Io vivat!

Bakel blinom du del alik
Ko cuk, vab e bodils,
Zifadiles ga visiti
Selöl keki e vuiti
Bonedeles okik.

Ab man labom pöki sembal
Leno kanom letön:
Löfom mödo ga laboti
E ven logom us pösodi
Aiblibom pükön.

Täno cukil ga valädom,
Stanom sufädiko
E vab i pelüvöl binom:
„Masel tu mödiko dlinom,”
Dunel tikom also.

Nogna dunom so del sembal,
Atos binos badik!
Studel yofik de Kikazif^[1],
Ailöföl cogis in lif,
Kömom la väb omik.

Tovom ga vabategadi.
„Vabil binom vagik,
„Oningolob,” studel püköm,
Lefoviko ati dunom:
Dunot binom füfik.

Studel nu nepesenitöl
Vabi eningolom,
Ab, liedö, tegad kikom,
E cuk kel atosi lilom,
Pedomitöl, rönom!

Tävel obsik nu seistom
Äs snek pekorulöl,
Ko logs omik lä kikahog
Kanom logön se bakabog,
Binom ya kanitöl:

Io vivat, io vivat
   Nostrorum sanitas!
Is seistob neluimo
Ab ma gälod obik, o no!
   Ag, tuvobl nu medili
   Vilob se vab bodas!

Ab kim us lenkömom fädo?
Komotapolenan
Pükom: „Bakelavab, ö, ö,
Denu nenü dunel, fiö,
O labotalöfan!

„O dlinamel! oplotogob!"
Pükom man bligälik,
Sumom cuki len kop oma,
Flapom omi su bäk oma;
Vö, nu vedos lügik!

Studel, kel atosi logom,
Vemo zunom in vab,
Osi sufön leno kanom,
Kanit oma ya tonedom,
Ab fibiko se vab:

Io vivat, io vivat.
   Luman glelestupik!
Flapom fleni oka vemo.
Mutom getön flapis geo.
   Io vivat, io vivat,
   Luman glelestupik!

Nedetoi e detoi
Legom ga polenel,
No senitom kim kanitom,
Abu ko vab emogolom
Al dom ela bakel.

Kömom fino ko fan oka
Jü dom dlinamela,
Kel ya nogo us valädom,
Ab levemo bakel jekom:
Lehät polenela!

Bakel töbo nu lielom
Poleneli konöl,
E manifom vabi okik
Ed us logom fleni obsik:
Eko, mans pejeköl!

Studel bunom vemo spido
Se spad oka smalik;
Manis bofik nu gleipom
E gäliko zidanüdom
E kanitom yofik:

Io vivat, io vivat,
   Nostrorum sanitas!
O polenel! kanitolös!
Ed ol, bakel, danüdolös!
   Io vivat, io vivat
   Nostrorum sanitas.

Kilans flekoms okis äs mül;
   Abu studel käfik
Logom - e no negitiko! -
Das lezunoms lejekiko,
   Välom, eko, vifiküno
   Smavegi lievik!

Purmerend.

NOETS. (Vükifonät)

Se Nuns blefik se Volapükavol 1893, Nüm: 4, Pads: 2-3.