Gramat Volapüka/C. Ladyek
| ← B. Lartig | C. Ladyek Gramat Volapüka |
D. Numavöds → |
50. Ladyek labon finasilabi: ⸗ik, me kel ai binon sevädovik. Sams: jönik, pöfik, blägik.
51. Kösömö ladyeks binons nemediko po subsat, lü kel dutons. Pö jenet at ladyek no padeklinon; if papladon ye fo subsat, ud if padeteilon fa vöds votik: no ladyeks‹ de subsat oka, ladyek lensumon deklinamali subsata, lü kel duton. Sams: doga gretik; jipule löfik; fati gudik; bels geilik.
52. If ladyek soelon, klu if no patanon len subsat, padeklinon äs subsat. A.s.: Sumolöd penis gretik, e givolöd obe smalikis.
2353. If ladyek soelöl malon pösodi, defomoy de on subsati dub lenlägam poyümota: ⸗an. A.s.: Liegikans e pöfikans.
54. If patöf, keli ladyek notodon, patikodon soelölo, kanoy defomön de ladyek at subsati dub lenlägam poyümota: ⸗os. Subsat so pedefomöl diston boso tefü subsat rigik, de kel ladyek tefik pidefomon. Leigodoyöd sinifis vödas: gud e gudikos in sams sököl!
Gud voma at binon levemo gretik.
Gudikos yegeda at moikon dub stül grobik, ön kel pelauton.
55. Plä fom me el ⸗ik finiköl ladyeks labons nog gramatafomis ad leigodön dinis difik. Tefü leigodam gramatik at distidoy gredis kil, sevabo:
| 1. fümafom, | 2. pluamafom, | 3. muamafom. |
Fümafom ladyeka binon fom, kel finikon me el ⸗ik. Pluamafom pafomon dub lenlägam poyümota: ⸗um, e muamafom dub lenlägam poyümota: ⸗ün len fin fümafoma ladyeka. Sams:
| gudik, | gudikum, | gudikün; | ||
| nulik, | nulikum, | nulikün; | ||
| yunik, | yunikum, | yunikün. |
56. Konyun po pluamafom (latino: ‚quam‘ [kwám, kvám]) binon el ka. A.s.: Planets fol binons gretikums ka tal.
57. Muamafom kanon malön gredi gretikün u patöfi in gred vemo gretik. If muamafom pagebon ad malön gredi gretikün, yeg u patöf tefik paleigodon lä votiks mödota seimik yegas u patöfas. Pö jenet at yegs u patöfs kösömo binons in genitif u pabefoons fa bal präpodas: de u se. Sams:
El Canopus [kánòpuš] binon gretikün stelas logädik valik.
De pods at son oma esumom benosmekiküni.
Jipulil ävälof jöniküni se pups ofe pijonöls.
Muamafom, kel malon patöfi in gred gretikün panemon muamafom verik e binon binälo fümafom pevemüköl. Muamafom verik at kanon dönu pavemükön me ladvärb: mu. Sams:
O vomül löfikün!
Flen divodikün ola.
Cil mu plütülikün at binon sonil bloda obik.
| ← B. Lartig | C. Ladyek Gramat Volapüka |
D. Numavöds → |