Il criec ded aur
Il criec ded aur
Sin crestas schai greppus e teis
Igl èr dil pur Flurin.
Da miez avrel leu aran treis,
Bab, mumma cun lur pign.
5Tschaghera rocla tras la val,
Dus bos zaccudan il stadal,
Davongiu las totonas pendan,
E grevamein las travs sefendan.
Il buob sedrova d'empalar,
10Ils dus tgaumogns van plaun
E lessen entraviers passar,
La tretscha tagl' il maun;
Las gaultas brischan al mattasch,
El bratta mintga ton il bratsch-
15Il criec fa giombers e sviescha,
Ch'il bab marmugna e smuldescha.
La mumma va cul tgau a bass
E sdrappa il zerclem
E mira mintga quatter pass
20Ensi tier il Suprem:
„O fai la crusch sul pauper pur
Che fa cun gretta la lavur!
Sche nus luvrein aschi malidi,
Co lein nus lu ch'il Segner gidi?“
25Snueivel va il criec a funs-
Hist, hot! va'i tur a a tur,
Ils stels daghiran sco izuns
Ord tuts cavegls dil pur.
„Quei ei strapaz de tut sesfar,
30E zaccudem de sestrunglar!
Sche vul ei infinita possa
Per far al graun la pintga fossa!“
Uss ein ils zuocles osum menai,
Il criec per tiara vi;
35Uss stauschan de lur guiv spindrai,
Il bos lur berls stendi.
Selegra pur, prest vegn tiu èr
A spender monas pil garner!
Mo pur Flurin stat e sbarbutta,
40Sco sch'el havess la bratscha rutta:
„Pilver, jeu sun dil criec unfis,
Traso cul nas el tratsch!
Ils auters han il paradis,
Il pur ei in pupratsch.
45Schi liungs e lads scho il sulegl
Sclaresch' il mund cun siu lamegl,
Ei franc il criec la menadira
La pli macorta, la pli stgira!“
|
This work is in the public domain in countries where the copyright term is the author's life plus 70 years or less. See Copyright.
|