Jv/Alkitab/Purwaning Dumadi/33

^33:1 ​꧊ꦪꦏꦸꦧ꧀ꦮꦼꦫꦸꦃ​꧊ꦌꦱꦲꦸꦠꦼꦏꦱꦏꦏꦢꦺꦴꦃꦲꦤ꧀꧈​ꦢꦶꦠꦸꦠ꧀ꦠꦏꦺꦮꦺꦴꦁꦥꦠꦁꦲꦠꦸꦱ꧀꧉​ꦲꦤꦏ꧀ꦲꦤꦏ꧀ꦏꦺꦢꦶꦏꦺꦴꦤ꧀ꦩꦺꦭꦸꦲꦶꦧꦸꦤꦺꦝꦺꦮꦺꦝꦺꦮꦺ꧈​ꦪꦏꦸꦮꦶ​꧊ꦭꦺꦪ꧈​​꧊ꦫꦲꦺꦭ꧀ꦭꦤ꧀ꦲꦧ꧀ꦢꦶꦤꦺꦭꦺꦴꦫꦺꦴ꧉​

^33:2 ꦱꦼꦭꦶꦂꦱꦼꦭꦶꦂꦏꦫꦺꦴꦲꦤꦏ꧀ꦲꦤꦏ꧀ꦏꦺꦩ꧀ꦭꦏꦸꦲꦤꦲꦶꦁꦔꦉꦥ꧀ꦝꦺꦮꦺ꧈​ꦧꦚ꧀ꦗꦸꦂ​꧊ꦭꦺꦪꦏꦫꦺꦴꦲꦤꦏ꧀ꦲꦤꦏ꧀ꦏꦺ꧈​ꦤꦸꦭꦶ​꧊ꦫꦲꦺꦭ꧀ꦭꦤ꧀​꧊ꦪꦸꦱꦸꦥ꦳꧀ꦲꦤꦲꦶꦁꦩ꧀ꦧꦸꦫꦶꦝꦺꦮꦺ꧉​

^33:3 ꦢꦺꦤꦺ​꧊ꦪꦏꦸꦧ꧀ꦩ꧀ꦭꦏꦸꦲꦤꦲꦶꦁꦔꦉꦥ꧀ꦥꦺꦲꦶꦫꦶꦁꦲꦶꦫꦶꦁꦔꦤ꧀ꦩꦲꦸ꧉​ꦧꦉꦁꦠꦼꦏꦤ꧀ꦔꦉꦥ꧀ꦥꦺ​꧊ꦌꦱꦲꦸ꧈​​꧊ꦪꦏꦸꦧ꧀ꦧꦚ꧀ꦗꦸꦂꦱꦸꦗꦸꦢ꧀ꦥꦶꦁꦥꦶꦠꦸ꧉​

^33:4 ꦤꦁꦔꦶꦁ​꧊ꦌꦱꦲꦸꦩ꧀ꦭꦪꦺꦴꦤ꧀ꦤꦶꦩꦼꦛꦸꦏ꧀ꦏꦏꦺ꧉​​꧊ꦪꦏꦸꦧ꧀ꦢꦶꦫꦁꦏꦸꦭ꧀ꦭꦤ꧀ꦢꦶꦲꦩ꧀ꦧꦸꦁꦔꦶ꧉​ꦭꦺꦴꦫꦺꦴꦭꦺꦴꦫꦺꦴꦤꦺꦥꦝꦠꦔꦶꦱ꧀ꦠꦔꦶꦱ꧀ꦱꦤ꧀꧉​

^33:5 ꦧꦉꦁꦮꦼꦫꦸꦃꦮꦺꦴꦁꦮꦢꦺꦴꦤ꧀ꦮꦢꦺꦴꦤ꧀ꦭꦤ꧀ꦧꦺꦴꦕꦃꦧꦺꦴꦕꦃ​꧊ꦌꦱꦲꦸꦠꦏꦺꦴꦤ꧀꧈​"ꦱꦶꦁꦥꦝꦩꦺꦭꦸꦏꦺꦴꦮꦺꦲꦶꦏꦶꦱꦥ?"ꦮꦁꦱꦸꦭ꧀ꦭꦤ꧀ꦤꦺ​꧊ꦪꦏꦸꦧ꧀꧈​"ꦩꦼꦤꦶꦏꦲꦤꦏ꧀ꦲꦤꦏ꧀ꦏꦸꦭ꧈​ꦏꦤꦸꦒꦿꦃꦲꦤ꧀ꦥꦼꦥꦫꦶꦁꦔꦶꦥꦸꦤ꧀ꦥꦔꦺꦫꦤ꧀꧉"​

^33:6 ꦱꦼꦭꦶꦂꦭꦺꦴꦫꦺꦴꦏꦫꦺꦴꦲꦤꦏ꧀ꦲꦤꦏ꧀ꦏꦺꦧꦚ꧀ꦗꦸꦂꦥꦝꦩꦗꦸꦱꦸꦗꦸꦢ꧀꧉​

^33:7 ꦤꦸꦭꦶ​꧊ꦭꦺꦪꦏꦫꦺꦴꦲꦤꦏ꧀ꦲꦤꦏ꧀ꦏꦺ꧈​ꦭꦤ꧀ꦥꦸꦁꦏꦱ꧀ꦱꦤ꧀ꦝꦺꦮꦺ​꧊ꦫꦲꦺꦭ꧀ꦏꦫꦺꦴ​꧊ꦪꦸꦱꦸꦥ꦳꧀꧉​

^33:8 ꦥꦶꦠꦏꦺꦴꦤ꧀ꦤꦺ​꧊ꦌꦱꦲꦸ꧈​"ꦥꦤ꧀ꦛꦤ꧀ꦥꦤ꧀ꦛꦤ꧀ꦏꦺꦮꦤ꧀ꦱꦶꦁꦏꦼꦥꦼꦛꦸꦏ꧀ꦲꦏꦸꦩꦲꦸꦲꦥꦏꦉꦥ꧀ꦥꦺ?"ꦮꦁꦱꦸꦭ꧀ꦭꦤ꧀ꦤꦺ​꧊ꦪꦏꦸꦧ꧀꧈​"ꦩꦼꦤꦶꦏꦏꦸꦭꦱꦲꦺꦴꦱ꧀ꦱꦏꦼꦤ꧀ꦏꦒꦼꦩ꧀ꦏ꧀ꦭꦔꦼꦤ꧀ꦤꦤ꧀꧉"​

^33:9 ꦤꦁꦔꦶꦁ​꧊ꦌꦱꦲꦸꦕ꧀ꦭꦛꦸ꧈​"​꧊ꦝꦶ꧈​ꦲꦏꦸꦮꦶꦱ꧀ꦏꦼꦕꦸꦏꦸꦥ꧀ꦥꦤ꧀ꦱꦩꦸꦧꦫꦁ꧉​ꦏꦺꦴꦮꦺꦲꦺꦴꦫꦱꦸꦱꦃꦩꦺꦤꦺꦃꦲꦶꦲꦥꦲꦥ꧉"​

^33:10 ​꧊ꦪꦏꦸꦧ꧀ꦲꦢꦽꦁꦲꦠꦸꦂꦫꦺ꧈​"ꦩ꧀ꦧꦺꦴꦏ꧀ꦱꦩ꧀ꦥꦸꦤ꧀꧈​ꦩꦼꦤꦮꦶꦥꦚ꧀ꦗꦼꦤꦼꦁꦔꦤ꧀ꦉꦤꦲꦶꦁꦥꦼꦁꦒꦭꦶꦃꦏꦼꦂꦱꦲꦤꦩ꧀ꦥꦶꦩꦼꦤꦥꦲꦶꦁꦏꦁꦏꦸꦭꦲꦠꦸꦂꦫꦏꦼꦤ꧀ꦩꦼꦤꦶꦏ꧉​ꦩꦼꦁꦒꦃꦲꦶꦁꦏꦸꦭ꧈​ꦏꦧꦶꦔꦃꦲꦤ꧀ꦩꦼꦂꦒꦶꦱꦒꦼꦢ꧀ꦏꦼꦥꦁꦒꦶꦃꦥꦚ꧀ꦗꦼꦤꦼꦁꦔꦤ꧀ꦱꦂꦠꦤꦩ꧀ꦥꦺꦤ꧀ꦤꦶꦏꦼꦱꦲꦺꦤꦤ꧀ꦥꦚ꧀ꦗꦼꦤꦼꦁꦔꦤ꧀ꦩꦼꦤꦶꦏꦏꦢꦺꦴꦱ꧀ꦱꦸꦩꦼꦉꦥ꧀ꦒꦸꦱ꧀ꦠꦶꦄꦭ꧀ꦭꦃꦥꦶꦪꦩ꧀ꦧꦏ꧀꧉​

^33:11 ꦩꦶꦭꦏꦼꦂꦱꦲꦤꦩ꧀ꦥꦶꦧꦼꦧꦶꦔꦃꦏꦸꦭꦩꦼꦤꦶꦏ꧉​ꦒꦸꦱ꧀ꦠꦶꦄꦭ꧀ꦭꦃꦱꦩ꧀ꦥꦸꦤ꧀ꦤꦽꦱ꧀ꦤꦤꦶꦏꦸꦭ꧈​ꦱꦂꦠꦩꦫꦶꦁꦔꦶꦱꦩꦸꦏꦮꦶꦱ꧀ꦲꦶꦁꦏꦁꦏꦸꦭꦧꦼꦠꦃꦲꦏꦼꦤ꧀꧉"​ꦩꦼꦂꦒꦱꦏꦲꦢꦽꦁꦔꦺ​꧊ꦪꦏꦸꦧ꧀꧈​​꧊ꦌꦱꦲꦸꦒꦼꦊꦩ꧀ꦤꦩ꧀ꦥꦤꦶꦲꦢꦶꦪꦃꦩꦲꦸ꧉​

^33:12 ​꧊ꦌꦱꦲꦸꦧꦚ꧀ꦗꦸꦂꦕ꧀ꦭꦛꦸ꧈​"ꦮꦶꦱ꧀ꦲꦪꦺꦴꦥꦝꦧꦸꦝꦭ꧀꧈​ꦤꦼꦫꦸꦱ꧀ꦱꦏꦺꦭꦏꦸ꧉​ꦲꦏꦸꦢꦏ꧀ꦩ꧀ꦭꦏꦸꦲꦤꦔꦉꦥ꧀꧉"​

^33:13 ꦮꦁꦱꦸꦭ꧀ꦭꦤ꧀ꦤꦺ​꧊ꦪꦏꦸꦧ꧀꧈​"ꦩꦠꦸꦂꦤꦸꦮꦸꦤ꧀꧈​ꦤꦩꦸꦁꦏꦸꦭꦲꦠꦸꦂꦫꦶꦩꦼꦁꦒꦭꦶꦃ꧈​ꦧꦶꦭꦶꦃꦭꦫꦺꦭꦫꦺꦩꦼꦤꦶꦏꦠꦏ꧀ꦱꦶꦃꦫꦶꦁꦏꦶꦃꦭꦤ꧀ꦏꦛꦃꦏꦺꦮꦤ꧀ꦲꦶꦁꦏꦁꦱꦩꦶꦤꦼꦱꦼꦥ꧀ꦥꦶ꧉​ꦩꦼꦤꦮꦶꦏꦸꦭꦢꦶꦥꦸꦤ꧀ꦱꦼꦱꦭꦩ꧀ꦥꦃꦲꦶꦥꦸꦤ꧀꧈​ꦱꦼꦤꦗꦤ꧀ꦤꦩꦸꦁꦱꦼꦢꦶꦤ꧀ꦠꦼꦤ꧀ꦏꦺꦩꦮꦺꦴꦤ꧀꧈​ꦠꦼꦩ꧀ꦠꦸꦧꦝꦺꦱꦩꦶꦥꦼꦗꦃ꧉​

^33:14 ꦩꦶꦭꦏꦸꦭꦲꦠꦸꦂꦫꦶꦠꦶꦤ꧀ꦢꦏ꧀ꦫꦸꦩꦶꦪꦶꦤ꧀꧈​ꦏꦸꦭꦧꦝꦺꦩ꧀ꦭꦩ꧀ꦥꦃꦭꦺꦴꦤ꧀ꦭꦺꦴꦤ꧀ꦤꦤ꧀ꦱꦠꦺꦠꦃꦲꦶꦥꦸꦤ꧀꧉​ꦮꦺꦴꦱ꧀ꦱꦶꦥꦸꦤ꧀ꦏꦸꦭꦭꦤ꧀ꦏꦺꦮꦤ꧀ꦏꦺꦮꦤ꧀ꦠꦸꦮꦶꦤ꧀ꦭꦫꦺꦭꦫꦺꦩꦼꦤꦶꦏꦱꦱꦒꦼꦢ꧀ꦱꦒꦼꦢ꧀ꦲꦺꦁꦒꦭ꧀ꦱꦺꦴꦮꦤ꧀ꦥꦚ꧀ꦗꦼꦤꦼꦁꦔꦤ꧀ꦮꦺꦴꦤ꧀ꦠꦼꦤ꧀ꦲꦶꦁ​꧊ꦌꦢꦺꦴꦩ꧀꧉"​

^33:15 ꦮꦁꦱꦸꦭ꧀ꦭꦤ꧀ꦤꦺ​꧊ꦌꦱꦲꦸ꧈​"ꦪꦮꦶꦱ꧀꧈​ꦪꦺꦤ꧀ꦩꦼꦁꦏꦺꦴꦤꦺꦴꦏꦉꦧꦺꦤ꧀ꦮꦺꦴꦁꦮꦺꦴꦁꦏꦸꦱꦮꦼꦠꦫꦲꦤꦱꦶꦁꦩ꧀ꦧꦉꦁꦔꦶꦭꦏꦸꦩꦸ꧉"​ꦤꦁꦔꦶꦁ​꧊ꦪꦏꦸꦧ꧀ꦕ꧀ꦭꦛꦸ꧈​"ꦏꦸꦭꦏꦶꦤ꧀ꦠꦼꦤ꧀ꦩ꧀ꦧꦺꦴꦠꦼꦤ꧀ꦥꦽꦭꦸ꧉​ꦏꦸꦭꦱꦩ꧀ꦥꦸꦤ꧀ꦧꦶꦔꦃꦱꦔꦼꦠ꧀ꦥꦚ꧀ꦗꦼꦤꦼꦁꦔꦤ꧀ꦉꦤꦲꦶꦁꦥꦼꦁꦒꦭꦶꦃꦏꦼꦂꦱꦏꦼꦥꦁꦒꦶꦃꦏꦭꦶꦪꦤ꧀ꦏꦸꦭ꧉"​

^33:16 ꦩꦼꦁꦏꦺꦴꦤꦺꦴꦲꦶꦁꦢꦶꦤꦩꦲꦸ​꧊ꦌꦱꦲꦸꦩꦸꦭꦶꦃꦩꦼꦚꦁ​꧊ꦌꦢꦺꦴꦩ꧀꧉​

^33:17 ꦢꦺꦤꦺ​꧊ꦪꦏꦸꦧ꧀ꦤꦼꦫꦸꦱ꧀ꦱꦏꦺꦭꦏꦸꦤꦺꦔꦼꦤꦼꦂꦲꦶꦁ​꧊ꦱꦸꦏꦺꦴꦠ꧀꧈​ꦧꦚ꧀ꦗꦸꦂꦥꦱꦁꦏꦺꦩꦃꦲꦤꦲꦶꦁꦏꦺꦴꦤꦺꦴ꧈​ꦭꦤ꧀ꦒꦮꦺꦏꦤ꧀ꦝꦁꦏꦁꦒꦺꦴꦔꦺꦪꦸꦧ꧀ꦏꦺꦮꦤ꧀ꦏꦺꦮꦤ꧀ꦤꦺ꧉​ꦩꦸꦭꦤꦺꦥꦁꦒꦺꦴꦤ꧀ꦤꦤ꧀ꦩꦲꦸꦢꦶꦗꦼꦤꦼꦁꦔꦏꦺ:​꧊ꦱꦸꦏꦺꦴꦠ꧀꧉​

^33:18 ​꧊ꦪꦏꦸꦧ꧀ꦏꦼꦭꦏꦺꦴꦤ꧀ꦧꦭꦶꦱꦏꦠꦤꦃ​꧊ꦩꦺꦱꦺꦴꦥꦺꦴꦠꦩꦶꦪꦠꦼꦏꦤ꧀ꦏꦸꦛꦤꦺ​꧊ꦱꦶꦏꦺꦩ꧀꧈​ꦲꦶꦁꦠꦤꦃ​꧊ꦏꦺꦤꦲꦤ꧀꧈​ꦏꦤ꧀ꦛꦶꦱ꧀ꦭꦩꦼꦠ꧀꧉​ꦧꦚ꧀ꦗꦸꦂꦥꦱꦁꦏꦺꦩꦃꦲꦶꦁꦱꦕꦼꦝꦏ꧀ꦏꦺꦏꦸꦛ꧉​

^33:19 ꦊꦩꦃꦱꦶꦁꦢꦶꦲꦼꦁꦒꦺꦴꦤ꧀ꦤꦶꦩꦲꦸꦢꦶꦠꦸꦏꦸꦱꦏꦲꦤꦏ꧀ꦲꦤꦏ꧀ꦏꦺ​꧊ꦲꦩꦺꦴꦂ꧈​ꦧꦥꦏ꧀ꦤꦺ​꧊ꦱꦶꦏꦺꦩ꧀꧈​ꦉꦒꦱꦠꦸꦱ꧀ꦝꦸꦮꦶꦠ꧀ꦱ꧀ꦭꦏ꧉​

^33:20 ​꧊ꦪꦏꦸꦧ꧀ꦧꦚ꧀ꦗꦸꦂꦔꦼꦢꦼꦒꦏꦺꦩꦼꦱ꧀ꦧꦺꦃꦲꦤꦲꦶꦁꦏꦺꦴꦤꦺꦴꦭꦤ꧀ꦢꦶꦗꦼꦤꦼꦁꦔꦶ:"ꦲꦭ꧀ꦭꦃꦲꦺ​꧊ꦆꦱꦿꦲꦺꦭ꧀ꦲꦶꦏꦸꦄꦭ꧀ꦭꦃ꧉"​