Gratulazion di cari curazians da Bula
Gratulazion di cari curazians da Bula.
- SUL St. InUeM DeL sIn. Ujep CUrat In BULLa.
- (de Seniëur Matie, 1828).
1.
Aliegri nëus da Bula!
Fajëve ncuei unëur!
Ne sparaniede nula
Al di de nosc pastëur!
Vo uemes jide dant,
Tulëve l bel guant!
I autri po prëst do,
La vedles drët de do!
2.
I uemes tole chitli,
La breies la fenans!
Scichëde su chi pitli,
Scichëve, vo mutans!
Tulëde mo, vo grandes
Sul cë bela gherlandes!
La vedles per unëur
L gran scuac da fëur!
pagina:64
3.
Cun bela pruzescion
A per, a man a man,
Po deberieda jon,
Cigan y bel ciantan;
Tulon l gran tamburdl
Che tire n drë gran urdl,
Che l aude chëi che vën
Y scote su dassënn.
4.
I vën duc chëi da Bula,
Ciantan, sunan, cigan.
No mé la vedla Lula
Per ve prië de pan.
L ie cossa de mpurtanza,
Bincion de vera panza,
De vere cuer, sci, sci!
Fertuna for vosc di!
5.
Auguron a seniëur curat
Che l stebe drët nton.
Ël ie daniëura stat
Cun nëus valënt y bon.
Die debe si aiut,
Che l vive mo drët giut.
Da nëus daniëura amà,
Tan giut ch' ël mei sarà.
6.
Giauride su la musa
Y duc ciantëde do.
Degun ne tire scusa
Y sveie chël che l po,
Per fin che on saliva,
Svaiede pu mé: viva!
Viva seniëur curat,
Nsci saral bën fat.
7.
L ie stat na desfertuna,
Che duta Bula l sà.
Y duc bradlova aduna,
Che l Pimperl ie cherpà.
Di cians i plu valënc
Zanovel bel cui dënz.
Capiva prëst: Wart auf!
Geh, Pimperl, frißt und sauf!
8.
Y chël pitl ucel,
Che fova propi blot,
Ciantova drë tan bel,
Al dat a Mëine Cot.
Mi bon seniëur curat!
Tlo ëise fat damat.
Ie muesse drë ve l dì
Vo dassëis mé ve l tenì.
9.
Dut chël che ve ie de uega,
Messëise ve tenì.
Sce un ulëssa la cuega
Dijëise pa de sci?
Ie crëie bën de no.
Ma sce un la uel pa mpo
Per śën se maridé,
Messëis mpo i la dé.
10.
O bon seniëur curat!
Audide aboncont!
Ne sëise pa tan mat,
A jì mo sëura mont.
Vo sëis mo jëunn y sann,
Per nëus fossel n dann.
Sarëis bën mo zacan
Mpo giut assé pluan.
11.
Pastor de nosta ana!
Menënes su al ciel,
Ulache n maia mana
Y drë bon nioch da miel.
Vardëde nosc mutons
Da biesces y castrons!
Vardëde la fenans,
Chëla furbes de mutans!
12.
Svardënes dai malans,
Crauniede chëi lumberc,
Dijëde ala mutans
De no fé plu basterc!
Vardëde che deguni
Sëura y sot Cuntruni
Ne vede a se dané
Tl infiern po a cheghé.
pagina:65
13.
Svardënes dala stries,
Rie ëiles dl malan.
Les ie diaulmënter ries,
Nes fej suvënz gran dann.
Nes tira sula cresta
Na bela gran tampesta.
Per Triech ciacëles ju,
Fajëi la crëusc lessù.
14.
Les ie tel vedla pestes,
Che n' à mo mei giapà.
Les ie mpo mo lestes
Y sauta n crëp ca y là.
Les prueta sun Bulacia,
Fajëi mé n pue la ciacia.
Mustrëi vosc puni senià,
Udëis pa che les va!
15.
Śën ons bel ciantà,
Śën dëssel pa basté.
Nëus on dl dut bincià;
Śën jons a gusté.
La cuega porta su
Dl dut assé y plu.
Da bever plu che assé,
Che n posse drët cighé.
16.
Salute! bon seniëur!
Cul got n tla man
Buvons a Vosc unëur,
Vivëde giut y sann!
Ncuei de Vosta festa,
Sciaudonse drët la testa.
Stajon aliegramënter,
Potztausend sapramënt!