Jv/Alkitab/Purwaning Dumadi/2

^2:1 ꦩꦼꦁꦏꦺꦴꦤꦺꦴꦩꦲꦸꦫꦩ꧀ꦥꦸꦁꦔꦺꦢꦸꦩꦢꦶꦤꦺꦗꦒꦢ꧀ꦭꦤ꧀ꦱꦲꦶꦱꦶꦤꦺꦏꦧꦺꦃ꧉​

^2:2 ꦲꦶꦁꦢꦶꦤꦏꦥꦶꦠꦸꦒꦸꦱ꧀ꦠꦶꦄꦭ꧀ꦭꦃꦮꦶꦱ꧀ꦔꦿꦩ꧀ꦥꦸꦁꦔꦏꦺꦱꦏꦺꦃꦲꦶꦁꦪꦱꦤꦺ꧈​ꦧꦚ꧀ꦗꦸꦂꦏꦺꦤ꧀ꦢꦼꦭ꧀ꦲꦼꦁꦒꦺꦴꦤꦺꦩꦏꦂꦪ꧉​

^2:3 ꦢꦶꦤꦏꦥꦶꦠꦸꦩꦲꦸꦤꦸꦭꦶꦢꦶꦧꦼꦂꦏꦃꦲꦶꦱꦂꦠꦢꦶꦱꦼꦁꦏꦼꦂ꧈​ꦩꦼꦂꦒꦲꦶꦁꦢꦶꦤꦏꦸꦮꦶꦥꦚ꧀ꦗꦼꦤꦼꦁꦔꦤ꧀ꦤꦺꦏꦺꦤ꧀ꦢꦼꦭ꧀ꦲꦶꦁꦥꦏꦂꦪꦤ꧀ꦲꦼꦁꦒꦺꦴꦤꦺꦤꦶꦠꦃꦲꦏꦺꦱꦩꦸꦧꦫꦁꦪꦼꦪꦱꦤꦺ꧉​

^2:4 ꦏꦪꦩꦼꦁꦏꦺꦴꦤꦺꦴꦢꦸꦩꦢꦶꦤꦺꦗꦒꦢ꧀ꦤꦭꦶꦏꦢꦶꦠꦶꦠꦃꦲꦏꦺ꧉​ꦤꦭꦶꦏꦒꦸꦱ꧀ꦠꦶꦄꦭ꧀ꦭꦃꦤꦶꦠꦃꦲꦏꦺꦗꦒꦢ꧀꧈​

^2:5 ꦲꦶꦁꦧꦸꦩꦶꦢꦸꦫꦸꦁꦲꦤꦠꦼꦠꦸꦮꦸꦃꦲꦤ꧀꧈​ꦭꦤ꧀ꦢꦸꦫꦸꦁꦲꦤꦮꦶꦗꦶꦱꦶꦁꦛꦸꦏꦸꦭ꧀꧈​ꦲꦮꦶꦠ꧀ꦒꦸꦱ꧀ꦠꦶꦄꦭ꧀ꦭꦃꦢꦸꦫꦸꦁꦤꦼꦏꦏ꧀ꦏꦏꦺꦲꦸꦢꦤ꧀ꦭꦤ꧀ꦢꦸꦫꦸꦁꦲꦤꦮꦺꦴꦁꦔꦺꦴꦭꦃꦧꦸꦩꦶ꧉​

^2:6 ꦤꦁꦔꦶꦁꦲꦤꦧꦚꦸꦩꦼꦠꦸꦱꦏꦱꦔꦶꦱꦺꦴꦂꦫꦶꦁꦊꦩꦃꦭꦤ꧀ꦤꦼꦊꦱ꧀ꦱꦶꦥꦊꦩꦃꦲꦤ꧀ꦩꦲꦸꦏꦧꦺꦃ꧉​

^2:7 ꦒꦸꦱ꧀ꦠꦶꦄꦭ꧀ꦭꦃꦧꦚ꧀ꦗꦸꦂꦩꦸꦤ꧀ꦝꦸꦠ꧀ꦊꦩꦃꦱꦏꦲꦶꦁꦧꦸꦩꦶꦏꦮꦔꦸꦤ꧀ꦩꦤꦸꦁꦱ;ꦤꦸꦭꦶꦧꦺꦴꦭꦺꦴꦁꦔꦤ꧀ꦤꦺꦲꦶꦫꦸꦁꦔꦺꦏꦱꦼꦧꦸꦭ꧀ꦔꦁꦒꦺꦴꦤꦥꦱ꧀ꦱꦶꦁꦲꦸꦫꦶꦥ꧀꧈​ꦩꦸꦭꦩꦤꦸꦁꦱꦧꦚ꧀ꦗꦸꦂꦲꦸꦫꦶꦥ꧀꧉​

^2:8 ꦒꦸꦱ꧀ꦠꦶꦄꦭ꧀ꦭꦃꦧꦚ꧀ꦗꦸꦂꦪꦱꦥꦼꦠꦩꦤ꧀ꦤꦤ꧀ꦲꦶꦁꦠꦤꦃ꧊ꦌꦢꦺꦤ꧀꧈​ꦲꦶꦁꦱꦶꦱꦶꦃꦮꦺꦠꦤ꧀꧉​ꦲꦤꦲꦶꦁꦥꦼꦠꦩꦤ꧀ꦤꦤ꧀ꦏꦺꦴꦤꦺꦴꦒꦸꦱ꧀ꦠꦶꦄꦭ꧀ꦭꦃꦲꦼꦁꦒꦺꦴꦤꦺꦩꦥꦤ꧀ꦤꦏꦺꦩꦤꦸꦁꦱꦱꦶꦁꦢꦶꦝꦥꦸꦂꦩꦲꦸ꧉​

^2:9 ꦲꦶꦁꦥꦼꦠꦩꦤ꧀ꦤꦤ꧀ꦏꦺꦴꦤꦺꦴꦒꦸꦱ꧀ꦠꦶꦄꦭ꧀ꦭꦃꦤꦸꦏꦸꦭ꧀ꦭꦏꦺꦱꦏꦺꦃꦲꦺꦮꦶꦠ꧀ꦮꦶꦠ꧀ꦠꦤ꧀ꦱꦶꦁꦏꦠꦺꦴꦤ꧀ꦲꦱꦿꦶ꧈​ꦭꦤ꧀ꦱꦶꦁꦩꦼꦠꦺꦴꦏ꧀ꦏꦏꦺꦮꦺꦴꦃꦮꦺꦴꦃꦲꦤ꧀ꦱꦶꦁꦧꦼꦕꦶꦏ꧀ꦏꦁꦒꦺꦴꦥꦔꦤ꧀꧉​ꦲꦶꦁꦱꦠꦼꦔꦃꦲꦶꦁꦥꦼꦠꦩꦤ꧀ꦤꦤ꧀ꦲꦸꦒꦲꦤꦮꦶꦠ꧀ꦠꦶꦁꦏꦲꦸꦫꦶꦥ꧀ꦥꦤ꧀꧈​ꦭꦤ꧀ꦮꦶꦠ꧀ꦠꦶꦁꦥꦔꦼꦂꦠꦶꦧꦧ꧀ꦏꦁꦲꦭꦭꦤ꧀ꦧꦼꦕꦶꦏ꧀꧉​

^2:10 ꦲꦶꦁꦏꦺꦴꦤꦺꦴꦲꦤꦏꦭꦶꦒꦼꦝꦺꦱꦶꦁꦔꦶꦭꦺꦤ꧀ꦤꦶꦥꦼꦠꦩꦤ꧀ꦤꦤ꧀ꦩꦲꦸ꧉​ꦲꦶꦁꦱꦚ꧀ꦗꦧꦤꦺꦥꦼꦠꦩꦤ꧀ꦤꦤ꧀ꦏꦭꦶꦒꦼꦝꦺꦏꦸꦮꦶꦧꦚ꧀ꦗꦸꦂꦕꦮꦁꦢꦢꦶꦏꦭꦶꦥꦥꦠ꧀꧉​

^2:11 ꦏꦭꦶꦱꦶꦁꦏꦥꦶꦱꦤ꧀ꦗꦼꦤꦼꦁꦔꦺ꧊ꦥꦶꦱꦺꦴꦤ꧀;ꦏꦭꦶꦲꦶꦏꦶꦲꦶꦭꦶꦤꦺꦔꦸꦧꦼꦁꦔꦶꦲꦶꦁꦱꦠꦤꦃ꧊ꦲꦮꦶꦭ꧉​

^2:12 ꧌ꦲꦶꦁꦠꦤꦃꦏꦺꦴꦤꦺꦴꦲꦤꦲꦼꦩꦱ꧀ꦱꦺꦩꦸꦂꦤꦶ꧈​ꦲꦸꦒꦲꦤꦧꦁꦱꦤꦺꦧ꧀ꦭꦼꦤ꧀ꦢꦺꦴꦏ꧀ꦱꦶꦁꦲꦩ꧀ꦧꦸꦤꦺꦮꦔꦶꦧꦔꦼꦠ꧀꧈​ꦱꦂꦠꦱꦼꦱꦺꦴꦠꦾꦱꦼꦱꦺꦴꦠꦾꦱꦶꦁꦫꦸꦥꦤꦺꦲꦺꦤ꧀ꦢꦃꦧꦔꦼꦠ꧀꧉꧍​

^2:13 ꦏꦭꦶꦱꦶꦁꦏꦥꦶꦤ꧀ꦝꦺꦴꦗꦼꦤꦼꦁꦔꦺ꧊ꦒꦶꦲꦺꦴꦤ꧀꧈​ꦲꦶꦭꦶꦤꦺꦔꦸꦧꦼꦁꦔꦶꦱꦠꦤꦃ꧊ꦏꦸꦱ꧀꧉​

^2:14 ꦏꦭꦶꦏꦁꦏꦠꦼꦭꦸ꧊ꦠꦶꦒꦿꦶꦱ꧀꧈​ꦭꦏꦸꦤꦺꦩꦼꦠꦸꦲꦶꦁꦱꦮꦺꦠꦤ꧀ꦤꦺꦠꦤꦃ꧊ꦄꦱꦾꦸꦂ;ꦢꦺꦤꦺꦏꦭꦶꦏꦁꦏꦥꦠ꧀꧈​꧊ꦌꦥ꦳ꦿꦠ꧀꧉​

^2:15 ꦒꦸꦱ꧀ꦠꦶꦄꦭ꧀ꦭꦃꦩꦥꦤ꧀ꦤꦏꦺꦩꦤꦸꦁꦱꦲꦤꦲꦶꦁꦥꦼꦠꦩꦤ꧀ꦤꦤ꧀꧊ꦌꦢꦺꦤ꧀꧈​ꦢꦶꦝꦮꦸꦃꦲꦶꦔꦺꦴꦭꦃꦭꦤ꧀ꦔꦽꦏ꧀ꦱꦥꦼꦠꦩꦤ꧀ꦤꦤ꧀ꦩꦲꦸ꧈​

^2:16 ꦏꦫꦺꦴꦢꦶꦔꦤ꧀ꦢꦶꦏꦤꦶꦩꦼꦁꦏꦺꦤꦺ꧈​"ꦱꦫꦸꦥꦤꦺꦮꦶꦠ꧀ꦮꦶꦠ꧀ꦠꦤ꧀ꦤꦺꦥꦼꦠꦩꦤ꧀ꦤꦤ꧀ꦲꦶꦏꦶꦮꦺꦴꦃꦲꦺꦲꦺꦴꦭꦺꦃꦏꦺꦴꦏ꧀ꦥꦔꦤ꧀꧈​

^2:17 ꦏꦼꦗꦧꦩꦸꦁꦮꦶꦠ꧀ꦠꦶꦁꦥꦔꦼꦂꦠꦶꦧꦧ꧀ꦏꦁꦲꦭꦭꦤ꧀ꦧꦼꦕꦶꦏ꧀꧈​ꦏꦸꦮꦶꦮꦺꦴꦃꦲꦺꦲꦗꦏꦺꦴꦏ꧀ꦥꦔꦤ꧀꧉​ꦲꦮꦶꦠ꧀ꦱꦩꦱꦏꦺꦴꦮꦺꦩꦁꦔꦤ꧀ꦮꦺꦴꦃꦲꦺꦩꦲꦸ꧈​ꦲꦶꦁꦢꦶꦤꦏꦸꦮꦶꦲꦸꦒꦏꦺꦴꦮꦺꦧꦏꦭ꧀ꦩꦠꦶ꧉"​

^2:18 ꦒꦸꦱ꧀ꦠꦶꦄꦭ꧀ꦭꦃꦧꦚ꧀ꦗꦸꦂꦔꦤ꧀ꦢꦶꦏ꧈​"ꦲꦺꦴꦫꦥꦿꦪꦺꦴꦒꦪꦺꦤ꧀ꦩꦤꦸꦁꦱꦩꦸꦁꦲꦶꦗꦺꦤ꧀ꦮꦲꦺ꧉​ꦢꦏ꧀ꦪꦱꦏ꧀ꦤꦺꦏꦚ꧀ꦕꦏꦁꦱꦼꦩ꧀ꦧꦢ꧉"​

^2:19 ꦒꦸꦱ꧀ꦠꦶꦄꦭ꧀ꦭꦃꦧꦚ꧀ꦗꦸꦂꦩꦸꦤ꧀ꦝꦸꦠ꧀ꦊꦩꦃ꧈​ꦤꦸꦭꦶꦏꦝꦥꦸꦂꦢꦢꦶꦱꦫꦸꦥꦤꦺꦱꦠꦺꦴꦏꦺꦮꦤ꧀ꦭꦤ꧀ꦱꦫꦸꦥꦤꦺꦩꦤꦸꦏ꧀꧉​ꦏꦧꦺꦃꦩꦲꦸꦧꦚ꧀ꦗꦸꦂꦢꦶꦥꦥꦤ꧀ꦤꦏꦺꦲꦤꦲꦶꦁꦔꦉꦥ꧀ꦥꦺꦩꦤꦸꦁꦱ꧈​ꦲꦮꦶꦠ꧀ꦒꦸꦱ꧀ꦠꦶꦄꦭ꧀ꦭꦃꦏꦼꦂꦱꦩꦶꦂꦱꦤꦶ꧈​ꦏꦼꦥꦿꦶꦪꦺꦩꦤꦸꦁꦱꦲꦼꦁꦒꦺꦴꦤꦺꦩꦺꦤꦺꦃꦲꦶꦗꦼꦤꦼꦁꦩꦫꦁꦏꦺꦮꦤ꧀ꦏꦺꦮꦤ꧀ꦩꦲꦸ꧉​ꦪꦏꦸꦮꦶꦩꦸꦭꦧꦸꦏꦤꦺꦏꦺꦮꦤ꧀ꦭꦤ꧀ꦩꦤꦸꦏ꧀ꦥꦝꦢꦸꦮꦺꦗꦼꦤꦼꦁꦝꦺꦮꦺꦝꦺꦮꦺ꧉​

^2:20 ꦩꦼꦁꦏꦺꦴꦤꦺꦴꦢꦢꦶꦤꦺꦩꦤꦸꦁꦱꦩꦺꦤꦺꦃꦲꦶꦗꦼꦤꦼꦁꦩꦫꦁꦱꦫꦸꦥꦤꦺꦏꦺꦮꦤ꧀꧉​ꦤꦁꦔꦶꦁꦲꦺꦴꦫꦲꦤꦩꦤꦸꦁꦱꦱꦶꦗꦶꦮꦲꦺꦱꦶꦁꦧꦶꦱꦢꦢꦶꦫꦺꦮꦁꦔꦺꦱꦶꦁꦱꦼꦩ꧀ꦧꦢ꧉​

^2:21 ꦒꦸꦱ꧀ꦠꦶꦄꦭ꧀ꦭꦃꦤꦸꦭꦶꦤ꧀ꦢꦢꦺꦏ꧀ꦏꦏꦺꦩꦤꦸꦁꦱꦩꦲꦸꦠꦸꦫꦸꦏꦼꦥꦠꦶ꧈​ꦭꦤ꧀ꦲꦶꦒꦤꦺꦢꦶꦥꦸꦤ꧀ꦝꦸꦠ꧀ꦱꦶꦗꦶ;ꦠꦶꦭꦱ꧀ꦥꦁꦒꦺꦴꦤ꧀ꦤꦤ꧀ꦤꦺꦲꦶꦒꦏꦁꦏꦥꦸꦤ꧀ꦝꦸꦠ꧀ꦩꦲꦸꦢꦶꦲꦶꦱꦺꦤ꧀ꦤꦶꦢꦒꦶꦁ꧉​

^2:22 ꦲꦶꦒꦱꦶꦁꦏꦥꦸꦤ꧀ꦝꦸꦠ꧀ꦱꦏꦩꦤꦸꦁꦱꦩꦲꦸꦤꦸꦭꦶꦢꦶꦝꦥꦸꦂꦢꦺꦤꦶꦁꦒꦸꦱ꧀ꦠꦶꦄꦭ꧀ꦭꦃꦢꦢꦶꦮꦺꦴꦁꦮꦢꦺꦴꦤ꧀꧈​ꦧꦚ꧀ꦗꦸꦂꦢꦶꦥꦥꦤ꧀ꦤꦏꦺꦲꦤꦲꦶꦁꦔꦉꦥ꧀ꦥꦺꦩꦤꦸꦁꦱ꧉​

^2:23 ꦲꦶꦁꦏꦺꦴꦤꦺꦴꦩꦤꦸꦁꦱꦤꦸꦭꦶꦔꦸꦕꦥ꧀꧈​"ꦪꦲꦶꦏꦶꦠꦶꦠꦃꦱꦶꦁꦏꦪꦲꦏꦸ꧈​ꦱꦶꦁꦧꦭꦸꦁꦔꦺꦱꦏꦧꦭꦸꦁꦏꦸ꧈​ꦭꦤ꧀ꦢꦒꦶꦁꦔꦺꦱꦏꦢꦒꦶꦁꦏꦸ꧉​ꦩꦤꦸꦁꦱꦲꦶꦏꦶꦢꦶꦲꦫꦤ꧀ꦤꦶ‘ꦏꦼꦝꦶꦤꦶ’꧍​ꦲꦮꦶꦠ꧀ꦏꦗꦸꦥꦸꦏ꧀ꦱꦏꦏꦼꦝꦤ꧉"​

^2:24 ꦩꦸꦭꦤꦺꦮꦺꦴꦁꦭꦤꦁꦥꦶꦤꦼꦱ꧀ꦛꦶꦤꦶꦁꦒꦭ꧀ꦧꦥꦧꦶꦪꦸꦁꦔꦺꦭꦤ꧀ꦫꦸꦩꦏꦼꦠ꧀ꦩꦫꦁꦫꦧꦶꦤꦺ꧈​ꦱꦂꦠꦱꦼꦏꦫꦺꦴꦤꦺꦧꦏꦭ꧀ꦢꦢꦶꦧꦢꦤ꧀ꦱꦶꦗꦶ꧉​

^2:25 ꦩꦤꦸꦁꦱꦭꦤꦁꦭꦤ꧀ꦮꦢꦺꦴꦤ꧀ꦩꦲꦸꦱꦼꦏꦫꦺꦴꦤꦺꦥꦝꦮꦸꦢ꧈​ꦲꦺꦮꦢꦺꦤꦺꦲꦺꦴꦫꦫꦸꦩꦁꦱꦲꦶꦱꦶꦤ꧀꧉​