Ice Hese/Geren apostol i yabuha babe ejehe bithe

Musei

Ejen isus heristos i tutabuha ice hese, sunjaci debtelin.

Geren apostol i yabuha babe ejehe luka i bithe teofil de unggihe.

Ujui fiyelen

weishun teofil de unggihe mini dergi bithe de isus i yabuha，tacihiyaha deribun ci aname ini enduringge enduri de sonjome gaiha geren apostol de tacibure hese wasimbufi, abka de wesike inenggi de isitala geren baita be arame tucibuhe, ere apostol de, ini beyei gosihon be aliha amala geren yargiyan temgetu tucibufi, beyebe weihun tuwabufi, dehi inenggi sidende cende beyebe sabubume, abkai ejen i gurun i babe giyangname, kemuni cende, ume iyerusalim hecen ci aljara, damu mini suwende donjibuha ama i hesebuhengge be aliyame bisu, iowang oci, damu muke de obumbihe, suwe oci ere udu inenggi amala enduringge enduri de obubumbi seme hese wasimbuha. tuttu ofi, ce isandufi, isus de wesimbume, ejen, isarail de gurun ilibume fungnerengge ere erin de waka. isus cende hese wesimbume, ama i hesei yabubure erin forgon be suweni sara ba waka, damu suwe, enduringge enduri suweni beyei ninggude wasinjiha manggi, uthai erdemu bahafi, iyerusalim hecen, gubci iodeya ba na samariya aiman i dolo, kemuni na mohoro bade isitala mini siden ojoro be sa.

erebe sefi, ceni yasai juleri na ci wesihun dekdeme abkai baru wesime genehe, tugi imbe alifi gamaha, ce uthai imbe saraburakv oho. isus, abkai baru wesime geren de, ce kemuni abkai baru hargaxame bisirede, gaitai xanyan ituku juwe haha niyalma ceni juleri ilifi hendurengge, galiliyeya goloi niyalma, suwe ainu abkai baru hargaxandumbini, abka de wesike ere isus i dahvme wasinjirengge, uthai suweni sabuha abka de wesire durun i adali sehede, ce ulusu moo i alin ci iyerusalim hecen de bederehe.

ere alin iyerusalim hecen de hanci, sabbata inenggi i on be, dulenderakv. iyerusalim hecen isinafi, dabkvri boode dosifi, uthai tede bo(o)de tehengge piyeter, yakob, iowang, angdarei, filib, toma, bartolomai, mattai, alfiyei i jui jakob, silot（奋锐党）sere simeng, yakob i deo ioda inu. ese jai udu hehesi, isus i eme mariya, isus i ahvta i sasa gemu uhei gvnin be akvmbume jalbarime, kesi be baime nakarakv bihe.

tere udu inenggi i dolo piyeter, ini geren nofi i dulimbade ilifi henduhengge, geren ahvta deote, enduringge enduri dabit de ulhibufi, nomun bithe de ejehe gisun wacihiyaci acambihe, ioda, meni emu adali jergi de bici, ere faxxaci acara tusan be alima gaiha, damu jurgan akv baha ulin de usin be udaha, tubade wasihvn fasiha manggi, ini hefeli fudejefi, sunja baktakv ninggun singgeku gemu ticifi tuheke. ere baita idyerusalim hecen de tehe geren niyalma deiletu oho, tuutu ofi, tere ba ceni gisun de akeldama sembi. akeldama be manjurame ubaliyambuci, senggi i ba sere gisun.

irgebun i nomun de henduhengge, terei tehe ba susu okini, tubade tefi banjirengge akv okini sehebi. geli henduhenge, terei tuxan hergen be gvwa niyalma alime gaimbi sehebi. tuttu ofi, musei ejen isus meni dorgide tefi arbuxaha, iowang ni oboho inenggi ci aname isus i menci aljafi, abka de wesike gulhun erin de musei sasa bihe geren nofi i dorgi emke ini dahvme weihun oho baitai musei sasa siden oci acambi sehede, geren uthai barsaba sere iosib tukiyehe gebu yuset, jai mattei juwe niyalma be tucibufi, jalbarifi henduhengge. geren niyalma mujilen be hafu bulekusere musei ejen, ere juwe nofi i dorgi ya emke be sonjofi, terei geneci acara ba i jalin ere faxxafi acara tuxan be urgedehe ioda i funde apostol i jergi be alime gaifi ojorongge be mende jorireo sefi, uthai ceni jalin sibiya maktafi, mattei i sibiya tucifi, juwan juwe apostl i ton de dosika.

Jai fiyelen

susaici inenggi isinjiha manggi, geren apostol hvwaliyasun be tuwakiyame, uhe emu bade bihe, holkonde hoo seme dara edun i adali amba urse abka ci tucifi, ceni tehe boode badaraka, ce geli tuwa i gesengge otala ilenggu be sabuha, ere e(i)lenggu ishunde fakcafi, ceni hecen emke emke i ninggude wasinjifi d(t)omoho, geren gemu enduringge enduri de jalumpi, enduringge enduri i tacibuha be tuwame, geren gurun i gisun mudan be gaime gisureme deribuhe.

abkai fejergi de bisirele gurun i niyalma dorgi iodeya niyalma tacin de dosika ududu niyalma iyerusalim hecen de bihe, apostol sai jilgan badaraka de geren niyalma isandufi, tesei meni menei gurun i gisun be dahame gisurere be donjire jakade, gemu farfabure de isinaka, geren gemu tuttu sesulefi, ferguweme ishunde hendume, esei gisurerengge gemu galiliyeya niyalma wakao, be ceni gisurere be donjifi, meni meni da banjiha ba na i gisun mudan be donjirengge ere adarame sembi, be partiya gurun i niyalma, midiya gurun i niyalma, elamit ba i niyalma, mesopotamiya, iodeya, kapadokiya, pongta, asiya, furigiya, pamfiliya, egipet, kirineya de adama bisire libiya i harangga hecen be, geren gurun aiman de tehe niyalma, roma gemun hecen ci isinjiha roma niyalma jai iodeya niyalma, kirit, arab sere niyalma gemu meni gisun de tesei abkai ejen i colgoroko amba be gisurere be donjimbi sefi, geli ferguweme, gvnin baharakv de isinafi, ishunde hendume, ere serennge adarame uttu oho serede, ememu basume hendume, ce dabatala nure omifi soktoho sehe.

damu piyeter juwan emu nofi i sasa geren niyalmai juleri ilifi, den jilgan i hendume, ai, iodeya niyalma, jai iyerusalim hecen de tehe geren urse suwe erebe sa, mini gisun be getuken i donji, suwe gvnime taxaraha, ese umai soktoho ba akv bime, kemuni erin be tuwaci, teni ilaci erin kai, ere serengge, ioil porofiyeta i doigonde ubabe jorime hendurengge, abkai ejen i minde wasimbuhe hese de, dubesilere inenggi de ojorongge, senggi sukdun bisirengge i ninggude mini enduringge enduri be wasimbure ohode, suweni haha juse, sargan juse jidere unde baita be doigonde alara, suweni asihata daci sabuhakv ferguwecun be sabure, suweni sakdasa tolgin de bahabure de isinambi, tere inenggi de mini ahasi, mini nehu("v")ji i ninggude mini enduringge enduri be wasimbure ohode, ce jidere unde baita be doigonde alara de isinambi, tere oci, abka de encu hacin i arbun tuwabure, fejile oci, na de encu hacin i ferguwecun tuwaburengge uthai senggi, tuwa, xanggiyara xanggiyan be kai, abkai ejen i tere colgoroko amba inenggi isinjire onggolo xun kvbullifi farhvn ojoro, biya kvbulifi senggi ojoro de isinambi, abkai ejen i enduringge colo be gingguleme tukirerengge bici, karmabumbi sehebi.

ai, isarail niyalma, ere gisun be getuken i donji, abkai ejen suwende amba baita, an ci encu ferguwecun, hacingga temgetu de nasarat i niyalma isus be iletulebume temgetulehe, abkai ejen erebe gemu inde afabufi, suweni yasai juleri yabubuha, suweni beyesei sabuha baita kai, abkai ejen i toktobuha boljohon, doigomxome saha bodogon i suwende afabuha ere isus be suwe ginggun akv ursei gala be baitalame, hiyahan tehe de hadafi belehe, damu abkai ejen imbe bucehe an ci niyalmai dolo ainaha seme bibuci ojorakv be dahame, ini bucere be kvbulifi, dahvme terebe weihun ilibuha.

dabit, terebe jorime hendume, bi erindari mini yasai juleri bisire ejen be hargaxambi, terei mini ici ergi de bisirengge, mini beye acinggiyara de isinarakv okini serengge, tuttu ofi, mini sure fayangga be na i gidana de biburakv, ejen i enduringge niyalma be efujere de isburakv ojoro jakade, mini mujilen selaha, mini ilenggu hoo hio seme lali ako(v), mini yali beye erecun de akdafi elhe ojoro de isinambi, abkai ejen, banjire doro be minde ulhibufi, ejen i hargaxan de mimbe urgunjere de isibumbi sehebi.

geren ahvta deote, suweni juleri mafa dabit i babe leolere de, iletu gisureci, ojoro giyan kai, tere urihe, terebe icihiyame sindaha, terei mungga(n) tetele musei yasai juleri bi, damu tere porofiyeta bifi, abkai ejen i inde, yali beye be bodome, terei beye ci tucike heristos be ilibufi, terei soorin de tebumbi seme, gashvha be same ofi, heristos i dahvme weihun ilire be doigonde sabure jakade, tuttu terei sure fayangga be na i gidana de bibuhekv, terei yali beye efujere de isnahakv seme henduhebi. ere isus be abkai ejen i dahvme weihun ilibuha baitai muse gemu siden kai, tuttu ofi, isus abkai ejen i ici galai wehiyeme wesifi, ini ama ci hesebuhe enduringge enduri be alime gaifi, te suweni sabuha, donjiha babe wasimbuha.

dabit umai abka de wesike ba akv, damu ini beye hendume, abkai ejen mini ejen de henduhengge, bi sini geren bata be efulefi, cembe sini bethei fehuhen obume tuhebure de isitala mini ici ergi de tekini sehengge sehebi, tuttu suwe hiyahan tehe de hadafi belehe isus be akabi ejen i musei ice heristos obuha be isarail i booi gubci ulhikini, ume kenehunjere sehede,

geren gemu erebe donjifi, dolori nasame, piyeter jai geren apostol de henduhengge, mini ahvta deote, te be ainaci ojoro, piyeter ceni baru hendume, suwe, suweni weile be aliyame, suweni weile be guwebure jalin isus heristos i colo de akdafi, meni meni beye be oboro dorolon be daha, uttu oci, enduringge enduri i kesi be alimbi, suweni beye, suweni juse, jalan jalan i amo(a)si de, aika musei ejen abkai ejen de suweni dorgi hvlame gajirengge bici, ere kesi isibure be boljohon turgun, kemuni ere gisun ci tulgiyen hala hacin i gisun be baitalafi, ceni mujilen be acinggiyame tafulame hendume, ere doro akv facuhvn irgen ci aljafi beyebe karmara be kice sehebi.

tuttu ofi, ini gisun be buyeme dahahangge oboro be alihabi, tere emu inenggi de apostol i isan de dosika niyalmai ton ilan minggan otolo bihe, ce gemu geren apostol i tacihyan, uhe hvwaliyan, efen bilara, jalbarime baire hacin be teng seme tuwakiyaha, geren gemu mujilen tuksiteme bihe. apostol sa utala ferguwecuke baita, an ci encu temgetu mutebuhe turgun. akdame dahaha geren gemu uhe bime, si bi seme ilgara ba akv bihe, boo hethe be uncafi, meni meni baitalara be tuwame salame bumbihe. inenggidari uhe tanggin de bime, meni meni boode efen bilaha, abkai ejen be tukiyeme maktame, gulu mujilen tebufi, urgunjeme tere efen be jembihe, geren niyalma cembe buyeme tuwaha, ejen inenggidari karmabure niyalma be ini isan de dosimbubihe.

Ilaci fiyelen

ememuinenggi i uyuci erin de piyeter jai iowang sasa jalbarire jalin tanggin i baru genere de, ememu urse banid(t)ai bethe jadahalaha niyalma be tukiyefi, tanggin i ambalinggv sere duka i jakade tebure jalin benehengge, tanggin de dosire niyalma jiha be giohame bahakini sehengge，terebe inenggidari tubade tebuhe bihe, tere piyeter jai iowang ni tanggin de dosire be sabufi, cende jiha be baiha. piyeter, iowang sasa terebe x(s)ame tuwafi, henduhengge, si membe x(s)a, tere cenci aika jaka be bahara be gvnime, yasa hadahai cembe tuwara de, piyeter tede hendume, minde aisin menggun gemu akv, damu minde bisirengge be sinde xelembi, nasarat i isus heristos i kesi de ilifi yabu sefi, uthai terei ici gala be jafafi, terebe ilibure de, bengneli terei bethei umunhun, fatan, tobgiya gemu fakjin bahafi, tere uthai terkime ilifi feliyeme deribufi, ceni sasa tanggin de dosika, tubade yabume, fekuceme, abkai ejen be tukiyeme maktaha, geren gubci terei yabure, abkai ejen be maktara be sabuha, tanggin i ambalinggv sere dukai jakade tefi giohame baiha niyalma, uthai tere beyei ojoro be saha manggi, ere tucike baitai turgunde gemu tar seme golofi bektereke, tere aitubure kesi be aliha adahalaha niyalma piyeter, iowang ci fuhali aljahakv be dahame, geren gubci geleke golohoi ceni jakade isinjiha, ce solomong gebungge deyen de bihe,

piyeter erebe sabufi, geren de jabume hendume, isarail niyalma, suwe ainu erebe ferguwembini, geli ainu membe yasa hadahai tuwme, uthai membe, meni erdemu eici meni ginggun de akdafi, terebe yabume mutere de isibuha gese niyalma obuha nikai, abaragam isak yakob i abkai ejen, uthai musei mafari i abkai ejen, ini jui isus i ten i terengge be iletulebuhe, erebe suwe pilat i juleri, tere imbe sindaki serede, cashvlafi maraha, damu suwe jurgangga enduringge be cashvlafi maraha, elemangga niyalma be waha doksin niyalma be sindara be baiha, banjire banjibure da be nememe belehe, erebe abkai ejen akvhangge i dorgi ilibuha, ere baitai be gemu side kai.

terei colo de akdara jalin terei colo suweni sabure, suweni sara ere niyala be bekitu obuha, ini beyei kesi de tucinjire akdara gvnin ere niyalma de suweni juleri muyahvn isibuha,tuttu bime, mini sarangge, sweni geren ahvta deote, sweni geren data i tuttu yabuhangge beyei ulhihekvngge haran,abkai ejen, ini geren porofiyed(t)a de ulhibufi, heristos i gosihon be alici acara be doigomxome dojinbuha babe wacihiyabure de isibuha.

tuttu ofi mini suwembe, suweni necihe geren weile be mayambure jalin suweni weile be nasame aliyame beyebe forokini seme tafularangge, ejen i bisire baci suwemba(e) surumbure kei(k) sere inenggi isinjikini, abkai ejen doigonde suwende takvraki sehe isus heristos be takvrakini sehengge?, akba ere isus be, abkai ejen i julgeci ebsi ini geren enduringge porofiyeta de ulhibufi hendubuhe babe wacihiyabure de isitala alici acara dabala, moisei i musei mafari de henduhengge, suweni ejen abkai ejen suweni dorgi uthai mini beyei adali suwende porofiyeta be ilibumbi, terei suwende gisurerede babe gemu dahame yabu, yaya niyalma, tere porofiyeta i gisun be dahame yaburakv oci, urunakv geren niyalma ton ci uksalabufi gukumbi sehebi.

tere anggala samuil ci ebsi tucike geren porofiyeta ere erin be jorime, doigomxome donjibuha. suwe serengge, geren porofiyeta i juse bime, geli abkai ejen i suweni mafari i jalin toktobuha boljohon de dosimbuha niyalma kai. ere boljohon toktobure de abkai ejen abaragam de hese wasimbume, sini beye ci tucirengge bi, terei kesi de abkai fejergi geren niyalma unenggi hvturi be alimbi sehebi. abkai ejen, ini jui isus be dahvme weihun ilibufi, neneme suweni jakade takvrahangge, cohome suweni dorgi yaya niyalma be ehe baita ci aldangga obume, suwende unenggi hvturi isbukini sehengge sehebi.

Duici fiyelen

apostol sa geren niyalmai juleri gisurere de, lamasa, tanggin be tuwakiyara niyalmai da, jai satdukei, ceni geren niyalma be tacihiyara, isus i kesi de, bucehe amala dahvme weihun ilire tacin be selgiyere babe gasame, leksei isanjifi, cembe jafafi, tuwankiyara niyalma de afabufi, inenggi yamjire jakade, cimari erede be aliyama tuwakiyabuha.

apostol i tacihiyara gisun be donjiha geren i dorgi ududu niyalma akdaha, tenteke niyalmai ton sunja minggan de isinaha. cimaha inenggi gurun i ambasa, tuxan de afaha hafasa, bithei niyalma, ujulaha lama angna, kaiyafa, iowang,alaksandar jergi ujulaha lamasai mo(u)kvn i niyalma gemu iyerusalim hecen de isandufi, apostol sabe teresi isaha bade gajibufi, cende, ai erdumu, eici wei gebu de akdafi, tere jadahalaha niyalma be aitubuha seme fonjire de, piyeter, enduringge enduri de jalumbufi, isaha geren de hendume, ai , gurun i ambasa, tuxan de afaha isarail ursei hafasa, suwe meni sain baita be jadahalaha niyalma de isibuha, geli tere adarame sain ok(h)o babe enenggi mende fonjime beidere ohode, uthai suweni geren, jai gubci isarail niyalma sakini, ere tuttu ohongge, damu nasarat i isus heristos i kesi de kai, suwe terebe hiyahan tehe de hadaha, abkai ejen nememe terebe akvhangge i dorgici ilibuha, ere niyalma terei kesi de sain ofi, te suweni juleri ilimbi.

tere serengge, uthai boo sahara suwende fusihvlabufi baitalabuhakv,elemangga booi hoxoi ten oho wehe kai, tereci tulgiyen mende karmara kesi be isiburengge akv, membe karmaci ojoro, geren niyalma de araha geren gebu i dorgi abkai fejergi de geli gvwa gebu bisirengge akv sere turgun sehede, isaha geren, piyeter, iowang ni hoo hio seme acabuxara be sabufi, geli tesei daci tacihakv an i nomhon niyalma ojoro be safi sesulaha, geli tesei isus i sasa bihe be inu sambihe, damu tesede aitubuha niyalma ceni sasa ilihangge be tuwame, umai jabure gisun be bahakv, tuttu cembe isha yamun ci tucibufi, ishunde hebexeme hendume, muse ere jergi niyalma be maka adarame icihiyame gamambini sembi, tesei mutebuhe an ci encu ferguwecuke baita be iyerusalim hecen de tehe niyalma sarkvngge akv be dahame, muse daldaci ojorakv, damu ere gese baita ulhiyen ulhiyen i badarara de isinarahv seme cende ciralame fafulafi, ereci julesi yaya we bihe seme, terei juleri ere gebu be gisureburakv sefi,

uthai cembe hvlame dosimbufi, isus i gebu be jorime gisurere, tacihiyara babe ciralame fafulaha de, piyeter, iowang nememe cende jabume hendume, suwe membe suweni gisun be abkai ejen i gisun ci weisihun obufi daha seci, uthai suweni ere gisun abkai ejen i juleri tondo seci ombio, suwe erebe gvnime tuwa, be meni sabuha, ceni donjiha babe gisurerakv oci ojorakv sehede, gurun i ambasa cembe tantaci acara weile be baharakv bime, geli geren niyalma de olhoxome, geren gemu ceni mutebuhe baitai turgunde abkai ejen be tukiyeme maktaha, aitubure kesi be aliha niyalma dehi funcere seingge bihe turgun, tuttu cende olhoxo seme ciralame fafulafi unggihe.

ce ukcafi, ceni gucusei jakade bederefi, ujulaha lamasa, tuxan de afaha geren hafasai cende gisurehe babe giyan giyan i alaha manggi, geren gemu ubabe donjime wajifi, gvnin uheleme den jilgan i abkai ejen de jalbarime henduhengge, ai, uheri ejen, abka, na, mederi tumen jaka be banjibuha abkai ejen, ejen i aha dabit de, enduringge enduri i gesei ulhiyebufi hendubuhengge, tumen hala i tak seme jamarame, geren gurun i niyalma doro akv babe hebexefi ainambi, geren gurun i han se ilifi, aiman i ejen isandufi sasa ini ejen heristos be batalaha sehebi.

yargiyan i irot, ponkti bilat, tulergi gurun i urse geren isarail niyalmai sasa ere hecen de isandufi, abkai ejen i beyei ijuhe, abkai ejen i enduringge jui isus be batalahangge, cohome abkai ejen i gala, dorgi hebe teisuleci ojoro be toktobuha babe wacihiyakini sehengge, ai, ejen, te tesei membe ciralame jafatara be tuwame, ejen i ahasi mende ejen i hese be selgiyere de, kengse lasha gvnin be xangnafi, geren nimekungge be aitubure jalin ejen i beyei gala be saniyame, ejen i enduringge jui isus i colo i jalin geren ferguwecuke baita, an ci encu arbun be yabubureo seme baimbi sehebi.

ce jalbarire gisun be wajiha manggi, ceni isaha ba axxaha, ceni geren gemu enduringge enduri de jalumbufi, kang seme abkai ejen i hese be selgiyembihe. akdame dahaha geren niyalma de mujilen emu, gvnin uhe bihe, ulin nandan jergi jaka be seci, umai miningge sere gisun akv bihe, damu gemu uhei baitalha.

geren apostol hoo hio seme fafurxame musei ejen isus i dahvme weihun iliha be silgiyembihe, amba kesi ceni geren i ninggude bihe, ceni dolo yadahvn ningge emke seme akv bihe, yaya eici usin bisire, eici boo bisire niyalma, usin boo be uncafi baha hvdai menggun be gajifi, geren apostol i bethei fejile sindambihe, geren niyalma de aika baibure ba bici, ede gaifi bahabumbihe, te bici, kipor sere tun i niyalma iosib gebungge lama, geren apostol de barnaba seme gebulehengge, inde bisire usin be uncafi, baha hvdai menggun be gajifi, terebe geren apostol i bethei fejile sindaha.

Sunjaci fiyelen

ememu ani(a)niya gebungge niyalma ini sargan sapfira i sasa, cende bisire usin be uncafi, baha hvdai menggun i amba dulin be gidafi, funcehengge be gajifi apostol sai bethei fejile sindaha, menggun i gidaha be ini sargan inu sambihe, damu piyeter i ananiya de henduhengge, ainu satana sini mujilen be ejelefi, simba(e) enduringge enduri be holtoro de isibufi, usin i hvdai menggun i amba dulin be gidaha ni, uncahakv usin siningge waka biheo, baha hvdai menggun be sini cihai baitalaci ojorongge biheo, tuttu si adarame ere gvnin be jafafi, tere gese baita yabuha ni, sini holtome yabuhangge damu abkai ejen be, umai niyalma be holtome yabuhangge waka sehe.

ananiya ere gisun be donjime jaka, tuhefi, ergen jociha. ubabe donjiha geren gemu tar seme gelefi bektereke. udu hahardaha niyalma ilifi, terebe burkire jalin belhefi, tucibufi umbuha.tereci ilan erin oho manggi, terei sargan ere tucike baita be sarkv, inu dosika de, piyeter i tede henduhengge, si minde ala, suweni usin be uncahangge damu ere hvdai menggun deo, hendume inu, damu ere menggun de kai, piyeter i neneme henduhengge, ara, suwe cohotoi gvnin jafafi abkai ejen i enduringge enduri be cendekuxa(e)ki sehenggeo, sini eigen i giran be burkire niyalma bethe kemuni t(d)ukai jakade bi, tese simbe inu tucibumbi sehede, tere uthai ini bethei fejile tuhefi ergen joriha, tere hahardaha niyalma dosifi, ini bucehe be sabufi, ini giran be tucibufi, ini eigen i dalbade umbume sindaha.

gubci isan erebe donjiha geren gemu tar seme gelefi bektereke. geren apostol i gala i utala an ci encu ferguwecuke baita temgetu mutebufi, geren niyalmai juleri iletulehe. ceni geren uhe hvwaliyan i solomong sere deyen de bisirede, gvwa niyalma gelhun akv hanci fimeci ojorakv bihe.

geren irgen cembe tukiyeceme maktambihe, ejen de akdaha haha hehe ulhiyan ulhiyan i nonggihai umesi geren oho.tere anggala geren nimekungge niyalma be giyai de tucibufi besergen sishe de tebuhen(g)ge, cohome duleme yabure piyeter i beyei helmen teresi dorgi yaka be goikini sehengge. iyerusalim hecen i xurdeme bisire geren hoton i niyalma, ceni nimekungge, hutusa de nungnebuhengge be gajime iyerusalim hecen de isinjiha, ceni gajiha niyalma gemu aitubure be hafafi sain oho.

ujulaha lama, jai ini sasa bisire geren, gemu satdukei sere encu demun i urse canggi, silhidara gvnin be dahame, sasa ilifi, apostol sabe jafafi, gidana de afabufi horibuha. damu abkai ejen i anggel i dobori de gidana i uce be neifi, cembe tucibufi henduhengge, suwe genefi, tanggin de ilifi, geren niyalma de ne jalan i banjire babe gisure sehebi. ce erebe donjime wajifi, gereke manggi tanggin de dosifi tacihiyaha.

ujulaha lama, jai ini sasa bisirengge isinjifi, gurun i hebe de dara ambasa, geren isarail i jusei sengge sakdasa be isabufi, gidana de niyalma takvrafi, apostol sabe gamabuha. takvraha niyalma isinjifi, gindanade dosifi cembe baifi, baihakv ofi, amasi marifi boolame hendume, "be gindana i duka da an i yaksiha, tuwakiyara niyalmai duka i jakade ilire be sabuha, gindana i duka neifi, dolo dosifi tuwaci, emu niyalma be seme hahafi sabuhakv" sehede, ujulaha lama, tanggin be tuwakiyara niyalmai da, dalaha lamasa ere gisun be donjifi, ere baita ci tucici ojoro babe bodome gvnin baharakv bisirede, gaitai emu niyalma isinjifi, cende boolame hendume, suweni afabuha songkoi gindana de horibuha niyalma te tanggin de ilicahai geren be tacibumbi sehede, taggin be tuwakiyara niyalmai da fejergi niyalma be gaifi, tubade genefi, cembe gajire de, horon hvsun be sindahakvngge, geren niyalma, wehe fahame buceburahv seme gelehengge kai.

apostol sabe gajifi geren i isaha bade ilibuha de, ujulaha lamasa cende, meni suwende, ere gebu be jorime tacibure be ciralame fafulangge waka semeo, te suwe, suweni tacin be selgiyeme, iyerusalim hecen de ambula badarambuha, suwe ere niyalmai funde mende karu gaiki sembio seme fonjihade, piyeter, jai geren apostol tede, abkai ejen i hese be niyalmai gisun ci weisihun obufi dahaci acambi, musei mafari i abkai ejen, suwende hiyan tehe de hadafi belebuhe isus be dahvme weihun ilibufi, beyei ici galai terebe wehiyeme uheri ejen, aitubure da obuhangge, isarail niyalma de weile aliyara gvnin, weile guwebure kesi be isibuki sehengge, ere baitai be, jai abkai ejen i ini hese be dahara niyalma de xanggha enduringge enduri siden seme jabuha.

ujulaha lama sa, erebe donjifi, niohon jili banjifi, cembe wara be hebexere de, farisei sere tacin be dahaha, geren niyalma de ujelebuhe gamaliyal gebungge tacihiyan i da ilifi, apostol sebe taka tule tucibufi, isaha geren i baru henduhengge, ai, isarail niyalma, suwe ere niyalma be adarame gamaci ojoro babe hing seme gvnin akvmbume bodo, seibeni teb(o?)da gebungge niyalma beyebe an i jergi niyalma waka seme tucike, terebe dahaha niyalmai ton duin tanggv de isinaha. damu tere beye wabufi, inde hvlimbuha geren gemu samsifi arun furun akv oho. tereci amala boigon anggala baicame bodoro erinde galiliyeya goloi niyalma ioda tucifi, ududu niyalma be dahabuha, damu goidahakv gubci, ini gisun be dahaha niyalma gemu samsiha, te mini suwende gisurerengge, suwe ere niyalma ci alt(d)angga oso, esebe inu sinda, aikabade ere hebe, ere baita niyalma ci tucike ofi, ini cisui efujembi,aikabade abkai ejen i hesei ohode, suweni beye nakabume muterakv sere anggala, elemangga abkai ejen-i hese be fudarara de isinara ayoo sembi sehede, ceni geren ini gisun be dahafi, apostol sabe dosimbufi, cembe tantafi, geli cende isus i gebu be jorime gisurere be ciralame fafulafi unggihe.

ce, isus i colo i turgunde fusihvxara be aliha be kesi obufi urgunjeme isaha yamun ci tucike. tereci inenggidari eici tanggin, eici geren boode tacihiyame, isus heristos i babe selgiyeme nakahakv bihe.

Ningguci fiyelen

tereci tere udu inenggi dolo xabisa geren oho manggi, elling niyalmai gebereya niyalma be gasara arbun iletulehe, ese, ceni anggasi hehesi be oihorilame, inenggidari baitalaci acara jaka be dendere de tondo be akvmbuhakv turgun. juwan juwe apostol, ceni geren xabisa be selgiyeme gajifi henduhengge, be abkai ejen-i hese be selgiyere be nakafi, budai babe kecere oci, giyan de acanarakv baita, tuttu ofi, ahvta deote suwe, beyei dorgi tucike enduringge enduri, mergen erdemu de yongkiyaha nadan niyalma be sonjome tucibu, be ere tuxan be cende nikebufi, be oci, damu jalbarime baita , hese be selgiyere baita de jalandarakv faxxaki sehe.

ere gisun geren-i gvnin de acanaha, tuttu ceni sonjome tucibuhengge, teng seme akdara, enduringge enduri de jalumbuha sedefan gebungge niyalma, filib, porohor, nikanor, timeng, parameng tacin de dosika angtiyohiyan hecen i niyalma nikolai inu, eseba(e) gajifi, apostol sai juleri ilibuha de, apostol sa jalbarifi, ceni ninggude gala sindaha.

abkai ejen-i hese ambarame selgiyebufi, xabisai ton iyerusalim hecen de ulhiyen ulhiyen-i nonggiha bime, kemuni lamasai dorgi tacin be dahahangge ambula geren bihe. teng seme akdara, murgen erdemu yongkiha sedefan geren niyalmai dolo utala an ci encu ferguwecuke baita, temgetu mutebuhe. libertini[Freedman] sere encu temgetu be dahaha urse, kiriniya ba, alaksangdariya hecen, kilikiya ba, yasiya jeo-i geren niyalma sedefan de bakcilame, terebe mohobume gisurehe, damu ini mergen erdemu enduringge enduri de tacibuha gisun de, bakcilame mutehekv de, uthai utala niyalma be xusihiyeme tacibufi, cembe terei moisei, jai abkai ejen be oihorilara, doro akv gisun gisurere be taciha seme hendubuhe,ere gisun de geren irgen, tuxan de afaha afaha hafasa, bithei niyalma be nukcibuhe.

ese gaidai terebe gafi, jafafi, ceni isan-i bade benefi, golo siden tucibufi, cembe "ere niyalma urui ere enduringge ba, jai nomun bithe be jorime, doro akv gisun be gisureme nakarakv, be terei 'nasarat niyalma isus ere ba be efulefi, moisei mende afabuha an tacin be halambi' seme gisurere be donjiha" seme hendubuhe, isan-i bade tehe geren niyalma sedefan be tuwaci, terei cira de anggel-i cira be sabuha.

Nadaci fiyelen

ujulaha lama Sedefan de, ere gemu yargiyvn seme fonjihade, tere hendume, geren ahvta deote, geren weisihun niyalma mini gisun be getuken i donjireo, ten-i derengge wesihun abkai ejen Mesopotomiya ba na de musei da mafa Abragam de, erei Harang de gurire onggolo, hese wasimbume, si da ba na ci tucifi, sini niyaman hvncihin be waliya, damu mini jorire ba na de guri sehebi. Abragam, hese be gingguleme dahafi, Haldeya ba na ci tucifi, Harang bade genefi tubade tehe. terei ama akv oho manggi, abkai ejen geli terebe tere ba ci, te suweni tehe ere ba na de guribuhe, damu tere erin de tesu bade tede bethe sindara ba be funggehe ba akv, nememe tede, terei juse omosi, udu tere funde inde enen akv bicibe, ere ba na be fungneki seme hese wasimbuha.

tere dade abkai ejen geli tede hese wasimbume, sini juse omosi gvwa gurun de gurinafi, tubade aha ofi duin tanggv aniyai sidende adunggiyara akvbure be alimbi, abkai ejen geli hese wasimbume, damu bi, sini juse omosi be adunggiyara gurun-i niyalma be beideki, tereci amala ceni geren tubaci tucifi, ere bade mimbe uileme yabumbi sehebi. ereci tulgiyen tede dubei sukv be xurdeme faitara kooli ilibufi yabubuha.

terei amala Abragam Isak be banjifi, jakvci inenggi de terei dubei sukv be xurdeme faitaha. Isak de banjiha Yakob, Yokob de banjiha juwan juwe Patriyaraha[patriarch], ere Patriyaraha Iosib be silhidame, tererbe Egipet gurun de uncaha, damu abkai ejen terei sasa bifi, terebe geren jobolon ci tucibufi, Egipet gurun i han Farung ni juleri mergen erdemu doshon be xangnaha, Farung tede gurun-i dasan, dorgi baita be afabufi, uheri kadalabuha. Egipet gurun gubci, Hanang ba na yuyure amba gasaha de tuxaha, musei mafari jeterengge be bahara ba akv, Yakob, Egipet gurun de jeku bisire be donjifi, tuktan mudan musei mafari be tubade unggihe, jai mudan tubade genehe de, Iosib cende, ini beyei uthai ceni deo ojoro be firgembuhe,tereci Iosib-i hala mukvn Farung de il(e)tulehe.

Iosib ini ama Yakob be solinafi, terei juse omosi uheri nadanju sunja anggala be gajibuha. Yakob, Egipet de gurifi, tubade akv oho, musei mafari inu tuttu, tesei giran Sihem sere bade benebufi, Abragam-i Sihem-i Emor-i juse de menggun-i hvda de udaha musen de sindabuha. abkai ejen-i Abragam de gashvha boljohon-i erin jalure de haminara de, ere irgen, Egipet gurun de bifi, Iosib be sarkvngge encu emu han ilire erinde isitala mutume fusembihe, ere han, ehe gvnin be hefeliyefi, cohotoi meni halangga niyalma be jobobome, musei mafari be gidaxame, ceni banjiha juse be tule maktara de isibuhangge, tese bucekini sehengge kai. tere erinde Moisei banjifi, abkai ejen-i kesi de umesi hojo bihe, ere ilan biyai sidende ini ama i boode ujibuhe, amala tule maktabuhangge be Farung ni sargan jui gaifi, ujihe jui obufi, hvwaxabume ujihe. tuttu ofi, Moisei, Egipet gurun-i hala hacin-i bithe erdemu tacifi, ambula dosika, ini mergen erdemu gisun yabun de ambarame iletulehe. tere dehi se de isinaha manggi, geren ahvta deote be tuwanaki sere gvnin jafaha, erei dorgi emke-i Egipet niyalma de gidaxabure be sabufi, inde aisilame dafi, Egipet niyalma be wafi, gidaxabuha niyalmai funde karu gaiha. tere, ainci ini ahvta deote abkai ejen-i ini gala be baitalame, cende aitubure kesi be isibure be ulhimbi tere seme gvniha, damu ce bahafi ulhihakv.

jai inenggi de ceni dolo ememu niyalmai ishunde tantanure be sabufi, ceni jakade ibefi, cembe hvwaliyambume, suwe serengge gemu ahvta deo kai, emke emken be gidaxafi ainambi seme tafulara de, damu gidaxame yabure niyalma gala imbe anabufi henduhengge, we simbe mini ejen da obuha ni, sikse si Egipet niyalma be waha songkoi mimbe waki semu(e) sehede, Moisei, ere gisun-i turgunde burulafi, Madiyang sere ba na de antaha bifi, juwe jui banjiha.

dehi aniya oho manggi, abkai ejen-i aggel Sina sere alin-i bigan de tuwa de dara bula-i fuldun-i dolo beyei bisire be tede sabubuha, Moisei, ere arbun be sabufi, aldungga baita obufi, ibefi, kimj(c)ime tuwaki serede, gaitai ejen-i jilgan terei xan de isinafi, bi serengge, sini mafari-i abkai ejen, Abragam-i abkai ejen, Isak-i abkai ejen, Yakob-i abkai ejen inu sehede, Moisei, tar seme gelefi, xurgeme dargime gelhun akv cincilarakv oho.

ejen geli tede hese wasimbume, sini bethe de bisire sabu be su, sini ilire ba-i boihon enduringge ojoro turgun, bi mini irgen-i Egipet gurun de akabure be sabufi, ini usame sejilere be donjifi, imbe aitubure jalin wasinjiha, tuttu ofi si jio, bi simbe Egipet gurun de takvraki sembi sehebi. ce ere Moisei be, we simbe mini ejen da obuha seme ashvha, abkai ejen beye terebe tukiyefi, tere bula fuldun-i dolo sabuha anggel-i yarume de afabufi, ceni ejen, cembe aitubure da obufi takvraha. ere Moisei cembe tucibufi, Egipet gurun, Fulgiyan sere mederi, xehun bigan de an ci encu geren ferguwecuke baita temgetu be dehi aniyai sidende tuwabume yabuha.

Moisei serengge, uthai Isarail-i geren juse de, suweni ejen, abkai ejen suweni dorgi mini beyei adali Porofiyeta be ilibure, suwe terei gisun be dahame yabu seme sehengge inu. ere Moisei serengge, uthai geren irgen xehun bigan de isaha de, Sina sere alin de ini baru gisurehe anggel, jai musei mafari-i sas bifi, mende ulame afabure jalin dergici wasimbuha hese be alihangge inu.damu musei mafari terei gisun be dahame yabure be cihakv ofi, terebe ashvfi, ceni mujilen be Egipet-i baru forofi, Arong de henduhengge, Egipet gurun ci membe yarume tucibuhe Moisei de teisulehe babe sarkv ojoro jakade, tuttu si abkai ejen be dursuleme vren arafi musei juleri yabukini.

tere udu inenggi-i dolo tukxan be arafi, ere vren de wecefi, ceni galai arahangge-i juleri urgunjeme sebjelehe. tuttu ofi, abkai ejen, beyebe casi forofi, ceni cihai usiha oron be uilere be iliburakv oho, geren Porofiyeta-i bithe de, ai, Isarail-i boo, suwe xehun bigan de dehi aniya bifi, aika minde wecere doboro bio, suwe Moloha-i cacari, abkai ejen-i funde uilehe suweni Remafang ni usiha, beyei araha jergi jaka be tukiyehengge, cohome tede henggilekini sehengge, bi suwembe Babilong ci hono goro gurubumbi seme sehengge erebe jorihabi.

musei mafari de, ce xehun bigan de bisirede, Moisei de hese wasimbuhangge-i inde tuwabuha durun-i songkoi weilebuhe temgetungge cacari(有法柜的帐幕) bihe.erebe musei mafari Isus(“Joshua”)-i sasa alifi, abkai ejen de musei mafari-i yasai juleri burulabuha geren aiman-i niyalma de dailame ejelehe ba na de tukiyeme gajihaci aname Dabit han-i erinde isitala ceni dolo bihe, Dabit han, abkai ejen-i doshon kesi be alifi, Yakob-i abkai ejen de toktoho Gurung be ilibuki sere gvnin be wesimbufi yabubure be baiha. Solomong han nameme abkai ejen de gurung be weileme xanggaha. damu ten-i dergi, Porofiyeta-i henduhe songkoi niyalmai galai weilehe gurung de terakv, abka oci, mini soorin, ne oci, mini bethei fehuhen kai, tuttu abkai ejen hese wasimbume, suwe minde ai hacin-i gurung weilembi, mini ergere jalin ai hacin-i ba bi, ere babe banjibuhangge mini gala wakao sehebi.

ai, meifen mangga, xurdeme faitahakv mujilen, xan bisire niyalma, suwe suweni mafari-i adali enteheme enduringge enduri-i hese be fudarame yabumbi, suweni mafari geren Porofiyeta-i dorgi ya emke be sihame adunggiyahakv.ce oci, ten-i jurgangga-i enggelenjire be doigonde alanjihangge be waha, suwe oci, tere ten-i jurgangga be fudaraka belehe hvlaha oho, suwe geren anggel-i icihiyaha songkoi kooli be alime gaiha bime, damu kooli be umai tuwakiyaha ba akv sehede, erebe donjiha geren, xara fancafi,weihe saime terebe seyehe,Sedefen, nememe enduringge enduri de jalumbufi, abka be hargaxara de, abkai ejen-i ten-i horonggo, jai Isus-i abkai ejen-i ici ergide ilire be sabufi henduhengge, te bi, abkai neihe, jai niyalmai jui-i abkai ejen-i ici ergi de ilire be sabumbi serede, geren gemu den jilgan-i ara sefi, ceni xan be gidafi, uhe Sedefan be aburame jafafi, hecen-i tule uxame gamafi, wehe fahame terebe wame deribuhe, siden oho niyalma, beyei etuku be Sabal gebungge niyalmai bethei fejile sindafi, wehe fahame Sedefan be wara de, Sedefan jalbarime henduhengge, ai, mini ejen Isus, mini sure fayangga be bargiyarao, uthai niyakvrafi, den jilgan-i sureme henduhengge, ai, ejen, ceni ere yabun be cende ehe weile-i dolo daburakv be buyembi, erebe sefi, ergen yadaha.

Jakvci fiyelen

Sedefen be warangge Sabal-i gvnin de acanaha, tere inenggi de iyerusalim hecen de bisire isan sihame adunggiyara ten-i jobolon de tuxaha be dahame geren apostol ci tulgiyen gemu iodeya, samariya-i xurdeme bisire geren bade samsiha.

ememu ginggun be tuwakiyara niyalma, Sedefan-i giran be burkifi, ambarame songgocofi genehe. Sabal, elemangga meni meni boode dosime, tacin de dosika haha hehe be uxame gamama gidana de horibume, akabure ten de isibuha. tuttu bime, samsiha geren babade yabume, abkai ejen-i hese be selgiyehe.

Filib samariya hoton de isinafi, tere aiman-i niyalma de heristos be selgiyehe, geren niyalma, tede mutebuhe an ci encu ferguwecuke baita be donjime, sabume, terei selgiyere hese be uhei gvnin akvmbume donjiha. miosihon endurisa, cende nunggebuhe niyalmai bade ci sureme tucike, edulehe nimeku de hvsibuha geren, dogolon jergi nimekungge niyalma aitubure be bahara turgun. tuttu ofi, tere hoton-i geren gubci ambula urgunjeke. ememu Simeng gebungge niyalma inu tere hoton de bihe, tere beyebe an-i jergi niyalma ci encu obufi, neneme tubade samaxame, samariya hoton-i geren be sesulebuha, amba ajige gemu imbe gingguleme tuwame, abkai ejen-i amba toosengge seme hendumbihe.

amala abkai ejen-i gurun, Isus-i colo-i babe selgiyere Filib-i gisun be dahaha manggi, ceni haha hehe gemu oboro be aliha. Simeng beye inu Filib-i gisun be dahafi, oboro be alifi, erindari terei hashv ici ergide bifi, terei mutebuhe an ci encu amba ferguwecuke baita, temgetu be sabume sesulambihe.

iyerusalim hecen de bihe geren apostol, samariya aiman-i niyalmai abkai ejen-i hese be aliha be donjifi, Piyeter, Iowang juwe nofi be tucibufi tubade takvraha. ce isinafi, geren-i funde jalbarime, enduringge enduri be alikini seme baiha, enduringge enduri tesei ninggude kemuni wasinjiha ba akv turgun, tesedamu musei ejen Isus-i colo de akdafi oboboha bihe, apostol sa tesei ninggude gala sindaha manggi, enduringge enduri be uthai alime gaiha.

Simeng, apostol sai gala sindaha amala enduringge enduri-i wasinjiha be sabuha manggi, menggun gajifi, cende alibume hendume, suweni tere toose be minde bure be buyerengge, bi ,terebe bahafi, ya niyalmai ninggude mini gala be sindaci, tere uthai enduringge enduri be alikini serengge. Piyeter-i nememe tede henduhengge, sini menggun sini sasa gukukini, si abkai ejen-i kesi be menggun-i hvda de bahara be gvniha turgun, ere baita de sini ubu sibiya akv ojorongge, sini mujilen abkai ejen-i juleri tob akvngge kai,tuttu ofi, si, sini ere arga jali be aliyame, abkai ejen de jalbarime baisu, ainci sini mujilen-i ere kesi gvnihangge oncodome gamabumbi dere, bi sini silhingga ten de isinaha fudasihvn babe jempi yabure be saumbi sehede, Simeng jabume henduhengge, suweni sehe songkoi emu ehe seme mini beyede isinjirahv seme, mini funde ejen de jalbarime baisu.

apostol sa erei ejen-i hesei ten-i unenggi be temgetulefi, iyerusalim hecen de bedereme genere de, samariya aiman-i harangga utala gaxan de ewanggelium be selgiyehe. abkai ejen-i anggel Filib de hendume, si ilifi, julergi baru iyerusalim hecen ci Gasa de isitala yarure tere waliyaha jugvn be baime gene sehede, Filib ilifi genehe, tubade isinafi tuwaci, gaitai Eteobiya gurun-i hehe ejen Gangdakiya-i geren namun be uheri kadalara amban eteobiya niyalma taigiyan-i yabure be sabuha. tere iyerusalim hecen de henggilenjifi, da gurun de bederere de,sejen de teme isaiya porofiyeta-i bithe be tuwaha. ede enduri Filib de hendume, si ebefi sejen de hanci yabu, Filib sujume ibefi, taigiyan-i isaiya porofiyeta-i bithe be ginssime? hvlare be donjifi, tede, si hvlara babe ulhimbio seme fonjiha, taigiyan hendume, minde getukeleme alara niyalma akv oci, bi ainahai ulhime mutembini sefi, uthai Filib be, sejen de tafafi, ini sasa teki seme anahvnjaha, terei hvlaha bithei meyen-i gisun ere bihe, tere wara jalin kutulere honin-i gese ini angga neirakv ojorongge uthai honin-i deberen, ini funiyehe hasalara niyalmai juleri jilgan tucirakv adali, terei beiden-i wacihiyabuhangge, terebe fusihvlara ten de isibuha de bi, terei banjirengge na ci gamabure be dahame, terei banjire jalan be we getukelembi sehebi.

taigiyan, Filib de jabume hendume, porofiyeta-i erebe henduhengge, webe jorihabi, ini beyeo, eici gvwa emu niyalma beo, bairengge, erebe minde ulhibuci ojoroo, Filib, angga juwampi ere bithei gisun be deribun obufi, isus-i babe giyan giyan-i alaha. tuttu bime, jugvn yabure de muke bisire bade isinaha de, taigiyan hendume, ere muke wakao, tede mimbe obuci ai ojorakv ba bi. Filib hendume, si aika hing seme akdara oci, uthai ojorakv ba akv. taigiyan jabume hendume, bi isus heristos-i abkai ejen-i jui ojoro be akdambi sefi, uthai sejen be ilibufi, Filib, taigiyan juwe nofi sasa sejen ci ebuhe, Filib terebe oboho, muke ci tucike manggi, abkai ejen-i enduri Filib be jafafi gamaha, taigiyan terebe saburakv oho. taigiyan urgunjeme julesi genehe, Filib elemangga Asot hoton de oho, tubade bisire geren hoton de yabume, kesariya hoton de isitala ewanggelium be selgiyehe.

Uyuci fiyelen

Sabal, kemuni ejen-i xabisa be ei seme seyeme, cembe wara be kiceme, ujulaha lama-i jakade jifi, damaska hoton de bisire geren sinagoga de bithe yabubure be baime bahangge, cohome tubade ere tacin de dosika haha hehe be ucaraha de, gemu huthufi, iyerusalim hecen de gajikini sere jalin, tere jurafi, damaskahoton de hanci bisirede, holkonde abka ci elden wasinjifi, terebe fosoko de, tere na de tuhefi, jilgan be donjiha, jilgan-i henduhengge, "Sabal, Sabal, si ainu mimbe gidaxame jobobumbi" sehede, Sabal hendume, ejen, sini beye weci, ejen hese wasimbume, bi serengge, uthai sinde gidaxame jobobure isus inu, si dubengge mukxan-i ishun feshelere de mangga.

tere xurgeme dargime hendume, ejen, mimbe adarame yabu sembi. ejen tede hese wasimbume, si ilifi, hoton de dosifi, adarame yabuci acara babe tubade bahafi donjimbi sehebi. Sabal-i sasa jugvn yabure niyalma jilgan be donjimbime, gisurerengge be saburakv ojoro jakade, tuttu sesulame ilicaha, Sabal na ci ilifi, yasa neifi tuwaci, fuhali niyalma ba sabume muterakv oho, tuttu niyalma ini galal be jafafi, yarume damaska hoton de dosimbuha.

tere ilan inenggi-i dolo sabuhakv bime, kemuni umai seme jake omiha ba akv. tere funde damaska de Ananiya gebungge xabi bihe, ejen, tede sabubufi, hese wasimbuhangge, aniniya. aniniya hendume, ejen, mini beye kai. ejen tede, si ilifi, tondo sere giyai de genefi, ioda-i boode bisire Tars hoton-i Sabal gebungge niyalma be baisu, te tere jalbarime bi, kemuni tede, Ananiya gebungge niyalmai isinjire, terebe sabume mutere de isibuki seme, terei ninggude gala sindara babe dolori sabubuha sehebi, Anniniya wesimbume, ejen, bi geren niyalmai gisun be donjici, ere niyalma iyerusalim hecen de bisirede, ejen-i enduringge niyalma de ton akv ehe babe isibuha bime, kemuni ujulaha lama sai afabuha be alime gaifi, ubade ejen-i colo be tukiyere geren niyalma be huthubume isinjiha sembi. ejen tede hese wasimbume, damu gene, tere serengge, mini tetuxame baitalara jalin sonjohongge, tere mini colo be geren gurun-i niyalma, geren gurun-i ejen, jai isarail-i juse de donjibume isibumbi. tere anggala, bi tede, mini colo-i haran utala gosihon be alici ojoro babe iletu tuwabumbi sehebi.

aniniya genefi, terei boode dosifi, terei beyei ninggude gala sindafi henduhengge, Sabal agu, sini yabuha jugvn de sinde iletulehe mini ejen isus-i mimbe takvrahangge, cohome sini beye sabume mutekini, enduringge enduri de jalumbukini sere jalin sehede, holkonde terei yasa ci esihe-i gese jaka kobcime tuheke, tuttu ofi, dahvme sabume mutefi, oboro be aliha manggi, teni boda jefi aituha. sabal damaska hoton de bisire xabisai sasa ududu inenggi bifi, geren sinagoga de dosime isus-i abkai ejen-i jui ojoro be tacihiyame deribuhe, erebe donjire geren niyalma sesulafi ishunde, ere gebu be tukiyerengge be iyerusalim hecen de gidaxame jobobuha bime, kemuni ubade isinjihangge. cohome tentekengge be huthufi ujulaha lama sai jakade benebini sehengge ere wakao seme hendumbihe. sabal elemangga gvnin be teng seme obume, isus-i heristos ojoro be temgetu bisire gisun be yarume, damaska hoton de tehe iodeya niyalma be jabume muterakv de isibuha.

tereci udu e(i)nenggi oho manggi, iodeya niyalma terebe wara uhei gvnin jafaha, damu sabal ceni ere hebe be serehe, ce imbe waki seme inenggi dobori akv duka be tuwakiyaha. xabisa nememe terebe xoro de tebufi, dobori de hecen dabame wasimbuha. sabal, iyerusalim hecen de isinjifi, geren xabisa de dayaki sembihe, damu ce gemu, terei xabi ojoro be akdarakv ofi, tede olhoxombihe, damu barnaba terebe halbufi, geren apostol-i jakade gajifi, cende, ejen-i tede jugvn de sabubume hese wasimbuha, terei damaska hoton de hoo hio seme, musei ejen isus-i colo be iletu selgiyehe babe giyan giyan-i alaha.

tereci julesi sabal iyerusalim hecen de bisirede, inenggidari apostol sai sasa teme, hoo hio seme musei ejen isus-i colo be tukiyeme gisurehe. geli Elling(希腊) sere niyalmai baru ambarame giyan be mohobume gisurere jakade, tuttu ce imbe wara be kicehe. ahvta deote erebe safi, terebe kesariya hoton de gamafi, tubaci tars hoton de jurambuhe. tuttu bime, tacin de dosika geren niyalma, gubci iodeya, galiliyeya, samariya de bisirengge gemu taifin be alifi, toktome xanggame, ejen be gingguleme yabume, enduringge enduri-i tohorombure kesi de, ulhiyan ulhiyan-i nonggibuha. piyeter geren be tuwanara ildunde Lioda hoton de tehe enduringge niyalmai jakade isinaha, tubade menen nimeku de hvsibufi, jakvn aniya besergen de dedufi ilihakv ememu Ani gebungge niyalma be ucaraha, piyeter tede hendume, sini, isus heristos simbe da an-i sain obumbi, si alifi, sini sishe jibehun be sekteme dasata sehede, tere uthai iliha, lioda, sarong de tehe geren gebci terebe sabufi, ejen-i hese be dahaha.

Yopiyan hoton de ememu Tabita gebungge hehe xabi bihe, tabita be manjurame ubaliyambuci sirg(h)acin sere gisun, tere hehe utala sain baita yabuha, ulin be hairandarakv xa(e)leme yabuha, damu tere udu inenggi-i dolo holkonde nimekulefi akv oho, terei giran be obufi, dabkvri boode dercilehe. lioda hoton yopiya hoton ci sandalabuhangge goro akv ojoro jakade, geren xabisa, piyeter-i tubade bisire be donjifi, juwe niyalma be tucibufi, piyeter-i jakade takvrafi, imbe ceni bisire bade elhexerakv isinjireo seme solibuha. piyeteri ilifi, takvraha niyalmai sasa juraka, ini beye isinjiha manggi, dabkvri boode terebe dosimbume jaka, geren anggasai hehe yasai muke tuhebume ini jakade jifi, tabita ceni sasa weihun bisirede beyei galai weilehe etuku adu be tuwabuha, piyeter, geren be tule tucibufi beye niyakvrafi jalbariha, jalbarime wajifi, giran-i baru forofi henduhengge, tabita ili sehede, tere uthai ini yasa be neifi, piyeter be sabufi ilifi tehe, piyeter tede gala alibufi, geren endurigge, anggasai hehe be hvlame dosimbufi, cende terebe weihun ningge afabuha.

ere baita yopiya hoton gubci de iletulehe be dahame, tuttu ejen de akdaha niyalma geren bihe. piyeter yopiya hoton de sukv uyere faksi simeng ni boode utala inenggi tehebi.

Juwanci fiyelen

kasariya hoton de Italiya sere jalan-i nirui janggin Korinili gebungge bihe, tere beye, terei booi gubci ginggun be tuwake(i)yame, abkai ejen de olohoxome yabume, ini ulin be hairarakv geren de bireme fulehun isibuha niyalma, tere abkai ejen de hing seme jalbarime baire de, inenggi-i uyuci erin-i otolo terei boode dosika abkai ejen-i anggel be iletusaka sabufi, ini baru hendurengge, korinili, korinili yasa hadahai imbe tuwame, geleke golohoi je seme jabuha.

anggel tede hendume, sini jalbarime baire gisun, sini fulehun yabure baita gemu abkai ejen-i juleri iletulehe, te si yosiya hoton de niyalma takvrafi, piyeter sere simong be solibu, tere sukv uyere faksi simeng ni boode tehebi, erei boo mederi de hanci bi, piyeter sinde, sini beye, sini booi gubci niyalmai karmara be bahaci ojoro gisun be firgembumbi sehebi. korinili-i baru gisurehe anggel genehe manggi, tere booi niyalmai dorgi juwe, jai inde hanciki coohai dorgi emu jurgangga niyalma be hvlame gajifi, ini sabuha babe giyan giyan-i alafi, yopiya hoton de takvraha.

jai inenggi de ce jugvn yabume hoton de hanci bisirede, piyeter ningguci erin-i otolo dabkvri boode dosifi jalbarimbihe, gaitai yadahvxafi jeki sembihe, buda dagilara de, tere liyeliyehun-i gisun oho, kemuni neihe abkai ta(de)rgici ini jakade wasinjire, dv(u)in hoxo de hvwaitabuha amba wadan-i gese emu hacin-i tetun ne(a) de wasinjiha, tere tetun-i dolo hala hacin-i na de yabure ulha ujima, gurgu, esihengge, hurungge, abka de deyere gasha cecike-i bisire babe sabuha, kemuni ini baru hendurenggei jilgan, piyeter, si ilifi, wafi jefu seme sembihe, piyeter hendume, mini ejen, bi ojorakv, bi umai nantuhvn hatacuka jaka be jeke ba akv.henduhenggei jilgan kemuni ini baru, abkai ejen-i bolgo obuha babe si ume hatacuka obure seme sehe.

ilan mudan tuttu oho manggi, tere tetun dahvme abka de gamabuha. piyeter sabuha inde sabubuhangge be ulhirakv ai babe jorimbi see jing bodome bisirede, korinili-i takvraha niyalma simeng ni boo be fujurulame safi, dukai jakade isinafi, duka toksime piyeter sere simong ubade bio seme fonjiha.piyeter kemuni inde sabubuha be bodome bisirede, enduri tede henduhengge, simbe baihanjire ilan niyalma isinjiha, si il(i)fi, ebufi, heni majige kenehunjerakv ceni sasa gene, bi cembe takvraha turgun sehede, piyeter, korinili-i takvraha niyalmai jakade ebufi henduhengge, suweni baihangge, uthai mini beye kai, damu suweni isinjihangge ai baita-i jalin sehede, ce hendume, korinili gebungge nirui janggin, tob jurgangga, abkai ejen de olhoxome yabure niyalma, erebe gubci iodeya niyalma-i sarangge, tere, enduringge anggel-i gisun be dahafi(?), sini beyebe ini boode solifi, sini gisun be donjiki sembi.

piyeter cembe boode dosimbufi, antaha-i gese tuwame kutulehe. cimari ilifi ceni sasa juraka. yopiya hoton de tehe tacin de dosika niyalmai dorgid emu udu nofi inu ini sasa genehe, cimaha inenggi de kesariya hoton de isinaha. korinili, ini niyalman hvncihin, gvlika gecu be solime isabufi, terei isinjiha be aliyaha. piyeter dosire de, korinili tucifi, terei bethei fejile hujume niyakvrafi henggilehe. piyeter terebe ilibufi hendume, si illi, bi inu sini adali niyalma kai sefi, uthai ini sasa leoleme booi dolo dosika de, tubade isabuha utala niyalma be sabufi, cende hendume, iodeya niyalma de, encu gurun-i niyalma de hanci ojoro, eici ishunde arbuxara doro akv be suweni beye sambi, damu abkai ejen, minde gese wasimbufi, yaya niyalma be nantuhvn hatacuka sere be fuhali naka seme ulhiyebuhe be dahame, tuttu bi solire be alifi, marahakv isinjiha, tuttu bime, suweni mimbe solime gajihangge ai baitai jalin minde alara be buyembi.

korinili hendume, ereci duin inenggi-i onggolo uthai ere gese erinde isitala bi umai jeke omiha ba akv, uyuci erinde booi dolo jalbarime bisirede, holkonde a(e)ldengge eteku etuhe emu niyalma mini juleri ilifi henduhengge, korinili, sini jalbarime baire gisun be gemu dojifi saha, sini fulehun yabure baita abkai ejen-i juleri iletulehe, tuttu ofi, si yopiya hoton de niyalma takvrafi, piyeter sere simong be solibu, tere sukv uyere faksi simeng ni mederi de hanci bisire boode tehebi, tere isinjiha manggi, gemu sinde alambi sehebe dahafi, ne je sini beyei jakade niyalma takvraha, sini beyei isinjihangge oihori sain, te be gemu abkai ejen-i juleri ilime bi, abkai ejen-i sinde afabuha hese be donjire be buyembi.

piyeter angga juwampi henduhengge, bi abkai ejen-i yala tere banjirakv, yaya gurun-i niyalmai dorgi, damu inde olhoxome yabure, jo(u)rgan be tuwakiyarangge bici, uthai inde acara babe saha, ini isarail-i geren juse de wasimbuha gese serengge, uthai abka na bisirelenggei uheri ejen ojoro isus heristos de selgiyebuhe taifin inu, oboro doro iowang de selgiyebuhe amala, galiliyeya golo ci aname gubci iodeya de donjibuha baita, adarame abkai ejen nasaret-i isus de enduringge enduri, yongkiyaha erdemu salgabuha, abkai ejen terei emgi bisire jakade, terei adarame geren de kesi isibume, diyabol("devil") de nungnebuhengge be aitubume yabuha babe suweni beyesei sarangge kai, terei iodeya ba na, iyerusalim hecen de yabubuha geren baita, jai terebe moo de lakiyafi belehe baitai be siden kai, abkai ejen terebe ilaci inenggi de akvhangge-i dorgici ilibufi, ini beyebe sabubure de isibuhangge, umai geren niyalma de waka, damu abkai ejen de doigomxome sonjoho siden, terei dahvme weihun ilihangge-i amala sasa jeke omiha mede teile sabubuha, tere mede afabufi, geren niyalma de ulhibume, ini beyei abkai ejen-i salgabuha weihun ningge, bucehengge be beidere ejen ojoro be selgiyebuhe.

geren porofiyeta terebe jorime, tede akdara yaya niyalma de ini kesi de geren weile be guwebure gese wasimbure be gisurehe. piyeter ere jergi gisun be gisurere de enduringge enduri, ere gisun be donjire geren niyalmai ninggude wasinjiha, ede dube sukv xurdeme faitaha niyalmai dorgi tacin de dosika piyeter-i sasa isinjiha niyalma, enduringge enduri-i kesi encu gurun-i ursei ninggude wasinjiha be sabufi, cira aljangge, tesei geren gurun-i gisun mudan be gaime gisurere, abkai ejen-i colgoroko amba be tukiyere be donjihangge kai. tere nereginde piyeter jabume, enduringge enduri be mini adali alihangge be muke de, oboro be iliburengge ainahai bini sefi, uthai cende ejen-i gesei muke de beye be obobuha. ce piyeter be bibume ceni sasa udu inenggi tekini seme baiha.