom ad sovön.
Ed äjenos, das pö sov, dil äfalon ve veg, e böds äkömons ed äfifidons oni.
Dil votik äfalon sui tops stonagik, kö no älabon taili mödik, ed ädaglofikon sunädo, bi no älabon jüdi bigik taila;
ab ven sol isülöpikon, äsufon dub hit ed äsigikon, bi no älabon vuli.
E dil votik äfalon ini tils, e tils ädaglofikons, ed äteifons oni; prodi no äblinon.
Dil votik äfalon ini tail gudik, ed äblinon prodi; äsüikon, ädaglofon ed ägivon prodi kildegiko, mäldegiko, u tumiko».
Ed äsagom: «Utan, kel labon lilis ad lilön, lilonöd»!
Ven äbinons soeliks, utans, kels äsökons omi, ko degtelanef, äsäkons ome dinädü parab;
Ed äsagom ones: «Oles dasev pegevon tefü müster regäna Goda; pro ons, kels plödons, val jenon medü parabs;
dat, utans logölo, logons e no dasevons, ed utans lilölo, lilons e no suemons; dat no ceinons okis, e dagetons pardi».
Tän äsagom ones: «If no suemols parabi at, lio üfo osuemols-li parabis votik valik?
Sovan binom utan, kel sovom vödi.
Dil, kel efalon ve veg, binon utans, kels elilons vödi, ab pö kels sunädo diab kömom, e mosumom utosi, kelos pesovon ini ladäl onas.
Leigo, ut binon, kel efalon sui top stonagik; sosus lilons vödi, oni lasumons fredo,
ab no labons ninälo vuli, binons mens nen laidäl: ven poso dränäl e pöjut kömons demü lekred, sunädo lefailons.
Votans binons ut, kel pesovon ini tils; atans binons utans, kels lilons vödi,
täno kuds aldelik kömons, e bätod liega, e desirs lü dins votik süikons ninälo, e teifons vödi, sodas blebon nenfrutik.
Ed ut, kel pesovon ini tail gudik binon utans, kels lilons vödi e lasumons oni, e blinons prodi, balan kildegiko, e votans mäldegiko, e tumiko».
Ed äsagom ones: «Lampad dabinon-li ad papladön disi grenimaf u disi bed? No papladon-li sui litikipian?
Ibä nos peklänedon, kel no pasevädükon, ni bos binon klänik, kas ad padasevädükön.
If ek labon lilis ad lilön, tän lilonöd»!
I äsagom ones: «Küpälolsöd ad utos, kelosi lilols! Me maf, me kel mafols, pomafols, ed oles, kels lilols, mödikumos pogivon.
Ibä ai kel dalabon, utane pogivos, e kel no dalabon, de utan utos, keli dalabon, pomosumon».
I äsagom: «So regän Goda binon, äsif men jedülon sidi sui glun,
golon ad slipön e löädon, ün neit alik ed ün del alik, e sid sproton e löglofon, ed on no sevon eli lio.
Ito glun prodon, büiko stagi, täno spigi, täno greni fulik in spig.
Ven gren emadikon, sunädo gebon fodi; ibä klopüp ekömon».
I äsagom: «Ko kis oleigodobs-li regäni Goda, ud in parab kinik omagobs-li oni?
Binon as mutaragran; ven pajedülon sui glun, tän binon smalikün sidas valik, kels falons sui glun,
ab ven pesovon, tän löikon e vedon gretikum ka härbats valik, e spröton tuigis gretik; sodas böds sila kanons nästön in jad onas».
Ed in parabs somik mödik äspikom lü ons, sotefo äkanons suemön onis,
e nen parab no äspikom lü ons, ab tidäbes lönik okik ägivom patiko tuvedoti vala.
E tü soar dela ot, äsagom omes: «Nafobsöd votaflanio»!
Äleadoms mogolön menamödotis, ed äkesumoms omi soäsä äbinom. E nafs votik i äbinons lä naf omsik.
E tep levemik ädavedon, vefs äflumons love naf, sodas äfulikon.
Vüo äseatom ad slipön in pödastir; ko kap oka su kusen. Ab ägalükoms omi, ed äsagoms ome: «O Mastan! No glifol-li, das nafädobs»?
Tän älöädom, äblamom vieni, ed äsagom lake: «Seilolöd! takolöd! E vien änosikon, e stil gretik ädavedon.
Ed äsagom omes: «Sekü kis binols-li so drediks? Kikodo no labols-li lekredi»?
Täno ävedoms vemo drediks; ed äsagoms odes: «Kim om ga binom-li, das i vien e vat laka lobedons omi»?

KAPIT: V

Ed äkömoms len loveflan laka ini län elanas di ‚Gadara‛.
E sosus ilüvom nafi, se sepüls äkosgolom lü om men labü lanan neklinik;
ästebom in sepüls, e nek nog ikanom fimatanön omi, igo no me jänäds;
ibä suvo, ven pitanom me futijänäds e jäns, ädesleitom jänis, ed ädabreikom futijänädis; nek äfägom ad mütön omi.
Laiduliko, dü neit e dü del, äbinom in sepüls e su bels, luvokädölo ed oki me stons flapölo.
Ven älogom fagao Yesusi, älükömom, ädofalom fo om,
ed ävokädom lelaodiko: «Demü kis mutob-li jäfikön me ol? o Yesus! Son Goda löpikün! Lebegob vemo ole nämätü God ad no datomön obi».
(Ibä äsagom ome: «O lanan neklinik! segololöd se men et»!)
I äsäkom ome: «Lio panemol-li»? Ed äsagom ome: «Nem oba binon : Legion, ibä binobs mödiks».
Ed älebegom ome, ad no xilön onis se län.
Nu us nilü bel jep gretik svinas äyebidon.
E milanans älebegons ome: «Sedolös obis lü svins, dat nügolobs ini ons»!
E Yesus ädälom sunädo osi ones. Tän milanans äsegolons ed äninikons ini svins, e jep, kel äbinädon me svins telmil, äjutedon de jol skapik ini lak, ed änoyon in on.
Galedans äfugoms, ed änunoms osi in zif e su länäd; e mens äkömons ad logön utosi, kelos ijenon.
Ven äkömons lä Yesus, ed älogons diabäbi, kel ilabom legioni, äseadöli, piklotöli ä suemäli älaböli, ädredikons.
Logamatemunans äkonons ones jenoti tefü diabäbi e svins.
Ed äprimons ad lebegön ome ad mogolön se topäd oksik.
Ven äboidom oki ini naf, ediabäbölan älebegom ome, ad dalön blibön lä om.
Ab no ädälom ome atosi, ab äsagom ome: «Gololöd lü dom olik lü olikans, e konolöd ones utosi valik, keli Söl edunom ole, e vio emiserom oli»!
Ädegolom, ed äprimom ad nunön in el ‚Decapolis‛ utosi, kelosi Yesus idunom ome, e valans ästunons.
Ven Yesus ilovenafom lü loveflan laka, ed äbinom su jol ona, dönu menamödot gretik äkobikon lä om.
Ed ekö! balan löpalas sünagoga, ‚Iairus‛ panemöl, äkömom, e ven älogom omi, ädofalom foi futs omik,
ed älebegom draniko: «Dautil obik deadikof; kömolös ad suseitön ofe nami olik, dat pasavofös ä bleibofös lifön»!
Äkegolom ko om, e menamödot gretik äsökon omi, ed ädränon vemo omi.
Vom, kel isufof dü yels degtel sekü bludaflum,
ed isufof mödikosi de sanans, ed igebädof demü atos vali, keli ädalabof, e no isaunikof, ab güo ivedof badikum,
äkekömof, ven älilof dö Yesus, i bevü menamödot, ed ädoatof pödao mänedi omik;
ibä äsagof ninälo: «If doatob te mänedi omik, osaunikob».
E sunädo fon bluda isägikon, ed äküpof in koap okik, das isaunikof de maläd at.
E Yesus, kel äküpom ninälo, das näm igolon se om, ägüflekom sunädo oki in menamödot ed äsäkom: «Kin edoaton-li mänedi obik»?
Tidäbs omik äsagoms ome: «Logol ga, das padränol, lio kanol-li säkön: ‚Kin edoaton-li obi‛»?
Ab äzilogedom, ad logön utani, kel idunon atosi.
Vom, dredöl ä dremöl, bi äsevof utosi, kelos ijenon in ok, äkömof ed ädofalof foi om, ed äsagof ome verati lölik.
Tän äsagom ofe: «O daut obik! lekred olik esavon oli. Gololöd in püd! binolöd saunik e pesanolöd de maläd olik»!
Ven nog äspikom, mens de löpal sünagoga äkömoms ed äsagoms: «Daut olik edeadof; kikodo töbol-li nog mastani»!
Ab Yesus, lielöl sagön atosi, sunädo äsagom löpale sünagoga: «No dredolöd! Labolöd te lekredi»!
Ed ädälom neke ad sökön omi, plä els ‚Petrus‛, ‚Iacobus‛ e ‚Ioannes‛ : blod ela ‚Iacobus‛.
Ven nu äkömoms lä dom löpala sünagoga, ed om äküpom lenoidi, e vio lelaodiko ädrenons, ed ävions,
äsagom, ven änügolom: «Kio lenoid e drenals! Jicil no edeadof, slipof».
Ab äbesmilons omi. Posä imoükom valanis, äkesumom ko ok fati e moti jicila e kompenanis okik, ed ägolom lü top, kö jicil äseatof,
ägleipom nami cila, ed äsagom ofe: «Thalita kumi», kelos sinifon: «O jicil! sagob ole : löädolöd»!
E sunädo jicil älöädof ed äzigolof, ibä älabof lifayelis degtel. Ed älejekons mu vemo.
Ed äbüdom ones seväro, das nek ädalon sevön atosi; ed äsagom ad givön ofe zibi.

KAPIT: VI

Yesus ädegolom usao ed äkömom ini lomazif okik, e tidäbs omik äsökoms omi.
Ven jabat ivedon, äprimon ad lejonön in sünagog; e mödikans, kels älilons omi, älejekons, ed äsagons: «Kiöpao labom-li atosi valik? E sap kion pegivon ome, das milags somik padunons me nams omik!
No binom-li kapenan : son ela ‚Maria‛, blod elas ‚Iacobus‛, ‚Ioseph‛, ‚Iudas‛ e ‚Simon‛? E sörs omik, no binofs-li is lä obs»? Ed äskanons demü om.
E Yesus äsagom ones: «Profetan te no pastimom in lomän okik, fa bludaröletans okik, ed in dom okik‛.
No fägom ad dunön us milagi bal, te malädanis nemödik esanom medü namisuseit.
Ästunom dö nenlekred onas, ed äzitevom lejonölo in vilags züik.
Seimna ävokom lü ok degtelanefi, ed äprimom ad lesedön omis a tel; ed ägevom omes nämädi tefü milanans.
Äbüdom omes ad no kesumön bosi dü vegam plä staf; no tävasakädi, no bodi, no moni kuprinik in zönül.
Ädaloms lenükön sandalis, ab no niklotis tel.
I äsagom omes: «If ninikols ini dom, blibolsöd täno us, jüs degolols usao-
Ed utöpo, kö no getedoy olis, ni daliloy olis, delemufükolsöd pö mogol püfi de futs olsik, as temunod ones! (Vö! sagob oles: Obinos sufovikum pro län elas ‚Sodom‛ e ‚Gomorrha‛, ka pro zif et.)
Ädegoloms ed äpredoms, das älecenonsöd!
Äsejedoms milananis mödik ed äsanoms malädanis mödik dub leüledön onis ko leül.
Reg ‚Herodes‛ nu älelilom dö om, ibä nem omik isevädikon. Äsagoy : «‚Ioannes‛ : blunedan elelifikon se deadans; sekü atos näms vobedons in om».
Votans äsagons: «Atan binom ‚Elias‛». E votans äsagons: «Binom profetan, äsä balan profetanas votik».
Ven ‚Herodes‛ älelilom atosi, äsagom: «Atan binom ‚Ioannes‛, keli esäkapob. Elelifikom se deadans».
Ibä ‚Ioannes‛ isagom ele ‚Herodes‛ : «No pedälos ole ad labön jimatani bloda olik».
‚Herodias‛ nu izeilof omi, ed ävilof deidön omi, ab no äplöpof.
Ibä ‚Herodes‛ ädredom pro ‚Ioannes‛, bi äsevom, das äbinom man ritik ä saludik; somo äkälälom sefi oma. E ven älilom omi, äbluvikom, ab ga ädalilom vilöfo omi.
Tü del semik, ven ‚Herodes‛ imeikom tü motedadel okik daifafidedi pro kuranef okik, lebüdans kohortas, e cädans Galileyäna,
daut ela ‚Herodias‛ äninikof, ed äplitof dub danüd okik eli ‚Herodes‛ e kekompenanis omik. Tän reg äsagom jipule: «Begolöd obe aluti, keli desirol, ed ogivob oni ole»!
Ed äfümükom yulo ofe: «Aluti, keli desirol, ogivob ole, ifi obinonöv laf regäna obik».
Ägolof plödio, ed äsagof mote okik: «Kisi obegob-li»? E jiatan äsagof: «Kapi ela ‚Ioannes‛ : blunedan».
E sunädo äninikof spido lü reg, ed äflagof: «Vilob, das givol obe tü timül at su bov kapi ela ‚Ioannes‛ : blunedan».
Reg ävedom vemo glumik, ab demü yul okik e demü kekompenans fideda, no ävilom refudön ofe osi.
Somo reg älesedom boyadi, ed äbüdom ome ad blinön kapi omik.
Atan nu ädegolom, ed äsäkapom omi in fanäböp, änüblinom kapi su bov, ed ägivom oni jipulile, e jipulil ägivof oni mote okik.
Ven tidäbs oma äliloms atosi, äkömoms ad ramenön fui omik, ed äseitoms oni ini sepül.
Paostolans äkobikoms nu lä Yesus, ed änunoms ome utosi valik, kelosi idunoms ed ipredoms.
Ed äsagom omes: «Gololsöd soeliko ve veg at lü top soelöfik, e takädolsöd boso»! Ibä utans, kels äkömoms ed ämogolons äbinons so mödiks, das igo no älaboms timi ad fidön.
Ägoloms kludo in naf ü top soelöfik, ad binön soeliks.
Ab ven mens älogons, das ädegoloms, e mödikans äsevoms omis, se zifs valik ägolons futo usio, ed älükömons nog bü oms tö top et, ed äkobikons lä om.
Ven Yesus äsäboidom oki, ed älogom menamödoti gretik, äkeliedom vemo ko ons, bi äbinons äsä jips nen galedan, ed äprimom ad lejonön ones mödikosi.
E ven nu ivedos vemo latik, tidäbs omik äkömoms lü om ed äsagoms: «Top at no pabelödon, e binos ya vemo latik;
leadolös mogolön onis, dat kanons remön okes bodi in top e vilags züamöpa, ibä no labons bosi ad fidön».
Ab ägesagom omes: «Givolsöd ols ones bosi ad fidön»! Äsagoms ome: «Mutobs-li remön tä zikuls teltum bodi, e givön ones ati ad pafidön»?
Äsagom omes: «Bodedis kimödotik labols-li? Gololsöd ad logön atosi»! Ävestigoms osi, ed äsagoms: «Luli e fitis tel»»
Tän äbüdom valikanes ad seitön okis grupiko sui yeb grünik.
Ed äseitons okis ad grups pösodas tum e luldegas.
Nu äsumom bodedis lul e fitis tel, ed älöpiologölo äl sül, äbenedom, ed äbreikom bodedis, ed ägivom onis tidäbes okik, dat öfoseidomös onis ones; e fitis tel äseagivom valikanes.
Valikans äfidons e päsatükons.
Älasumoy breikotis mö bäsets degtel e dili fitas.
Ed utans, kels ifidons bodi äbinons mans lulmil.
Sunädo ämütom tidäbis okik ad boidön okis ini naf ed ad lovenafön bü onm lü ‚Bethesda‛, du öleadom mogolön menamödoti.
Posä ileditüom oni, ägolom lü bel ad plekön.
E ven ivedos soar latik, naf äbinon zänodo in lak, ed om äbinom soeliko su län.
Ed älogom, das pätöboms ad lainafön, ibä vien äbinon taik. Än neitogal folid ävegom lü oms ägolölo su vat laka; ävilom beigolön omis.
Ven älogoms omi su vat laka spatöli, äcedoms, das äbinom späk, ed äluvokädoms vemo,
ibä valikans älogoms omi, ed äbluvikoms. Ab sunädo äspikom lü oms, ed äsagom: «Binolsöd benoladäliks! binos ob, no dredolsöd»!
Tän äxänom ini naf lä oms, e vien änosikon. Nu ävedoms mu vemo kofudiks, ed ästunikoms.
No idasevoms utosi, kelos ijenon pö bodeds, ibä ladäls omsik äbinons döliks.
Älovenafoms ed äkömoms tö ‚Genesareth‛, kö äjoloms.
Töbo äsäboidoms okis, ed äsevoy, kim äbinom.
Äzigoloy da län lölik, ed äprimoy ad blinön malädanis su polabeds lü top, kö ma sagod äbinom.
Ed alutöpo, kö äkömom, ini vilag, ini zif ud ini vilagil, us ädoseitoy su maket malädanis, ed älebegoy ome ad dalön doatön mänedi omik, if binosöv te kvat ona. Ed alan, kel ädoaton omi, äsaunikon.

KAPIT: VII

Seimna farisetans e bibinolavans anik, kels ikömoms de ‚Hierusalem‛, äkömoms kobo lü om,
e ven älogoms, das anans tidäbas omik äfidoms bodi ko nams neklinik, sevabo, ko nams no pilavöls,
- ibä farisetans e yudans no fidons büä elavons kälöfiko namis oksik, dakipölo vönaoloveikodi büröletanas,
e ven kömons de maket, no fidons, büä elavons okis; so kösömots votik mödik dabinons, kelis demons : lav köpas, kenas, gefas kuprinik, e bedas -
täno farisetans e bibinolavans äsäkoms ome: «Kikodo tidäbs olik no kondötoms-li ma vönaoloveikods büröletanas, ab fidoms bodi ko nams neklinik»?
Ab ägesagom omes: «Gideto ‚Iesaias‛ eprofetom dö ols, o simulans! utosi, kelos pepenon : ‚Pöp at stimon obi ko lips, ab ladäl onik binon fagik de ob.
Vaniko kultons obi me lejonods oksik, kels binons büdeds menas‛.
Ibä nedemols büdedi Goda, e dakipols vönaoloveikodi menas, dubä lavols kenis e köpis, e dunols dinis somik mödik».
Äsagom i omes: «Binos-la jönik, das nefölols büdedi Goda, ad dakipön vönaoloveikodi olsik?
Ibä ‚Moyses‛ esagom : ‚Stimolöd fati olik e moti olik‛! ed ‚Utan, kel malediton fati u moti oka, fümiko odeadon‛.
Ab ols sagols : Utos binon ‚corban‛ (sevabo: givot) kelosi de ob kanolöv frutidön ole,
e täno no plu letols oni ad dunön bosi pro fat u mot oka.
Somo nenämükols büdedi Goda dub vönaoloveikod fa ols pelonöl; e dinis somik mödik dunols».
E posä ivokom menamödoti lölik lü ok, äsagom one: «Ols valik lilolsöd obi e suemolsöd!
Nos plödao ini men niniköl kanon neklinükön oni, ab utos, kel sekömon se on, neklinükon oni.
Utan, kel labon lilis ad lilön, lilonös»!
Ven ilüvom menamödoti ed ikömom ini dom, tidäbs omik äsäkoms ome pläni paraba at.
Äsagom omes: «Binols-li i ols nog so nelärnafägiks? No sevols-li, das val, kel plödao ninikon ini men, no kanon neklinükön oni?
Ibä at no ninikon ini ladäl, ab ini bälid, ed usao kömon ini prifet, so zibs valik klinikons».
I äsagom: «Utos, kelos sekömon se men, neklinükon oni.
Ibä ninälao, se ladäl mena süikons tikods badik, dulters, nepued, sasen,
tif, labiäl, badöf, cüt, nestön, glöt, blasfäm, pleidäl, nensüen,
dins badik valik at süikons se ninäl, e neklinükons meni».
Ädegolom usao ed ägolom lü topäd di ‚Tyrus‛ e ‚Sidon‛. Äninikom ini dom, ed ävilom, das nek ösevon atosi; ab no äkanom blebön klänedik.
Ibä vom, kela dautil älabof milanani, ililof töbo dö om, ed äkömof ed ädofalof foi futs omik.
Vom et äbinof ji-Helänan, pemotöl in Süriyäna-Fönikiyän; äbegof ome ad sejedön milanani se daut okik.
Yesus nu äsagom ofe: «Büikumo cils satikonsös! ibä no pötos ad sumön bodi de cils e lüjedön oni dogiles».
Ab ägesagof ome: «Atos binon sio pötik, o Söl! i dogils dis tab fidons bodabrekülis cilas».
Tän äsagom ofe: «Demu sagod at ola, degololöd! diab esegolom se daut olik».
E ven ikömof ini dom okik, äplakof, das milanan pisejedon, e daut ofik äseatof in bed.
Ven idetevom dönu de topäd di ‚Tyrus‛, ägolom ve ‚Sidon‛ lü lak di ‚Galilaea‛, zänodü topäd di ‚Decapolis‛.
Tän äpoloy lü om sudani, kel töbo äkanon spikön, ed äbegoy ome ad seitön nami omik sui on.
E posä isumom oni soelio fagotü menamödot, ästeigom doatis okik ini lils onik, äspukom, ed ädoatom linegi onik.
Äseifom ed älöpiologölo äl sül, äsagom ome: «Effatha», kelos sinifon: «pamaifükolöd»!
E sunädo lils onik ämaifikons, se nelet linega onik ämoikon, ed äspikom gudiko.
Äbüdom ones ad sagön neke atosi, ab plüo mödikumo äbüdom atosi ones, plüo mödikumo änotükons atosi.
Ed äbluvikons plödakösömiko, ed äsagons: «Edunom vali go gudiko; kodom, das sudans lilons, e das müätans spikons».

KAPIT: VIII

Än dels et, ven menamödot go gretik äkomon, e no älabons bosi ad fidön, ävokom tidäbis okik lü ok ed äsagom omes:
«Keliedob ko menamödot, ibä binons nu lä ob dü dels kil, e no labons bosi ad fidön.
If leadob degolön onis cunöl lü doms onsik, osukubons dü vegam; ed anans onas ekömons fagao».
Tidäbs omik ägesagoms ome: «Lio ek kanonöv-li satükön onis me bod in soalöföp»?
Äsäkom omes: «Bodedis liomödotik labols-li»? Ägespikoms: «Veli».
Ed äbüdom menamödote ad seadön sui glun. Äsumom bodedis vel, äsagom danami, äbreikom onis, edägivom onis tidäbes, ad lovegivön onis; ed älovegivoms onis menamödote.
Älaboms i fitis anik, e posä ibenedom onis, äbüedom seagivön i atis.
Äfidons e päsatükons, e brekotis retik älasumoms mö bäsets vel.
Num utanas, kels ifidons, äbinon zao folmil, ed äleadom mogolön onis.
Sunädo äboidom oki ini naf ko tidäbs okik, ed ävegom lü topäd di ‚Dalmanutha‛.
Farisetans äkömoms ed äprimoms ad feitön ko om : äflagoms de om mali se sül. Äviloms blufön omi me atos.
Dibäto seifölo äsagom: «Sekü kis menäd at flagon-li mali? Vö! sagob oles, menäde at mal no pogivon».
Äzedom omis, ed äboidom dönu oki ini naf ad vegön lü votaflan.
Iglömoms ad kesumön bodi ed älaboms in naf bodedi te bali.
Ven nu ägevom omes nunedi: «Prüdolsöd! galedolsöd olis demü lefapest farisetanas e lefapest ela ‚Herodes‛!
äbespikoms ko ods; das no älaboms bodedis.
Yesus, kel äsuemom atosi, äsagom omes: «Kisi vätälols-li, das no labols bodedis? Labols-li üfo no nog dasevi u suemi? Binols-li üfo so nesuemoviks?
Du labols logis, no logols, e du labols lilis, no lilols. No memols-li,
ven äbreikob bodedis lul pro milats lul, bäsetis me bodabrekots fulikis kimödotikis elasumols-li»? Äsagoms ome: «Degteli».
«E bodedis vel pro folmilans, bäsetis me bodabrekots fulikis kimödotikis elasumols-li»? Äsagoms: «Veli».
Tän äsagom omes: «No nog suemols-li üfo osi»?
Ven äkömom ini ‚Bethsaida‛, äblinoy ome bleinani, ed äbegoy ome ad doatön omi.
Ägleipom me nam bleinani, ed ädugom omi plödü vilag, äspukom sui logs omik, äseidom namis sui om, ed äsäkom ome: «Logol-li bosi»?
Ämaifükom logis ed äsagom: «Logob menis; loegob spatön onis äs bims».
Tän äseidom dönu namis sui logs omik, äleadom maifükön logis, ed inätikom; älogom vali kleiliko.
Tän äkoedom golön omi domio, ed äsagom: «No gololöd ini vilag, e sagolöd nosi in vilag et»!
Usao Yesus ägolom ko tidäbs okik lü vilags di ‚Caesarea Philippi‛, e dü vegam äsäkom tidäbes okik: «Kim mens sagons-li, das binob»?
Ägesagoms: «‚Ioannes‛ : blunedan, e votans sagons: «Elias‛ e votans: balan profetanas».
Nu äsäkom omes: «Ab ols, kim, ols sagols-li, das binob»? E ‚Petrus‛ ägesagom: «Binol Kristus».
Ed äproibom seväriko omes ad sagön eke atosi.
Seimna äprimom ad tidön omes, das Son mena ömutom sufön mödiko, das pödeimom fa bäldikünans, lekultans e bibinolavans, e pödeidom, e das ölelifikom pos dels kil.
Äsagom stedälo atosi. E ‚Petrus‛ äkesumom omi flanio, ed äprimom ad blamön omi.
Ab ädeflekom oki, älogedom tidäbis okik, ed äblamom eli ‚Petrus‛ : «Moö! gololöd poi ob, o diab! ibä no labol tikodis Goda, ab menas».
Tän ävokom menamödoti e tidäbis okik, ed äsagom ones: «If ek vilon slopön obi, tän noädonöd oki, lasumonöd krodi okik e sökonöd obi!
Ibä, kel vilon dakipön lifi okik, utan operon oni, e kel peron oni demü ob e gospul, utan odakipon oni.
Ibä, kisi frutosöv-li mene, if gaenonöv voli lölik, e lan ona sufonöv dämi?
U kisi men givonöv-li tökü lan okik?
Ibä, utan in menäd dulterik ä sinik at, kel jemon demü ob e vöds obik, demü on i Son mena ojemom, ven okömom ini glor Fata okik ko silanans saludik».

KAPIT: IX

Ed äsagom ones: «Vö! sagob oles: semans utanas, kels binons is, no odeadons, büä oloegons kömön nämo regäni Goda».
Pos dels mäl, Yesus äkesumom ko ok eli ‚Petrus‛, eli ‚Iacobus‛ ed eli ‚Ioannes‛, ed äblinom omis lü bel geilik, nendas votans äkomons. Us äcenodom lo oms,
klots omik ävedons nidiko vietiks äs nif, soäsä vietädan su taled no kanom vietädön.
E lo oms el ‚Elias‛ äpubom ko ‚Moyses‛, spikölo ko Yesus.
Tän ‚Petrus‛ äprimom spikami, ed äsagom Yesuse: «O rabinan! binos gudik, das binobs is. Bumobsös tänadis kil! bali pro ‚Moyses‛ e bali pro ‚Elias‛».
Ibä no äsevom utosi, kelosi äsagom, ibä ijekoms vemo.
Nu lefog äkömon ed älovejadon omis, e se lefog vög ätonon: «Atan binom Son fa ob palöföl. Lilolsöd omi»!
E sunädo züo älogölo, no älogoms eki äsä Yesusi, kel äbinom lä oms.
Du änexänoms de bel, Yesus äproibom omes ad konön eke utosi, kelosi ilogoms, büä Son mena ulelifikom se deadans.
Ädakipoms sagodi at ninälo, ed ädisputoms ko ods dö sinif ela ‚lelifikön se deadans‛.
Äsäkoms ome: «Bibinolavans esagoms sio, das ‚Elias‛ okömom büikumo».
Ed ägesagom omes: «Elias» okömom büikumo, ed onätükom vali, e dö Son mena pepenos, das osufom mödiko e ponestümom.
Ab sagob oles: «‚Elias‛ ekömom, ed edunoy ko om, soäsä eviloy; ma utos, kelos pepenon dö om».
E ven äkömoms lä tidäbs, älogoms zü oms menamödoti gretik, e bibinolavanis, kels ädisputoms ko oms.
Sosus menamödot älogon omi, älejekon, älügolon lü om, ed äglidon omi.
Äsäkom omes: «Dö kis disputols-li ko oms»?
E balan se menamödot ägespikom ome: «O mastan! eblinob lü ol soni obik, kel diabäbom me milanan müätik.
Ven gleipon omi, tän däbreikon omi, sodas mud omik skömon, knirom me tuts okik e stifikom. Ebegob tidäbes olik ad sejedön milanani et; ab no äfägoms ad dunön atosi».
Ägesagom ones: «O menäd nelekredik! kilunüpo obinob-li nog lä ols? Kilunüpo osufälob-li olis? Blinolsöd omi obe»!
Ed äblinons omi lä om. E sosus milanan älogon omi, äkodon, das hipul äkonvulom, ädofalom sui glun ed älaitülom oki ko sköm su mud.
Äsäkom fate omik: «Kilunüpo elabom-li atosi»? Äsagom: «De yun omik,
e suvo milanan jedon omi ini fil ud ini vat, ad deidön omi. If fägol osi, miserolös üfo obis, e yufolös obis»!
Yesus äsagom ome: «If fägol osi - sagol - val binon mögik pro utan, kel labon lekredi».
E sunädo fat hipula ävokädom, drenölo, «Lekredob. Yufolös obi pö nelekred obik»!
Ven nu Yesus älogom, das menamödot ärönädon lü om, äsagom ko vög tädöl lü milanan: «O milanan sudamüätik! Segololöd se om, e gegololöd neai plu ini om»!
E ko luvokäd e ko konvuls mödik äsegolon se om, e hipul ävedom äsä fun, sodas mödikans äcedons, das ideadom.
Ab Yesus ägleipom omi len nam omik, älöädükom omi, ed ästanom.
Ven ikömoms lomio, tidäbs äsäkoms ome, ven äbinoms soelik ko om: «Kikodo no äkanobs sejedön oni»?
Äsagom omes: «Sot at kanon pasejedön dub nos, ka dub plek e cun».
Posä idegolom usao, äzitevoms da Galileyän, e no ävilom, das ek äsevon atosi.
Ibä änotükom tidäbes okik, das Son mena pölovegivom menes, kels ödeidoms omi, e das, posä püdeidom, ölelifikom pos dels kil.
No äsuemoms sagodi at, ab no äriskoms ad säkön ome bosi tefü at.
Ven ikömoms ini ‚Capharnaum‛, ed äbinoms in dom, äsäkom omes: «Dö kis espikols-li dü vegam»?
Äseiloms, bi ifeitoms dü vegam dö säk, kim äbinom gretikün.
Tän äseidom oki, ävokom degtelanis, ed äsagom omes: «If ek vilon binön balidan, tän obinon lätikan valanas, dünan valanas».
Pos atos äsumom cili, ed äpladom oni zänodü oms, e bradölo oni, äsagom omes:
«Kel getedon balani cilas somik nemü ob, utan getedon obi, ed utan, kel getedon obi, no getedon obi, ab omi, kel elesedom obi».
Tän ‚Ioannes‛ äsagom ome: «O Mastal! Älogobs eki, kel äsejedom milananis nemü ol, e kel no sökom obis,; e, bi no sökom obis, eproibobs osi ome».
Yesus äsagom: «No neletolsöd atosi! Ibä nek, kel duinon milagis nemü ob fägon ad slänön obi brefüpo pos atos.
Ibä, utan, kel no binon ta obs, binon ko obs.
Ibä, kel givon oles köpeti vata ad drinön, bi binols slopans Kristusa, vö! sagob oles, utan no onelabon bläfodi oka.
E kel skänon balani smalikanas, kels lekredons obi, binosöv gudikum pro utan, das mülaston palägonöv zü särvig onik, e pajedonöv ini lak.
Ed if nam olik skänonöv oli, decöpolöd oni! Binos gudikum pro ol ad lifön pemitulölo, kas vegön hölio ko nams tel ini fil nekvänovik,
utöpo, kö vum onas no deadon e fil no pakvänon.
Ed if fut olik skänonöv oli, decöpolöd oni! Binos gudikum pro ol ad lifön boatiko, kas pajedön ko futs tel ini höl, ini fil nekvänovik,
utöpo, ko vum onas no deadon e fil no pakvänon.
Ed if log olik skänonöv oli, mojedolöd oni! Binos gudikum pro ol ad nügolön ballogiko ini regän Goda, kas pajedön ko logs tel ini höl fila,
utöpo, kö vum onas no deadon e fil no pakvänon.
Ibä alan posalon me fil, e sakrifot alik posalon me sal.
Sal binon gudik, ab if sal nesalöfikon, me kis onätükols-li oni dönu? Labolsöd sali in ols it, e dakipolsöd püdi bevü ods»!

KAPIT: X

Detevölo usao, ägolom lü topäds Yudäna, da län votaflanü el ‚Iordanis‛. Menamödots äkömons dönu lü om, ed älejonom ones, soäsä äkösömom.
Tän farisetans anik äkömoms ad säkön ome, va man ädalom dejoikön jimatani okik. Ädunoms atosi ad blufön omi.
Ägesagom omes: «Kisi ‚Moyses‛ ebüdom-li oles»?
Äsagoms: «‚Moyses‛ edälom ad penön matiteilapenädi ed ad dejoikön so ofi».
Yesus äsagom omes: «Demü düfäl ladäla olsik epenom oles büdi at.
De prim jafa God emekom onis: mani e vomi.
‚Sekü kod at, man olüvom fati e moti okikis, ed oslopom jimatani oka,
ed ons bofik obinons koap midik bal‛. Sodas obinons no plu koaps tel, ab koap midik bal.
Utosi kludo, kelosi God ebalom, men no teilonöd»!
E domo tidäbs äsäkoms ome dönu dö din at,
ed äsagom omes: «Utan, kel dejoikom jimatani okik e matikom jivotikani, dulterom kol of;
ed if vom dejoikof himatani okik, e matikof hivotikani, tän dulterof».
Seimna äblinoy lü om cilis, das ödoatom onis, ab tidäbs äblamoms utanis, kels äblinons onis.
Ab ven Yesus älogom atosi, äbadocedom osi omes, ed äsagom: «Leadolsöd kömön cilis lü ob, no neletolsöd onis! ibä lü somans regän Goda duton.
Vö! sagob oles, kel no lasumon äsä cil regäni Goda, utan no onügolon ini on.
E posä ibradom onis, äseidom nami okik sui ons ed äbenedom onis.
Ven äsegolom sui veg, balan äkömom, äfalom sui kiens okik, ed äsäkom ome: «O Mastan gudik! Kisi mutob-li dunön, ad dagetön lifi laidüpik»?
Yesus äsagom ome: «Liö! nemol-li obi gudiki? Nek binon gudik plä Balan : God.
Sevol büdedis: ‚No sötol dulterön, no deidön, no tifön, no temunön dobiko, no ludämön eki, stimolöd fati e moti olikis‛»!
Äsagom ome: «O Mastan! Atosi valik yunao ai edunob».
Nu Yesus älogedom omi, älöfom omi, ed äsagom ome: «Pö din bal no efölol löliko söti. Gololöd ad selön uti, keli dalabol, e givolöd ati pöfanes, ed olabol divi in sül! Kömolöd täno, lasumolöd krodi olik, e sökolöd obi»!
Tän nefrediko sekü sagod at ädegolom lügiko, ibä ädalabom dalabotis mödik.
Yesus äzilogölo äsagom tidäbes okik: «Kiofikulik obinos pro utans, kels dalabons monemi, ad nügolön ini regän Goda»!
E tidäbs ästunoms dö vöds omik. Yesus nu äsagom dönu omes: «O cils! Kiofikulik obinos pro utans, kels konfidons monemi okik, ad nügolön ini regän Goda!
Binos fasilikum pro jamod ad golön da hog nada, ka pro liegan ad nügolön ini regän Goda»!
Nu äbinoms nog bluvikums, ed äsagoms odes: «Ab kin üfo okanon-li padakipön»?
E Yesus, omis älogedöl, äsagom: «Pö mens atos binon nemögik, ab no pö God. Ibä pö God val mögon».
Tän ‚Petrus‛ äprimom spikami, ed äsagom ome: «Ekö! obs elüvobs vali, ed esökobs oli».
Yesus äsagom: «Vö! sagob oles: No balan, kel elüvon domi, blodis, söris, fati, moti, jimatani, cilis u länedis demü ob e demü gospul odabinon,
kel no odageton tumnaediko, nu in dabinöp domis, blodis, söris, motis, cilis e länedis, sa pöjutis, ed in lananöp lifi laidüpik.
Ab balidans mödik obinons lätikans, e lätikans balidans».
Ven äbinoms su veg lü ‚Hierusalem‛, Yesus seimna ägolom föfo, ed oms äsökoms omi go stuno e dredo. Äkoedom kömön lä ok degtelanis, ed äprimom ad sagön omes utosi, kelos öjenon ko o_-m:
«Ekö! vegobs lü ‚Hierusalem‛ e Son mena polovegivom lekultanes e bibinolavanes. Atans ocödetoms omi ad deadön, ed olovegivoms omi paganes.
Okofoy omi, olebatoy omi, obespukoy omi, ed odeidoy omi; ab pos dels kil olelifikom».
Seimna ‚Iacobus‛ e ‚Ioannes‛ : sons ela ‚Zebedaeus‛ äkömoms lü om ed äsagoms: «O Mastan! vilobsöv, das odunolös obes utosi, kelosi obegobs ole»!
Äsagom omes: «Kisi vilols-li, das odunob oles»?
Äsagoms ome: «Dälolös obes,, das balan obas oseadom detaflanü ol, e balan nedetaflanü ol, in glor olik»!
Yesus äsagom omes: «No sevols utosi, kelosi begols. Fägols-li ad vagükön köpi, keli ob ovagükob, u pablunedön me bluned, me kel ob poblunedob»?
Äsagoms ome: «Fägobs ad atos». E Yesus äsagom omes: «Se köp, se kel odrinob, sio odrinols, e me bluned, me kel pablunedob, poblunedols sio;
ad lonülön : kim oseadom detaflanü ob, e kim nedetaflano, ye, no labob gitodi. Atos podüton utanes, keles peblümükon».
Ven votikans deg äliloms atosi, äprimoms ad badocedön osi eles ‚Iacobus‛ e ‚Ioannes‛.
Yesus ävokom omis lü ok ed äsagom: «Sevols, das utans, kels palecedons plins netas, reigons onis, e das calans gretik onas plägons nämädi tefü ons.
Soik ye no binos bevü ols; ab utan bevü ols, kel vilom binön gretik, mutom binön dünan olas valik.
Ed utan bevü ols, kel vilom binön balidan, mutom binön slafan valikanas.
Ibä i Son mena no ekömom ad padünön, ab ad dünön, ed ad givön lifi okik asä säsinamasakrifoti pro mödikans».
Äkömoms ini ‚Iericho‛. E ven älüvom ko tidäbs okik e menamödot mödik eli ‚Iericho‛, son ela ‚Timaeus‛ : ‚Bartimaeus‛, lubegan bleinik, äseadom len veg.
Ed älilölo, das äbinos Yesus di ‚Nazareth‛, äprimom ad vokädön : «O Son ela ‚David‛, O Yesus! miserolös obi»!
E mödikans äblamons omi, ed äbüdons ome ad seilön; ab ävokädom plüo laodikumo: «O Son ela ‚David‛, miserolös obi»!
Yesus ästopom, ed äsagom : «Vokolsöd omi isio»! Ävokons omi ed äsagons: «Labolöd kuradi- löädolöd! vokom oli».
Atan ädejedom mänedi okik, älöbunom, ed ägolom lü Yesus.
E Yesus äsäkom ome: «Kisi vilol-li, das dunob ole»? Bleinan äsagom : «O ‚Rabboni‛! das okanobös logön»!
E Yesus äsagom ome: «Gö! lekred olik esavon oli». E sunädo ädagetom logami, ed äsökom omi su veg.

KAPIT: XI

Ven änilikoms lü ‚Hierusalem‛, lü ‚Bethphage‛ e ‚Bethania‛ len Learabel, älesedom teli tidäbas okik,
ed äsagom omes: «Gololsöd lü vilag visü ols, e sosus nükömols ini on, otuvols cuküli pefimatanöl, su kel nog neföro men eseadon. Livükolsöd oni e keblinolsöd oni!
Ed if ek sagonöv oles: Kikodo dunols-li atosi? Sagolsöd täno: Söl neodom oni; ogesedom oni sunädo».
Ämogoloms, ed ätuvoms cuküli len yan pifimatanöli, plödo su veg, ed älivükoms oni.
E balans utanas, kels ästanons us, äsäkons omes: «Kisi dunols-li? Kikodo livükols-li cuküli»?
Ägespikoms ones, soäsä Yesus isagom, ed äleadons dunön omis.
Äblinoms cuküli lü Yesus, äseitoms klotis oksik sui on, ed äseidom oki sui on.
Mödikans täno ätenükons klotis oksik sui veg, votikans ädecöpons tuigis labü bleds de bims ed ästürülons onis sui veg.
Ed utans, kels äfogolons, ed utans, kels äsökons, ävokädons: «‚Hosanna‛! Pabenedomös utan, kel kömom nemü Söl!
Pabenedonös regän kömöl Fata obsik : ‚David‛! löpiküno ‚hosanna‛»!
So änükömom ini ‚Hierusalem‛, ed ägolom lü tem, e posä ilogedom vali, e bi ya ivedos latik, älüvom ko degtelans zifi ed ägolom lü ‚Bethania‛.
Ven äsegoloms tü göd fovik se ‚Bethania‛, äfaemikom,
e ven älogom fagao figabimi labü bledem, ägolom lü on, ad logön, va ötuvom bosi len on. Ab ven äkömom lä on, ätuvom nosi, äsä bledis; ibä no äbinos tim figas.
Täno äsagom one: «Nek ofidonöd plu laidüpo flukis de ol»! E tidäbs omik äliloms atosi.
E ven ikömoms ini ‚Hierusalem‛, ed inügoloms ini tem, äprimom ad semofön utanis, kels in tem äselons ed äremons, ädojedom tabis monicänanas e bamis pijuniselanas.
Äletom neki ad polön gefi alseimik da tem,
ed älejonom ones: «No pepenos-li: ‚Dom obik ponemon plekadom pro pöps valik‛? ab ols emekols oni ravanaspadädi».
Ven lekultans e bibinolavans äleliloms atosi, ästeifoms ad päridükön omi. Ibä ädredoms omi, bi menamödot lölik äbluvon dö lejon omik.
Ed ün soar latik äsegoloms dönu se zif.
Tü göd fovik gölik ägoloms ve figabim, ed älogoms, das isigikon vulao.
E ‚Petrus‛, kel ämemom jenoti, äsagom ome: «O rabinan! logolös! figabim, keli emaleditol, esigikon».
E Yesus ägesagom omes: «Labolsöd lekredi in God!
Vö! sagob oles, if ek sagonöv bele ati: Tovolöd oli e sturolöd ini mel! ed if ninälo no dotonöv, das utos ojenon, kelosi sagon, tän atos jenonöv.
Sekü atos sagob oles: Alutos, kelosi plekols e begols, lekredolsöd te, das ogetols osi, ed atos oledutikon lü ols.
E ven jäfols me plekam, pardolsöd, if labols bosi ta votikan! dat Fat olsik in sül i pardomös oles nefölotis olsik-
If no pardols, i Fat olsik in sül no opardom oles nefölotis olsik».
Äkömoms dönu ini ‚Hierusalem‛. Ven nu äzigolom in tem, lekultans, bibinolavans e bäldikünans äkömoms lü om,
ed äsagoms ome: «Sekü gitod kinik dunol-li atosi? e kim egevom-li ole gitodi ad dunön atosi»?
Yesus ägesagom omes: «I ob osäkob oles dini bal. Gespikolsöd obe! ed osagob oles, sekü gitod kinik dunob atosi.
Bluned ela ‚Ioannes‛, äbinon-li se sül u se mens? Gespikolsöd obe»!
Nu ävätäloms ninälo: «If sagobs: se sül, tän osäkom obes: Kikodo üfo no elekredols-li omi?
Ab if sagobsöv: se mens? ädredoms demü pöp: ibä valans älecedons, das ‚Ioannes‛ äbinom jenöfo profetan.
Ägesagoms kludo Yesuse: «No sevobs osi». Tän Yesus ägesagom omes: «Täno i ob no sagob oles, sekü gitod kinik dunob atosi».

KAPIT: XII

Tän äprimom ad spikön lü ons in parabs: «Ek iplanom vitidagadi, ibuidom oni, isebom in on vitidabälipedömi, ed ibumom tümi. Äbailom oni feilanes, ed ämotävom.
Tü tim pötik älesedom lü feilans hidünani ad getön de feilans dili proda vitidagada.
Ab ägleipoms ed äflapoms omi, ed älesedoms omi ko nams vagik.
Älesedom dönu hidünani lü oms, ab atani ästonoms ed ätomoms, ed ämolesedoms omi peviodöl.
E dönu älesedom votani; atani ädeidoms. Nog votanis mödik älesedom, ab de atans äflapoms atanis ed ädeidoms votanis.
Nu älabom nog balani : son fa om pelöföl. Fino älesedom i omi lü oms, äcedölo : Ospaloms soni obik.
Ab daloatans et äsagoms ninälo : Atan binom geran; gö! deidobsöd omi! e gerot obinon dalabot obas.
Klu ägleipoms omi, ädeidoms omi, ed äjedoms omi se vitidagad.
Kisi täno dalaban vitidagada odunom-li? Okömom, opäridükom feilanis, ed obailom vitidagadi votanes.
No ereidols-li in penäds bibik: ‚Ston, keli bumans edeimoms, evedon gulaston.
Atos ejenon ma vil Söla, e binon milag in logs obsik‛»?
Täno ästeifoms ad bemastikön omi, ab ädredoms demü menamödot. Ibä äsuemoms sio, das izeilom omis me parab at. Äzedoms kludo omi, ed ämogoloms.
Seimna älesedoms lü om farisetanis e slopanis di ‚Herodes‛ anikis, ad brulälükön omi medü säk böladik.
Ven atans äkömoms lü om, äsagoms: «O Mastan! Sevobs, das binol men stedälik, e das demol neki; ibä binol men nesekidik, e lejonol ma verat vegami Goda. Pedälos-li ad pelön tripi lampöre, u no? Mutobs-li pelön, u no mutobs-li pelön»?
Ab om, kel äsevom simuli omsik, äsagom omes: «Kio blufols-li obi? Blinolsöd obe sikuli, dat logob oni»!
Äblinoms ome bali. Ed äsagom omes: «Kim atan binom-li? Lio nüpenäd tonon-li»? Äsagoms ome: «Atan binom lampör».
Tän Yesus äsagom omes: «Givolsöd lampöre utosi, kelos duton lü lampör, e Gode utosi, kelos duton lü God»! Ed ästunoms dö om.
I sadukans, kels lesagoms, das lelifikam no dabinon, äkömoms lü om, ed äsäkoms ome:
«O mastan! ‚Moyses‛ ebüdülom obes ‚das, if blod eka deadom, e posbinükom jimatani nen cils, blod oma osumom jimatani omik, ed ofatom posbinanis blode okik‛,
Nu seimna blods vel ädabinoms; balidan äsumom jimatani, e ven ädeadom, no äposbinükom posbinanis.
Tän telidan äsumom ofi, ed ädeadom nes posbinükön posbinanis; kilidan leigoso.
Valans valik äsumoms ofi, e no äposbinükoms posbinanis. As lätik valanas i vom ädeadof.
Pö lelifikam, nu ven olelifikons, de kim omas obinof-li jimatan? Ibä velans valik elaboms ofi asä jimatani».
Yesus ägespikom omes: «No pölols-li tefü dinäd at, bi no sevols penädis bibik, ni nämädi Goda?
Ibä, ven lelifikons se deadam, no matikons, ni pamatükons, ab binons äsä silanans in süls.
Tefü lelifükam it deadanas, no ereidols-li in buk ela ‚Moyses‛, in konot fotüla bramarubudas, vio God äsagom ome: ‚Binob God ela ‚Abraham‛, God ela ‚Isaac‛, God ela ‚Iacob‛?
God no binom God deadanas, ab lifölanas. Pölols kludo vemo».
E balan bibinolavanas, kel ilielom disputön omis, äkömom nilikumo, e bi äsuemom, das igesagom omes gudiko, äsäkom ome: «Kin binon-li veütikün büdedas valik»?
Yesus ägesagom ome: «Balid büdedas valik binon: «Lilolsöd! O Yisraelänans! Söl : God obsik binom Söl balik.
Sötols löfön Söli : God olsik ko ladäl lölik olsik, ko lan lölik olsik, ko täläkt lölik olsik, ko nämäl lölik olsik‛! Atos binon büded balid.
E telid ad at leigöl binon: ‚nowiki‛‚Sötol löfön kemeni olik äsä oli it‛!‚/nowiki‛ Büded gretikum ka ats no dabinon».
Täno bibinolavan äsagom ome: «Verätö! O mastan! Bai verat esagol, das binom balikan, e das plä om votikan no dabinom,
ed ad löfön omi ko ladäl lölik, ko täläkt lölik, ko lan lölik, ko nämäl lölik, e löfön kemeni okik äsä oki it binos gudikum ka holokosts e sakrifots votik valik».
Ven Yesus äküpom, das äspikom täläktiko, äsagom ome: «No binol fagik de regän Goda»! Nek äkünon fovo ad säkön ome bosi.
Nu Yesus äprimom ad spikön, ed äsagom, ven älejonom in tem: «Lio bibinolavans kanoms-li sagön, das Kristus binom Son ela ‚David‛?
El ‚David‛ it esagom ga dub Saludalanal: «Söl esagom Söle obik: Seadolöd detü ob, jüs uvedükob neflenis olik futabami olik‛!
If ‚David‛ it nemom omi Söli, lio üfo binom-li son omik»? Menamödot gretik älilon vilöfo omi.
Pö lejon okik äsagom ones: «Prüdolsöd demü bibinolavans! Löfiloms ad zigolön in klotem gravik, ed ad paglidön su makets,
ad seadön su stuls föfikün in sünagogs, ed ad labön stimapladis pö fideds;
oms, kels luslugoms domis jiviudanas, me kodül, das mutoms plekön lunüpo. Odagetoms micödeti plüo gretikumi demü atos.
Seimna Yesus äseadom visü sakrifamonabog, ed älogedom vio menamödot änüjedon kuprinamoni ini sakrifamonabog. E liegans mödik änüjedons moni mödik,
e jiviudan pöfik äkömof ad nüjedön fenigis tel, kels labons kobo völadi foldila sulda.
Tän ävokom tidäbis okik lü ok, ed äsagom: «Vö! sagob oles, jiviudan pöfik et enüjedof mödikumo ini sakrifamonabog, ka votans valik.
Ibä valans egivons de bundan oksik; of egivof de pöf oka vali, keli älabof, monemi lölik okik».

KAPIT: XIII

Ven älüvom temi, balan tidäbas omik äsagom ome: «O mastan! Logolös! Stons kion, e bumots kion»!
E Yesus ägespikom ome: «Logol-li bumotis gretik et? No bal stonas onas obleibon seitön su votik; val podistukon».
Ven nu äseadom su Learabel visü tem, ‚Petrus‛, ‚Iacobus‛, ‚Ioannes‛ ed ‚Andreas‛, kels äbinoms soeliks lä om, äsäkoms ome:
«Sagolös obes! Kitimo atos ojenon, e dub kis osevobs, das atos valik ofinikon».
Täno Yesus äprimom ad sagön omes: »Prüdolsöd, das nek opöladugom olis!
Ibä mödikans okömoms, ed osagoms, das binoms ob, ed opöladugoms mödikanis.
If olilos dö krigs, dö sagäds tefü krigs, no fäkikolsöd! ibä atos muton jenön, ed atos no nog binon fin.
Ibä net ovolutikon ta net, regän ta regän; in topäds difik taladrems odabinons, e faemaditrets e voluts odavedons. Atos binon prim daveda dolas.
Prüdolsöd! ibä olovegivoy olis lü sanhedrin e lü sünagogs; polebatols e podugols lü provinaguverans e regs demü ob, ad temunön lo oms.
E büiko gospul muton panotükön netes valik.
Ven nu modugoms olis ad palovegivön, no kudolsöd dö utos, kelosi osagols, ab sagolsöd atosi, kelos potikodükon oles tü timül at! Ibä ols no binols utan, kel spikon, ab Saludalanal.
Blod bal olovegivom blodi votik deadio, fat cili okik, cils ovolutikons ta pals okik, ed odeidons onis.
E pohetols fa valikans, demü nem obik; ab utan, kel laidälon jü fin, obleibon padakipön.
Ven logols distuki ledredodik, (dö kel profetan : ‚Daniel‛ espikom) utöpo, kö no dalon binön, (utan, kel reidon atosi, küpälonöd!) das valikans, kels binons in Yudän, fugons lü bels,
utan, kel binon su nuf no doniogolon ini dom ad kesumön bosi se on,
utan, kel binon su läned, no gegolon lü utos, kel epoblibon, ad sumön mänedi okik.
Vi! ün dels et lü voms grodik e sügöls!
Plekolsöd, das fug olsik no ojenon ün nifüp!
Ibä dels et obinons tim ditreta, soäsä no edabinon de prim jafotema Goda jü adel, e neai plu odabinon.
If Söl no obrefükomöv delis et, dabinan nonik obleibonöv dakipön; ab demü väläbs, demü utans, kelis evälom, obrefükom delis et.
If täno ek sagonöv oles: Ekö! is Kristus binom, ud ekö! us binom; no kredolsöd osi!
Ibä els Kristus dobik, e profetans dobik osüikoms, ed odunoms malis e milagis ad pölükön mögiko igo väläbis.
Küpolsöd gudiko! ekö! ebüsagob oles vali.
Ab ün dels et, pos ditret, sol odagikon, e mun no ogivon liti okik,
stels ofalons de sil, e sülanämäds ovakulons.
Täno oloegoy kömön su lefogs Soni mena ko nämäd gretik e glor,
Tän olesedom silananis ed okobükom väläbis okik de vienüds fol, de finot tala jü finot sila.
Lärnolsöd de figabim parabi at: Ven nu tuigs onik müdikons, e bleds sprotons, tän sevols, das hitüp binon nilik.
So i ven loegols jenön atosi valik, osevols, das binos nilik.
Vö! sagob oles: genäd at no opasetikon, büä atos valik ujenon.
Sil e tal opasetikons, ab vöds obik no omoikons.
Ab tefü dels et e düp et nek sevon bosi, igo silanans in sül no sevons osi, ni Son; te Fat sevom osi.
Klu logedolsöd! Galolsöd e plekolsöd! ibä no sevols, kitimo del et okömon.
Binos leigoäsä men, kel egolom ad tävön; elovegivom domi okik, ed egevom dünanes okik guvi ona, alane bligädi, e yanane ebüdom ad galön.
Galolsöd kludo! ibä no sevols, kitimo söl doma okömom, soaro u zeneito, tü tim higokakrava, ud ün göd gölik.
Kodolsöd, ven kömom süpo, das no tuvom olis slipölis!
Utosi, kelosi sagob oles, sagob valikanes: Galolsöd»!

KAPIT: XIV

Latikumo mö dels tel öbinos pajad e zäl bodas no pefemükölas. Lekultans e bibinolavans ästeifoms ad fanön käfo omi e deidön omi.
Ab äsagoms: «No tü del zäla, dat pöp bo no volutonös»!
E ven Yesus äbinom tö ‚Bethania‛ in dom ela ‚Simon‛ : lepradan, ed älenseatom len tab, vom äkömof ko fladil laabatik labü nardaleül rafinik vemo jerik, keli, posä ibreikof fladili, äsegifof sui kap omik.
Anans ädabinons, kels äskanons dö atos, ed äsagons ninälo: «Demü kis zesüdos-li ad spilön benosmelaleüli at?
Ibä at ikanon paselön tä denars plu kiltums; ed atis ikanoy legivön pöfanes; ed äzunons ta of».
Ab Yesus äsagom «Leadolsöd takedön ofi! Kikodo töbols-li ofi? Eduinof vobodi gudik kol ob.
Ibä pöfanis labols ai lä ols, ed okanols benodön onis, if ovilols osi. Ab obi no ai labols.
Edunof utosi, kelosi äkanof dunön : Büo eleüledof koapi obik demü sepülam.
Vö! sagob oles, utöpo in vol lölik kö gospul ponotükon, ospikoy dö utos, kelosi edunof, ad mebön ofi».
Än tim et el ‚Iudas Iscariotes‛ : balan degtelanefa, ägolom lü lekultans, ad lovegivön omi omes.
Ven atans äliloms atosi, äfredikoms, ed äpromoms ad givön ome moni. Ed äsukom pöti ad loveükön omi.
Tü del balid delas boda nenlefik, kü äsakrifoy pajadajipüli, tidäbs omik äsagoms ome: «Kiöpo vilol-li, das blümükobs ole pajadafidädi»?
Täno älesedom telanis tidäbas okik ko komit: «Gololsöd lü zif, ed ek, kel polom vatalufladi okoskömom olis. Sökolsöd omi!
Uto, kö onügolom, sagolsöd domasöle: Mastal sagom: Kiöpo lecem binon-li pro ob, dat kanobös fidön ko tidäbs obik pajadafidädi?
Ed ojonom oles fidalecemi pötöfiko peblümüköli. Blümükolsöd us vali pro obs»!
Tidäbs omik ädegoloms, äkömoms ini zif, ätuvoms osi, soäsä isagom, ed äblümükoms pajadafidädi.
E ven soar ivedon, äkömom ko degtelanef.
Ven älenseatoms ed äfidoms, Yesus äsagom: «Vö! sagob oles, das balan olas oträtom obi, balan, kel fidom ko ob».
Älügikoms, e balan pos votan äprimom ad sagön: «Ob ga no binob-li utan»?
Äsagom omes: «Balan degtelanas, utan, kel blunülom ko ob ini bov,
Son mena omoikom sio soäsä epenoy dö om; ab vi! lü men, fa kel Son mena paträtom! Äbinosöv gudikum pro men et, if no pimotomöv».
E du äfidoms, Yesus äsumom bodi, äbenedom oni, äbreikom oni, ägivom oni omes, ed äsagom: «Sumolsöd ati, at binon koap obik»!
Pos atos äsumom köpi, äsagom danamapleki, ed ägivom oni omes. Valans ädrinoms se at.
Ed äsagom omes: «At binon blud obik diateka nulik, kel paspilon pro mödikans.
Vö! sagob oles, odrinob no plu prodoti vitida, jü del ut, tü kel odrinob oni dönu in regän Goda».
Posä ikanitoms lelobakaniti, ägoloms lü Learabel.
E Yesus äsagom omes: «Ols, valik oskanols (ün aneit dö ob), ibä pepenos: «Oflapob galedani, e jips pospearükons‛.
Ab posä ulelifikob, ofogolob olis lü Galileyän».
‚Petrus‛ äsagom ome: «Ifi valans oskanomsöv dö ol, ab no ob».
E Yesus äsagom ome: «Vö! sagob oles, adelo ün neit ebo at, büä higok ukravom telna, onoädol kilna obi».
Äsagom nog kazetikumo: «Ifi mutoböv deadön ko ol, no onoädob oli». Otosi i votans valik äsagoms.
Tän ägoloms lü top ‚Gethsemani‛ panemöl, ed äsagom tidäbes okik: «Bleibolsöd seadön is, jüs uplekob»!
Äkesumom ko ok eli ‚Petrus‛, eli ‚Iacobus‛, ed eli ‚Ioannes‛, ed äprimom ad vedön lejekik ä dredik,
ed äsagom omes: «Lan obik binon mu dibätiko lügik. Blibolsöd is, e galolsöd»!
Ägolom boso fagikumo, ädofalom sui taled, ed äplekom: «If mögos, leadolös beigolön de ob düpi at»!
Ed äsagom: «‚Abba‛! o Fat! Pro ol val binon mögik. Mosumolös köpi at de ob! Ab no soäsä ob vilob, ab soäsä ol vilol.
Nu ägolom, ed ätuvom omis slipölis, ed äsagom lü ‚Petrus‛: «O ‚Simon‛! Slipol-li? No kanol-li üfo galön düp te bal?
Galolsöd e plekolsöd, das no pablufodols. Lanöf vilöfon sio, ab mid fibon».
Dönu ämogolom ed äplekom me vöds ot.
Ven ägekömom, ätuvom omis dönu slipölis, ibä logs omsik äbinons lefeniks, e no äsevoms ad gespikön kisi.
Ven ägekömom kilidnaedo, äsagom omes: «Laislipolsöd e takädolsöd! Epasetikos. Düp enilikon. Ekö! Son mena palovegivom ini nams sinanas.
Löädolsöd! Golobsöd! Ekö! Utan, kel oträtom obi, binom nilik».
E sunädo, du nog äspikom, ‚Iudas‛ : balan degtelanefa, kobü lusog gretik labü säbs e klöbs, demü lekultans, bibinolavans e bäldikünans, äkömom.
Trätan omik irajanom ko oms mali: «Om, keli okidob, binom utan, gleipolsöd omi, e modugolsöd fümiko omi»!
E stedöfiko ägolölo lü om, äsagom: «O rabinan! O rabinan»! ed äkidom omi.
Atans nu älenodoms omi ed ägleipoms omi.
Balan züölanas ätirom säbi, ädrefom hidünani dalekultana, ed ädecöpom lili omik.
Yesus äprimom spikami ed äsagom omes: «Äsä ta ravan esegolols ko säbs e klöbs ad fanäbükön obi.
Aldeliko äbinob lä ols in tem ad lejonön, e no egleipols obi. Ab atos jenon, dat penäds profetanas pofölons».
Tän valans äfätükoms omi, ed äfugoms.
Ab hiyunan bal äsökom omi, älabom flabi linumastofik zü koap okik, e hiyunans ägleipoms omi,
ab äzedom flabi linumastofik, ed äfugom nüdiko.
Ädugoms Yesusi lü dalekultan, e lekultans, bäldikünans e bibinolavans valiks äkobikoms domü om.
E ‚Petrus‛ äsökom omi fagoto jü yad ledoma dalekultana, äseidom oki lä hidünans, ed ävamükom oki lä fil.
Lekultans e sanhedrin lölik ästeifons ad dagetön temunodis ta Yesus, ad cödetön deadio omi; ab no ätuvons onis.
Ibä mödikans ätemunons dobiko ta om, ab temunods no äbaibinons.
Anans älöädons ed ätemunons dobiko:
«Elielobs sagön omi : Odebreikob temi at, kel pemekon dub nams menas ed obumob ünü dels kil votiki, no dub nams menas pemeköli».
I tefü atos temunods no äbaibinons.
Pos atos, dalekultan zänodü sog älöädom, ed äsäkom Yesuse: «No gespikol-li bosi? Kisi atans temunons-li ta ol»?
Äbleibom ye seilön, ed ägespikom nosi. Nu dalekultan äsäkom ome dönu, ed äsagom: «Binol-li Kristus : Son Palelobölala»?
E Yesus äsagom: «Utan binob, ed oloegols seadön Soni mena detü Nämal, e kömön omi me lefogs sila».
Nu dalekultan äsleitom klotis okik ed äsagom: «Demü kis neodobs-li nog temunanis?
Elilols blasfämi. Kis cödot olsik binon-li? Ad atos valans ästetoms omi döbiki ad deadön».
Anans äprimoms ad bespukön omi, ad tegön logodi omik ed ad flapön omi me pun, äsagölo: «Profetolöd»! I hidünans ägevoms ome liliflapis.
Ven ‚Petrus‛ äbinom dono in yad, balan jidünanas dalekultana äkömof,
älogof eli ‚Petrus‛, kel ävamükom oki, älülogof omi ed äsagof: «I ol äbinom lä Yesus di ‚Nazareth‛».
Änoom osi ed äsagom: «No sevob ni suemob utosi, kelosi sagol». Tän ägolom plödio lü foyad, e higok äkravom.
Ab jidünan, kel älogof dönu omi, äprimof ad sagön lü züölans: «Atan binom balan omas».
Änoom osi dönu. E boso pos atos züölans äsagons dönu lü ‚Petrus‛: «Jenöfö! dutol lü oms, ibä binol Galileyänan ma spik ola».
Tän äprimom ad maleditön oki ed ad yulön: «No sevob meni et dö kel spikols».
Sunädo higok äkravom telidnaedo, e ‚Petrus‛ ämemom utosi, kelosi Yesus isagom: «Büä higok okravom telna, kilna unoädol obi». Ed äbetikölo atosi, ädrenom.

KAPIT: XV

Sunädo ün göd gölik lekultans, ko bäldikünans, bibinolavans e sanhedrin lölik ädakonsäloms. Äjänoms Yesusi, ämodugoms omi, ed älovegivoms omi ele ‚Pilatus‛.
Ven ‚Pilatus‛ äsäkom ome: «Binol-li hireg yudanas»? ägespikom: «Sagol osi».
Ab ven lekultans äsagoms kusadis mödik,
‚Pilatus‛ äsäkom ome dönu: «No gespikol-li? ekö! kusadis kiomödik sagoms ta ol»!
Yesus ägesagom no plu bosi, sodas ‚Pilatus‛ ästunom.
Tü zäladel nu äsäfanäböpom fanäbi, balani kela säfanäböpami ädesiroy.
Nu in fanäböp el ‚Barabbas‛ semik äbinom, ko volutans votik, kels pö volut isasenom eki.
E ven menamödot äkömon ad begön ome utosi, kelosi äkösömom ad dunön,
‚Pilatus‛ ägesagom omes: «Vilols-li, das säfanäböpob oles hiregi yudanas»?
Ibä äsevom sio, das lekultans ilovegivoms omi sekü glöt.
Lekultans äslüdoms menamödoti ad begön buikumo säfanäböpami ela ‚Barabbas‛.
E ven ‚Pilatus‛ äsäkom omes dönu: «Kisi vilols-li üfo, das dunob ko man, keli nemols hiregi yudanas»?
Äluvokädons: «Krodolöd omi»!
‚Pilatus‛ äsagom omes: «Ab badikosi kinik edunom-li üfo»? ed äluvokädons plüo laodikumo : «Krodolöd omi»!
Tän gönü menamödot ägevom libi ele ‚Barabbas‛, e posä ibüedom lebatön Yesusi, älovegivom omi ad pakrodön.
Soldats nu ädugoms omi lü yad, efe cödöpa, ed äkobükoms kohorti lölik.
Älenükoms ome kloti purpurik, äflökoms kroni de spins, ed äpladoms oni sui kap omik,
ed äprimoms ad stimodön omi : «Glidö! O reg yudanas»!
Äflapoms omi me ridastag sui kap omik, äbespukoms omi, äflegoms kienis oksik, ed ädofaloms foi om.
Posä ikofoms so omi, ädesumoms de om kloti purpurik, ed älenükoms ome dönu klotis lönik omik. Tän ämodugoms omi ad pakrodön.
Ämütoms beigolani seimik : ‚Simon‛ di ‚Cyrene‛, kel äkömom de läned : fat elas ‚Alexander‛ e ‚Rufus‛ ad polön krodi omik.
Ädugoms omi lü top : ‚Golgotha‛, kela tradutod binon : kranatop.
Ägivoms ome ad drinön vini ko mir pimigöli, ab no älüsumom oni.
Posä ikrodoms omi, äseadiloms klotis omik, kubädölo, kisi alan ögetom.
Äbinos düp kilid, ven äkrodoms omi.
Nüpenäd kusada omik sus om ätonon : Hireg yudanas.
Ko om äkrodoms ravanis tel, balani detü om, e balani nedetü om,
(so utos pefölon, kelos pepenon : ‚Pedütedom midunanes‛).
Beigolans älukofons omi, älemufons kapis oksik, ed äsagons : «Fi! ol, kel debreikol temi, e bumol dönu oni ünü dels kil,
savolöd oli it, e kömolöd de krod»!
Leigoso i lekultans e bibinolavans äkofoms ko ods omi, sagölo : «Esavom votikanis, oki it no kanom savön,
Kristus, hireg Yisraeläna, dekömomöd de krod, dat logobsös osi, e vedobsös lekrediks»! I kekrodäbs omik älukofoms omi.
Tän de düp mälid dag ädavedon love taled lölik jü düp zülid.
E tü düp zülid, Yesus ävokädom me vög laodik : «Eli, eli, lamma sabacthani»? kelos petradutöl binon : «O God obik! O God obik! sekü kis elüvol-li obi»?
Ven züölans anik älilons atosi, äsagons : «Ekö! vokom eli ‚Elias‛».
Balan ägolom ad blunön spogi ini vinig, äpladom oni sui rid ed ädrienom omi, sagölo : «Stebedobsöd! logobsöd va ‚Elias‛ kömom ad desumön omi»!
E Yesus ävokädom me vög laodik, ed ädeadom.
Tän körten in tem äsleaton telio de löp jü don.
E ven kapiten, kel ägalädom visü om, älogom, vio ideadom ko vokäd somik, äsagom : «Jenöfö men at äbinom Son Goda».
Us voms anik älülogofs fagao atosi. Bevü ofs äbinofs ‚Maria‛ di ‚Magdala‛, ‚Maria‛ : mot ela ‚Iacobus‛ smalik ed ela ‚Ioses‛. e ‚Salome‛,
kels, ven äbinom in Galileyän, isökofs ed idünofs omi, ko mödikans votik, kels igolofs ko om lü ‚Hierusalem‛.
Ven ya ivedos soar, bi äbinos fridel; del bü jabat,
‚Ioseph‛ di ‚Arimathaea‛ : konsälal cädik, kel i äspetom kömi regäna Goda, äkömom, ed äkünom ad golön lü ‚Pilatus‛ ad begön ome koapi Yesusa.
‚Pilatus‛ ästunom, das ya ideadom. Äbüedom kömön kapiteni, ed äsäkom ome, va äbinom ya lunüpo deadik.
E ven ililom osi de kapiten, äletom koapi ele ‚Ioseph‛.
Atan äremom diledi linumastofik, ädesumom omi de krod, ed ävilupom omi ini diled linumastofa; äseitom omi ini sepül, kel pisecöpon ini klif, ed äjapodom stoni foi yan sepüla.
E ‚Maria‛ di ‚Magdala‛ e ‚Maria‛ de ‚Ioses‛ älogofs, kö piseitom.

KAPIT: XVI

Ven jabat ipasetikon, ‚Maria‛ di ‚Magdala‛ e ‚Maria‛ de ‚Iacobus‛ e ‚Salome‛ äremofs kebis benosmelik, ed äkömofs ad leüledön omi.
Ven äbinos nog vemo gölik tü del balid viga, pö sülöpikam sola, ägolofs lü sepül.
Äsagofs ninälo: «Kim odejapodom-li pro obs stoni de yan sepüla»?
E ven älölogofs, äküpofs, das ston, kel äbinon vemo gretik, ya pidejapodon.
E ven änügolofs ini sepül, äloegofs seadön detaflano hiyunani, in klot vietik piklotöli, ed äbluvikofs.
Ab äsagom ofes: «No binolsöd bluviks! Sukols Yesusi di ‚Nazareth‛, kel pekrodom. Elelifikom. No binom is. Ekö! us binon top, kö eseitom omi.
Ab gololsöd ad sagön tidäbes omik ed ele ‚Petrus‛, das ofogolom olis lü Galileyän. Us ologols omi, soäsä esagom oles».
Äsegolofs se sepül ed ädespidofs. Drem e lejek ifanetons ofis, ed äsagofs neke bosi atosa; ibä ädredofs.
(Ven Yesus ilelifikom ün göd gölik dela balid viga, äpubom balidnaedo lo ‚Maria‛ di ‚Magdala‛, se kel isejedom milananis vel.
Jiatan ägolof ad nunön osi utanes, kels ibinons lä om, e kels älügons ed ädrenons.
Ven atans älilons, das älifom, e pilogom fa ofs, no äkredons osi.
Pos atos epubom, in maged votik, lo telans onas, kels äzigolons ed ägolons länädio.
I atans ägoloms ad nunön osi votanes, ab i ons no äkredons omis.
Poso epubom lo degbalans, ed äriprodom omes nekredi e düfäli omas, bi no ikredoms utanis, kels ilogons omi, pos lelifikam omik.
Ed äsagom omes: «Mogololsöd ini vol lölik ad predön gospuli lifanes valik!
Utan, kel ulekredon e publunedon, podakipon, ab kel no ulekredon pokondanon.
Lü utans, kels ulekredons, mals at odutons: Osejedons milananis nemü ob, ospikons pükis nulik.
Otovons snekis; e no odämükos onis, üf drinons bosi deidöl. Oseidons namis sui malädikans, ed osaunikons».
Tän Söl, posä ispikom lü ons, pelasumom ini sül, e seadom detü God.
Oms esegoloms ed epredoms valöpo, e Söl äkeyufom ed äzepom sagodi omas me mals, kels äsökons ati).

---------- oOo ----------

Ninädalised