jan lawa mi li toki e ni : “o pali mute. o pana e mani tawa mi.” ni li ike ala, tawa mi.
mi jan tawa. mi tawa lon ma ante lon ma mute.
mi wile e ilo mani. jan lawa mi li toki e ni tawa mi : “o alasa e ilo wawa pi ma Toli. mi wile e wawa. o tawa wawa.”
ona li toki e ni la, mi tawa lon ma Toli.
ma mi li ma Soni. ma Toli en ma Soni li utala mute. mi ken ala tawa lon ma Toli. ni li ike. taso, jan lawa mi li toki la, mi tawa.
ilo wawa ni li pona tawa jan pi ma Toli. ilo ni li ken pona e jan ike. ona li ken pana e lon tawa jan moli. jan lawa mi li wile e ni, tan ni : utala li ike. jan mute li moli. sijelo pi jan mute li kama ike li pakala. mi wile pona e ma mi. mi jan ike tawa jan pi ma Toli. taso, mi jan pona tawa jan pi ma Soni.
***
ma Toli la, mi lon tomo pi jan lawa. jan ante li lukin ala e mi. jan ante li sona ala e ni : mi lon. jan ante li kute ala e mi.
mi lon poka tomo pi ilo wawa. jan utala mute li lon. mi tawa ala. mi awen. jan utala li awen. mi sona ala e ni : mi ken ala ken jo e ilo ni ?
jan utala li tawa. ni la, mi tawa lon tomo pi ilo wawa. mi jo e ona. mi tawa wawa.
mi kute e ni : jan utala li toki wawa. mi sona e ni : jan utala li lukin e mi. ona li wile pakala li wile moli e mi. mi tawa wawa mute. jan pi ma Toli li toki wawa li tawa wawa, kin.
tenpo ni la, mi lon ma kasi pi jan lawa. taso, jan utala mute li lon. mi wile ala e ni : ona li jo e ilo wawa pi ma Toli. jan lawa mi li wile e ni. mi wile pona e ma Soni.
mi toki : “o tawa, o tawa wawa. ilo ni li pona mute.”
***
mi lon ma tomo lawa pi ma Toli. jan li pilin ike tan ni : mi tawa wawa. mi jo e ilo ona. uta ona li kalama mute, lukin ona li telo mute… mi wile pona e ma Soni. taso, mi wile ala ike e ma Toli…
***
mi tawa wawa lon ma kasi suli. jan pi ma Toli li lon ala. ale li pona. mi pilin lape, taso mi tawa. tenpo kama la, mi kama awen.
mi tawa lili. mi wile len. pilin insa mi li kalama mute. lukin mi li open ala.
mi sona ala e ni : jan li lon monsi mi. jan ni li pakala e lawa mi kepeken palisa. ale li pimeja.
***
mi open e lukin mi. mi lon tomo pi jan ike. palisa kiwen li sinpin mi. mi jo ala e ilo wawa. mi ken ala pali e wile pi jan lawa mi.
lukin mi li kama telo. mi pilin ike mute. lawa mi li pakala.
jan ante li toki e ni tawa mi : “sina pali e ijo ike. jan pi ma Toli li ike mute tan ni. taso … jan lawa mi wile toki tawa sina. o kama.”
jan ni li open e tomo pi palisa kiwen. mi tawa lon poka sina.
***
jan lawa pi ma Toli li sinpin e mi. ona li toki e ni : “tenpo ni la, jan pi ma Soni li tawa ala lon ma Toli. ni li nasa. mi wile e ni : utala li lon ala. sina wile utala la, sina kama moli. sina wile toki la, ale li pona.”
mi pilin nasa. jan lawa ni li wile ala utala ? mi toki e ni : “sina wile ala utala e ma Soni ? taso, tenpo ale la, ma Toli en ma Soni li utala, tan seme ?”
tenpo lili la, jan lawa li toki ala.
“tenpo pini la, ma Toli en ma Soni li sama li wan. jan lawa pi ma ni li mama. jan sama tu li lon. jan lawa li wile e ni : jan sama tu li pilin pona. tan ni, ona li tu e ma ona.
tenpo li tawa la, jan lawa pi ma Toli li pona tawa jan lawa pi ma Soni.
taso, jan lawa pi ma Toli li moli. jan lawa ante li lon. jan ni li wile utala tan ni : ma tu li kama wan. jan lawa pi jan Soni li wile ala e ni. tan ni, utala li lon. taso… toki ni li sin ala. tenpo ni la, jan lawa ni li lon ala, taso, ma Soni en ma Toli li utala. jan pi ma Soni li wile ala toki. tan seme la, mi sona ala. mi wile toki. jan mute li moli li pakala. ni li ike. mi wile ala utala.”
mi kute. mi toki ala. toki pi jan lawa li wawa : “sina tawa lon ma ni. tenpo kama la, jan pi ma Soni li tawa ala lon ma Toli. o toki e ni tawa jan lawa sina : mi wile utala ala.”
mi toki e ni : “sina wile ala wile moli e mi e jan ale pi ma Soni ?”
“wile ala. sina ken tawa, sina ken len. taso, o toki tawa jan lawa sina.”
***
tenpo mute li tawa. tenpo ni la, utala li lon ala.
mi pilin pona tan ni. jan mute li pilin pona kin. ma Soni en ma Toli li pona li utala ala.
mi lon ma Soni ala. tenpo ni la, mi lon ma Toli tan ni : mi ken tawa lon ma ante lon ma mute.
tenpo pini la, mi tawa lon ma Soni. mi toki tawa jan lawa mi. tenpo lili la, jan lawa mi li pilin ike tan ni : mi jo ala e ilo wawa pi ma Toli. taso, ona li pilin pona tan ni : jan lawa pi ma Toli li wile ala utala. mi sona e ni : jan lawa mi li wile mani li wile wawa. mi sona ala e ni : jan mute li moli la, ona li pilin ike. jan lawa mi en jan lawa pi ma Toli li toki. tenpo ni la, ma Soni en ma Toli li esun. jan lawa mi li pilin pona tan ni : mani la, esun li pona. kin la, jan lawa pi ma Toli li kepeken e ilo wawa ona. ona li pona e jan pi ma Soni e jan pi ma Toli.
tenpo kama la, mi tawa lon ma ante lon ma mute, tan ni : mi jan tawa. mi wile la, tawa suli li lon nasin mi !
