Il gramo lavoro del contadino
Pelliscion
Il gramo lavoro del contadino
Han pari a dagh de s'cenna e romp i brasc
a rebatton de sô fina ch'hin stuff
han pari a sternì brugh, paja e melgasc
per mett insemma di bonn mott de ruff.
Han pari a toeu su in straa stronz e bovasc;
chè on poo de pan ben vescionent e muff
han de stantà a mangiall, via d'andà attorna
cercand de chì e de lì de sternì el forna.
Han pari i donn a cascià via el fresch
prima de l'aurora con la sappa
lavorand in di camp pesg di fantesch
che mi no soo per quant no la ghe scappa
la pazienza de strappà el nevesch,
là tutt el santo dì a brusass la crappa
a fass rostì del cold i scinivej,
a vegnì tenc, a vegnì brutt, s'hin bej.
E la terra besogna lavoralla,
ma lavoralla ben se l'ha da rend
per conseguenza se la gent la calla
l'è quand ven su la vescia a oeucc vedend,
e no la fa negott anch a ingrassalla;
e in temp d'estaa che gh'è paricc faccend,
el po minga on omm sol tend da per tutt.
Sicchè in tutt i maner che voeur aiutt.
E poeu già gh'è de fa in tutti i stagion
che nun paisan stemm mai settaa sul scagn;
o i frasch, o i brugh, o i legn, o andà al patron,
o cattà su la grassa in di cavagn,
o menà al manz la vacca ch'è in guadagn;
o sternì i besti, o fagh el beveron,
in sostanza, per tutt on ann intregh,
basta vorrè, gh'emm semper quai impiegh.