Jv/Alkitab/Purwaning Dumadi/44

^44:1 ​꧊ꦪꦸꦱꦸꦥ꦳꧀ꦤ꧀ꦝꦮꦸꦃꦲꦶꦩꦫꦁꦏꦼꦥꦭꦫꦸꦩꦃꦠꦁꦒꦤꦺꦩꦼꦁꦏꦺꦤꦺ꧈​"ꦏꦫꦸꦁꦔꦺꦮꦺꦴꦁꦮꦺꦴꦁꦏꦸꦮꦶꦏꦼꦧꦏ꧀ꦏꦤꦒꦤ꧀ꦢꦸꦩ꧀ꦱꦏꦸꦮꦠ꧀ꦠꦺꦔ꧀ꦒꦮ꧈​ꦭꦤ꧀ꦝꦸꦮꦶꦠ꧀ꦠꦺꦠꦸꦏꦺꦴꦤ꧀ꦒꦤ꧀ꦢꦸꦩ꧀ꦱꦺꦭꦺꦃꦤꦲꦶꦁꦤ꧀ꦝꦸꦮꦸꦂꦒꦤ꧀ꦢꦸꦩ꧀ꦲꦶꦁꦏꦫꦸꦁꦔꦺꦝꦺꦮꦺꦝꦺꦮꦺ꧉​

^44:2 ꦠꦸꦮꦸꦁꦏꦸꦱ꧀ꦭꦏꦊꦧꦺꦴꦏ꧀ꦤꦲꦶꦁꦏꦫꦸꦁꦔꦺꦱꦶꦁꦫꦒꦶꦭ꧀꧈​ꦢꦢꦺꦏ꧀ꦤꦱꦶꦗꦶꦏꦫꦺꦴꦝꦸꦮꦶꦠ꧀ꦠꦺꦠꦸꦏꦺꦴꦤ꧀ꦒꦤ꧀ꦢꦸꦩ꧀꧉"​ꦲꦧ꧀ꦢꦶꦩꦲꦸꦤꦶꦤ꧀ꦢꦏ꧀ꦏꦏꦺꦲꦥꦱꦶꦁꦢꦶꦝꦮꦸꦃꦲꦏꦺꦢꦺꦤꦶꦁ​꧊ꦪꦸꦱꦸꦥ꦳꧀꧉​

^44:3 ꦲꦺꦱꦸꦏ꧀ꦏꦺꦲꦶꦱꦶꦃꦲꦸꦩꦸꦤ꧀ꦲꦸꦩꦸꦤ꧀ꦮꦺꦴꦁꦮꦺꦴꦁꦩꦲꦸꦢꦶꦏꦺꦴꦤ꧀ꦧꦸꦝꦭ꧀ꦏꦫꦺꦴꦏꦸꦭ꧀ꦢꦶꦏꦸꦭ꧀ꦢꦶꦤꦺ꧉​

^44:4 ꦭꦒꦶꦮꦲꦺꦩꦼꦠꦸꦱꦏꦏꦸꦛ꧈​​꧊ꦪꦸꦱꦸꦥ꦳꧀ꦝꦮꦸꦃꦩꦫꦁꦲꦧ꧀ꦢꦶꦤꦺꦏꦼꦥꦭꦫꦸꦩꦃꦠꦁꦒ꧈​"ꦒꦼꦭꦶꦱ꧀꧈​ꦮꦺꦴꦁꦮꦺꦴꦁꦩꦲꦸꦠꦸꦠꦸꦠ꧀ꦠꦤ꧉​ꦪꦺꦤ꧀ꦮꦶꦱ꧀ꦏꦼꦕꦤ꧀ꦝꦏ꧀ꦩꦸꦤꦶꦪ꧈​‘ꦪꦒꦺꦤꦺꦏꦧꦼꦕꦶꦏ꧀ꦏꦤ꧀ꦏꦺꦴꦏ꧀ꦏꦺꦴꦏ꧀ꦮꦊꦱ꧀ꦔꦁꦒꦺꦴꦥꦶꦪꦭ꧉​

^44:5 ꦪꦒꦺꦤꦺꦠꦸꦮꦸꦁꦔꦺꦱ꧀ꦭꦏꦧꦼꦤ꧀ꦢꦫꦏꦸꦏꦺꦴꦏ꧀ꦕꦺꦴꦭꦺꦴꦁ?ꦠꦸꦮꦸꦁꦏꦸꦮꦶꦫꦏ꧀ꦢꦶꦲꦒꦼꦩ꧀ꦔꦸꦚ꧀ꦗꦸꦏ꧀ꦭꦤ꧀ꦢꦶꦲꦒꦼꦩ꧀ꦭꦤ꧀ꦠꦂꦫꦤ꧀ꦔꦿꦩꦭ꧀?ꦏꦺꦴꦮꦺꦏꦸꦮꦶꦥꦚ꧀ꦕꦺꦤ꧀ꦠꦿꦃꦮꦺꦴꦁꦲꦭ!’"

^44:6 ꦧꦉꦁꦱꦼꦢꦸꦭꦸꦂꦱꦼꦢꦸꦭꦸꦂꦫꦺ​꧊ꦪꦸꦱꦸꦥ꦳꧀ꦮꦶꦱ꧀ꦏꦼꦠꦸꦠꦸꦠ꧀ꦠꦤ꧀꧈​ꦲꦧ꧀ꦢꦶꦩꦲꦸꦕ꧀ꦭꦛꦸꦏꦪꦮꦼꦭꦶꦁꦔꦺ​꧊ꦪꦸꦱꦸꦥ꦳꧀ꦩꦲꦸ꧉​

^44:7 ꦮꦺꦴꦁꦮꦺꦴꦁꦩꦲꦸꦤꦸꦭꦶꦥꦝꦩꦁꦱꦸꦭ꧀ꦭꦶ꧈​"ꦱꦩ꧀ꦥꦺꦪꦤ꧀ꦱꦩ꧀ꦥꦸꦤ꧀ꦤ꧀ꦢꦏ꧀ꦮꦱꦶꦁꦩ꧀ꦧꦺꦴꦠꦼꦤ꧀ꦩ꧀ꦧꦺꦴꦠꦼꦤ꧀꧉​ꦏꦸꦭꦮꦤ꧀ꦠꦸꦤ꧀ꦱꦸꦩ꧀ꦥꦃ꧈​ꦪꦺꦤ꧀ꦩ꧀ꦧꦺꦴꦠꦼꦤ꧀ꦔ꧀ꦭꦩ꧀ꦥꦃꦲꦶꦥꦶꦪꦭꦏꦢꦺꦴꦱ꧀ꦔꦺꦴꦠꦼꦤ꧀!

^44:8 ꦱꦩ꧀ꦥꦺꦪꦤ꧀ꦱꦸꦩꦼꦉꦥ꧀ꦝꦺꦮꦺ꧈​ꦲꦂꦠꦠꦸꦩ꧀ꦧꦱ꧀ꦱꦤ꧀ꦒꦤ꧀ꦢꦸꦩ꧀ꦱꦶꦁꦏꦼꦥꦁꦒꦶꦃꦲꦺꦴꦤ꧀ꦠꦼꦤ꧀ꦏꦫꦸꦁꦏꦫꦸꦁꦏꦸꦭꦫꦏ꧀ꦲꦼꦩ꧀ꦥꦸꦤ꧀ꦏꦸꦭꦧꦼꦏ꧀ꦠꦠꦼꦁꦠꦤꦃ​꧊ꦏꦺꦤꦲꦤ꧀꧈​ꦏꦸꦭꦮꦁꦱꦸꦭ꧀ꦭꦏꦺ꧉​ꦏꦁꦒꦺꦤꦥꦏꦸꦭꦱꦩꦶꦚꦺꦴꦭꦺꦴꦁꦠꦸꦮꦸꦁꦲꦼꦩꦱ꧀ꦤꦥꦱ꧀ꦭꦏꦏꦒꦸꦁꦔꦤ꧀ꦤꦺꦧꦼꦤ꧀ꦢꦫꦱꦩ꧀ꦥꦺꦪꦤ꧀!

^44:9 ꦕꦼꦏꦏ꧀ꦏꦺꦔꦺꦠ꧀ꦠꦼꦤ꧀ꦩꦮꦺꦴꦤ꧀:ꦠꦶꦪꦁꦔꦺꦱꦶꦁꦩꦼꦤ꧀ꦝꦼꦠ꧀ꦧꦫꦁꦮꦲꦸ꧈​ꦏꦺꦁꦔꦶꦁꦢꦶꦥꦼꦗꦃꦲꦶ꧈​ꦭꦤ꧀ꦏꦸꦭꦱꦼꦢꦪꦒꦼꦊꦩ꧀ꦢꦢꦶꦫꦺꦚ꧀ꦕꦁꦠꦸꦩ꧀ꦧꦱ꧀ꦱꦤ꧀ꦱꦩ꧀ꦥꦺꦪꦤ꧀꧉"​

^44:10 ꦮꦁꦱꦸꦭ꧀ꦭꦤ꧀ꦤꦺꦲꦧ꧀ꦢꦶꦤꦺ​꧊ꦪꦸꦱꦸꦥ꦳꧀꧈​"ꦲꦶꦪ!ꦩꦸꦁꦮꦺꦴꦁꦱꦶꦁꦚꦺꦴꦭꦺꦴꦁꦠꦸꦮꦸꦁꦏꦸꦮꦶꦮꦲꦺꦱꦶꦁꦢꦢꦶꦧꦠꦸꦂꦠꦸꦏꦺꦴꦤ꧀ꦏꦸ꧉​ꦭꦶꦪꦤꦺꦧꦺꦧꦱ꧀꧈​ꦏꦼꦤꦤꦼꦫꦸꦱ꧀ꦱꦏꦺꦭꦏꦸ꧉"​

^44:11 ꦮꦺꦴꦁꦮꦺꦴꦁꦧꦚ꧀ꦗꦸꦂꦲꦺꦁꦒꦭ꧀ꦲꦺꦁꦒꦭ꧀ꦥꦝꦔꦼꦝꦸꦤ꧀ꦤꦏꦺꦏꦫꦸꦁꦔꦺꦝꦺꦮꦺꦝꦺꦮꦺꦭꦤ꧀ꦢꦶꦧꦸꦏꦏ꧀ꦏꦶ꧉​

^44:12 ꦲꦧ꧀ꦢꦶꦤꦺ​꧊ꦪꦸꦱꦸꦥ꦳꧀ꦧꦚ꧀ꦗꦸꦂꦩꦿꦶꦏ꧀ꦱꦏꦫꦸꦁꦔꦺꦱꦶꦗꦶꦱꦶꦗꦶ꧈​ꦮꦶꦮꦶꦠ꧀ꦱꦏꦏꦫꦸꦁꦔꦺꦱꦶꦁꦠꦸꦮꦔꦤ꧀ꦠꦶꦱꦶꦁꦲꦼꦤꦺꦴꦩ꧀ꦝꦺꦮꦺ꧉​ꦠꦸꦮꦸꦁꦔꦺꦏꦼꦠꦼꦩꦸꦲꦤꦲꦶꦁꦏꦫꦸꦁꦔꦺ​꧊ꦧꦺꦚꦩꦶꦤ꧀!

^44:13 ꦏꦧꦺꦃꦤꦸꦭꦶꦥꦝꦚꦸꦮꦺꦏ꧀ꦥꦼꦔꦁꦒꦺꦴꦤꦺꦩꦼꦂꦒꦱꦏꦱꦼꦝꦶꦃꦲꦺ꧉​ꦏꦫꦸꦁꦏꦫꦸꦁꦔꦺꦧꦚ꧀ꦗꦸꦂꦢꦶꦲꦸꦁꦒꦃꦲꦏꦺꦲꦶꦁꦏꦸꦭ꧀ꦢꦶꦩꦼꦤꦺꦃꦭꦤ꧀ꦏꦧꦺꦃꦤꦸꦭꦶꦧꦭꦶꦩꦼꦚꦁꦏꦸꦛ꧉​

^44:14 ꦤꦭꦶꦏ​꧊ꦪꦺꦲꦸꦢꦱꦱꦼꦢꦸꦭꦸꦂꦫꦺꦠꦼꦏꦤ꧀ꦲꦶꦁꦲꦺꦴꦩꦃꦲꦺ​꧊ꦪꦸꦱꦸꦥ꦳꧀꧈​ꦥꦿꦶꦪꦪꦶꦤꦺꦲꦶꦱꦶꦃꦲꦤꦲꦶꦁꦏꦺꦴꦤꦺꦴ꧈​ꦤꦸꦭꦶꦥꦝꦱꦸꦗꦸꦢ꧀ꦲꦶꦁꦔꦉꦥ꧀ꦥꦺ꧉​

^44:15 ​꧊ꦪꦸꦱꦸꦥ꦳꧀ꦤꦸꦭꦶꦕ꧀ꦭꦛꦸ꧈​"ꦏꦺꦴꦮꦺꦏꦸꦮꦶꦮꦺꦴꦁꦲꦥ?ꦲꦥꦏꦺꦴꦮꦺꦲꦺꦴꦫꦔꦼꦂꦠꦶꦪꦺꦤ꧀ꦲꦏꦸꦲꦶꦏꦶꦮꦺꦴꦁꦱꦶꦁꦮꦼꦫꦸꦃꦱꦢꦸꦫꦸꦁꦔꦺꦮꦶꦤꦫꦃ?"

^44:16 ​꧊ꦪꦺꦲꦸꦢꦩꦁꦱꦸꦭ꧀ꦭꦶ꧈​"ꦏꦸꦭꦩ꧀ꦧꦺꦴꦠꦼꦤ꧀ꦱꦒꦼꦢ꧀ꦩꦠꦸꦂꦩꦼꦤꦥꦩꦼꦤꦥ꧈​ꦒꦸꦱ꧀ꦠꦶ꧉​ꦏꦸꦭꦩ꧀ꦧꦺꦴꦠꦼꦤ꧀ꦱꦒꦼꦢ꧀ꦩꦧꦼꦤ꧀ꦤꦶꦲꦸꦠꦮꦶꦔ꧀ꦭꦼꦉꦱ꧀ꦱꦏꦼꦤ꧀ꦧꦢꦤ꧀ꦏꦸꦭꦥꦶꦪꦩ꧀ꦧꦏ꧀꧉​ꦒꦸꦱ꧀ꦠꦶꦄꦭ꧀ꦭꦃꦥꦶꦪꦩ꧀ꦧꦏ꧀ꦲꦶꦁꦏꦁꦱꦩ꧀ꦥꦸꦤ꧀ꦩꦼꦭꦺꦃꦲꦏꦼꦤ꧀ꦝꦠꦼꦁꦏ꧀ꦭꦼꦥꦠ꧀ꦠꦤ꧀ꦏꦸꦭ꧉​ꦏꦸꦭꦱꦼꦢꦪꦠꦿꦶꦩꦃꦢꦢꦺꦴꦱ꧀ꦫꦺꦚ꧀ꦕꦁꦠꦸꦩ꧀ꦧꦱꦤ꧀ꦥꦚ꧀ꦗꦼꦤꦼꦁꦔꦤ꧀꧈​ꦩ꧀ꦧꦺꦴꦠꦼꦤ꧀ꦤꦩꦸꦁꦲꦝꦶꦏꦸꦭꦫꦒꦶꦭ꧀꧈​ꦲꦶꦁꦏꦁꦏꦁꦒꦺꦤ꧀ꦤꦤ꧀ꦠꦸꦮꦸꦁꦥꦚ꧀ꦗꦼꦤꦼꦁꦔꦤ꧀ꦩꦼꦤꦶꦏ꧉"​

^44:17 ꦕ꧀ꦭꦛꦸꦤꦺ​꧊ꦪꦸꦱꦸꦥ꦳꧀꧈​"ꦲꦺꦴꦫ꧈​ꦮꦺꦴꦁꦱꦶꦁꦚ꧀ꦗꦸꦥꦸꦏ꧀ꦠꦸꦮꦸꦁꦔꦺꦮꦲꦺꦱꦶꦁꦧꦏꦭ꧀ꦢꦢꦶꦧꦠꦸꦂꦠꦸꦏꦺꦴꦤ꧀ꦏꦸ꧉​ꦭꦶꦪꦤꦺꦏꦼꦤꦩꦸꦭꦶꦃꦩꦼꦚꦁꦥꦁꦒꦺꦴꦤ꧀ꦤꦤ꧀ꦤꦺꦮꦺꦴꦁꦠꦸꦮꦩꦸ꧉"​

^44:18 ​꧊ꦪꦺꦲꦸꦢꦧꦚ꧀ꦗꦸꦂꦩꦗꦸꦚꦼꦝꦏ꧀ꦏꦶ​꧊ꦪꦸꦱꦸꦥ꦳꧀ꦏꦫꦺꦴꦩꦠꦸꦂ꧈​"ꦚꦸꦮꦸꦤ꧀ꦥꦔꦥꦸꦤ꧀ꦠꦼꦤ꧀꧈​ꦒꦸꦱ꧀ꦠꦶ꧉​ꦏꦼꦥꦉꦁꦔꦏꦸꦭꦩꦠꦸꦂꦱꦮꦺꦴꦤ꧀ꦠꦼꦤ꧀ꦤꦶꦥꦸꦤ꧀꧉​ꦱꦩ꧀ꦥꦸꦤ꧀ꦏꦼꦱꦼꦱꦢꦸꦏ꧈​ꦩꦼꦂꦒꦶꦥꦚ꧀ꦗꦼꦤꦼꦁꦔꦤ꧀ꦩꦼꦤꦶꦏꦥꦽꦱꦱꦠ꧀ꦱꦁꦥꦿꦶꦔꦺꦴꦤ꧀ꦥꦶꦪꦩ꧀ꦧꦏ꧀꧉​

^44:19 ꦥꦚ꧀ꦗꦼꦤꦼꦁꦔꦤ꧀ꦱꦩ꧀ꦥꦸꦤ꧀ꦤ꧀ꦢꦔꦸꦝꦠꦼꦁꦏꦸꦭꦱꦼꦢꦪ꧈​ꦩꦼꦤꦥꦧꦥꦏ꧀ꦏꦸꦭꦠꦏ꧀ꦱꦶꦃꦒꦼꦱꦁꦭꦤ꧀ꦩꦼꦤꦥꦏꦸꦭꦠꦏ꧀ꦱꦶꦃꦒꦝꦃꦱꦼꦝꦺꦫꦺꦏ꧀ꦱꦤꦺꦱ꧀ꦱꦶꦥꦸꦤ꧀꧉​

^44:20 ꦏꦸꦭꦱꦩ꧀ꦥꦸꦤ꧀ꦩꦠꦸꦂ꧈​ꦧꦶꦭꦶꦃꦧꦥꦏ꧀ꦏꦸꦭꦱꦩ꧀ꦥꦸꦤ꧀ꦱꦼꦥꦸꦃ꧈​ꦭꦤ꧀ꦤꦭꦶꦏꦲꦝꦶꦲꦶꦁꦏꦁꦫꦒꦶꦭ꧀ꦩꦼꦤꦶꦏꦭꦲꦶꦂ꧈​ꦧꦥꦏ꧀ꦱꦩ꧀ꦥꦸꦤ꧀ꦱꦼꦥꦸꦃꦱꦔꦼꦠ꧀꧉​

^44:21 ꦥꦚ꧀ꦗꦼꦤꦼꦁꦔꦤ꧀ꦝꦮꦸꦃꦱꦸꦥꦢꦺꦴꦱ꧀ꦏꦸꦭꦱꦩꦶꦔꦗꦏ꧀ꦲꦝꦶꦲꦶꦁꦏꦁꦲꦭꦶꦠ꧀ꦥꦶꦪꦩ꧀ꦧꦏ꧀ꦩꦼꦤꦶꦏꦱꦺꦴꦮꦤ꧀ꦩꦿꦶꦏꦶ꧈​ꦱꦸꦥꦢꦺꦴꦱ꧀ꦥꦚ꧀ꦗꦼꦤꦼꦁꦔꦤ꧀ꦱꦒꦼꦢ꧀ꦩꦶꦂꦱꦤꦶ꧉​

^44:22 ꦏꦸꦭꦲꦶꦁꦒꦶꦃꦱꦩꦶꦩꦠꦸꦂ꧈​ꦧꦶꦭꦶꦃꦭꦫꦺꦩꦼꦤꦶꦏꦩ꧀ꦧꦺꦴꦠꦼꦤ꧀ꦱꦒꦼꦢ꧀ꦥꦶꦱꦃꦏꦭꦶꦪꦤ꧀ꦧꦥꦏ꧀ꦏꦶꦥꦸꦤ꧀꧈​ꦩꦼꦂꦒꦶꦩꦼꦤꦮꦶꦏꦠꦶꦭꦂꦢꦺꦤꦶꦁꦲꦝꦶꦩꦼꦤꦶꦏ꧈​ꦧꦥꦏ꧀ꦏꦸꦭꦠꦼꦩ꧀ꦠꦸꦧꦝꦺꦥꦼꦗꦃ꧉​

^44:23 ꦩꦁꦏꦥꦚ꧀ꦗꦼꦤꦼꦁꦔꦤ꧀ꦝꦮꦸꦃ꧈​ꦧꦶꦭꦶꦃꦏꦸꦭꦩ꧀ꦧꦺꦴꦠꦼꦤ꧀ꦏ꧀ꦭꦶꦭ꧀ꦭꦤ꧀ꦱꦺꦴꦮꦤ꧀ꦩꦿꦶꦏꦶ꧈​ꦩꦼꦤꦮꦶꦩ꧀ꦧꦺꦴꦠꦼꦤ꧀ꦔꦗꦏ꧀ꦲꦝꦶꦏꦸꦭꦲꦶꦁꦏꦁꦲꦭꦶꦠ꧀ꦥꦶꦪꦩ꧀ꦧꦏ꧀ꦮꦲꦸ꧉​

^44:24 ꦥꦿꦩꦶꦭꦤꦭꦶꦏꦮꦁꦱꦸꦭ꧀ꦱꦏꦶꦁꦔꦿꦶꦏꦶ꧈​ꦏꦸꦭꦲꦶꦁꦒꦶꦃꦱꦩꦶꦚꦫꦶꦪꦺꦴꦱ꧀ꦱꦏꦼꦤ꧀ꦥꦔꦤ꧀ꦢꦶꦏꦥꦚ꧀ꦗꦼꦤꦼꦁꦔꦤ꧀ꦮꦲꦸꦝꦠꦼꦁꦧꦥꦏ꧀꧉​

^44:25 ꦧꦥꦏ꧀ꦤ꧀ꦝꦮꦸꦃꦲꦶꦏꦸꦭꦱꦩꦶꦏꦺꦱꦃꦩꦭꦶꦃꦩꦿꦶꦏꦶꦠꦸꦩ꧀ꦧꦱ꧀ꦒꦤ꧀ꦢꦸꦩ꧀꧉​

^44:26 ꦏꦸꦭꦩꦠꦸꦂ꧈​ꦧꦶꦭꦶꦃꦩ꧀ꦧꦺꦴꦠꦼꦤ꧀ꦧꦝꦺꦏꦺꦱꦃꦝꦠꦼꦁ​꧊ꦩꦺꦱꦶꦂꦭꦤ꧀ꦱꦺꦴꦮꦤ꧀ꦒꦸꦧꦼꦂꦤꦸꦂꦩꦼꦤꦮꦶꦲꦝꦶꦲꦶꦁꦏꦁꦫꦒꦶꦭ꧀ꦩꦼꦤꦶꦏꦩ꧀ꦧꦺꦴꦠꦼꦤ꧀ꦠꦸꦩꦸꦠ꧀꧉​

^44:27 ꦧꦥꦏ꧀ꦭꦗꦼꦁꦔꦤ꧀ꦢꦶꦏ꧈​ꦧꦶꦭꦶꦃꦥꦸꦠꦿꦤꦶꦥꦸꦤ꧀ꦲꦶꦁꦏꦁꦥꦠꦸꦠ꧀ꦠꦤ꧀ꦱꦏꦶꦁ​꧊ꦫꦲꦺꦭ꧀ꦩꦼꦤꦶꦏꦤꦩꦸꦁꦏꦭꦶꦃ꧉​

^44:28 ꦲꦶꦁꦏꦁꦱꦼꦠꦸꦁꦒꦭ꧀ꦱꦩ꧀ꦥꦸꦤ꧀ꦥꦼꦗꦃ꧈​ꦱꦒꦼꦢ꧀ꦲꦸꦒꦶꦢꦶꦥꦸꦤ꧀ꦩꦁꦱꦏꦺꦮꦤ꧀ꦒꦭꦏ꧀꧈​ꦲꦮꦶꦠ꧀ꦧꦥꦏ꧀ꦩ꧀ꦧꦺꦴꦠꦼꦤ꧀ꦤꦠꦺꦱꦸꦩꦼꦉꦥ꧀ꦭꦫꦺꦩꦼꦤꦶꦏꦩꦭꦶꦃꦮꦶꦮꦶꦠ꧀ꦏꦺꦱꦃꦱꦏꦶꦁꦒꦿꦶꦪ꧉​

^44:29 ꦩꦼꦤꦮꦶꦏꦸꦭꦱꦩꦶꦔꦗꦏ꧀ꦏꦺꦱꦃꦲꦤꦏ꧀ꦱꦼꦠꦸꦁꦒꦭ꧀ꦭꦶꦥꦸꦤ꧀ꦮꦲꦸ꧈​ꦩꦁꦏꦏꦺꦁꦔꦶꦁꦲꦭꦁꦔꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦩꦂꦒꦶ꧈​ꦠꦼꦩ꧀ꦠꦸꦱꦶꦱꦃꦲꦶꦥꦸꦤ꧀ꦩꦼꦤꦶꦏꦧꦝꦺꦚꦼꦁꦏꦏ꧀ꦏꦏꦼꦤ꧀ꦥꦼꦗꦃꦲꦶꦥꦸꦤ꧀ꦧꦥꦏ꧀꧈​ꦲꦮꦶꦠ꧀ꦧꦥꦏ꧀ꦱꦩ꧀ꦥꦸꦤ꧀ꦱꦼꦥꦸꦃ꧉​

^44:30 (44:30-31)ꦥꦿꦩꦶꦭꦱꦲꦸꦥꦩꦶꦏꦸꦭꦮꦁꦱꦸꦭ꧀ꦏꦼꦥꦁꦒꦶꦃꦧꦥꦏ꧀ꦠꦤ꧀ꦥꦩ꧀ꦧꦼꦏ꧀ꦠꦭꦫꦺꦩꦼꦤꦶꦏ꧈​ꦠꦼꦩ꧀ꦠꦸꦧꦥꦏ꧀ꦧꦝꦺꦠꦸꦩꦸꦤ꧀ꦠꦼꦤ꧀ꦥꦼꦗꦃ꧉​ꦱꦼꦩꦤ꧀ꦠꦼꦤ꧀ꦠꦽꦱ꧀ꦤꦤꦶꦥꦸꦤ꧀ꦧꦥꦏ꧀ꦝꦠꦼꦁꦭꦫꦺꦩꦼꦤꦶꦏ꧉​ꦭꦤ꧀ꦒꦤ꧀ꦝꦺꦁꦏꦭꦶꦪꦤ꧀ꦲꦸꦩꦸꦂꦫꦶꦥꦸꦤ꧀ꦲꦶꦁꦏꦁꦱꦩ꧀ꦥꦸꦤ꧀ꦏꦛꦃꦩꦼꦤꦶꦏ꧈​ꦠꦼꦩ꧀ꦠꦸꦧꦝꦺꦚ꧀ꦗꦭꦂꦫꦶꦥꦼꦗꦃꦲꦶꦥꦸꦤ꧀꧉​

^44:31 (44:30)

^44:32 ꦏꦼꦗꦮꦶꦱꦏꦶꦁꦩꦼꦤꦶꦏ꧈​ꦏꦸꦭꦱꦩ꧀ꦥꦸꦤ꧀ꦱꦸꦩ꧀ꦥꦃꦤꦁꦒꦼꦭ꧀ꦏꦮꦶꦭꦸꦗꦼꦁꦔꦤ꧀ꦤꦶꦥꦸꦤ꧀ꦭꦫꦺꦩꦼꦤꦶꦏ;ꦪꦺꦤ꧀ꦔꦤ꧀ꦠꦺꦴꦱ꧀ꦩ꧀ꦧꦺꦴꦠꦼꦤ꧀ꦮꦁꦱꦸꦭ꧀꧈​ꦏꦸꦭꦲꦶꦁꦏꦁꦧꦝꦺꦚꦁꦒꦶꦥꦲꦸꦏꦸꦩ꧀ꦩꦤ꧀ꦤꦶꦥꦸꦤ꧀ꦱꦭꦩꦶꦤꦶꦁꦒꦼꦱꦁꦏꦸꦭ꧉​

^44:33 ꦩꦶꦭꦥꦚꦸꦮꦸꦤ꧀ꦏꦸꦭ꧈​ꦒꦸꦱ꧀ꦠꦶ꧈​ꦏꦼꦥꦉꦁꦔꦏꦸꦭꦏꦺꦩꦮꦺꦴꦤ꧀ꦲꦶꦁꦏꦁꦥꦚ꧀ꦗꦼꦤꦼꦁꦔꦤ꧀ꦢꦢꦺꦴꦱ꧀ꦱꦏꦼꦤ꧀ꦫꦺꦚ꧀ꦕꦁꦠꦸꦩ꧀ꦧꦱꦤ꧀ꦒꦼꦤ꧀ꦠꦺꦴꦱ꧀ꦱꦶꦥꦸꦤ꧀ꦲꦝꦶꦏꦸꦭ꧉​ꦭꦫꦺꦩꦼꦤꦶꦏꦏꦗꦼꦁꦔꦶꦥꦸꦤ꧀ꦮꦁꦱꦸꦭ꧀ꦏꦭꦶꦪꦤ꧀ꦏꦏꦁꦏꦏꦁꦔꦶꦥꦸꦤ꧀꧉​

^44:34 ꦏꦸꦭꦩ꧀ꦧꦺꦴꦠꦼꦤ꧀ꦱꦒꦼꦢ꧀ꦮꦁꦱꦸꦭ꧀ꦩꦼꦤꦮꦶꦩ꧀ꦧꦺꦴꦠꦼꦤ꧀ꦏꦭꦶꦪꦤ꧀ꦭꦫꦺꦩꦼꦤꦶꦏ꧉​ꦏꦸꦭꦩ꧀ꦧꦺꦴꦠꦼꦤ꧀ꦧꦝꦺꦠꦼꦒꦼꦭ꧀ꦤꦶꦔꦭ꧀ꦭꦶꦏꦱꦶꦱꦃꦲꦤ꧀ꦤꦶꦥꦸꦤ꧀ꦧꦥꦏ꧀ꦏꦸꦭ꧉"​