Jv/Alkitab/Kaimaman/2

^2:1 ꦪꦺꦤ꧀ꦮꦺꦴꦁꦱꦲꦺꦴꦱ꧀ꦏꦸꦂꦧꦤ꧀ꦝꦲꦂꦫꦤ꧀ꦒꦤ꧀ꦝꦸꦩ꧀꧉​ꦒ꧀ꦭꦼꦥꦸꦁꦩꦲꦸꦏꦸꦢꦸꦢꦶꦲꦼꦱꦺꦴꦏ꧀ꦏꦶꦊꦔꦗ꦳ꦲꦶꦠꦸꦤ꧀ꦭꦤ꧀ꦢꦶꦠꦸꦩ꧀ꦥꦁꦔꦶꦩꦼꦚꦤ꧀꧈​

^2:2 ꦧꦚ꧀ꦗꦸꦂꦢꦶꦱꦲꦺꦴꦱ꧀ꦱꦏꦺꦢꦺꦤꦶꦁꦥꦫꦲꦶꦩꦩ꧀ꦲꦤꦏ꧀ꦠꦸꦫꦸꦤꦺꦲꦫꦸꦤ꧀꧉​ꦲꦶꦩꦩ꧀ꦏꦸꦢꦸꦚ꧀ꦗꦸꦥꦸꦏ꧀ꦒ꧀ꦭꦼꦥꦸꦁꦔꦺꦱꦼꦒꦼꦒꦼꦩ꧀ꦏꦫꦺꦴꦊꦔꦤꦺꦗ꦳ꦲꦶꦠꦸꦤ꧀꧈​ꦱꦂꦠꦩꦼꦚꦤ꧀ꦤꦺꦏꦧꦺꦃ꧈​ꦭꦤ꧀ꦔꦺꦴꦧꦺꦴꦁꦒ꧀ꦭꦼꦥꦸꦁꦩꦲꦸꦲꦶꦁꦩꦼꦱ꧀ꦧꦺꦃ꧈​ꦩꦶꦤꦁꦏꦠꦤ꧀ꦝꦪꦺꦤ꧀ꦏꦸꦂꦧꦤ꧀ꦝꦲꦂꦫꦤ꧀ꦩꦲꦸꦏꦧꦺꦃꦮꦶꦱ꧀ꦢꦶꦱꦲꦺꦴꦱ꧀ꦱꦏꦺꦢꦢꦶꦏꦸꦂꦧꦤ꧀ꦏꦠꦸꦂꦩꦫꦁꦄꦭ꧀ꦭꦃ꧉​ꦒꦤ꧀ꦢꦤꦺꦏꦸꦂꦧꦤ꧀ꦝꦲꦂꦫꦤ꧀ꦩꦲꦸꦒꦮꦺꦉꦤꦤꦶꦁꦥꦼꦁꦒꦭꦶꦃꦲꦺꦄꦭ꧀ꦭꦃ꧉​

^2:3 ꦠꦸꦫꦃꦲꦤ꧀ꦤꦺꦏꦸꦂꦧꦤ꧀ꦝꦲꦂꦫꦤ꧀ꦩꦲꦸꦢꦢꦶꦧꦒꦺꦪꦤ꧀ꦤꦺꦥꦫꦲꦶꦩꦩ꧀꧉​ꦠꦸꦫꦃꦲꦤ꧀ꦏꦸꦮꦶꦧꦫꦁꦱꦸꦕꦶꦩꦼꦂꦒꦢꦶꦗꦸꦥꦸꦏ꧀ꦱꦏꦝꦲꦂꦫꦤ꧀ꦱꦶꦁꦮꦶꦱ꧀ꦢꦶꦱꦲꦺꦴꦱ꧀ꦱꦏꦺꦩꦫꦁꦄꦭ꧀ꦭꦃ꧉​

^2:4 ꦪꦺꦤ꧀ꦱꦶꦁꦢꦶꦱꦲꦺꦴꦱ꧀ꦱꦏꦺꦫꦺꦴꦠꦶꦧꦏꦂꦫꦤ꧀꧈​ꦏꦸꦢꦸꦫꦺꦴꦠꦶꦱꦶꦁꦠꦤ꧀ꦥꦫꦒꦶ꧉​ꦏꦼꦤꦫꦺꦴꦠꦶꦱꦶꦁꦏꦤ꧀ꦢꦼꦭ꧀꧈​ꦱꦶꦁꦢꦶꦒꦮꦺꦱꦏꦗ꧀ꦭꦢꦿꦺꦤ꧀ꦒ꧀ꦭꦼꦥꦸꦁ꧈​ꦢꦶꦲꦸꦊꦠ꧀ꦏꦫꦺꦴꦊꦔꦗ꦳ꦲꦶꦠꦸꦤ꧀꧉​ꦏꦼꦤꦫꦺꦴꦠꦶꦱꦶꦁꦠꦶꦥꦶꦱ꧀꧈​ꦲꦁꦒꦼꦂꦢꦶꦭꦺꦭꦺꦠ꧀ꦠꦶꦊꦔꦗ꦳ꦲꦶꦠꦸꦤ꧀꧉​

^2:5 ꦪꦺꦤ꧀ꦱꦶꦁꦢꦶꦱꦲꦺꦴꦱ꧀ꦱꦏꦺꦫꦺꦴꦠꦶꦥꦁꦒꦁꦔꦤ꧀꧈​ꦏꦸꦢꦸꦫꦺꦴꦠꦶꦱꦶꦁꦢꦶꦒꦮꦺꦱꦏꦒ꧀ꦭꦼꦥꦸꦁ꧈​ꦠꦤ꧀ꦥꦫꦒꦶꦭꦤ꧀ꦢꦶꦲꦸꦊꦠ꧀ꦏꦫꦺꦴꦊꦔꦗ꦳ꦲꦶꦠꦸꦤ꧀꧉​

^2:6 ꦪꦺꦤ꧀ꦢꦶꦱꦲꦺꦴꦱ꧀ꦱꦏꦺꦏꦁꦒꦺꦴꦏꦸꦂꦧꦤ꧀ꦝꦲꦂꦫꦤ꧀꧈​ꦫꦺꦴꦠꦶꦩꦲꦸꦏꦸꦢꦸꦢꦶꦲꦼꦗꦸꦂꦭꦤ꧀ꦢꦶꦲꦼꦱꦺꦴꦏ꧀ꦏꦶꦊꦔꦗ꦳ꦲꦶꦠꦸꦤ꧀꧉​

^2:7 ꦪꦺꦤ꧀ꦱꦶꦁꦢꦶꦱꦲꦺꦴꦱ꧀ꦱꦏꦺꦫꦺꦴꦠꦶꦒꦺꦴꦫꦺꦁꦔꦤ꧀꧈​ꦏꦸꦢꦸꦢꦶꦒꦮꦺꦱꦏꦒ꧀ꦭꦼꦥꦸꦁꦭꦤ꧀ꦊꦔꦗ꦳ꦲꦶꦠꦸꦤ꧀꧉​

^2:8 ꦫꦺꦴꦠꦶꦩꦲꦸꦢꦢꦶꦱꦲꦺꦴꦱ꧀ꦱꦤ꧀ꦩꦫꦁꦄꦭ꧀ꦭꦃꦭꦤ꧀ꦢꦶꦥꦱꦿꦃꦤꦩꦫꦁꦲꦶꦩꦩ꧀꧈​ꦱꦶꦁꦏꦸꦢꦸꦔ꧀ꦒꦮꦱꦲꦺꦴꦱ꧀ꦱꦤ꧀ꦩꦲꦸꦩꦼꦚꦁꦩꦼꦱ꧀ꦧꦺꦃ꧉​

^2:9 ꦲꦶꦩꦩ꧀ꦚꦸꦮꦶꦭ꧀ꦫꦺꦴꦠꦶꦱꦲꦺꦴꦱ꧀ꦱꦤ꧀ꦩꦲꦸꦭꦤ꧀ꦔꦺꦴꦧꦺꦴꦁꦕꦸꦮꦶꦭ꧀ꦭꦤ꧀ꦏꦸꦮꦶꦲꦤꦲꦶꦁꦩꦼꦱ꧀ꦧꦺꦃ꧉​ꦏꦸꦮꦶꦩꦽꦠꦤ꧀ꦝꦤꦶꦪꦺꦤ꧀ꦏꦸꦂꦧꦤ꧀ꦩꦲꦸꦮꦶꦱ꧀ꦢꦶꦱꦲꦺꦴꦱ꧀ꦱꦏꦺꦩꦫꦁꦄꦭ꧀ꦭꦃ꧉​ꦒꦤ꧀ꦢꦤꦺꦏꦸꦂꦧꦤ꧀ꦝꦲꦂꦫꦤ꧀ꦩꦲꦸꦒꦮꦺꦉꦤꦤꦶꦁꦥꦼꦁꦒꦭꦶꦃꦲꦺꦄꦭ꧀ꦭꦃ꧉​

^2:10 ꦠꦸꦫꦃꦲꦤ꧀ꦤꦺꦏꦸꦂꦧꦤ꧀ꦩꦲꦸꦢꦢꦶꦧꦒꦺꦪꦤ꧀ꦤꦺꦥꦫꦲꦶꦩꦩ꧀꧉​ꦠꦸꦫꦃꦲꦤ꧀ꦏꦸꦮꦶꦱꦸꦕꦶꦩꦼꦂꦒꦢꦶꦗꦸꦥꦸꦏ꧀ꦱꦏꦝꦲꦂꦫꦤ꧀ꦱꦶꦁꦮꦶꦱ꧀ꦢꦶꦱꦲꦺꦴꦱ꧀ꦱꦏꦺꦩꦫꦁꦄꦭ꧀ꦭꦃ꧉​

^2:11 ꦝꦲꦂꦫꦤ꧀ꦱꦶꦁꦲꦉꦥ꧀ꦢꦶꦱꦲꦺꦴꦱ꧀ꦱꦏꦺꦢꦢꦶꦏꦸꦂꦧꦤ꧀ꦲꦺꦴꦧꦺꦴꦁꦔꦤ꧀ꦏꦺꦴꦚ꧀ꦗꦸꦏ꧀ꦩꦫꦁꦄꦭ꧀ꦭꦃꦲꦗꦥꦶꦱꦤ꧀ꦥꦶꦱꦤ꧀ꦢꦶꦲꦺꦴꦭꦃꦔꦁꦒꦺꦴꦫꦒꦶꦲꦸꦠꦮꦩꦢꦸ꧉​

^2:12 ꦱꦧꦼꦤ꧀ꦠꦲꦸꦤ꧀꧈​ꦱꦥꦺꦫꦁꦔꦤ꧀ꦤꦶꦁꦒꦤ꧀ꦢꦸꦩ꧀ꦱꦏꦥꦤꦺꦤ꧀ꦱꦶꦁꦏꦮꦶꦠ꧀ꦠꦤ꧀꧈​ꦏꦸꦢꦸꦏꦺꦴꦏ꧀ꦱꦲꦺꦴꦱ꧀ꦱꦏꦺꦩꦫꦁꦄꦭ꧀ꦭꦃ꧉​ꦒꦤ꧀ꦢꦸꦩ꧀ꦩꦲꦸꦲꦺꦴꦫꦏꦼꦤꦢꦶꦲꦺꦴꦧꦺꦴꦁꦲꦶꦁꦩꦼꦱ꧀ꦧꦺꦃ꧉​

^2:13 ꦱꦧꦼꦤ꧀ꦏꦸꦂꦧꦤ꧀ꦝꦲꦂꦫꦤ꧀ꦏꦸꦢꦸꦢꦶꦲꦸꦪꦃꦲꦶ꧈​ꦩꦼꦂꦒꦲꦸꦪꦃꦏꦸꦮꦶꦤꦺꦭꦏ꧀ꦏꦏꦺꦥꦽꦗꦚ꧀ꦗꦶꦪꦤ꧀ꦲꦤ꧀ꦠꦫꦤꦺꦏꦺꦴꦮꦺꦏꦫꦺꦴꦄꦭ꧀ꦭꦃ꧉​ꦩꦸꦭꦱꦧꦼꦤ꧀ꦱꦲꦺꦴꦱ꧀ꦱꦤ꧀꧈​ꦱꦶꦁꦏꦺꦴꦏ꧀ꦒꦮꦺꦏꦸꦂꦧꦤ꧀꧈​ꦏꦸꦢꦸꦏꦺꦴꦏ꧀ꦲꦸꦪꦃꦲꦶ꧉​

^2:14 ꦪꦺꦤ꧀ꦏꦺꦴꦮꦺꦥꦝꦚꦲꦺꦴꦱ꧀ꦱꦏꦺꦱꦥꦺꦫꦁꦔꦤ꧀ꦤꦶꦁꦒꦤ꧀ꦢꦸꦩ꧀ꦱꦏꦥꦤꦺꦤ꧀ꦱꦶꦁꦏꦮꦶꦠ꧀ꦠꦤ꧀ꦩꦫꦁꦄꦭ꧀ꦭꦃ꧈​ꦒꦤ꧀ꦢꦸꦩ꧀ꦩꦺꦏꦸꦢꦸꦢꦶꦥꦁꦒꦁꦝꦶꦱꦶꦏ꧀ꦲꦸꦠꦮꦢꦶꦒꦮꦺꦒ꧀ꦭꦼꦥꦸꦁ꧉​

^2:15 ꦒꦤ꧀ꦢꦸꦩ꧀ꦩꦲꦸꦏꦸꦢꦸꦢꦶꦲꦼꦱꦺꦴꦏ꧀ꦏꦶꦊꦔꦗ꦳ꦲꦶꦠꦸꦤ꧀ꦭꦤ꧀ꦢꦶꦠꦸꦩ꧀ꦥꦁꦔꦶꦩꦼꦚꦤ꧀꧉​

^2:16 ꦒꦤ꧀ꦢꦸꦩ꧀ꦩꦺꦱꦭꦺꦴꦁꦲꦤꦱꦶꦁꦢꦶꦲꦺꦴꦧꦺꦴꦁꦧꦉꦁꦏꦫꦺꦴꦊꦔꦤꦺꦗ꦳ꦲꦶꦠꦸꦤ꧀ꦭꦤ꧀ꦩꦼꦚꦤ꧀ꦤꦺꦏꦧꦺꦃ꧈​ꦩꦶꦤꦁꦏꦠꦤ꧀ꦝꦪꦺꦤ꧀ꦏꦸꦂꦧꦤ꧀ꦝꦲꦂꦫꦤ꧀ꦩꦲꦸꦏꦧꦺꦃꦮꦶꦱ꧀ꦢꦶꦱꦲꦺꦴꦱ꧀ꦱꦏꦺꦩꦫꦁꦄꦭ꧀ꦭꦃ꧉​