He Inoa no Kalaninuiahilapalapa
I
A he Wehi keia no Kaiulani
No ka Wohi kukahi lei a Kapili
A he pua Loke no Ainahau
Maoli Iliahi no Hawaii
Opuu liko hou no ka Hikina
No ka La hiki mai ma Kumukahi
Hookahi mea hou ua lono ia
Ma ke Kapikala nani a o Honolulu
A he lono Lanakila no ka Lahui
Me ka noho Kalaunu a o na Lani
Ua kui e ka lohe puni ke Kaona
Ua mau ke Ea o ka Aina
Welo haaheo e ka Hae Hawaii
Ma na welelau a o ka Honua
Aohe hana e a ka puuwai
A e pauma nei me ke aloha
Ua piha ka manao i ka uilani
No ka lono hauoli ua hiki mai
I lawea mai nei o ka Monowai
Nene aukai a o ka moana
Nawai no la e pakele aku
A he hana noii na ka imi loa
He loaa i ka welelau lihilihi
I ke kii hooheno a ka onohi
He Onohi pua ia no ke Kalaunu
A he lei no Kalani puuwai Kila
Kilakila kapukapu ke ike aku
Ka hiona o Kalaniahilapalapa
Me he pua hau ala no Maluaka
Ka popohe ohaoha i ka lihi wai
Nawai e ole hooheno ia
A he liko Ahihi no Panaewa
Aia i ka nua lehua o Hilo
Ka paia aala i ka uka o Puna
Ko leo e Kalani kuu i ka nahe
Kaili puuwai ke lohe aku
Pupukanioe no ke kuahiwi
Kahuli leo lea no kanahele
Ua nani hiehie oe e Kahiwa
E ka Wohi kukahi a o Hawaii
Haina ko Wehi kau i ka Hano
O Kawekiulani kuu Haku ia.
II
He inoa Nou e Kalani Lunalilo
Kamalei a Liliulaniikekapu
Ua kapu no Oe a he hiwahiwa
A he pua Kalaunu no Hawaii
Aia ko kino a i Enelani
I ka uluwehiwehi a o Ladana
E imi ana i ka naauao
I pono hoi no ka noho Kalaunu
Me ko Hae nani oi kelakela
A ka puuwai a e haaheo ai
Ua halialia aku ke aloha
O na kaiaulu o ka Aina
O ka nalu hai o Kalehuawehe
A e ne hone ana i ka ae one
Ka makani holu nape i ka lau Niu
Halihali moani no Kahaloa
Na pua aala o Ainahau
E mapu hu ana i ke onaona
Kahiko mau ia no ia home
a ka Wohi kukahi e walea ai
Me he wai mapuna ala ka huahuai
Ke aloha o Kalani e pipii ana
I ka lohe ana aku nei i ka lono
Na hana hookohu a ke Kolea
Hoopunana ana me ka maalea
I ka hua Koae hapa Aiko
Ua pii ka ena o na Hilana
Na keiki o ke kipuka ili
O ehuehu mai e ka Liona
Hoolale na moku Akimalala
Hoeu o ka Bea noho kuahiwi
Uluhua i ka leo o ke Kolohala
I ke kapu alapahi a na manu
E wa mai la i Amerika
Ilaila o Kalani wela ka manao
Hana e ke aloha i ka puuwai
Kau mai na maka no Hawaii
No ke one hanau o ka makua
Ka pipii aku a ke Ao Aina
Ka Opua hoohaehae Naulu
Liuliu o Kalani no Nu Ioka
Alo mai o ke kai hanupanupa
Mea ole wale no ia kai loa
I ka pua nani a o Ainahau
E imi ana i ka pono kaulike
Me ka laahia o ka noho Kalaunu
No ka Hae Hawaii welo haaheo
Me ka leo aloha o ka Lahui
Ao’i hopo iho o Kawekiu
Ka imina i ka pono o ka Aina
Aia no a ike kumaka
Launa pu me ka Peresidena
Hakalia ole iho ka manao
Ka iini o Kalaniahilapalapa
I ke kono ae no a ke aloha
Paila hana mau i ka nui kino
A he ui ninau na Kaiulani
Pehea ka manao e Kiliwalana
Eia hoi Au ua hiki mai
No Ko’u kuleana i ke Aupuni
Ua puni paha oe i ka pelo ia
E ka Alopeka hulu kalole
Ua pololei oe e ka Loea
E ka Lei Momi a Kekauluohi
Ua ike maka iho nei hoi A’u
Na hana epa a ka manu Pikake
A e peepoli ana me ka punua
Ma ka rumi kapu o ka Hale Keokeo
E kilohi ana i ka hulu eheheu
I ka pulu i ka ua Kukalahale
Ka alawa ana iho kihi e ka maka
Hananee kela i ka papahele
Ua kuhihewa paha a he aniani
A i lana haakei ai ka manao
Ua hewa ke kalohe hua Makeke
Ua wela e ka waha puu e ka nuku
Aole e pakele ua lima nui
Ua ku i ka hewa Amerika
Me oe ke aloha Waianuhea
E ka pua Loke Lani a o Ladana
E hoi e ka Wohi noho i ke kapu
E ka noiau o ka lai a Ehu
Ehuehu o Kalani ko ka manao
Lanakila mau loa mai luna mai
Ike ia Hawaii oia ka oi
Ka Hoku nani o ka Pakipika
He aloha i ka maka ke ike aku
Ka awihi ana mai hooheno au
E o e ka Wohi i ke Kalaunu
O Kawekiulani Kou inoa.
|
This work was published before January 1, 1929, and is in the public domain worldwide because the author died at least 100 years ago. |