Jv/Alkitab/Pangentasan/25

^25:1 ꦒꦸꦱ꧀ꦠꦶꦄꦭ꧀ꦭꦃꦔꦤ꧀ꦢꦶꦏꦩꦫꦁ꧊ꦩꦸꦱ꧈​

^25:2 "ꦮꦺꦴꦁ꧊ꦆꦱꦿꦲꦺꦭ꧀ꦝꦮꦸꦃꦲꦤꦱꦲꦺꦴꦱ꧀ꦥꦶꦱꦸꦁꦱꦸꦁꦩꦶꦫꦸꦁꦒꦤ꧀ꦏꦁꦒꦺꦴꦲꦏꦸ꧉​ꦥꦶꦱꦸꦁꦱꦸꦁꦩꦲꦸꦏꦸꦢꦸꦩꦼꦠꦸꦱꦏꦊꦒꦊꦒꦮꦤꦶꦁꦲꦠꦶꦤꦺ꧉​

^25:3 ꦥꦶꦱꦸꦁꦱꦸꦁꦩꦲꦸꦲꦫꦸꦥ:ꦲꦼꦩꦱ꧀꧈​ꦱ꧀ꦭꦏꦭꦤ꧀ꦠꦼꦩ꧀ꦧꦒ;

^25:4 ꦏꦲꦶꦤ꧀ꦭꦺꦤꦲꦭꦸꦱ꧀꧈​ꦏꦲꦶꦤ꧀ꦮꦺꦴꦭ꧀ꦧꦶꦫꦸ꧈​ꦮꦸꦔꦸꦭꦤ꧀ꦲꦧꦁ꧈​ꦏꦲꦶꦤ꧀ꦱꦶꦁꦢꦶꦒꦮꦺꦱꦏꦮꦸꦭꦸꦮꦼꦝꦸꦱ꧀꧈​

^25:5 ꦭꦸꦭꦁꦮꦼꦝꦸꦱ꧀ꦒꦺꦩ꧀ꦧꦺꦭ꧀ꦭꦤꦁꦱꦶꦁꦢꦶꦥꦸꦭꦱ꧀ꦲꦧꦁ꧈​ꦭꦸꦭꦁꦲꦭꦸꦱ꧀꧈​ꦏꦪꦸꦲꦏꦱꦶꦪ꧈​

^25:6 ꦊꦔꦏꦁꦒꦺꦴꦭꦩ꧀ꦥꦸ꧈​ꦧꦸꦩ꧀ꦧꦺꦴꦤ꧀ꦏꦁꦒꦺꦴꦊꦔꦗꦼꦧꦢ꧀ꦭꦤ꧀ꦢꦸꦥꦮꦔꦶ꧈​

^25:7 ꦮꦠꦸꦲꦗꦶꦮꦼꦂꦤꦮꦼꦂꦤꦏꦁꦒꦺꦴꦲꦺꦥ꦳ꦺꦴꦢ꧀ꦱꦶꦁꦢꦶꦲꦼꦁꦒꦺꦴꦲꦶꦩꦩ꧀ꦲꦒꦸꦁꦭꦤ꧀ꦠꦸꦠꦸꦥ꧀ꦝꦝ꧉​

^25:8 ꦧꦁꦱꦏꦸꦮꦶꦝꦮꦸꦃꦲꦤꦒꦮꦺꦏꦺꦩꦃꦏꦁꦒꦺꦴꦲꦏꦸ꧈​ꦱꦸꦥꦪꦲꦏꦸꦢꦼꦢꦊꦩ꧀ꦲꦶꦁꦠꦼꦔꦃꦲꦶꦁꦲꦸꦩꦠ꧀꧉​

^25:9 ꦏꦺꦩꦃꦱꦂꦠꦥꦿꦧꦺꦴꦠ꧀ꦠꦺꦏꦸꦢꦸꦢꦶꦒꦮꦺꦩꦤꦸꦠ꧀ꦫꦚ꧀ꦕꦁꦔꦤ꧀ꦱꦶꦁꦧꦏꦭ꧀ꦢꦏ꧀ꦝꦮꦸꦃꦲꦏꦺꦩꦫꦁꦏꦺꦴꦮꦺ꧉"​

^25:10 "ꦒꦮꦺꦪꦥꦼꦛꦶꦱꦏꦏꦪꦸꦲꦏꦱꦶꦪꦱꦶꦁꦢꦮꦤꦺ110ꦱꦺꦤ꧀ꦠꦶꦩꦺꦠꦼꦂ꧈​ꦲꦩ꧀ꦧꦤꦺꦭꦤ꧀ꦝꦸꦮꦸꦂꦫꦺ66ꦱꦺꦤ꧀ꦠꦶꦩꦺꦠꦼꦂ꧉​

^25:11 ꦲꦶꦁꦱꦶꦱꦶꦃꦚ꧀ꦗꦧꦭꦤ꧀ꦚ꧀ꦗꦼꦫꦺꦴꦤꦺꦭꦥꦶꦱ꧀ꦱꦤꦔꦁꦒꦺꦴꦩꦱ꧀ꦩꦸꦂꦤꦶꦱꦂꦠꦮꦺꦤꦺꦃꦲꦤꦥ꧀ꦭꦶꦱꦶꦂꦩꦱ꧀ꦩꦸꦧꦼꦁ꧉​

^25:12 ꦒꦮꦺꦪꦒꦼꦭꦁꦔꦤ꧀ꦩꦱ꧀ꦥꦥꦠ꧀ꦏꦁꦒꦺꦴꦔꦸꦱꦸꦁꦥꦼꦛꦶꦤꦺ꧈​ꦱꦂꦠꦥꦱꦁꦔꦼꦤ꧀ꦲꦶꦁꦱꦶꦏꦶꦭ꧀ꦭꦺꦥꦥꦠ꧀꧈​ꦱꦧꦼꦤ꧀ꦱꦶꦱꦶꦃꦒꦼꦭꦁꦔꦤ꧀ꦭꦺꦴꦫꦺꦴ꧉​

^25:13 ꦒꦮꦺꦪꦥꦶꦏꦸꦭ꧀ꦭꦤ꧀ꦱꦏꦏꦪꦸꦲꦏꦱꦶꦪ꧈​ꦧꦚ꧀ꦗꦸꦂꦭꦥꦶꦱ꧀ꦱꦼꦤ꧀ꦩꦱ꧀꧉​

^25:14 ꦥꦶꦏꦸꦭ꧀ꦭꦤ꧀ꦏꦸꦮꦶꦱ꧀ꦭꦺꦴꦧꦺꦴꦏ꧀ꦤꦲꦶꦁꦒꦼꦭꦁꦔꦤ꧀ꦏꦶꦮꦠꦼꦔꦼꦤ꧀ꦤꦺꦥꦼꦛꦶꦩꦲꦸ꧉​

^25:15 ꦥꦶꦏꦸꦭ꧀ꦭꦤ꧀ꦥꦶꦏꦸꦭ꧀ꦭꦤ꧀ꦲꦶꦏꦸꦏꦸꦢꦸꦠꦼꦠꦼꦥ꧀ꦲꦤꦲꦶꦁꦒꦼꦭꦁꦔꦤ꧀꧈​ꦲꦺꦴꦫꦏꦼꦤꦢꦶꦕꦺꦴꦥꦺꦴꦠ꧀꧉​

^25:16 ꦥꦥꦤ꧀ꦮꦠꦸꦭꦺꦴꦫꦺꦴꦱꦶꦁꦲꦤꦠꦸꦭꦶꦱ꧀ꦱꦤ꧀ꦤꦺꦥꦼꦥꦏꦺꦴꦤ꧀ꦥꦼꦥꦏꦺꦴꦤ꧀ꦏꦸꦱꦶꦁꦧꦏꦭ꧀ꦢꦏ꧀ꦥꦫꦶꦁꦔꦏꦺ꧈​ꦱꦺꦭꦺꦃꦤꦲꦶꦁꦚ꧀ꦗꦼꦫꦺꦴꦤꦺꦥꦼꦛꦶꦩꦲꦸ꧉​

^25:17 ꦒꦮꦺꦪꦠꦸꦠꦸꦥ꧀ꦥꦺꦥꦼꦛꦶꦩꦲꦸꦱꦏꦩꦱ꧀ꦩꦸꦂꦤꦶ꧈​ꦢꦮꦤꦺ110ꦱꦺꦤ꧀ꦠꦶꦩꦺꦠꦼꦂꦭꦤ꧀ꦲꦩ꧀ꦧꦤꦺ66ꦱꦺꦤ꧀ꦠꦶꦩꦺꦠꦼꦂ꧉​

^25:18 ꦒꦮꦺꦪꦥꦼꦥꦼꦛꦤ꧀ꦤꦶꦁꦏꦼꦫꦸꦧ꧀ꦭꦺꦴꦫꦺꦴꦔꦁꦒꦺꦴꦱ꧀ꦮꦶꦮꦶꦱꦏꦩꦱ꧀ꦠꦠꦏ꧀ꦏꦤ꧀꧈​

^25:19 ꦥꦱꦁꦔꦼꦤ꧀ꦲꦶꦁꦤ꧀ꦝꦸꦮꦸꦂꦫꦶꦁꦥꦼꦛꦶꦩꦲꦸ꧉​

^25:20 ꦥꦼꦥꦼꦛꦤ꧀ꦏꦼꦫꦸꦧ꧀ꦔꦁꦒꦺꦴꦱ꧀ꦮꦶꦮꦶꦩꦲꦸꦒꦮꦺꦤꦼꦤ꧀ꦱꦸꦥꦪꦢꦢꦶꦱꦶꦗꦶꦏꦫꦺꦴꦠꦸꦠꦸꦥ꧀ꦥꦺ꧈​ꦥꦝꦲꦝꦼꦥ꧀ꦲꦝꦼꦥ꧀ꦥꦤ꧀;ꦢꦺꦤꦺꦱ꧀ꦮꦶꦮꦶꦤꦺꦩꦼꦒꦂꦤꦸꦠꦸꦥ꧀ꦥꦶꦥꦼꦛꦶꦤꦺ꧉​

^25:21 ꦥꦥꦤ꧀ꦮꦠꦸꦭꦺꦴꦫꦺꦴꦩꦲꦸꦱꦺꦭꦺꦃꦤꦲꦶꦁꦚ꧀ꦗꦼꦫꦺꦴꦤꦺꦥꦼꦛꦶꦱꦂꦠꦠꦸꦠꦸꦥ꧀ꦥꦺꦥꦼꦛꦶꦠꦸꦩ꧀ꦥꦁꦤꦲꦶꦁꦤ꧀ꦝꦸꦮꦸꦂꦫꦺ꧉​

^25:22 ꦲꦶꦁꦏꦺꦴꦤꦺꦴꦲꦏꦸꦧꦏꦭ꧀ꦔꦿꦮꦸꦃꦲꦶꦏꦺꦴꦮꦺ꧈​ꦭꦤ꧀ꦱꦏꦲꦶꦁꦤ꧀ꦝꦸꦮꦸꦂꦠꦸꦠꦸꦥ꧀ꦲꦤ꧀ꦠꦫꦤꦺꦥꦼꦥꦼꦛꦤ꧀ꦏꦼꦫꦸꦧ꧀ꦔꦁꦒꦺꦴꦱ꧀ꦮꦶꦮꦶꦩꦲꦸ꧈​ꦲꦏꦸꦧꦏꦭ꧀ꦩꦫꦶꦁꦔꦏꦺꦝꦮꦸꦃꦏꦸꦏꦁꦒꦺꦴꦧꦁꦱ꧊ꦆꦱꦿꦲꦺꦭ꧀꧉"​

^25:23 "ꦒꦮꦺꦪꦩꦺꦗꦱꦏꦏꦪꦸꦲꦏꦱꦶꦪꦢꦮꦤꦺ88ꦱꦺꦤ꧀ꦠꦶꦩꦺꦠꦼꦂ꧈​ꦲꦩ꧀ꦧꦤꦺ44ꦱꦺꦤ꧀ꦠꦶꦩꦺꦠꦼꦂ꧈​ꦭꦤ꧀ꦝꦸꦮꦸꦂꦫꦺ66ꦱꦺꦤ꧀ꦠꦶꦩꦺꦠꦼꦂ꧉​

^25:24 ꦭꦥꦶꦱ꧀ꦱꦤꦩꦱ꧀ꦩꦸꦂꦤꦶꦱꦂꦠꦩꦸꦧꦼꦁꦏꦼꦩ꧀ꦥꦸꦠ꧀ꦥꦱꦁꦔꦤꦥ꧀ꦭꦶꦱꦶꦂꦩꦱ꧀꧉​

^25:25 ꦒꦮꦺꦪꦮꦼꦁꦏꦸꦤꦶꦁꦩꦺꦗꦱꦶꦁꦲꦩ꧀ꦧꦤꦺ7,5ꦱꦺꦤ꧀ꦠꦶꦩꦺꦠꦼꦂꦱꦂꦠꦮꦼꦁꦏꦸꦩꦲꦸꦲꦶꦪꦮꦺꦤꦺꦃꦲꦤꦥ꧀ꦭꦶꦱꦶꦂꦩꦱ꧀ꦩꦸꦧꦼꦁ꧉​

^25:26 ꦒꦮꦺꦪꦒꦼꦭꦁꦔꦤ꧀ꦱꦏꦩꦱ꧀ꦥꦠꦁꦲꦶꦗꦶ꧈​ꦏꦁꦒꦺꦴꦱ꧀ꦭꦺꦴꦧꦺꦴꦏ꧀ꦏꦤ꧀ꦥꦶꦏꦸꦭ꧀ꦭꦤ꧀ꦱꦂꦠꦲꦼꦠꦿꦥ꧀ꦤꦲꦶꦁꦥꦺꦴꦗꦺꦴꦏ꧀ꦏꦤ꧀ꦤꦺꦥꦥꦠ꧀꧈​ꦱꦕꦼꦝꦏ꧀ꦏꦺꦮꦼꦁꦏꦸꦥꦽꦤꦃꦲꦺꦱꦶꦏꦶꦭ꧀ꦭꦺ꧉​

^25:27 ꦒꦼꦭꦁꦱ꧀ꦭꦺꦴꦧꦺꦴꦏ꧀ꦏꦤ꧀ꦥꦶꦏꦸꦭ꧀ꦭꦤ꧀ꦩꦲꦸꦏꦁꦒꦺꦴꦔ꧀ꦒꦺꦴꦠꦺꦴꦁꦩꦺꦗꦤꦺ꧉​

^25:28 ꦥꦶꦏꦸꦭ꧀ꦭꦤ꧀ꦩꦲꦸꦏꦸꦢꦸꦢꦶꦒꦮꦺꦱꦏꦏꦪꦸꦲꦏꦱꦶꦪꦭꦤ꧀ꦢꦶꦭꦥꦶꦱ꧀ꦱꦶꦩꦱ꧀꧉​

^25:29 ꦒꦮꦺꦪꦥꦶꦫꦶꦁ꧈​ꦕꦁꦏꦶꦂ꧈​ꦏꦼꦤ꧀ꦝꦶꦭꦤ꧀ꦩꦁꦏꦺꦴꦏ꧀ꦱꦶꦁꦏꦼꦤꦢꦶꦲꦼꦁꦒꦺꦴꦚꦲꦺꦴꦱ꧀ꦱꦏꦺꦲꦁꦒꦸꦂ꧉​ꦏꦧꦺꦃꦩꦲꦸꦏꦸꦢꦸꦱꦏꦩꦱ꧀ꦩꦸꦂꦤꦶ꧉​

^25:30 ꦩꦺꦗꦩꦲꦸꦏꦸꦢꦸꦢꦶꦱꦺꦭꦺꦃꦲꦏꦺꦲꦶꦁꦱꦔꦉꦥ꧀ꦥꦶꦁꦥꦼꦛꦶꦥꦽꦗꦚ꧀ꦗꦶꦪꦤ꧀꧈​ꦱꦂꦠꦲꦶꦁꦱꦤ꧀ꦝꦸꦮꦸꦂꦫꦶꦁꦩꦺꦗꦏꦸꦢꦸꦠꦤ꧀ꦱꦃꦲꦤꦫꦺꦴꦠꦶꦱꦲꦺꦴꦱ꧀ꦱꦤ꧀ꦱꦸꦕꦶꦏꦒꦼꦩ꧀ꦲꦏꦸ꧉"​

^25:31 "ꦒꦮꦺꦪꦥꦼꦢꦩꦂꦫꦤ꧀ꦱꦏꦩꦱ꧀ꦩꦸꦂꦤꦶ꧉​ꦝꦱꦂꦱꦂꦠꦲꦢꦼꦒ꧀ꦲꦢꦼꦒꦏꦸꦢꦸꦢꦶꦒꦮꦺꦱꦏꦩꦱ꧀;ꦉꦉꦁꦒꦤ꧀ꦲꦮꦸꦗꦸꦢ꧀ꦏꦼꦩ꧀ꦧꦁ꧈​ꦏꦸꦝꦸꦥ꧀ꦭꦤ꧀ꦱ꧀ꦭꦒꦤꦺꦏꦸꦢꦸꦢꦢꦶꦱꦶꦗꦶꦏꦫꦺꦴꦝꦱꦂꦭꦤ꧀ꦲꦢꦼꦒ꧀ꦲꦢꦼꦒ꧉​

^25:32 ꦲꦶꦁꦲꦢꦼꦒ꧀ꦲꦢꦼꦒ꧀ꦩꦲꦸꦏꦸꦢꦸꦲꦤꦥꦁꦔꦺꦤꦼꦩ꧀꧈​ꦱꦧꦼꦤ꧀ꦱꦶꦱꦶꦃꦠꦼꦭꦸꦁꦥꦁ꧉​

^25:33 ꦱꦧꦼꦤ꧀ꦥꦁꦩꦲꦸꦮꦺꦤꦺꦃꦲꦤꦉꦉꦁꦒꦤ꧀ꦏꦼꦩ꧀ꦧꦁꦠꦼꦭꦸꦏꦫꦺꦴꦏꦸꦝꦸꦥ꧀ꦱꦂꦠꦱ꧀ꦭꦒꦤꦺ꧉​

^25:34 ꦲꦢꦼꦒ꧀ꦲꦢꦼꦒꦭꦩ꧀ꦥꦸꦩꦲꦸꦮꦺꦤꦺꦃꦲꦤꦉꦉꦁꦒꦤ꧀ꦏꦼꦩ꧀ꦧꦁꦥꦥꦠ꧀ꦏꦫꦺꦴꦏꦸꦝꦸꦥ꧀ꦭꦤ꧀ꦱ꧀ꦭꦒꦤꦺ꧉​

^25:35 ꦲꦶꦁꦱꦔꦶꦱꦺꦴꦂꦫꦶꦁꦥꦁꦠꦼꦭꦸꦩꦲꦸꦲꦤꦏꦸꦝꦸꦥ꧀ꦥꦺꦱꦶꦗꦶ꧉​

^25:36 ꦏꦸꦝꦸꦥ꧀ꦏꦸꦝꦸꦥ꧀꧈​ꦥꦁꦥꦁꦭꦤ꧀ꦥꦥꦤ꧀ꦭꦩ꧀ꦥꦸꦩꦲꦸꦮꦸꦗꦸꦢ꧀ꦲꦸꦏꦶꦂꦲꦸꦏꦶꦂꦫꦤ꧀ꦩꦱ꧀ꦩꦸꦂꦤꦶꦱꦶꦗꦶ꧉​

^25:37 ꦒꦮꦺꦪꦭꦩ꧀ꦥꦸꦕꦕꦃꦲꦺꦥꦶꦠꦸꦲꦶꦁꦥꦼꦢꦩꦂꦫꦤ꧀ꦩꦲꦸꦱꦂꦠꦥꦽꦤꦃꦤꦲꦶꦁꦤ꧀ꦝꦸꦮꦸꦂꦫꦺ꧈​ꦱꦸꦥꦪꦩꦝꦁꦔꦶꦔꦉꦥ꧀ꦥꦺ꧉​

^25:38 ꦱꦥꦶꦠ꧀ꦭꦤ꧀ꦠꦝꦃꦲꦺꦭꦔꦼꦱ꧀ꦏꦒꦮꦺꦪꦱꦏꦩꦱ꧀ꦩꦸꦂꦤꦶ꧉​

^25:39 ꦥꦼꦢꦩꦂꦫꦤ꧀ꦭꦤ꧀ꦭꦩ꧀ꦥꦸꦭꦩ꧀ꦥꦸꦩꦲꦸꦱꦂꦠꦥꦶꦫꦤ꧀ꦠꦶꦤꦺꦏꦧꦺꦃꦏꦒꦮꦺꦪꦱꦏꦩꦱ꧀ꦩꦸꦂꦤꦶꦠꦼꦭꦸꦁꦥꦸꦭꦸꦃꦭꦶꦩꦏꦶꦭꦺꦴꦒꦿꦩ꧀꧉​

^25:40 ꦥꦼꦢꦩꦂꦫꦤ꧀ꦩꦲꦸꦱꦸꦥꦪꦢꦶꦒꦮꦺꦩꦤꦸꦠ꧀ꦕꦺꦴꦤ꧀ꦠꦺꦴꦱꦶꦁꦮꦶꦱ꧀ꦢꦏ꧀ꦠꦸꦢꦸꦃꦲꦏꦺꦤꦭꦶꦏꦲꦤꦲꦶꦁꦒꦸꦤꦸꦁ꧉"​