Il giorno del mercato
Angelo Cossa (XVIII-XIX secol)
Il giorno del mercato
(Part I, scena I)
PIRLONZI: - Insoma, el mè Cocumer, mì la vuj sposà. Pensa e ripensa, mì no poss minga viv senza lee. L'è vera che sont minga gioven, l'è vera che lee la g'ha vintun ann e che l'è bella viscora come on pess, l'è vera che l'è mia nevoda, fiœula del mè pover fradell, Esuss per lu; ma mì no poss stà senza de lee. Se m'insogni, me par de vedella, de sentilla, de parlaggh, de staggh insema. Se mì pensi, lee l'è el mè penser principal, anzi l'unich. Se voo a spass, me par de incontralla; insoma, se no la sposi, mì deslengui come la scira al sô, e a poch a poch finiroo a andà in sepoltura.
COCUMER: - Car el mè scior padron, lu el sa che mì ghe sont tacaa come la colla al legn, che mì g'hoo amor per lu. Hoo minga de voreggh ben a lu, che 'l m'ha faa e 'l me fa semper di benefizzi? L'è trent'ann che mì el servi, el mè car scior Pirlonzi; e lu l'è semper staa content de mì. L'è ver che mì cerchi de fà l'impossibil per servill ben, per andaggh in sul sò vers; ma anca con tutt quest, el gh'è certi padron che o inn matt o inn stravagant, e no inn mai e pœu mai sodisfaa de nient, tant a fà ben come a fà mal; che barbotten semper, che g'hann semper la cera scura scura. Ma lu, al contrari, ah lu!...
PIR.: - Vegnem a nun. Sett cossa hoo faa perchè la mia nevodina, la mia cara Salsetta, no la m'abia de dì de nò? Mì l'hoo pensada bella! Già te vedet che mì sont on poo sul temp, perchè con settant'ann sul gœub s'è minga gioven; mì g'hoo on poo de roba, anzi: chì in 'sto paes se dis che sont rich, e forsi per 'sto paes sont propi rich; mì no g'hoo che ona fiœula del mè pover fradell, Esuss per lu!, che 'l me l'ha recomandada tant e pœu tant; mì donca vuj sposalla e vuj faggh ona donazzion de tutt el fatt mè, e el dì fissaa per fà ona roba e l'altra a l'è incœu dopo disnaa, propri in quell temp che se farà la tombola del bèe.
COC.: - Oh, cossa me dis! Lu el me fa strasecolà! Incœu, propri incœu! Mì credevi che 'l voress pensaggh su on poo de pu. El matrimoni, el ved ben!, l'è vuna de quei zerimoni che, quand l'è fada, no la se pò pu desfà; e 'sta autoritaa no ghe l'ha che vuna solla, vuj dì quella brutta veggia tisega tisega che disen che de nott la sta sui tecc cont in man ona ranza. Lu però el farà quell che 'l credarà che possa vess de la soa convenienza. Ma... se 'l me permett... mì vorev faggh fà ona osservazzion: che 'l me scusa; mì sont on bacol, ma quai volta anca i bacol hann parlaa come on liber stampaa, e ai temp d'adess forsi anca mej.
PIR.: - Di' pur, parla pur. Mì sont chì a datt a trà.
COC.: - Mì me par che la sciora Salsetta la sia cotta e biscotta de quell todesch del paes di Grison, che l'è mercant de cavai, che l'ha de vess nassuu a Ciavena, e che l'è semper inanz e indree de Ciavena a chì in grazzia di sò negozzi. Quell l'è gioven, l'è viscor, l'è bell; e lu... che 'l me compatissa, védel,... lu l'è....
PIR.: - Hoo capii, tas lì; se te g'hee on'onza de reson, te ghe n'hee des o vundes de tort. Guarda on poo: l'è capitaa di aventor in botega, va' a servì! Già in 'sto dì de mercaa, se gh'avess anca al dopi gent de famm servì, saraven quasi nanca assee: tant l'è el profluvi di forestee!
(Cocomero parte)
Chi ven dai paes visin o a pè o in barca; vun el ven per i sò negozzi, l'alter per curiositaa; e la pupart de quei che vegnen in carrozza o a cavall no vegnen che per spassass via, per passà ona bona giornada in 'sto bell sit e in mez a 'sto spuell de gent de tutt i sort e de tutt i condizzion, in mez ai cavai, ai vitur, ai frecass; e paregg de 'sti sciori resten pœu chì fina che l'è finii la tombola che, anca che la sia ona roba de poch interess (perchè a la fin no l'è che d'on bèe), pur pur che la fa legria la tratén chì tanta gent, anca che la fenissa on poo tard. Oh, eco la mia nevodina che la ven chì. Mì, quand la vedi, me par che 'l sangu el me se metta a fà ona forlonia, mì deventi ancamò quell de 45 ann fa, mì sont on oltr'om!