Il Marzo 1848
Il Marzo 1848
Sicchè, l'è vera o hin ball?
Se g'ha doma paura de insognass,
E poeu de dessedass
E sentiss ancamò i Todisch sui spall.
Se restava tant minga suefaa
A vedenn voenna bonna,
Che questa chì, che la ne var cent milla,
Intant che femm per dilla
El par che se cojonna.
Ma no, quij car Pattan hin proppi andaa,
Cioè i emm casciaa via
On poo de desgarbaa
Dopo trentaquattr'ami de compagnia:
E i Milanes inscì grazios e bon
In fin g'han mostraa poca educazion.
Trentaquattr'ann de flemma
L'è staa on gran bell duralla e nun e lor.
Semm vegnuu vece insemma
Ai noster bon tutor.
Quij che han trovaa bardassa de pasquee
Adess hin andeghee:
I tosannett hin nonn:
E se pò di che han vist a seppellì
Dò volt la Lombardia, staghela li.
E quand gh'emm ditt coi bonn
Che serem pù fioeu
E de guarnà in saccoccia el tettiroeu,
Cribbi, che furia porca!
Han impienii i gazzett de strapazzad,
M'han promiss boia e forca;
E intrattant per provamm che semm bagai
M'han faa corr per i strad
Sott ai bott di soldaa e di polizzaj.
Rivaa a sto pont i coss,
L'odi e la rabbia g'han vuu pù misura,
E tucc a svoià 'l goss;
Fin quij che g'ha paura
Del prezzi di galett e di Cartell,
Fina tucc quij che per salvà la pell
Leccaraven la pesta o l'Antecrist,
St'invrnmo chi s'hin vist
A voltass contra a lor e maledij;
E se fussen staa men compromettuu,
Credi che fina i spij
Ch'avaraven voltaa tanto de cuu.
Ma l'Austria sueffada
A vess abominada
E a schiscià i vanzavusc di simpatij,
La tirava via drizz per la soa strada:
Che vosen pur, che faghen,
Ma che tremmen, che creppen, e che paghen.
A dì la veritaa,
Serem anca on poo stracch
De vess compassionaa
In qualitaa de invalid e de fiacch:
No se leggeva olter sui gazzett
Che Poveri Lombardi, oh marcadett!
E gh'aveven reson:
Depertutt Viva Italia e Viva Pio,
L'era ona fiocca de costituzion;
E nun, sangue de bio!
Ne se seguita a strenc el straforzin
Che me fa schizzà i oeucc foeura del coo?
Puttasca! juttet che te juttaroo,
is el nost meneghin;
E s'è pensaa sul seri
A vedè de cavass de sti miseri.
Emm comenzaa a provass
Sul pont de l'union:
Presempi, a cambià 'l cors per andà a spass,
tucc insemma s'è cambiaa rion.
Incoeu se va a teatter, tucc ghe andaven;
Diman no se ghe va,
E tucc staven a cà;
S'ha de fa la tal cossa, e tucc la faven.
Col primm de l'ann se fuma pù zigall,
E, via de quai carogna
De quij senza vergogna,
Almanch in publich se fumava pù:
Sti coss ai ciaj pariven coss de ciall,
Ma gh'era dent la soa bonna virtù:
Tiraven a spiegass tutt el paes,
Saldaven l'armonia,
Inviaven a fa quaicoss de pes,
E faven disperà la Polizia:
Che matta e infuriada
L'avaran pestaa el coo per i muraj
Per avè mai poduu trovà la strada
De cattà i mennapolt e ingattiaj.
ntant per fà quaicoss,
D'accord con tucc i olter capp, baloss
S'hin miss a fà sarà parecc Casin,
E a fa stremi de nott
I mej familli di nost cittadin,
Borland al lece de bravi giovinott,
Faj vestì, strusaj via,
E mandaj per la posta in Todeschia.
La deventava spessa:
A Napoli s'è faa costituzion,
E tutt Milan corrend in Domm a messa
L'ha voruu fà la soa dimostrazion:
E l'ha fada tant grossa e de sfacciaa,
Che i Todisch no han sbrottaa.
Ma dopo han faa stampa, le leg stataria
Che l'ha stremii come i moschitt de l'aria.
Intant, per spassass via,
an battuu on poo i student
A Padova e Pavia;
Tutt coss bonissim per el nost intent:
Inzigaven el Tòr de Lombardia
Che coi oeucc ross de rabbia
L'ha comenzaa a fregà i corni in la sabbia.
La cera de Milan
Vers la mitaa de marz l'era ben scura;
Ch'era quaicoss che metteva paura.
In del sarass la man
I amis diseven: Pronti, emm de finilla!
Cosse voreven fà? le sa '1 Signor:
Nol saveven nanch lor.
Giudizzi, Milanes! che ghè cent milla
E passa bajonett
Che ne borlen adoss in manch d'on ett:
nun semm disarmaa,
Semm minga regolaa;
No gh'emm nè sperienza nè malizia;
Regordév di spetasc de la Galizia!
Se, dininguarda, femm quai strambaria,
Emm de vess tucc vitej de beccaria.
A l'alba del dersett,
Ora adattada per no fass fìs'cià,
L'è mollaa via Rajner quiett quiett
Dopo avè strappaa sù i ciod de la cà;
Lassand i réden che l'ha mai ciappaa
E i so speranz fondaa (1).
L'è andaa via sospirand de quell palazz
Dove l'ha faa trent'ann el vis de cazz,
Giugand al tira molla, al si e no,
Vedrò, dirò, farò quel che potrò:
Beato de passà per coo de legn
Quand l'era on porch indegn.
Va, tira drizz, e voltet nanca indree:
Cosse pensen de dì i nost Milanes
Prest prest tel savaree
Se te portet i verz; al to paes.
L'istess dì per cittaa,
Intrà 'l mezz di e Fora,
Se spantega on trattin la novitaa
Che gh'è tutta Vienna sott e sora.
Gesusmaria! Vienna?
La cà di nost arpij,
La cittaa de la carna e di legrj,
La cittaa del talent che sta in la schenna,
E del rispett eterno,
Anca lee revoltass?
L'è come imaginass
I sorbett a l'inferno.
Ma, disi, i lacrim, la disperazion
De ses o sett nazion
Che formen sta potenza bestial,
A chi ghe fari bon prò, giurabaccon,
Se la sta pù in la pell la capital?
A la mattina adree
Ne riva per telegrafo e correr
El rose de tutt i grazzi: imaginee
El slargafiaa di omen de parer
A vedè la cittaa
Satisfada in do sò giust desideri
Senza rivoluzion
Nè olter trebuleri.
Difatti hin staa stampaa,
E taccaa foeura subet sui canton.
Pont primm: Abolizion de la Censura;
Segond: Convocadura
Vienna di nost rappresentant
De li e mes no soo quant.
Ah facc de tutt'i di!
Dopo on bel terz de secol de malann
Mandà giò de sta sort de cremesi,
E menamm anmò a spass con di bambann?
A on popol stomegaa
Che trà bava e pretend quaicoss de gross,
Che voeur in conclusion vess liberaa,
L'è men maa dagli nagott che dagli on oss.
In mezz ai nost nemis,
Cont ona Polizia
Che rid sott ai barbis,
O me guarda in cagnesch quand passem via,
Sto loffi de censura
L'è ona canzonadura:
Anzi l'è on trabuchell e on tradiment
Per mett i sgriff sui omen de talent:
Perchè se on coo de matt
El gh'avess coeur de scriv on poo ladin
E de scartà bagatt,
El dì dopo l'inzanchen i Pollin:
E in sta bella manera i nost scrittor
Se faraven la spia lor de per lor.
Sto trattà inscì de tangher
L'ha rasaa la misura
E l'ha tiraa Milan foeura di gangher.
Lì s'è cors adirittura
Al palazz del Brovett, in municippi
Per fà la guardia civica. - Va ben,
Ma gh'è minga de s'ciopp. -
Faremm a condemen:
Ombrell e regondin per el prenzippi,
E ghe n'emm anca tropp. -
Han miss giò parrecc pont de petizion,
E in cova al Podestaa,
Che con coeur de leon
L'ha ris'ciaa semper per el primm la pell,
Sto esercit disarmaa
L'e andaa al Governo, del sur O'Donnell,
Per fagh firmà quel che voreven lor,
Per forza o per amor:
Perchè difatti la vegneva veggia
E l'era vora de dà on pè in la seggia.
Rivaa al palazz, mazzaa
Do guardi, e tolt s'ciopp e giberna ai olter,
Trovaa '1 Donnell sconduu, e destanaa,
G'han faa firmà i decrett, e noccorolter.
Intrattanta la gent,
Per no stà a zìffolà pondada ai mur,
L'è corsa per i sal allegrament
A strascià, spantegà e buttà via
Quai centenna de risma de scrittur
A gloria e onor de la burocrazia
Fada de sgobbadura e de palpee.
Dopo s'è tornaa indree Trionfant,
glorios Sbraggiand a tutta vôs:
- Viva l'Italia, abbass la Polizia!
E lì, foeura coccard, foeura bander
Di poggiceu, di finester, di lingher.
L'era ona scenna noeuva,
Granda, pienna, vegnuda a l'improvista,
Sul fa del gust che proeuva
On orb quand el ricupera la vista.
Che bell'oretta de carnevalon!
La variva cent ann de mascarad
E d'alter bagajad.
Quelle esercit de gent
El s'è come divis in do porzion:
Part hin cors al Brovett
A fass inscriver per guardia: el rimanent
Hin restaa a linzonà per la corsia
Di Serv, tutta festosa e d'on effett
Che fava sbilidri de la legria.
Quand' tutt a on tratt... l'è staa ona s'cioppettada
Sparada de lontan (2) ?
L'è staa quai ùsser che corress per strada?
S'è spantegaa on allarme in tutt Milan:
E l'è staa in d'on esuss
On urtass, on sbandass,
On pessegà a sarà bottegh e uss,
On tirà su i rizzad per fà di sass.
L'è staa de quel moment
Ch'è comenzaa ona guerra disperada
D'on popol disarmaa contra on'armada:
Roba ché fa spavent!
I s'ciopp contra i baston,
I sass contra i cannon,
E ona cittadinanza sueffada
A tutt i e omoditt,
E a scoeud tutt i petitt,
Moresina e pacifica de coeur,
Che tutta insemma salta sù in d'on tratt
A fa quell che Dio voeur.
Fieri come leon,
Svelti come legoratt,
E senza distinzíon
De pitocch, sciori o nobil,
De donn o de fioeu,
De gioven o de vece,
Chi ruza in strada i mobil
Per fa di barricad,
Chi resenta i bottegh di ariniroeu,
Chi se porta ai finester o sui tecc
Per tirà sui nemis copp e sassad.
El primm bisogn de tutt
L'era quell del fusill,
E attorna i pù ris'cios e risolutt .
A guadagnassel col tarell, col still.
Ogni s'ciopp guadagnaa
L'era on Croatt mazzaa:
Ogni vun de qui s'ciopp
N'ha voltaa là di tropp.
I campann a martell col so dan dan
Boffaven in la furia de Milan,
E qui son tant terribil e pietos
A tucc gh'era duvis
Che fudessen la vos
De Pio Nono che ai nost e so nemis
El ghe sonava i bott de l'angonia.
Dopo è compars avoltra anca i cannon
Che in quella sinfonia
Faven de tamboron.
E sta scenna de sangu e de spavent,
De foeugh, de mazzament,
Sta frenesia, sto inferno in barilott
On trattin l'è duraa cinqu dì e cinqu nott.
Madonna de l'ajutt!
Come pò la cittaa
Desgarbiass de tanti post armaa
Che la inredaven tutta e depertutt?
I barricad hin bonn de tegnì indree
La truppa del Castell
E di olter quarter foeura di pee;
Ma la Cort? e la piazza de Mercant?
E quij del Genni? e '1 General Comand (3)
E tanti Corp de guardia e sentinell?
E Santa Margaritta? e i Andeghee?
San Simon? Sant'Antonni?
E tanti olter bisoeu de Polizzaj
Che per vess odiaa come demonni
Hin staa i pù disperaa e i pù canaj?
E la cà de Radetzky? e San Francesch
Magazzin de Todesch?
E i trupp ch'eren sul Domm a sparà giò?
M'en regordava no,
E almen quij se pò di senza ingannass
Che ne trattaven proppi d'alt in bass.
Milan l'ha tegnuu dur:
Già l'era al tu per tu de vita e mort,
E la s'è missa al fort,
E l'ha ditt anca lee: Zorocch tì e mur!
I Corp che hoo nominaa
E tanti d'olter che hoo desmentegaa
Part col brusagh i port
Sott al tir di fusij e di cannon,
Part per assedi e famm,
Part per avè vojaa la munizion,
Part dopo faa di tradiment infamm,
Chi s'è daa presoner,
Chi è sghimbiaa via de nott
Locch, travestii, mezz biott.
S'è ciappaa tutt i post, tutt i quarter:
E dent di pont no gh'è staa pù soldaa
Che no fussen in gabbia o massacraa.
E innanz a pù non poss
A slontanaj anca de là del foss;
Han battuti e ciappaa San Semplizian,
Sant'Angiol, San Vittor, l'Incoronada,
San Lucca,... in conclusion tutta l'armada
Casciada a furia de tutt quant Milan
La s'è ridotta cont i soeu cannon
n del Castell, ai dazzi, e ai bastion.
Capii che bagatell?
Domà a cuntaj se sent tutt a rugà:
Per omen fabricaa de carna e pell
L'è 'l non plus ultra e no se va pù in là.
E de quest capirii
Che ghe n'era puranca de la gent
Che ghe pondava dent,
Che s'è mai desvestii, che ha mai dormíi,
Che girava di e nott per la cittaa
Mojisc, rauch de vôs e strabuffaa,
o E che a furia de corr, battes, drovass
Aveven pers l'usanza de fermass.
I donn han faa miracol
De forza, de virtù, de intelligenza;
Pù nè lacrim, nè ciacol,
Eren el balsem de la providenza:
Lor colà piomb, lor medegà ferid,
Lor mett coracc a tucc
E fà, col cceur strasciaa, bocchin de rid.
Lor fà bind e filaper,
E fina trattà '1 s'ciopp compagn di gucc
E mandà al babbi on rebellott de Slaper.
E la bardassaria?
Tutt a on bott l'è cressuda in del giudizzi,
Beati e smanios de fa servizzi,
E de mettegh la pell comesessia.
Lor sù e giò per i strad
A portà intorna avvis,
E in pee di barricad
A fa segn che rivaven i nemis,
E vosagh adree succ! ai s'cioppettad
Come fan sabet grass cont i benis.
Hin coss d'ona natura
Che per vess ben cuntaa
Bisogna vessegh staa in mezz adrittura,
E l'è per quest che mi vi cunti maa:
Perchè, come savii,
Sont deventaa Monsciasch che l'è chi ajbella,
E sti robb i hoo leggiuuu e i hoo sentii;
Ma quella gran scovada,
Per mia disgrazia, hoo poduu no vedella.
Ah!, se gh'è staa on moment
Che m'è pesaa sul coeur la besasciada
Del mè lontanament,
L'è staa quest chi: sera dannaa, camuff
De trovamm. minga in mezz al mè Milan
A juttagh ona man,
Portà in straa moschiroeula e portaruff,
E spetasciagh la ghigna a quai Croatt
Con la marmitta, col bronzin, coi piatt.
Hoo nanca movuu on did contra i Pattan!
E quand ghe pensi sù
Me troeuvi fina indegn de vedej pù.
Se ghe fudess staa dent
Marcarev di cossett e di penser
Che al poetta ghe rughen el talent,
E la pu part ghe passen via liger.
Chi me impresta dò ôr de qui cinqu nott
Che mi trasava a Monscia a fà nagott?
Che magazzin de idei
In quel tarlescament
De campann e martej
Che tempestaven giò de tutt i ges!
E qui vôs che vegneva de lontan
Portaa de post in post per i contrad
A visà i pese pericol de Milan:
- A Porta Tosa! - A Porta Ticines!
Foeugh al tal dazzi! - All'erta ai barricad!
E quel trovass insemma
Gent che s'è mai veduti nè conossuu,
Senza sospett nè temma,
E vess i ben vegnuu,
E sentiss tucc fradej e tucc sorell,
E in quell'agitazion
Del pericol che forma l'union
Trovass el coeur ciappaa senza savell,
E Dio predestinà di parentell.
Ma i Milanes lontan
Han passaa de qui spasim in qui dì
De inguraj nanca ai can:
Perchè violter chi
(Minga che voeubbia sminuiv la gloria
De avè faa di miracol incredibil
Che han de pari panzanegh in la storia),
Ma, disi, chi in Milan,
Passaa qui primm moment, i pù terribil,
Savevev cosse favev.
Savevev come stavev,
E, direv squas, l'orgasmo de l'azion
El slingeriva ai oeucc la situazion.
Vedevev Feroismo
Di voster tiralioeur,
Quiett el barabbismo
Che lavorava insemma de tutt coeur,
E l'union de tutta la cittaa,
E rispettaa '1 Governo, e '1 Comitaa,
Tant che fina in pericol de la mort
Cresseva el sentiment de trovass fort.
In quanto poeu al cannon,
A poch a poch ve serev persuas
Ch'el lavorava inscì a vista de nas
E che '1 gh'aveva on poo del fanfaron.
Sì, l'ha strasciaa di mur,
L'ha faa di bei rottur,
Ma men poeu infin di fin
De quell che ghe premeva a Rainerin (4)
(On popò de Rajner che reussirà
Per stomegh e bon coeur mej del papà).
Del rest sti cannonad
Se faven debolment el so dover,
Con fior de s'cioppettad
Se ghe coppava tutt i cannoner:
El colp gh'era el sò comod de schivall,
E de portass apress coi fassinon
Per podè tirà a segn,
E poeu lassall sfogà compagn d'on ciall
Incontra ai med de legn:
Violter Milanes in conclusion
Gh'avii pers molto el credit al cannon.
Ma vess lontan des mia
E senti semper quel brontolament
Che '1 pariva lì arent,
E che in del temp de di on'avemaria
El replicava quatter o cinqu volt,
Credevem che Milan el se desfass,
E che i cà pussee avolt
A tocch a tocch crodassen tutt abass.
Ogni colp che se tira
Dio sa che mazzament e che sconquass!
Tra i olter ona sira (5),
Che andava cannonad de l'alter mond,
Ch'era la luna pienna, e inscì a bell bell
La s'è quattada dent come in d'on vell:
E mi cont el coo in man
Diseva: La se scond
Per no vedè '1 sterminni de Milan.
A st'ora chi Dio sa cosse n'è andaa
De parent e de amis!
E li m'era duvis
De vedè '1 tal e '1 tal longh e tiraa
Cont spantegaa el cervell per el selciaa.
Signor, che viv d'inferno!
Com'hin staa longh per nun qui cinqu giornad!
Rivava quai proclama del Governo,
Ma i credevem sparad
Per tegnì in pee '1 coracc:
Infin savevem mai nagott affacc.
Mandavem di vittur e di pedon
Per avè informazion:
Ma, di cojoni! appenna che toccaven
La Cassina di Pomm, oppur Lorett,
Che ciappava el spaghett
E a gambe ghe la daven:
Che la gent sequestraven i cavai
E la Croazia la batteva i ortaj.
Passaa i primm tre giornad,
L'era ona smania tal, ona passion,
Ona disperazion,
L'era roba de dass di cortellad.
Me pariva incredibil
Che '1 fuss anmò possibil
De battes, de stà in pee.
E i baloss? e i pittocch che no sent leg?
Se podarà tegnij de fa saccheg?
(V'emm calanniaa, povera gent, scusee!)
Se gh'aveva rimors de andà a dormi,
De mettes a disnà.
Se diseva: Là giò de st'ora chi
Chi l'è che dormirà?
Chi sarà settaa a tavola in Milan?
Quanti sospiraran on tocch de pan?
I provision de bocca
Podaran circolà?
E tucc quij che ghe tocca
De lavorà dì e nott,
Pese che in temp de borasca i galeott,
Com'han de fà a mangià e mojà '1 becch?
Roba de avegh la polver sui busecch.
Finalment anca nun
Gh'emm avuu '1 nost ossett de resignà,
E l'è staa '1 di vintun:
Vottcent soldaa de batt e disarmà!
Voreven toeu '1 passagg
A ona frotta de bulli de Lecches
Che infiammaa de coragg
Correven in ajutt di Milanes:
Allora Monscia anch lee
Coi so vintott o trenta s'ciopp de caccia
La se gh'è missa dent cont man a pee
E no l'ha voltaa faccia!
E l'è staa on affar gross, longh, disperaa,
De pari fina matt a 'vell tentaa.
E ghe n'hin reussii
Cont on bell mucc de mort e de ferii.
E mi ai primm colp pessega,
Preparem a bottega,
E sont staa all'ospedaa squas tutt el di
A giustà, resegà, stagnà, cusi:
E (quand se dis a dì)
Quel lavorà fogaa de beccaria
El m'ha desaviaa via
Del penser principal,
E, salvo el dispiasè,
Che ghe n'hoo avuti comè,
L'è anmò staa '1 dì che abbia passaa men mal.
A l'ultima giornada
N'è tomaa adoss la vita e la speranza:
S'avarav ditt che tutta la Brianza
L'era on nivol de usej che fass passada.
Andaven al Vapor
Ch'el menava giò a gratis tutt i ôr;
Passaven via a tropp,
Annaa a la bella mej de forch, de s'ciopp,
De sciabol, de pistoll e de folcion.
De baston cont ligaa inscimma i cortei,
E (le lanz strappaa foeura di restej.
Chi sonava tambor,
Chi portava bandera,
L'era on moto, on sussor
Olter che in temp de fera!
Bagher, vittur, carrocc, carr, carrettitt,
Cont pan, vin, polver, ball e cannonzitt:
E se sbraggiava, se batteva i man:
Evviva i Brianzoeu, sangue de di!
Bravi, corrii a Milan,
Mazzee on para de Gnibba anca per mi.
Quand poeu Dio l'ha volsuu
Radetzky coi sò besti ghe l'ha dada,
E Milan l'ha vengiuu,
E s'è vosaa: Betulia liberada!
E giò subet mezz Monscia per Vapor,
Ancamò tutt stremii
Per paura di mort e di ferii,
A cercà cunt di sò parent, di amis:
E'l tal ? e '1 tal?... e '1 tal?... grazia al Signor,
In proporzion de l'odi di nemis
E de la volontaa
Che gh'aveven de fà busecca e mort,
L'è staa on gran bell confort
A vedè che l'è andada minga maa;
E mì, presempi, i mee,
Che hin on bell rose, i hoo trovaa tucc in pee.
Se brasciaven sù tutt
Come se se vegniss de Calicutt;
L'era on mist de legria, de convulsion,
Tucc gh'aveven quai storia de cuntà
De orror, de compassion:
Se fava nanca a temp de dagh atrà.
E ve diroo che fina
I pù gran motrion
Gh'aveven tucc adoss la parlantina.
Qui ludri de Croatt,
Inscì negher e brutt! mì me figuri
Che gh'abbien del scorbatt
Perchè hin proppi usellasc del mal auguri.
Quand incontraven gent
Che ghe mostrava i dent
Sti carogn barbellaven e scappaven
Come i bagaj che tremma del bordoeu,
E presoner piangeven, supplicaven:
Ma in sit foeura di pee,
Cont i vece, cont i donn, cont i fioeu
N'han faa tant che sia assee.
N'han inciodaa paricc contra i muraj,
N'han ongìuu d'aqua rasa, e poeu brusaj,
Parecc bambin de tetta
I han portaa attorno su la bajonetta;
E a vun de sti Antecrist g'han fin trovaa
In la giberna dò man delicaa
Con sù i anej in dit... Oh, car Signor!
Hin mò fioeu de Pio Nono anch lor?
No! freghégh giò '1 battesim a qui moster
Che g'ha in di viscer la maledizion,
Che no gh'entren nagott col Pater noster;
I tigher, i leon,
I lôff rabbiaa de famm e idrofobia
In pari a lor hin fior de cortesia.
E tutt sti azion d'inferno
I han fors faa per difend i sò diritt?
Per salvà la soa cà, i soeu piscinitt?
Noi per servì on Governo
Forestee, prepotent, lader, lontan,
Gent che no han mai vedu-u nè conossuu;
Che per on tocch de pari
Negher e muff, e di legnad sul cuu,
E on scartozz de tabacch
Je strappa di sò stall e di sò vacch,
Per corr a spantegà de terra in terra
Tutt i orror de la guerra
Contra di popol che g'han faa nagott,
E che anch lor crennen sott
A l'istessa familia de ladron
Che bev i lacrim de tanti nazion,
E che tra vuna e l'oltra la somenna
La rabbia e la passion de sbuseccass
Per tegnij tucc stremii, debol e bass,
E mandà innanz la boria de Vienna.
Ma i pover Milanes
In mezz al sò trionf, quanta bontaa!
Ilari renduu ben per maa:
Naturalment, se han liberaa '1 paes,
Han dovuu coppan giò nè tropp nè pocch;
Ma quand i Pattatocch
Ghe capitaven viv- in di sò man,
I liti staa trattaa fin tropp de cristian.
E i centenn de ferii
(Anca ben che ghe voeubbia on bell talent
A fissass che Do sien besti ma gent)
Hin staa assistii, servii,
E consolaa anca lor
Lecc a lecc cont i nost liberator.
E tutti i presoner
Hin talment ben trattaa e mantegnuu
Che g'ha fin de pari de avè vengiuu:
E in quest Milan l'è staa tutt d'on penser:
Ah, la vostra vittoria
L'è stada el colmo de la vera gloria!
Perchè a pati. qui strasc de infamitaa,
Fagh minga pagà '1 fio,
Anzi trattaj con tanta caritaa,
L'è ona virtù che ve avvisina a Dio:
Già Milan l'è puranch de bonna pasta!
Han nanca mazzaa '1 Bolza, e tanto basta.
Ma per tornà indree on pass
E sarà sù '1 discors di cinqu giornad,
Vuj di che i barricad
M'han faa restà de sass.
S'ha pari a pensagli sù come sessia
Per fassen on'ideja:
Hin ona maraveja
Che passa tutt i sforz de fantasia.
Girà Milan, contrada per contrada,
E vedè depertutt, ogni tocchell
La cà portada in strada
Dai trappol del soree fina al vassell!
Matarazz e pajon, banch e sciffon,
Vestee, bauj, cardenz,
Antiport, capponer (senza cappon),
Omnibu.s, diligenz,
Legn de la Cort, forgon,
Med de s'cenn, de fassinn e de letamm,
Cass, cassetton, barì,
I pù bei equipagg di noster damm,
Qui carrocc che la gent sul fà de mi
G'han mai de pondà dent el taffanari,
Cont foeura i roeud e cont i pitt a l'ari.
Se capiva polit
I mestee di bottegh de la contrada
Guardand de sit in sit
De coss'era compost la barricada.
Se l'era on seggionee
Gh'era brent e seggion, bôtt e mastej:
L'era on stallazz? gh'era de foeura carr,
Bàgher, vittur e barr.
Se conosseva el fruttiroeu, el pessee
Per i scorb e i cavagn pien de quadrej;
E a San Zen, là del boia, ghera finna
El carr de la berlinna.
Banch e confessionari arent ai ges:
Quij pr contra a la Scala eren difes
Dai sedi de platea del Teatter,
E li apress, al Giardin,
Che l'è '1 sò magazzin de tutt i tatter,
Troni cont i gradin,
Divinitaa de rivi e gess, scenari,
Fett de montagn, colonn e colonnett,
E tra cent olter mila strafusari
Gh'era fina on barchett.
El Demani l'ha daa per barricada
Di carr de.... induvinee.... carta bollada!
E credii minga che tutt sto miscmasc
De robba bella e strase
Che naspaven la vista in del guardai
Fassen rid nanca i ciaj.
Se ghe vedeva i sforz e l'union
De tutt i cittadin che s'hin daa man:
Dedree de qui monton
S'è tegnuu in pee Milan,
E scadennaa l'Italia sul Pattan.
Qui baracch ve cuntaven ona storia
Che andarà foeura pù de la memoria:
Faven voeuja de piang, de ingenuggiass
Mej che denanz ai monument de sass,
E pariva de leggegh su stampaa:
ARCHITETTURA DE LA LIBETAA!
I mee car Milanes,
e vorii dimandagh ai noster vecc,
Di guerr n'han vist parecc,
G'han avuu chi Todisch e poeu Franzes,
E poeu Todisch anmò
E poeu anmò Bonapart a pestai giò;
E infin poeu semm tornaa a borlà in man
De sti razza de cari.
Ma sto ibis redibis, sti furor
Di forestee che se robava el post
E voreven l'Italia a tutt i cost,
Eren tutt coss che faven tra de lor
Coi sò esercit in pee
Che andava innanz indree.
E'l popol, diroo minga indifferent,
Ma 'l stava lì quiett
A speccià de servi '1 pù prepotent, i pret pregaven
Dio in di secrett. Ma nemis inscì fort
Che a costo de andà tucc contra a la mort
Se cascien a sassad, a quadrellad,
A campann e martell e barricad,
A sgarr e a urli de maledizion
D'on popol che l'è tutt in convulsion,
A student e abbaditt de seminari,
A pret e fraa col crocefiss in ari,
A gent che corr de tutt i part d'Italia
Cont la bava a la bocca
Per spetasciaj in l'ultima battalia,
L'è on fatt: strasordinari,
Che fa girà '1 cervell
Compagn d'ona bicocca;
Ch'è dent la man di Dio,
Gh'è dent la vôs de Pio,
L'è on fatt tant grand e bell
Che s'è mai daa l'ugual, nè '1 se dà pù,
E che parla tropp ciar lù de per lù.
Adess mò se dimanda
Se qui pover baloss
Han proppi meritaa de dagh adoss
Con sta furia inscì granda.
Chi vemm su l'argoment
Di canajad che han faa, e di malann
Che n'han vojaa sui corni in tutt sti ann.
Ma no l'è minga el cas de strusagh dent
Inscì liger liger,
Perchè l'è ona tal fila de latanni
Che domà a tornagh sora col penser
Se sent adoss i sudor frecc e i smanni.
E mì che no soo nanch com'abbia faa
Con la crappa anmò lôcca
De tanti novitaa
A tirà giù sta magra filastrocca,
Adess vuj ripossà,
E mettem de premura a fà nagott:
Dopo taccaroo sott
E tornaroo a sbraggià.
Donch semm intes, ve specci on'altra volta
Che hoo de cuntaven sù ona gran missolta,
E i cuntaroo polid,
E ghe sarà de piang e anca de rid,
Perchè se tratta infin
De processà i Todisch in meneghin.
Ma prima de andà via
Trovaren competent e natural
De fà on poo de moral
Inscì a la bonna e come sansessia.
Disii on poo, la mia gent,
In quell'impegn terribil
Come l'ha faa a cavassela Milan?
L'è ch'eren quasi tucc d'on sentiment:
E a sto mond l'union
La trà foeura i miracol pù incredibil.
E la filera de impiegaa pattan,
De balos e de spion
Che gh'aveva interess che l'andass maa
Han trovaa de stà quacc e no han sbrottaa.
E l'Italia savii per che reson
Dopo avè dominaa su tutt el mond
L'é tomborlada in fond
Compagn d'on milionari spendaccion
Che feniss in di cronich a Biagrass?
L'ha tolt sù sto sconquass
Per la disunion,
Per la superbia e l'odi di partii,
Per i guerr de cittaa contra cittaa,
E fina de pasquee contra pasquee:
E quand s'hin trovaa tuce indebolii,
E ben desbirolaa,
Allora è, saltaa in scenna i forestee
Che hin deventaa padron,
E per esercitamm in l'umiltaa
M'han robaa fina el titol de nazion.
E l'è on pezz che la va
Sta storia bozzaronna
De vedè scalcagnada a struggionà
Conte povera serva la padronna di secol assee
Che l'Italia la purga i cattiveri
Di messee di messee di nost messee,
E nun s'ha ereditaa on mucc de miseri
Frut de qui lit, e de qui guerr infamm
Che hin staa come on segond peccaa de Adamm.
E adess che semm reussii
Per on miracol de combinazion
A sbatt giò '1 bast e romp el cavezzon,
Ghe sarav di partii gemò dispost
A fà di raccol e pestass i crost?
El primm bisogn l'è de stà fort e unii:
Sì, ben unii e fort,
Se de no precipizzi, infamia e morti
Guardee, l'Europa integra
La ten sbarattaa i oeucc sul nost paes
Per vedè se semm bon de fass i spes
E de invià bottega.
E se no femm i coss polid e prest,
O on boia o l'olter ciapparà pretest
De ficcagh dent el nas
Per fann quel che ghe pias:
Perchè insomma l'Italia l'è tropp bella
E tuce voeuren godella.
Parlemm ciar: se vorii che i nost nemis
No tornen prest o tard.
A onscisciass i barbis
Col lard di nost porscej,
Emm de stà tucc insemma e vess fradej,
E avegh ona leg sola e on soll stendard:
Ciappemm la pappa fada;
Femm che sia nostra ona superba armada;
Radoppialla a di pocch,
E on mezz milion de guardi nazional
A fagh de contraffort e de schenal;
E poeu se i Pattatocch
Gh'avaran su l'Italia di caprizzi,
Che cavaremm del coo sto schiribizzi.
Mi adess disi per dì,
E se semm in d'on temp che ogni pivell
Bagna el nas a Gioberti e a Machiavell,
Poss dottorà anca mì.
Già, statitt, reottitt, republichett
Varen come '1 vinett,
E la ven veggia coi diminutiv:
E poeu certi paroll
Metten la gent quietta in sul chi viv!
E ghe tran el coo a l'ari
Ai barabba, ai pajsan e ai operari.
Del rest, chi l'è quel cioll
Che podend viv del so cerca on padron?
Ma bisogna adattass come se pò.
Ona costituzion
Sincera, larga, pienna,
Chè han de parlà con nun a mettela giò,
Fada e tajada per la nostra schenna
(E adess i nost hin schemi de barricad!),
Netta de scappatori e de cinad,
Sii minga persuas
Che in giornada la sia proppi el nost cas?
E sta povera Italia, che l'è giust
Sul fa d'on strivall frust
Tutt poncignaa a tassej e tassellitt
Per man de des o dodes sciavattitt (6),
Femmela noeuva on bott dal mezz in sù!
El rest l'è adree a fass nceuv là de per là.
Chi ghe sarav inscì de resonnà,
Ma per no famm fis'cià,
E toeu sù, se sa mai, de l'ignorant,
Taji sù a vista e ve saludi tant.
O bosinada mia,
Molla del stampador
E fatt mett a la via
Senza licenza di superior.
NOTE
(1) Dopo le enormità commesse in Milano, la sera dei 3 gennaio, dalla soldatesca, comparvero due Proclami dell'ex-vicerè intesi a calmare lo sdegno della popolazione. Egli dicevasi padre di tutti noi, ci chiedeva illimitata confidenza in lui, parlava delle sue più fondate speranze di ottenere concessioni da Vienna, cc.; e assicurava i suoi diletti Milanesi che egli teneva più strettamente unite nelle sue mani tutte le redini del potere che li doveva tutelare, ce. Parole divenute proverbiali in Milano, specialmente dopo la promulgazione della Legge Stataria.
(2) Ho lasciato in dubbio quale sia stata la causa ultima determinante l'attitudine reazionaria di tutta la città, perchè non potei raccogliere dati certi- pare che diversi atti di violenza militare sieno accaduti quasi contemporaneamente in vari punti disparati di Milano.
(3) La rima è fatta per gli orecchi e non per gli occhi; o, in altri termini, risulta dall'identità de' suoni, e non sempre da quella delle lettere che li esprimono: testimonio la poesia francese a ogni verso. Perciò mercant comand, pret fed, ec., sono ottime rime, perchè abbisogna un apposito sforzo di pronuncia a renderle dissonanti.
(4) Si allude a due lettere del giovinetto arciduca Ranieri scritte a un fratello, e pubblicate nel N. 5 (30 marzo) del Giornale ufficiale di Milano.
" Auguro ai Milanesi che ne sieno restati per lo meno 500 sul luogo... Al Broletto i cannoni da 12 avranno fatto dei magnifici buchi... Ne fosse almeno rimasto morto un bel numero... Almeno a quest'ora i Milanesi conoscono la musica dei cannoni da 12... Ora vorreì assumermi di pettinare ben bene la città di Milano, ec. ec. "
Tanto questa nota come la prima sarebbero affatto superflue oggidì dovunque s'intende il dialetto milanese; ma se alcuno dei nostri ragazzetti da qui a molti anni trovassero fra le anticaglie questo libercolo, e volesse mo' leggerlo e saper tutto, bisogna pur dargli ragione di quanto sta scritto.
(5) Eclisse totale di luna la sera del 19 marzo.
(6) Sì, dodici; anzi, solamente pochi mesi addietro, erano tredici; il numero della morte. Austria, Stati Sardi, Svizzera italiana, Parma, Modena, Lucca, Toscana, Romagna, Napoli, Francia in Corsica, Inghilterra e Malta, e i due Stati omeopatici S. Marino e Monaco. Non occupandoci di questi ultimi, che sono due scherzi innocentissimi o, direi quasi, due versi settenarii in un gran poema, cessarono già in Italia le dominazioni d'Austria, di Parma, di Modena, di Lucca: Ferdinando di Napoli, l'atroce e incorreggibile assassino de' suoi popoli, sembra stanco della vita non che dello scettro: perfino l'ottimo e adorabile Pio, colle ultime perplessità e angustie della sua timoratissima coscienza, pare aver sciolto il gran problema della incompatibilità dei due poteri, e avvicinarsi spontaneo all'evangelico regnum meum non est de hoc mundo. Tutti questi non sono grandi passi alla sospirata meta, l'unità d'Italia? Non pretendiamo dunque di forzare gli avvenimenti che già si succedono così inaspettati e meravigliosi allo scopo.
Ciò detto, quella parola sciavattitt è un po' irriverente e petulantella, non è vero? ma riposa sui diritti composti della similitudine, del dialetto, della rima e della libertà della stampa, la quale ci ha pur da essere per qualche sugo. Scrivendo in prosa e in lingua nobile, per lo meno avrei detto calzolai, che è tutt'altro affare. Però, con qualche eccezione: per esempio, gli ex duchi di Parma e di Modena che, italiani nel cuore d'Italia, stipularono contro i proprj sudditi quella loro famosa alleanza coll'Austria, destando tanto riso o tanta nausea secondo la varietà dei temperamenti, valgono forse miglior titolo che di ciabattini? Anzi, dimando perdono a tutti quelli che tirano lo spago di aver messo quei due miserabili, per la rima, a livello del loro mestiere tanto utile e onesto.
Dopo le letture fatte in Milano de' miei versi, mi furono dirette molte esortazioni perché inserissi alcuni accidenti importanti delle Cinque Giornate, da me non avvertiti, fra i quali merita specialissimo rimarco la preziosa invenzione dei bravi Seminaristi che mandavano fuori di città gli avvisi del Governo provvisorio e del Comitato di guerra col mezzo dei palloncini volanti. Ma, con mio vero rammarico, non fui più in tempo a riparare questa e altre ommissioni, perché la stampa dell'opuscolo era già troppo innoltrata.