Gretchen Grosser's Fertälstere in dän GA, 2012

<< Haudsiede
<< Uursichtssiede Gretchen Grosser's Fertälstere in dän GA

Düsse Siede is noch in Oarbeid

- 2012 -

23.06.2012 - So wäide iek gans goadelk oolde Reewen loos

- Wäl twäin Rokke häd, skäl aan oureeke

Knu hieden wie Geschwistertreffen in Oeding. Wät hääbe wie uus aal moal wier fertäld fon fröier un aleer. Mien Suster Angela kuud sik so goud deerap besinne, dät iek mie fröier altied so flugge Kloodere koopede of uk wäil bloot Göitjen deerfoar. Uus Määme säide ja uk froaie Kloode. Un so kude Angela dann uk masse Kloode seküür beliekteekenje un wiste uk, dät uus Määme maasttied schuulden häd, wan iek al wier moal bie Aden ap`t Fähn weesen waas un fonsäärm wier wät meebroacht hiede.

Iek weet oaber uk noch gans genau, dät mien bee Sustere sik uk mäd mien Kloode fain moakeden, wan jo tou’n Biespill een Rändezufuß hieden. „As Franz fon Hollnerfoan die bestoalt hiede, lookst du dän Klood in Türkis fon mie oun un lietst so fain deermäd, un hie koom nit“, kwaad iek tou mien jungste Suster. Fonsäärm, dät wiste ju uk noch goud, wie hääbe aal mädnunner so deeruur laached un Spoas häiwed. Wier sunt bloot aal do Seeken blieuwen? fräigje iek mie, do hieden wie dälich ja wäil wier ounlukke kuud.

Iek staale mie foar, wie hieden uk noch aal dät Wierk deertou abbewoart, uus Skappe sunt al so ful un appe Been dröömt uk noch sofuul foar sik wai.

Nu bän iek ounfangt, wächtoureeken. Toueerst hääbe iek mien KlooderSkap uutmjuksed. Do maaste Seeken paasje mie nit moor, uumdät jo mie tou groot sunt. Deerrum alles, wät Grööte 44 hiede, ruut uut mien Skapp. Do roate dät oaber al Bott! In Säptämber gungt dät wier ätter Litauen, un do Ljude fraue sik uur mien noch goude Blusen, Kloode un Rokke.

Trännt hääbe iek mie uk fon ful Bouke. Gertrud kreech alle Romoane fon mie foar uus Pfarrfest. Un Gregor broachte 58 oolde Skoulbouke ätter`t Skoulmuseum in Folmhusen. Wät waas ju Frau Reuer bliede! Deer sunt mien Schätse am bäästen abbewoart, uk, wan iek nit moor appe Wareld bän. Uurs loundet womuugelk alles in Säidelsbierich.

Mäiden gungt dät fääre. Toueerst smiete iek Tällere un Tassen ruut, do deer bloot so hääruumestounde. Wät wol iek deermäd? Tou Tied kon iek man bloot uut aan Teekop drinke, iek mout bloot appaasje, dät iek sofuul behoolde, dät iek sofuul Tassen in mien Skap hääbe, dät mien ljoowe fräiske Autorinnen fon uus Schriewerkoppel noch Tee bie mie drinke konnen un nit riegeuum uut een Tasse drinke mouten.

Bit die Transport ätter Litauen losgungt, mout iek uk noch mien Wääskeskap truchkiekje. Deerfon kon uk noch so moonich Uurträksel mee appe Raise gunge. Do Kartons mäd do oolde Reewen duurn oaber ap goar naan Fall loange bie uus stounden blieuwe. Dan kuud iek deer noch moal wier biegunge un wät wier ruut nieme. Iek mout fluks Anita anroupe, uumdät ju do Klamotten ouhoalt. Dan is ju groote Gefoar foarbie.

Wan iek straks kloor bän mäd aal mien Uutrüümjen un Wächsmieten, kon iek so as Rita kweede : Mäd minner Gepäk raised sik dät lichter.

Gräitje uut Roomelse

- 16.06.2012 - Dän näie Koaster Niemöller moaten alle Sköilere so aiske jädden liede

- Wieruum Lucas Mariechen nu wier jädden ättere Skoule geen

Iek koom in’t trääde Skouljier, as Koaster Niemöller 1922 ätter Roomelse koom. Hie hiede ja wisse al bie Kobs Läine, wier hie inne Kost waas, deerfon heerd, wo dät bie uus inne Skoule deerhäär geen un wo die lääste Koaster Boschenhenke fon sien Sköilere fäksiert wuden waas.

Niemöller stuud nu foar uus. Iek kon mie noch seküür äntsinne, wät sien eerste Woude wieren: „So habt ihr also immer in den Bänken gesessen!“ Älk liech of siet so as hie wüül. Fon nu of an wude dät oaber uurs. Dät geen nu alles sachtsinnich tou, böalked wude nit moor. Wie aal moaten fon ju eerste Uure an KoasterNiemöller so jädden liede, un nit bloot iek fraude mie altied ap Schoule.

Nu hieden wie uk Natur- un Erdkunde. Deerfoar hiede uus Koaster besunners ful uurich. Bie froai Weeder geen dät hääruut in Goades froaie Natur. Niemöller noom smoals sien Fuugele- un Ploantebouk mee, un dan geen dät ap Oosternboarch an. Twiske Akram Geert un Akram Härm liech sun Stuk Lound, wät nit beoarbaided wude.

Deer wiesede uus Koaster uus dan Ploante un leerde uus, wo jo hieten un wierfoar of wierjuun do goud sunt. Fuugelnääste bekeeken wie uus uk wäil mädnunner. Wie lusterden tou, wo do Fuugele soangen, un Niemöller kuud uus tälle, wo smoals die Fuugel hat, die deer juust soang. Altied sneeundeeges sunt wie uur en ganse Tied ätter Umme Heede tou geen. Dät waas uk ap Oosternboarch, so Göttken juunuur (nu Dockmann). Ljude hieden deer wäil altied Sound wächhoalt, un deeruum waas deer nu sun fräie, lieke Steede. Deerap hääbe wie mädnunner dät Ooldenburger Lound apteekent mäd älke Stääd un Täärp, Äi un Meer. Foar do Meere un Äie wieren äkstroa littje Goate moaked, wier fonsäärm uk Woater oane waas. So leerden wie bliede spieljend.

Uus Koaster wiesede mäd sin Stok ätter sun Steede, un wie tälden him, dät deer Ait lait un wieder in’t Suude Damme un naibie die Dümmer See. Uur ju ganse Tied, wier wie dät in Sound abbauden, is nit insen wät stukken moaked wuden. Wan wie een Wiek leeter wierkoomen, waas alles noch so, as wie dät ferlät hieden. Dät hiede dälich moal weese moast. Dan waas bestimmt alles stukken hauen wuden.

Al 1926 wude Koaster Niemöller fersät. Tildes Joop weet dät noch so as däälich, dät do Skoulbäidene so bedröiwed uum him huuld hääbe. Hie häd dät säärm blouked, as hie 1926 as I-Männken ättere Skoule koom.

Fertäld: Lucas Mariechen

Apschrieuwen: Gräitje uut Roomelse