jan Sitata li tawa weka tan ma kasi, tan ma kasi pi jan Puta, tan ma kasi pi jan Kowinta · ona li pilin e ni : tenpo pini mute la mi jan ante · jan pini mi li awen lon ma kasi kin · mi weka tan jan pini mi kin · pilin ni li wawa · ona li tawa lon nasin la sijelo ale ona li pilin e ona · ona li toki insa mute, li sitelen insa · sitelen la ona li tawa lon telo suli li tawa ma anpa lon telo, tawa ma open pi pilin wawa · ona li alasa sona e pilin, e tan ona, e open ona · nasin ni la pilin li kama sona · ona li kama pana e suno tan insa ona, li suno e sona insa ·
jan Sitata li tawa noka la ona li toki insa · ona li kama sona · tenpo ni la ona li lili ala · ona li kama suli · ona li kama sona e ni : ijo li kama weka tan ona, sama selo pi akesi linja · ijo wan li awen ala lon ona · tenpo pini ale la ona li lon · taso tenpo ni la ona li weka · ijo ni li wile pi jan sona li wile pi kute sona · ona li tawa weka tan jan sona suli, tan jan sewi Puta · ona li ken ala awen lon nasin sona pi jan sewi ni ·
tenpo suli la ona li tawa noka li toki insa · ｢taso ni li seme? sina alasa e seme tan sona pi jan ante? ona li pana e sona · taso sina lukin ala e seme? seme li weka?｣ · ni la ona li kama sona : ｢mi alasa e mi, e lon mi, e tan mi, e pilin mi, e mi pilin · ni la mi alasa · mi wile kama sona e lon mi · ni li nasin li pali suli · taso tenpo pini la mi ken ala weka tan mi pilin, tan pilin mi · mi ken powe · mi ken tawa weka · mi ken len e lawa mi · taso tenpo ale la ona li kama sin · ni taso la mi toki insa mute! ijo ante li suli ala tawa mi sama ni · lon mi taso en mi pilin taso li nasa e ale mi · ni taso li kama e ni : mi jan Sitata! ma ale la mi sona pi pona mute e mi Sitata!｣ ·
ona li tawa noka li toki insa la ona li pini lon nasin · toki insa sin li kama a : ｢mi sona ala e mi, e jan Sitata · mi sona ala tan pilin monsuta · mi wile weka tan mi a! · mi alasa e wan Aman · mi alasa e sewi Paman · mi kipisi e ale mi · mi lukin e selo e insa, e insa pi insa mute · mi lukin e insa pi wan Aman e insa ale e insa sewi · taso pali ale ni la mi sona ala e mi · mi weka tan mi sama｣ ·
jan Sitata li open e lukin ona li lukin e ma · uta pona lili li kama lon sinpin ona · ona li pilin e sona suno lon lawa ona, lon noka ona · tenpo lili la ona li open sin e tawa noka · ona li tawa kepeken tenpo lili sama mije pi wile pali ·
ona li insa suli e kon li toki insa : ｢a, tenpo ni la jan Sitata o weka ala tan mi! tenpo ala la mi wile open e ale mi kepeken wan Aman · mi wile ala open kepeken pilin ike · mi wile ala moli e mi sama · mi wile ala lukin insa e mi ale · mi wile ala kama sona e sona len · tenpo ni la mi kama sona ala tan lipu Joka-Weta, tan lipu Atawa-Weta, tan jan pi jo ala, tan sona ante · ni ale la mi kama sona ala · mi o kama sona tan mi taso, tan mi sama · mi o sona e mi sama, e sona len pi jan Sitata｣ ·
ona li lukin e ma la lukin li sama lukin nanpa wan · ona li lukin e ma sama jan lili · ma li suwi a · ona li kule · ona li nasa li jo e sona len a! ni li laso · ni li jelo · ni li loje · sewi en telo li tawa · kasi en nena li kiwen · ale ni li suwi li pona lukin · ale ni li nasa li jo e sona len · insa pi ale ni la jan Sitata li lon : jan pi kama sona, jan lon nasin pi ona sama · ale jelo en ale laso en telo en kasi li kama nanpa wan tawa jan Sitata kepeken lukin ona · nasa pi sewi ike Mala li len ala e lukin ona · ona ale li ike ala li pona tawa jan Paman ni pi alasa wan · laso li laso · telo li telo · insa laso en insa telo la insa sewi wan ni li awen len lon jan Sitata kin · ma ni li laso · ma ni li jelo · ma ni li sewi · ma ni li kasi · ma ni li Sitata · tan ale en insa sewi li lon monsi ala · ona li lon insa taso!
ona li tawa kepeken tenpo lili li toki : ｢tenpo pini la mi nasa mute a! jan li lukin e lipu la ona li toki ike ala e nimi e sitelen · ona li pilin ike ala tan lipu · ona li lukin e lipu li olin e sona e sitelen ale · taso mi wile lukin e lipu pi lon mi la mi toki ike e nimi e sitelen e lipu li lukin ala e kon! mi toki e ni: ma lukin li ike! uta en lukin mi li pakala e ale li pona ala! ala! ni ale li pini! tenpo ni la mi sona · tenpo ni la mi kama sona pona · tenpo ni la mi open sin · suno ni li suno nanpa wan mi｣ ·
ona li toki insa la jan Sitata li pini tawa noka lon nasin · ona li tawa ala sama jan pi pilin monsuta ·
ona li kama sona kin e ni : ona li kama sin lon suno ni li open sin e ale la ona o open sin e alasa nasin o open sin e sona · ona li tawa weka tan ma kasi Setawana pi jan sewi sona la ona li pilin insa e ni : mi pini e sona nasin la mi o tawa sin tomo mama ona · taso tenpo ni la ona li pini e tawa noka sama jan pi pilin monsuta lon nasin · ni la ona li kama sona kin e ni : ｢tenpo ni la mi jan sin · mi pi tenpo ni li mi pi tenpo pini ala · mi jan alasa ala · mi jan pi nasin sewi ala · mi jan pi nasin Paman ala · mi lon tomo mama la mi pali e seme a? mi lukin e lipu anu seme? mi pana tawa sewi anu seme? mi awen ala awen lon lawa mi? taso ale ni li pini · ale ni li nasin mi ala · ona li lon poka ala pi nasin mi｣ ·
tawa ala la jan Sitata li awen · tenpo pi tawa pilin wan la pilin ona li kama lete · lete li awen lon insa sijelo · ona li sama soweli lili · soweli lili li lon poka pi soweli ala, li pilin monsuta tan wan taso · sike mute la ona li lon ala tomo li pilin ala · tenpo ni la ona li pilin a · tenpo pini la lawa ona li awen pi tawa ala taso awen la ona li jan lili pi mama mani ona · tenpo ala la ona li ken weka tan kulupu mama sewi, tan open ona · tenpo ni la ona li jan Sitata taso · ona li jan pi sona suno · ala pi tenpo pini li awen a · mute la ona li insa e kon · tenpo lili la sijelo ona li tawa lili tan lete · jan ala li awen pi wan taso sama ona · jan ala pi kulupu mani li weka tan kulupu pi jan mani · jan ala pi kulupu pali li weka tan kulupu pi jan pali · jan ale ni li toki sama li ken awen pona lon poka · jan Paman ala li weka tan kulupu pi jan Paman li awen ala lon poka kulupu · jan ala pi alasa nasin li awen ala lon poka pi kulupu ona · jan nasin pi wan taso a la ona kin li awen lon poka ma, lon ma kasi, lon lupa kiwen · ona kin li kama tan kulupu jan li ken awen lon tomo pi kulupu ni · jan Kowinta li kama jan nasin pi jo ala · jan nasin mute li jan sama ona · ona li kepeken len sama li lon nasin sama li toki sama · taso ona Sitata la ona li ken awen lon seme? ona li ken awen lon poka pi jan seme? ona li ken toki kepeken toki seme?
tenpo wawa ni la ma poka li weka tan lukin · jan Sitata li awen suno sama mun sewi · pilin lete en pilin ike la jan Sitata li kama sin li wawa · lawa ona li kama wan wawa · ona li pilin : tenpo ni la utala li pini · utala pi sona suno en utala pi open ona li pini · tenpo sin la ona li tawa noka suli · ona li tawa kepeken tenpo lili li tawa tomo ala · ona li tawa mama ala · tenpo ala la ona li tawa monsi ·
