Jv/Alkitab/Purwaning Dumadi/26

^26:1 ꦏꦼꦕꦿꦶꦠꦲꦶꦁꦤꦼꦒꦫꦏꦺꦴꦤꦺꦴꦲꦤꦥꦲꦶꦭꦤ꧀ꦒꦼꦝꦺ꧈​ꦏꦪꦝꦺꦏ꧀ꦗꦩꦤ꧀ꦤꦺ​꧊ꦄꦧꦿꦲꦩ꧀꧉​​꧊ꦆꦱ꧀ꦏꦏ꧀ꦧꦚ꧀ꦗꦸꦂꦭꦸꦔꦩꦼꦚꦁ​꧊ꦒꦺꦫꦂ꧈​ꦱꦺꦴꦮꦤ꧀ꦲꦶꦁꦔꦂꦱꦤꦺ​꧊ꦄꦧꦶꦩꦺꦭꦺꦃ꧈​ꦫꦗꦲꦶꦁ​꧊ꦥ꦳ꦶꦭꦶꦱ꧀ꦠꦶꦤ꧀꧈​ꦱꦥꦽꦭꦸꦚꦸꦮꦸꦤ꧀ꦱꦸꦥꦪꦢꦶꦭꦶꦭꦤꦶꦩꦁꦒꦺꦴꦤ꧀ꦲꦤꦲꦶꦁꦏꦺꦴꦤꦺꦴ꧉​

^26:2 ꦱꦼꦧꦧ꧀ꦒꦸꦱ꧀ꦠꦶꦄꦭ꧀ꦭꦃꦮꦶꦱ꧀ꦔꦼꦠꦶꦔꦭ꧀ꦩꦫꦁ​꧊ꦆꦱ꧀ꦏꦏ꧀ꦭꦤ꧀ꦔꦤ꧀ꦢꦶꦏ꧈​"ꦏꦺꦴꦮꦺꦲꦗꦭꦸꦔꦩꦼꦚꦁꦠꦤꦃ​꧊ꦩꦺꦱꦶꦂ꧈​ꦩꦁꦒꦺꦴꦤꦲꦤꦲꦶꦁꦠꦤꦃꦏꦺꦤꦺ꧈​ꦏꦪꦱꦶꦁꦢꦏ꧀ꦝꦮꦸꦃꦲꦏꦺꦩꦫꦁꦏꦺꦴꦮꦺ꧉​

^26:3 ꦲꦏꦸꦧꦏꦭ꧀ꦔꦤ꧀ꦛꦶꦭꦤ꧀ꦩ꧀ꦧꦼꦂꦏꦃꦲꦶꦏꦺꦴꦮꦺ꧉​ꦠꦤꦃꦲꦶꦏꦶꦏꦧꦺꦃꦧꦏꦭ꧀ꦢꦏ꧀ꦥꦫꦶꦁꦔꦏꦺꦩꦫꦁꦏꦺꦴꦮꦺꦭꦤ꧀ꦩꦫꦁꦲꦤꦏ꧀ꦠꦸꦫꦸꦤ꧀ꦩꦸ꧉​ꦲꦏꦸꦧꦏꦭ꧀ꦤꦼꦠꦼꦥ꧀ꦥꦶꦗꦚ꧀ꦗꦶꦏꦸꦩꦫꦁ​꧊ꦄꦧꦿꦲꦩ꧀꧈​ꦧꦥꦏ꧀ꦩꦸ꧉​

^26:4 ꦲꦤꦏ꧀ꦠꦸꦫꦸꦤ꧀ꦩꦸꦧꦏꦭ꧀ꦢꦏ꧀ꦢꦢꦺꦏ꧀ꦏꦏꦺꦲꦏꦺꦃꦧꦔꦼꦠ꧀ꦔꦤ꧀ꦠꦶꦏꦪꦭꦶꦤ꧀ꦠꦁꦲꦶꦁꦭꦔꦶꦠ꧀꧈​ꦭꦤ꧀ꦠꦤꦃꦲꦶꦏꦶꦏꦧꦺꦃꦧꦏꦭ꧀ꦢꦏ꧀ꦥꦫꦶꦁꦔꦏꦺꦢꦢꦶꦢꦸꦮꦺꦏ꧀ꦏꦺ꧉​ꦱꦏꦺꦃꦲꦺꦧꦁꦱꦲꦶꦁꦧꦸꦩꦶꦧꦏꦭ꧀ꦚꦸꦮꦸꦤ꧀ꦢꦏ꧀ꦧꦼꦂꦏꦃꦲꦶ꧈​ꦏꦪꦲꦼꦁꦒꦺꦴꦤ꧀ꦏꦸꦩ꧀ꦧꦼꦂꦏꦃꦲꦶꦲꦤꦏ꧀ꦠꦸꦫꦸꦤ꧀ꦩꦸ꧉​

^26:5 ꦏꦺꦴꦮꦺꦧꦏꦭ꧀ꦢꦏ꧀ꦧꦼꦂꦏꦃꦲꦶ꧈​ꦩꦼꦂꦒꦱꦏ​꧊ꦄꦧꦿꦲꦩ꧀꧈​ꦏꦁꦩ꧀ꦧꦔꦸꦤ꧀ꦠꦸꦫꦸꦠ꧀ꦩꦫꦁꦲꦏꦸꦭꦤ꧀ꦔ꧀ꦭꦏꦺꦴꦤ꧀ꦤꦶꦱꦏꦺꦃꦲꦺꦥꦽꦤꦠꦤ꧀ꦭꦤ꧀ꦝꦮꦸꦃꦏꦸ꧉"​

^26:6 ꦩꦸꦭꦤꦺ​꧊ꦆꦱ꧀ꦏꦏ꧀ꦠꦼꦠꦼꦥ꧀ꦩꦁꦒꦺꦴꦤ꧀ꦲꦤꦲꦶꦁ​꧊ꦒꦺꦫꦂ꧉​

^26:7 ꦤꦭꦶꦏꦮꦺꦴꦁꦮꦺꦴꦁꦲꦶꦁꦏꦺꦴꦤꦺꦴꦥꦝꦤꦏꦺꦴꦏ꧀ꦏꦏꦺꦧꦧ꧀​꧊ꦫꦶꦧ꧀ꦏꦃ꧈​​꧊ꦆꦱ꧀ꦏꦏ꧀ꦩꦁꦱꦸꦭ꧀ꦭꦶꦪꦺꦤ꧀​꧊ꦫꦶꦧ꧀ꦏꦃꦏꦸꦮꦶꦲꦝꦶꦤꦺ꧈​ꦢꦸꦢꦸꦧꦺꦴꦗꦺꦴꦤꦺ꧉​​꧊ꦆꦱ꧀ꦏꦏ꧀ꦮꦼꦢꦶꦪꦺꦤ꧀ꦢꦶꦥꦠꦺꦤ꧀ꦤꦶꦮꦺꦴꦁꦮꦺꦴꦁꦲꦶꦁꦏꦺꦴꦤꦺꦴꦩꦼꦂꦒꦏꦼꦥꦺꦔꦶꦤ꧀ꦔꦽꦧꦸꦠ꧀​꧊ꦫꦶꦧ꧀ꦏꦃ꧈​ꦲꦮꦶꦠ꧀​꧊ꦫꦶꦧ꧀ꦏꦃꦏꦸꦮꦶꦫꦸꦥꦤꦺꦲꦪꦸꦧꦔꦼꦠ꧀꧉​

^26:8 ꦏꦺꦴꦕꦥ꧀ꦥꦧꦉꦁꦮꦶꦱ꧀ꦮꦼꦠꦫꦱꦸꦮꦺꦲꦼꦁꦒꦺꦴꦤꦺꦩꦁꦒꦺꦴꦤ꧀ꦲꦤꦲꦶꦁ​꧊ꦒꦺꦫꦂꦏꦺꦴꦤꦺꦴ꧈​ꦭꦤ꧀ꦫꦗ​꧊ꦄꦧꦶꦩꦺꦭꦺꦃꦥꦶꦤꦸꦗꦸꦔꦸꦔꦏ꧀ꦱꦏꦗꦼꦤ꧀ꦝꦺꦭꦤꦺ꧈​ꦥꦚ꧀ꦗꦼꦤꦼꦁꦔꦤ꧀ꦤꦺꦔꦺꦴꦤꦁꦔꦶ​꧊ꦆꦱ꧀ꦏꦏ꧀ꦭꦒꦶꦱꦶꦃꦱꦶꦤꦶꦃꦲꦤ꧀ꦏꦫꦺꦴ​꧊ꦫꦶꦧ꧀ꦏꦃ꧈​ꦧꦺꦴꦗꦺꦴꦤꦺ꧉​

^26:9 ​꧊ꦆꦱ꧀ꦏꦏ꧀ꦧꦚ꧀ꦗꦸꦂꦢꦶꦠꦶꦩ꧀ꦧꦭ꧀ꦭꦶꦭꦤ꧀ꦢꦶꦥꦔꦤ꧀ꦢꦶꦏꦤꦶ꧈​"ꦢꦢꦺꦴꦱ꧀​꧊ꦫꦶꦧ꧀ꦏꦃꦩꦼꦤꦶꦏꦱꦲꦺꦱ꧀ꦠꦸꦤꦶꦥꦸꦤ꧀ꦒꦂꦮꦥꦚ꧀ꦗꦼꦤꦼꦁꦔꦤ꧀ꦠ!ꦏꦺꦁꦔꦶꦁꦩꦼꦤꦥꦥꦚ꧀ꦗꦼꦤꦼꦁꦔꦤ꧀ꦏꦺꦴꦏ꧀ꦔꦼꦤ꧀ꦢꦶꦏꦧꦶꦭꦶꦃꦥꦶꦪꦩ꧀ꦧꦏ꧀ꦏꦶꦥꦸꦤ꧀ꦩꦼꦤꦶꦏꦫꦪꦶꦥꦚ꧀ꦗꦼꦤꦼꦁꦔꦤ꧀?"ꦮꦁꦱꦸꦭ꧀ꦭꦤ꧀ꦤꦺ​꧊ꦆꦱ꧀ꦏꦏ꧀꧈​"ꦏꦸꦭꦏꦸꦮꦠꦺꦴꦱ꧀ꦢꦶꦥꦸꦤ꧀ꦥꦼꦗꦃꦲꦶꦩꦼꦤꦮꦶꦏꦸꦭꦔꦏꦼꦤ꧀꧈​ꦧꦶꦭꦶꦃ​꧊ꦫꦶꦧ꧀ꦏꦃꦩꦼꦤꦶꦏꦱꦺꦩꦃꦏꦸꦭ꧉"​

^26:10 ꦥꦔꦤ꧀ꦢꦶꦏꦤꦺ​꧊ꦄꦧꦶꦩꦺꦭꦺꦃ꧈​"ꦠꦸꦩꦶꦤ꧀ꦢꦏ꧀ꦥꦚ꧀ꦗꦼꦤꦼꦁꦔꦤ꧀ꦲꦶꦁꦏꦁꦏꦢꦺꦴꦱ꧀ꦩꦼꦏꦠ꧀ꦠꦼꦤ꧀ꦩꦼꦤꦶꦏꦠꦸꦩꦿꦥ꧀ꦏꦸꦭꦱꦧꦁꦱꦩ꧀ꦧꦺꦴꦠꦼꦤ꧀ꦥꦤ꧀ꦠꦼꦱ꧀ꦱꦔꦼꦠ꧀꧉​ꦱꦲꦸꦥꦩꦶꦏꦼꦭꦩ꧀ꦥꦃꦲꦤ꧀ꦮꦺꦴꦤ꧀ꦠꦼꦤ꧀ꦱꦭꦃꦱꦼꦠꦸꦁꦒꦭ꧀ꦭꦶꦁꦠꦶꦪꦁꦏꦸꦭꦔꦼꦩ꧀ꦥꦭ꧀ꦭꦶꦒꦂꦮꦥꦚ꧀ꦗꦼꦤꦼꦁꦔꦤ꧀ꦩꦼꦤꦥꦩ꧀ꦧꦺꦴꦠꦼꦤ꧀ꦊꦥꦠ꧀ꦥꦚ꧀ꦗꦼꦤꦼꦁꦔꦤ꧀ꦥꦶꦪꦩ꧀ꦧꦏ꧀?"

^26:11 ​꧊ꦄꦧꦶꦩꦺꦭꦺꦃꦤꦸꦭꦶꦤ꧀ꦢꦮꦸꦃꦲꦏꦺꦩꦫꦁꦫꦏꦾꦠ꧀ꦠꦺꦏꦧꦺꦃꦩꦼꦁꦏꦺꦤꦺ꧈​"ꦱꦥꦱꦶꦁꦔ꧀ꦒꦁꦒꦸꦒꦮꦺ​꧊ꦆꦱ꧀ꦏꦏ꧀ꦲꦸꦠꦮꦧꦺꦴꦗꦺꦴꦤꦺ꧈​ꦧꦏꦭ꧀ꦏꦼꦤꦲꦸꦏꦸꦩ꧀ꦥꦠꦶ꧉"​

^26:12 ​꧊ꦆꦱ꧀ꦏꦏ꧀ꦚꦼꦧꦂꦮꦶꦗꦶꦲꦶꦁꦠꦤꦃꦏꦺꦴꦤꦺꦴ꧈​ꦭꦤ꧀ꦠꦲꦸꦤ꧀ꦏꦸꦮꦶꦥꦤꦺꦤ꧀ꦤꦺꦠꦶꦏꦼꦭ꧀ꦱꦠꦸꦱ꧀꧈​ꦩꦼꦂꦒꦱꦏꦧꦼꦂꦏꦃꦲꦺꦥꦔꦺꦫꦤ꧀꧉​

^26:13 ꦧꦤ꧀ꦝꦤꦺꦱꦪꦩꦸꦤ꧀ꦝꦏ꧀ꦲꦏꦺꦃꦔꦤ꧀ꦠꦶꦮꦼꦏꦱꦤ꧀ꦤꦺ​꧊ꦆꦱ꧀ꦏꦏ꧀ꦢꦢꦶꦮꦺꦴꦁꦱꦶꦁꦱꦸꦒꦶꦃꦧꦔꦼꦠ꧀꧉​

^26:14 ꦱꦫꦺꦃꦤꦺꦫꦗꦏꦪꦤꦺꦱꦶꦁꦫꦸꦥꦮꦼꦝꦸꦱ꧀ꦒꦺꦩ꧀ꦧꦺꦭ꧀ꦭꦤ꧀ꦱꦥꦶ꧈​ꦱꦼꦩꦺꦴꦤꦺꦴꦲꦸꦒꦧꦠꦸꦂꦫꦺꦲꦏꦺꦃꦧꦔꦼꦠ꧀꧈​ꦮꦺꦴꦁ​꧊ꦥ꦳ꦶꦭꦶꦱ꧀ꦠꦶꦤ꧀ꦥꦝꦩꦺꦫꦶ꧉​

^26:15 ꦧꦚ꧀ꦗꦸꦂꦥꦝꦔꦸꦫꦸꦒꦱꦸꦩꦸꦂꦱꦸꦩꦸꦂꦱꦶꦁꦢꦶꦝꦸꦝꦸꦏ꧀ꦢꦺꦤꦶꦁꦥꦫꦲꦧ꧀ꦢꦶꦤꦺ​꧊ꦄꦧꦿꦲꦩ꧀꧈​ꦤꦭꦶꦏ​꧊ꦄꦧꦿꦲꦩ꧀ꦲꦶꦱꦶꦃꦲꦸꦫꦶꦥ꧀꧈​ꦢꦶꦠꦧ꧀ꦭꦼꦒ꧀ꦊꦩꦃ꧉​

^26:16 ꦫꦗ​꧊ꦄꦧꦶꦩꦺꦭꦺꦃꦧꦚ꧀ꦗꦸꦂꦔꦤ꧀ꦢꦶꦏꦩꦫꦁ​꧊ꦆꦱ꧀ꦏꦏ꧀꧈​"ꦥꦚ꧀ꦗꦼꦤꦼꦁꦔꦤ꧀ꦏꦸꦭꦲꦠꦸꦂꦫꦶꦏꦺꦱꦃꦱꦏꦶꦁꦔꦿꦶꦏꦶ꧈​ꦲꦮꦶꦠ꧀ꦏꦮꦶꦧꦮꦤ꧀ꦥꦚ꧀ꦗꦼꦤꦼꦁꦔꦤ꧀ꦱꦩ꧀ꦥꦸꦤ꧀ꦔ꧀ꦭꦁꦏꦸꦁꦔꦶꦏꦸꦭꦱꦼꦢꦪ꧉"​

^26:17 ​꧊ꦆꦱ꧀ꦏꦏ꧀ꦧꦚ꧀ꦗꦸꦂꦭꦸꦔꦱꦏꦠꦤꦃꦏꦺꦴꦤꦺꦴ꧈​ꦭꦤ꧀ꦩꦁꦒꦺꦴꦤ꧀ꦲꦶꦁꦊꦩ꧀ꦧꦃ​꧊ꦒꦺꦫꦂ꧈​ꦔꦤ꧀ꦠꦶꦏꦼꦥꦫꦱꦸꦮꦺ꧉​

^26:18 ꦱꦸꦩꦸꦂꦱꦸꦩꦸꦂꦱꦶꦁꦢꦶꦝꦸꦝꦸꦏ꧀ꦤꦭꦶꦏꦗꦩꦤ꧀ꦤꦺ​꧊ꦄꦧꦿꦲꦩ꧀ꦭꦤ꧀ꦢꦶꦠꦧ꧀ꦭꦼꦒ꧀ꦢꦺꦤꦶꦁꦮꦺꦴꦁꦮꦺꦴꦁ​꧊ꦥ꦳ꦶꦭꦶꦱ꧀ꦠꦶꦤ꧀ꦢꦶꦝꦸꦝꦸꦏ꧀ꦩꦼꦤꦺꦃ꧉​ꦱꦸꦩꦸꦂꦱꦸꦩꦸꦂꦩꦲꦸꦢꦶꦗꦼꦤꦼꦁꦔꦶꦥꦝꦏꦪꦲꦼꦁꦒꦺꦴꦤꦺꦚ꧀ꦗꦼꦤꦼꦁꦔꦶꦧꦥꦏ꧀ꦤꦺꦧꦶꦪꦺꦤ꧀꧉​

^26:19 ꦲꦧ꧀ꦢꦶꦲꦧ꧀ꦢꦶꦤꦺ​꧊ꦆꦱ꧀ꦏꦏ꧀ꦥꦝꦔꦼꦝꦸꦏ꧀ꦱꦸꦩꦸꦂꦲꦤꦲꦶꦁꦊꦩ꧀ꦧꦃ​꧊ꦒꦺꦫꦂꦏꦺꦴꦤꦺꦴꦭꦤ꧀ꦩꦼꦠꦸꦧꦚꦸꦤꦺ꧉​

^26:20 ꦤꦁꦔꦶꦁꦥꦫꦥꦔꦺꦴꦤ꧀ꦲꦶꦁ​꧊ꦒꦺꦫꦂꦥꦝꦔꦗꦏ꧀ꦠꦸꦏꦂꦫꦤ꧀ꦏꦫꦺꦴꦥꦫꦥꦔꦺꦴꦤ꧀ꦤꦺ​꧊ꦆꦱ꧀ꦏꦏ꧀꧉​ꦥꦝꦩꦸꦤꦶ꧈​"ꦱꦸꦩꦸꦂꦲꦶꦏꦶꦢꦸꦮꦺꦏ꧀ꦏꦸ꧉"​ꦩꦸꦭꦤꦺ​꧊ꦆꦱ꧀ꦏꦏ꧀ꦚ꧀ꦗꦼꦤꦼꦁꦔꦶꦱꦸꦩꦸꦂꦩꦲꦸ"​꧊ꦌꦱꦺꦏ꧀꧈"​ꦠꦼꦒꦼꦱ꧀ꦱꦺ:ꦠꦸꦏꦂꦫꦤ꧀꧉​

^26:21 ꦲꦧ꧀ꦢꦶꦤꦺ​꧊ꦆꦱ꧀ꦏꦏ꧀ꦔꦼꦝꦸꦏ꧀ꦱꦸꦩꦸꦂꦭꦶꦪꦤꦺ꧈​ꦭꦤ꧀ꦲꦶꦁꦏꦺꦴꦤꦺꦴꦢꦢꦶꦥꦢꦸꦩꦼꦤꦺꦃ꧉​ꦩꦸꦭꦤꦺꦱꦸꦩꦸꦂꦩꦲꦸꦢꦶꦗꦼꦤꦼꦁꦔꦶ:"​꧊ꦱꦶꦠ꧀ꦤ꧈"​ꦠꦼꦒꦼꦱ꧀ꦱꦺ:ꦩꦼꦩꦸꦁꦱꦸꦃꦲꦤ꧀꧉​

^26:22 ​꧊ꦆꦱ꧀ꦏꦏ꧀ꦧꦚ꧀ꦗꦸꦂꦥꦶꦤ꧀ꦝꦃꦱꦏꦲꦶꦁꦏꦺꦴꦤꦺꦴꦭꦤ꧀ꦔꦼꦝꦸꦏ꧀ꦱꦸꦩꦸꦂꦩꦼꦤꦺꦃ꧈​ꦤꦁꦔꦶꦁꦲꦺꦴꦫꦤ꧀ꦢꦢꦺꦏ꧀ꦏꦏꦺꦠꦸꦏꦂꦥꦢꦸ꧉​ꦩꦸꦭꦤꦺꦱꦸꦩꦸꦂꦩꦲꦸꦢꦶꦗꦼꦤꦼꦁꦔꦶ:"​꧊ꦫꦺꦲꦺꦴꦧꦺꦴꦠ꧀꧈"​ꦠꦼꦒꦼꦱ꧀ꦱꦺ:ꦲꦺꦴꦩ꧀ꦧꦺꦂ꧉​ꦲꦸꦗꦂꦫꦺ꧈​"ꦱꦲꦶꦏꦶꦒꦸꦱ꧀ꦠꦶꦄꦭ꧀ꦭꦃꦩꦫꦶꦁꦔꦶꦲꦺꦴꦩ꧀ꦧꦺꦂꦩꦫꦁꦲꦏꦸꦲꦶꦁꦧꦸꦩꦶꦏꦺꦤꦺ꧈​ꦭꦤ꧀ꦏꦶꦠꦧꦏꦭ꧀ꦱꦪꦩꦏ꧀ꦩꦸꦂ꧉"​

^26:23 ꦱꦏꦲꦶꦁꦏꦺꦴꦤꦺꦴ​꧊ꦆꦱ꧀ꦏꦏ꧀ꦥꦶꦤ꧀ꦝꦃꦩꦼꦚꦁ​꧊ꦧꦺꦂꦱꦾꦺꦧ꧉​

^26:24 ꦲꦶꦁꦱꦮꦶꦗꦶꦤꦶꦁꦢꦶꦤ꧈​ꦲꦶꦁꦮꦪꦃꦧꦼꦔꦶꦒꦸꦱ꧀ꦠꦶꦄꦭ꧀ꦭꦃꦔꦼꦠꦶꦔꦭ꧀ꦩꦫꦁ​꧊ꦆꦱ꧀ꦏꦏ꧀꧈​ꦥꦔꦤ꧀ꦢꦶꦏꦤꦺ꧈​"ꦲꦏꦸꦲꦶꦏꦶꦲꦭ꧀ꦭꦃꦲꦺꦧꦥꦏ꧀ꦩꦸ​꧊ꦄꦧꦿꦲꦩ꧀꧉​ꦲꦗꦮꦼꦢꦶ꧉​ꦲꦏꦸꦔꦤ꧀ꦛꦶꦩꦫꦁꦏꦺꦴꦮꦺ꧉​ꦲꦏꦸꦧꦏꦭ꧀ꦩ꧀ꦧꦼꦂꦏꦃꦲꦶꦏꦺꦴꦮꦺ꧈​ꦭꦤ꧀ꦲꦤꦏ꧀ꦠꦸꦫꦸꦤ꧀ꦩꦸꦧꦏꦭ꧀ꦢꦏ꧀ꦒꦮꦺꦲꦏꦺꦃꦧꦔꦼꦠ꧀꧈​ꦩꦼꦂꦒꦱꦏꦗꦚ꧀ꦗꦶꦏꦸꦩꦫꦁ​꧊ꦄꦧꦿꦲꦩ꧀꧈​ꦲꦧ꧀ꦢꦶꦏꦸ꧉"​

^26:25 ​꧊ꦆꦱ꧀ꦏꦏ꧀ꦧꦚ꧀ꦗꦸꦂꦔꦼꦢꦼꦒꦏꦺꦩꦼꦱ꧀ꦧꦺꦃꦭꦤ꧀ꦔ꧀ꦭꦸꦲꦸꦂꦫꦏꦺꦲꦱ꧀ꦩꦤꦺꦒꦸꦱ꧀ꦠꦶꦄꦭ꧀ꦭꦃꦲꦤꦲꦶꦁꦏꦺꦴꦤꦺꦴ꧉​​꧊ꦆꦱ꧀ꦏꦏ꧀ꦤꦸꦭꦶꦩꦱꦁꦏꦺꦩꦃꦭꦤ꧀ꦲꦧ꧀ꦢꦶꦤꦺꦥꦝꦔꦼꦝꦸꦏ꧀ꦱꦸꦩꦸꦂꦩꦼꦤꦺꦃ꧉​

^26:26 ꦲꦶꦁꦱꦮꦶꦗꦶꦤꦶꦁꦢꦶꦤꦫꦗ​꧊ꦄꦧꦶꦩꦺꦭꦺꦃꦠꦼꦏꦱꦏ​꧊ꦒꦺꦫꦂ꧈​ꦏꦫꦺꦴ​꧊ꦄꦲꦸꦗ꦳ꦠ꧀꧈​ꦥꦼꦤꦱꦺꦲꦠ꧀ꦠꦺ꧈​ꦭꦤ꧀​꧊ꦥꦶꦏꦺꦴꦭ꧀꧈​ꦱꦺꦤꦥꦠꦶꦤꦺ꧈​ꦲꦉꦥ꧀ꦏꦼꦠꦼꦩꦸꦏꦫꦺꦴ​꧊ꦆꦱ꧀ꦏꦏ꧀꧉​

^26:27 ​꧊ꦆꦱ꧀ꦏꦏ꧀ꦠꦏꦺꦴꦤ꧀꧈​"ꦏꦺꦁꦔꦶꦁꦩꦼꦤꦥꦱꦩꦼꦤꦶꦏꦥꦚ꧀ꦗꦼꦤꦼꦁꦔꦤ꧀ꦱꦩꦶꦫꦮꦸꦃꦩꦿꦶꦏꦶ꧈​ꦩꦁꦏꦫꦸꦩꦶꦪꦶꦤ꧀ꦥꦚ꧀ꦗꦼꦤꦼꦁꦔꦤ꧀ꦤꦸꦤ꧀ꦝꦸꦁꦏꦸꦭꦱꦏꦶꦁ​꧊ꦒꦺꦫꦂ?"

^26:28 ꦮꦁꦱꦸꦭ꧀ꦭꦤ꧀ꦤꦺ​꧊ꦄꦧꦶꦩꦺꦭꦺꦃꦱꦏꦚ꧀ꦕꦤꦺ꧈​"ꦱꦩꦼꦤꦶꦏꦱꦩ꧀ꦥꦸꦤ꧀ꦠꦼꦠꦺꦭ꧈​ꦧꦶꦭꦶꦃꦒꦸꦱ꧀ꦠꦶꦄꦭ꧀ꦭꦃꦔꦤ꧀ꦛꦶꦝꦠꦼꦁꦥꦚ꧀ꦗꦼꦤꦼꦁꦔꦤ꧀꧈​ꦭꦤ꧀ꦏꦸꦭꦏꦶꦤ꧀ꦠꦼꦤ꧀ꦱꦲꦺꦩꦼꦤꦮꦶꦏꦶꦠꦱꦩꦶꦢꦩꦼꦭ꧀ꦥꦽꦗꦚ꧀ꦗꦶꦪꦤ꧀꧉​ꦏꦸꦭꦲꦠꦸꦂꦫꦶꦱꦸꦩ꧀ꦥꦃ꧈​

^26:29 ꦧꦶꦭꦶꦃꦥꦚ꧀ꦗꦼꦤꦼꦁꦔꦤ꧀ꦩ꧀ꦧꦺꦴꦠꦼꦤ꧀ꦧꦝꦺꦤꦤ꧀ꦢꦸꦏ꧀ꦏꦏꦼꦤ꧀ꦥꦼꦤ꧀ꦢꦩꦼꦭ꧀ꦲꦮꦺꦴꦤ꧀ꦝꦠꦼꦁꦏꦸꦭ꧈​ꦏꦢꦺꦴꦱ꧀ꦢꦺꦤꦺꦏꦸꦭꦲꦶꦁꦒꦶꦃꦩ꧀ꦧꦺꦴꦠꦼꦤ꧀ꦧꦝꦺꦤꦤ꧀ꦢꦸꦏ꧀ꦏꦏꦼꦤ꧀ꦥꦼꦤ꧀ꦢꦩꦼꦭ꧀ꦲꦮꦺꦴꦤ꧀ꦝꦠꦼꦁꦥꦚ꧀ꦗꦼꦤꦼꦁꦔꦤ꧀꧉​ꦏꦸꦭꦱꦩ꧀ꦥꦸꦤ꧀ꦢꦩꦼꦭ꧀ꦱꦲꦺꦝꦠꦼꦁꦥꦚ꧀ꦗꦼꦤꦼꦁꦔꦤ꧀꧈​ꦱꦂꦠꦥꦚ꧀ꦗꦼꦤꦼꦁꦔꦤ꧀ꦏꦺꦱꦃꦠꦤ꧀ꦥꦏꦸꦭꦩꦼꦤꦥꦏ꧀ꦩꦼꦤꦥꦏ꧀ꦏꦏꦼꦤ꧀꧉​ꦏꦁꦒꦺꦏꦸꦭꦱꦩ꧀ꦥꦸꦤ꧀ꦕꦼꦛ꧈​ꦧꦶꦭꦶꦃꦥꦚ꧀ꦗꦼꦤꦼꦁꦔꦤ꧀ꦩꦼꦤꦶꦏꦢꦶꦥꦸꦤ꧀ꦲꦪꦺꦴꦩ꧀ꦩꦶꦢꦺꦤꦶꦁꦄꦭ꧀ꦭꦃ꧉"​

^26:30 ​꧊ꦆꦱ꧀ꦏꦏ꧀ꦧꦚ꧀ꦗꦸꦂꦔꦤꦏ꧀ꦏꦏꦺꦥꦺꦱ꧀ꦠꦏꦁꦒꦺꦴꦔꦸꦂꦩꦠ꧀ꦠꦶ​꧊ꦄꦧꦶꦩꦺꦭꦺꦃꦱꦏꦚ꧀ꦕꦤꦺ꧈​ꦤꦸꦭꦶꦥꦝꦩꦁꦔꦤ꧀ꦭꦤ꧀ꦔꦺꦴꦩ꧀ꦧꦺ꧉​

^26:31 ꦲꦺꦱꦸꦏ꧀ꦏꦺ​꧊ꦆꦱ꧀ꦏꦏ꧀ꦭꦤ꧀​꧊ꦄꦧꦶꦩꦺꦭꦺꦃꦧꦼꦧꦉꦁꦔꦤ꧀ꦥꦝꦱꦸꦩ꧀ꦥꦃ꧉​​꧊ꦆꦱ꧀ꦏꦏ꧀ꦤꦸꦭꦶꦔꦸꦤ꧀ꦠꦥ꧀ꦥꦏꦺꦠꦩꦸꦤꦺꦤꦭꦶꦏꦥꦝꦧꦸꦝꦭ꧀ꦭꦤ꧀꧈​ꦱꦮꦶꦱ꧀ꦱꦺꦏꦸꦮꦶꦧꦚ꧀ꦗꦸꦂꦥꦝꦥꦼꦥꦶꦱꦃꦲꦤ꧀꧉​

^26:32 ꦲꦶꦁꦢꦶꦤꦲꦶꦏꦸꦲꦸꦒꦧꦠꦸꦂꦫꦺ​꧊ꦆꦱ꧀ꦏꦏ꧀ꦥꦝꦠꦼꦏꦭꦥꦸꦂ꧈​ꦪꦺꦤ꧀ꦱꦸꦩꦸꦂꦱꦶꦁꦥꦝꦢꦶꦝꦸꦝꦸꦏ꧀ꦮꦶꦱ꧀ꦩꦼꦠꦸꦧꦚꦸꦤꦺ꧉​

^26:33 ​꧊ꦆꦱ꧀ꦏꦏ꧀ꦧꦚ꧀ꦗꦸꦂꦚ꧀ꦗꦼꦤꦼꦁꦔꦶꦱꦸꦩꦸꦂꦩꦲꦸ"ꦱꦺꦧ꧈"​ꦠꦼꦒꦼꦱ꧀ꦱꦺ:ꦱꦸꦩ꧀ꦥꦃ;ꦩꦸꦭꦏꦸꦛꦲꦶꦁꦏꦺꦴꦤꦺꦴꦢꦶꦱꦼꦧꦸꦠ꧀​꧊ꦧꦺꦂꦱꦾꦺꦧ꧉​

^26:34 ꦤꦭꦶꦏꦲꦸꦩꦸꦂꦥꦠꦁꦥꦸꦭꦸꦃꦠꦲꦸꦤ꧀​꧊ꦌꦱꦲꦸꦫꦧꦶꦏꦫꦺꦴꦥꦿꦮꦤ꧀ꦭꦺꦴꦫꦺꦴꦱꦏꦧꦁꦱ​꧊ꦲꦺꦠ꧀꧈​ꦗꦼꦤꦼꦁꦔꦺ​꧊ꦪꦸꦢꦶꦠ꧀꧈​ꦲꦤꦏ꧀ꦏꦺ​꧊ꦧꦺꦲꦺꦫꦶꦭꦤ꧀​꧊ꦧꦱ꧀ꦩꦠ꧀꧈​ꦲꦤꦏ꧀ꦏꦺꦲꦺꦭꦺꦴꦤ꧀꧉​

^26:35 ꦮꦺꦴꦁꦮꦢꦺꦴꦤ꧀ꦭꦺꦴꦫꦺꦴꦩꦲꦸꦒꦮꦺꦱꦸꦱꦃꦲꦺ​꧊ꦆꦱ꧀ꦏꦏ꧀ꦭꦤ꧀​꧊ꦫꦶꦧ꧀ꦏꦃ꧉​