I Lementi de Fimjta
I Lementi de Fimjta INCONTRO
PJIRO SU MURUS
SECONDA EDIZIONE
C o r r e t t a e d a m p l i a t a
per
Pietro Angelini del fu dott. Giacomo
con aggiunta
......di altri scritti e traduzioni dello stesso autore.
1.
S'el vol vignì ch'el viegno,
Si nuò la cal xi parparada
Nu son nuò dasparada
Cumù 'l vuravo lù.
2.
E ti cridivi, sulso,
Ch'i fusso una sgurlassa
De quille de la piassa.
Ch'i nu le vol ningun ?
3.
Sibben ch'i nu ghe penso
Ucciade nu me manca:
E s'i vulisso, anca
Quille de qualco sciur.
4.
Ma mi nu vuoi savìghene:
Ai sciuri mi ghe cago
I siè cumù ch'i stago
E cumu i jè de stà. -
5.
A gira purassè ch'usmivo (1)
In teijo l'idija de sgambettàme,
De pagura tasivo par nu scaldame
De piùn, el zurviel de la me gnucca.
6.
Ai me uocci me fiva sirminìgo (2)
Quil vardame cul pêijo cajù e ingrintà:(3)
Pariva, viro da bon, ti vissi trincà:
Radagando e zindo zu de carizzada.
7.
Tijo cun mijo senpro ti badinii:
Ma vara, che tila, parsbrio !
Puoca ti na filarè cun mijo -
Ingermà d'un sarpento inbilfà! (4)
8.
E sti ursi e sti bursi inbilfadi, (5)
Me fa vivi sempro messedada, (6)
E me ten l'anema ingrupada
Ch'in fen de fen me faruò s'ciupà.
9.
E despoi che ti me vivi insulsida
Ti pansivi de dame el dugan ? (7)
Va cul diavo sciur muso de can,
Ugni vàlego te puosso sgurbà!
10.
Adabon, pardico viro !
Etto 'l grillo de lagàme
E cun quisto de bissàme
E d'affan fame crepà ?
11.
Alla fista ! S'el me laga
Mijo par quisto piurarè ?
A destiro, un biel murè,
De ti majo i catarè.
12.
Va t'in bisso, ch'in in fondo -
Va a remengo .... zighinà .... (8)
A te puosso el fia s'ciattà
E vignì la scaransija. -
13.
Arillo là ! Quil bèilfo ?
Parchì so barba Sorre (9)
Ghe uò lagà le forre,
El vol quil ch'el vol lù.
14.
E che l'ulij in cumulta
St'avverta el se se vido,
D'essi deventà lu crido
El Duso piruccon.
15.
El fa la mana, e rumignìja (10)
Cu i so pardêj, pardêj,
De ben fulpiame i pêj
E stremename el cor.
16.
Ma mi cussêjo n'intendo,
Sti sbirli nu me pias:
Par vivi sempro in pas
Biegna savisso amà.
17.
E nu xi drêjo de ruobe,
E nu scaldasse el cao,
De paja fasse un trao,
E tuntunasse insembro.
18.
Par lu bisugnaràvo
Chi stisso sempro in casa,
E mai un può de basa
I visso de ciapà.
19.
E quando i vago fora
Da nu stallàme ignuri (11)
E incuntrendo sciuri
De faghe el vuolta cul;
20.
E anca stendo in gèsia,
Ch'i stisso lu vuràvo
Cul burgo sempr'in cavo
Sansa dà gnanca 'l fià.
21.
A mù de le citine: (12)
E radeghi catàndo
Si mai de quando in quando
Un scartosso me stà a vardà.
22.
Ma china ti darè fittùra (13)
A uogni cavil che cajo
Piun d'una resta d'ajo
Ti varè de rusegà.
23.
I me disiva, che ti son de rama, (14)
Ch'intrincà ti surlii cum'una ruda,
Che ti puorti la calza insimuruda, (15)
Ch'invisso a mijo purassè me pol. -
24.
Vuoldi frà miêjo, i te l'è dêito,
E i te lo dêigo ancura,
Che sempro, e in uogni ura
Ti ti sariè el me ben.
25.
Si la to bus i vuoldirè cantà,
Da la cal, de miserere in ton, (16)
I salterè par videte al balcon
A sgnacate de drijo un biel basin.
26.
E si de recao vignerè catàme,
A destiro i currerè incuntràte
Par dulongo tanto basate
Inchina i n'averè piùn fià.
27.
Ti vadarè che nama
Ti varsarè la bucca.
I te dirè, frà strucca,
E strenseme al tu sen:
28.
Ma squogna el me musito dulso,
Che dal cao ti te cavi via
Quil brutto serimia de zilusìja
Trumento e sbisinijo del cor,
29.
Allura saruò a tu cugnussanza,
Chi sibben piccia murieda giro,
Dulongo i t'jè tendisto d'amur viro,
Pena t'jè scuminsià fame el palù.(17)
30.
Allura ti spalancarè tanto d'uocci,
E ti dirè, missersi, pena ch'el palù
A faghe i jè scumansià, la m'uò uldù
Dulongo, dulongo la m'uò amà.
31.
E cun dòuti i turguli murguli (18)
De me pare, me mare, me fradaj
E de dòute me surure, mi mai,
Ch'i te malsipij m'uò paristo biel.
32.
Disandoghe sul mus scito e nitto,
Ch'i pudaruò fà quisto e quil
Ch'inchina la muorto i te sarè fidil,
Che tijo i vuoi, e si n'jè tijo, ningun.
33.
E tanto giro scunìa e massedada,
Ch'el matron me vigniva su per gula; (19)
I saravi cajùda, se ma mare sula,
Cul brasso nu ma visso supuntuda.
34.
"Fieja mieja, - piurando la disiva -
"Ebbj passensia, douto guverneremo
"E in prufondo bisso sgniacaremo
"Sti ursi-bursi, e diavi malastriti.
35.
"Laga zi; laga zi: - cun Bara Chicco
"Tu pare, mijo me distrigarè parsbrìo!
"In malursega ! i siè tudescà anca mijo,
"A la barba da chi uò la mustacera. -
36.
"Diasculi! la me disiva ancura:
"Chi vieto, chi vieto drio che cajo
"La tima, ulla xi ch'el se desgajo
"De tijo, cussì biella e zintilina.
37.
"Xi viro che fumo, el nuò de vendi,
"Ch'el xi murè, e sa dessi benastanto,
"Biegna daghe calòma, e linfartanto
"Cun ziguli e zioguli tignilo sequarà.(20)
38.
E lurchì el xi drio a imbarlumbate
'essi in lòmina d'avì tutudi, (21)
"Tijo, fa fenta de cridi sansa refudi,
"Cul dighe - bon, siben, missersi, siguro. -
39.
"Maide, maide nu biegna cuntrastaghe,
"Muoleghe un ponto s'el s'incapunja,
"Essi surda s'el tira una curija.
"Ma!...uoccio a la piturina! capissà!
40.
E gnanca tijo ti ghe zarè cu le man vude;
Che ultro quil ch'in duota pudaremo date
Savisto ti jè pussiù ben che ingrumate,
Zindo in frabica tabacchi a lavurà.
41.
Dei bai bissiti ...in quilla frabica banaditta,
Che par Ruvegno, e par li nuostre muredole
Xi stada la manna del Signur che dôuto puole.
Parchì assiando sparagnenti e zudiziuse
42.
Parparasse le se pol un biel currjdo,
Par quando anca par gille vignaruò
Quilla biata ura, ch'el prieto ghe dumandaruò:
- Sonto cuntenta? - e le rispondaruò - missersi! -
43.
E ch'i vemo de rengrassià de stà cucagna?
Pardico ! el nostro Pudestà Duttur Mattio
Campitelli, che l'uò savisto de bon fijo
Amurus del sò pajis purassè missiase,
44.
Scrivà, e pjegiurà cun quij da Vienna,
E cun quij sciuri ch'in tuj tabacchi cumandiva,
Ch'in fen bandera venta el ripurtiva.
E ch'el sevisso stallà sulegno a tabacchine?
45.
Sciur nuò ! ch'altro ancura el nuò fatto avì,
Cumo sarao l'Uspissio a San Palajo
E l'Uquario dei pissi - Chi vulide vi majo
De quij duj palassi, un vier la Muccia,
46.
E l'altro a San Gutardo - El mierito chi l'uò bù
D'avili tiradi quà, s'il nu l'uò budo lù?
Donca, muriede, nu fivelo scampà, cu l'incuntride
Un viva da cor in vir de lù zighide.
47.
Cu fivo l'amur cun misser pare,
Tucà m'uò istissamento:
C'un può de pulegàna a piuramento, (22)
Tant'i l'è incucalì de fàmelo un pulsin.
48.
Bigniva vine visto a le Letàgne
Su la mula, e mi in gruppa de lù:
El primo zuorno se ziva in Palù, (23)
In Saline e a San Tuma el dì drio,
49.
Vistì lù de festa cui busighini nuvi(24)
La calza insimurada e el casachin:
Mijo, cun la carpita russa, el cappillin
De paja, e d'uoro al cuolo el me curdon.
50.
E lurchì la pursission staliiva a logo,
Fora se tiriva da le basasse
Mulchère culme, e de bon vin buttasse.
E ligri su la gierba el pasto se fassiva.
51.
Despoi poi ch'i turnivimo in pais
Cantendo Salvanò e Chirieleleison,
La zento da la cal, piasse, e dal balcon
N'urbiva cul butàne sura el cavo
52.
Cumulta de becche, zinestra e mangris.
Quille, quille se pudiva dighe Letàgne:
Quiste d'ancuj xi piene de magagne!
Nu biegna fale si nu se vol che le se seppio.
53.
- E chi uò la grenta in cào se la gratto, -
Disiva ma amia Sà Ciara Gattussa.
Ruobe, pardico ! xi, che purassè le spussa!
Ma nu matemo pilvaro, ne sal, ne uojo e azì.
54.
E dôuto còoza un s'ciaffo che calumà xi stà
Da Bastian Aquilante ditto Cirighin,
Ruvignis de la mela, ch'el fiva el zavatin,
E che pei su lavuri a Valle se purtiva.
55.
In una, dirè, Dumenaga del mis de Majo
1761 ch'el se truviva là,
L'uò bù cun quille fimmane avì de radegà
Malsipandosse insembro cun noni a chi pol piun.
56.
Sciur sì, ch'in quil mumento el Pudestà del logo,
Che Cesarel nuniva, ulduda la quistion,
Se firma, e sansa sintì altro, dendoghe razon
A la so zento, c'un mus de can pajaro, manassa Cirighin
57.
Disandoghe: - Cavron e biccassasso futuvo,
Tija, e dôuti i ruvignisi, i te farè ligà. -
A sti malsipi, Bastian s'impissa, e de rabbia urbà
Ghe sgniaca un slavadenti che piovi ghe fa sango
58.
Dal nas. E, jùtame gambitta piun che da pressa
Currando via da Valle, se salva invir Ruvigno,(25)
Ulla in un batti d'uoccio, savisto s'uò el cuntigno
Tignù in difisa nostra dal bullo muscardin.
59.
A valle, a tanto smacco, in cavo el Pudestà
Ven stabilì: ch'a Ruvigno se dobbia daghe fogo.
Despoi i l'uò missa via, turnadi i uossi a logo.
Sultanto a le Vallise, ch'a vendi gerbe e pan
60.
Vigniva a la mitina, cum'anca ancui le fà,
La zento dumandiva: - La cicca guò passà al vostro Pudestà? -
- Ah ! sango, sango ! Povero Ruvigno prissipità -
Gille rispundiva - Mai, mai piun ben el gaverà. -
61.
E quilla prufissia passò per tradission,
Parchì, uognisempro a diesso, le ruobe zide mal,
Private che sìo, e majo Cumunal,
Ara se dis: el s'ciaffo d'Aquilante còoza de dôuto xi!
62.
Ma mijo i vuoi cuntate ancura
Quil ca ma nuonna grama me cuntiva:
Xi a dì: la bona misissia che passiva,
Intra le duj stripe, sciura e zappadura.
63.
Biegna savì che prima de quil rassa de can
E malvignù anno de la custipassion,
A se viviva in pas cun gran cunsulassion:
E nuò al mù d'ancuj che gniento secundija.
64.
De giuvarieri i nostri vistì al mariolo
A le so forre i ziva tendi ai so lavuri;
Invisso le dumenaghe cullegadi a sciuri
De ponso e cappellina, i fiva cumunella.
65.
Ma nuò all'usteria, cumù la zuventù d'ancuj;
Sibben in proprie case dei sciuri o zappaduri
E là, magnendo e trinchendo da viri frajaduri
Cun sene e zinsèghe le sire i se gudiva.
66.
E daghela despoi a chi pudiva majo
Furnì refuschi dulsi e muscatello,
E bersamin cui fiuchi, e altro bon vinello,
E màndule, nuselle, e maccaroni al mel!
67.
E alla !...nuj fimmane dôuto ragajade
A preparaghe el pasto, che sempro i vansiva
Par sgniunfane anca nuj, e che despoi finiva
Cul fane ligre e sgaje, e ben passude.
68.
Xi viro che ne scugniva el zuorno drijo
Lavà la biancaria e fregà 'l pavimento,
Dôuto insbrudelà de vin e cundimento,
Sansa cuntà le ruobe rute e avariade.
69.
Che sti frajoni, massimamento in ultamo,
Se pol imaginasse, in simbarli ch'i gira
I laghiva che dôuto vago, in quilla sira,
In bisso, sansa ch'algun se ne incurisso.
70.
Un può vuliando essi giuste, se cichiva
A vidi la mitina quil dasurdano,
Despoi ridievimo a cul metti dôuto in urdano,
Che zà, la Pruvedensa ne giutiva, parchì
71.
Quij gira anni bai ! ...Cumulta de l'entrade,
Puoca privial e ugniun ne rispettiva.
E cussijo "donna mare" ridando tirminiva
De cuntàme quil che nuonna vieccia ghe cuntiva. -
72.
Sicchè donca, i uò cridisto majo
De tignì cunsijo de famija,
E sciurchì ningun se lemenija,
D'accuordo a me barbani,
73.
E de me amie insembro,
Duopo ben favellà e custionà,
Che nassisso pur i uò lagà
Intra nuj duj la biella union.
74.
Allura el me cuntento
Xi zi sura li stille,
Sulegna, duj candile (26)
In gesia a Sant'Ufiemia,
75.
De Ruvèigno mare e parona
A inpissaghe i je curristo,
Disandoghe par quisto
Un grassie de dôuto cor.
76.
Parchì cu ti me son arrento
El cor me gungulìa in pitto,
El sango me va fà el saltitto,
Me s'incina le gambe, e nu siè chi dì.
77.
Donca nu me fà piun piuri,
Ch'i jè piurà bastanto;
I nu vuoi patì piun tanto
De quil ch'i jè patì.
78.
Ti ti siè ch'i sè de bon
E i nu sè de sufalcà... (27)
Anca tijo...ma xi paccà
El nu savite cuntignì.
79.
Parchì cu ti piergiurij, (28)
E nu te fuma el bisti, (29)
Sèrtete, mai s'uò visti
Zuvani majo de ti.
80.
Le strussie e le cunduolme
Che cumu mijo t'jè bù,
Mècheti ! che bon prù (30)
Fane ne puderao. -
81.
Vissere mieje, frà Pijro
I te dumando pardunansa
Si fora de cunussansa
Cun noni i t'jè malsipà.
82.
E in signo de ligrissa
Che ti m'ebbi pardunisto,
De pas un bas inamuristo
Ciapa de cor e viro amur.
83.
E lurchì struleghendo me ven in mento
Chi puderè fà a nu lonsi un fantulin
Biel, sgajo, rissito e sbisigulin,
De sumejàghe in dôuto al me Pijrin.
84.
Guantàme i nu puoi piun, e scogna ridi
De ligria, a la pier d'anzuliti in paradis.
Ah, frà ! i nu vido l'ura che passo stu mis
E sponto e l dêi, chi varè la vira in di:
85.
Che cussijo, assiando tu mujer
Le cicierche da la cal n'avrò piun vus
De dame truvi, sbrajendo a sciuppa bus (31)
Sira e matina: La biella bionda al pal!
La biella bionda al pal!
86.
A sti truvi, che me fiva purassè cicà,(32)
Mi mucivo, fenzando el siergo nu capì:
Parchì sigura d'avite in brivo par marì,
Cumù nuj sempro se vemo imprumetà,
87.
In ultimo i sarè mijo ch'i riderè:
E mustrendaghe despoi el piccio me bambin,
Che spiro dobb'essi sgajo cum'un sparussolin,
Gille, gille, ste bajulche cicierche cicaruò.(33)
88.
Muchì, se i vûoi menàle a tardiso,
Muchì, se i studierè de fale tasi;
Fendo ballà 'l me nini, e dendoghe dei basi
Indrioman, china i sinterè i to valeghi
montà le scale a baleghi...
89.
Veme, donca, a catà: te spietto,
Ti ti sarè el me cuocolo,
Mijio i sarè el to buocolo,
E dôuto zaruò de majo in ben. -
90.
E Fimjta saruò de Pijro,
E Pijro saruò de Femjta,
Ch'insembra e alligramento,
Gungulendo de cuntento,
E la bus a dôuto fià,
91.
De fa movi el casamento,
E vuliando e nu vuliando.
Cun basiti de rimando,
Zuorno e nuoto s'ciuparemo,
De bissase de cantà:
92.
Priesto, a fuga parparemo
Fassitine e pannisai,
Le scuffiette e i cussinai,
La cuniita e un bon piumin.
93.
Ch'in sta casa nuj varemo
A nu lonsi un biel ninin,
Che saruò la cuntentissa
De Fimjta e de Pjirin
Che saruò la cuntentissa
De Fimjta e de Pjirin.
..........................................................................................................
Ruvêigno mis de Lujo 1872
(Riveîsto e curieto 1882)