Jv/Alkitab/Purwaning Dumadi/50

^50:1 ​꧊ꦪꦸꦱꦸꦥ꦳꧀ꦧꦚ꧀ꦗꦸꦂꦔꦿꦸꦁꦏꦼꦧꦶꦧꦥꦏ꧀ꦤꦺ꧈​ꦫꦲꦶꦤꦺꦢꦶꦲꦩ꧀ꦧꦸꦁꦔꦶꦏꦫꦺꦴꦤꦔꦶꦱ꧀꧉​

^50:2 ​꧊ꦪꦸꦱꦸꦥ꦳꧀ꦏꦺꦴꦁꦏꦺꦴꦤ꧀ꦤꦤ꧀ꦥꦫꦲꦧ꧀ꦢꦶꦤꦺꦚ꧀ꦗꦼꦧꦢ꧀ꦢꦶꦭꦪꦺꦴꦤꦺ꧉​

^50:3 ꦕꦫꦤꦺꦚ꧀ꦗꦼꦧꦢ꧀ꦢꦶꦭꦪꦺꦴꦤ꧀ꦩꦲꦸꦩꦤꦸꦠ꧀ꦠꦠꦕꦫ꧈​ꦱꦸꦮꦺꦤꦺꦔꦤ꧀ꦠꦶꦥꦠꦁꦥꦸꦭꦸꦃꦢꦶꦤ꧉​ꦢꦺꦤꦺꦮꦺꦴꦁ​꧊ꦩꦺꦱꦶꦂꦔꦤꦏ꧀ꦏꦏꦺꦥꦠꦔꦶꦱ꧀ꦱꦤ꧀ꦱꦸꦮꦺꦤꦺꦥꦶꦠꦸꦁꦢꦶꦤ꧉​

^50:4 ꦱꦮꦶꦱ꧀ꦱꦺꦮꦼꦏ꧀ꦠꦸꦤꦺꦥꦼꦭꦪꦢ꧀ꦢꦤ꧀ꦫꦩ꧀ꦥꦸꦁ꧈​​꧊ꦪꦸꦱꦸꦥ꦳꧀ꦧꦚ꧀ꦗꦸꦂꦏꦺꦴꦁꦏꦺꦴꦤ꧀ꦤꦤ꧀ꦥꦼꦒꦮꦺꦥꦼꦒꦮꦺꦏꦿꦠꦺꦴꦤ꧀꧈​"ꦩꦠꦸꦂꦫꦩꦫꦁꦱꦁꦥꦿꦶꦔꦺꦴꦤ꧀꧈​

^50:5 ‘ꦤꦭꦶꦏꦧꦥꦏ꧀ꦏꦸꦭꦔꦗꦼꦁꦔꦏꦼꦤ꧀ꦠꦶꦭꦂꦢꦺꦴꦚ꧈​ꦲꦏꦺꦤ꧀ꦏꦸꦭꦱꦸꦩ꧀ꦥꦃ꧈​ꦱꦸꦥꦢꦺꦴꦱ꧀ꦗꦶꦱꦶꦩ꧀ꦩꦶꦥꦸꦤ꧀ꦏꦸꦭꦏꦸꦧꦸꦂꦲꦶꦁꦏꦸꦧꦸꦂꦫꦤ꧀꧈​ꦲꦶꦁꦏꦁꦱꦩ꧀ꦥꦸꦤ꧀ꦏꦕꦮꦶꦱ꧀ꦱꦏꦼꦤ꧀ꦲꦶꦁꦠꦤꦃ​꧊ꦏꦺꦤꦲꦤ꧀꧉​ꦥꦿꦩꦶꦭꦏꦸꦭꦚꦸꦮꦸꦤ꧀ꦥꦭꦶꦭꦃꦏꦺꦱꦃꦩꦿꦶꦏꦔꦸꦧꦸꦂꦧꦥꦏ꧀ꦏꦸꦭ꧉​ꦱꦼꦱꦩ꧀ꦥꦸꦤꦶꦥꦸꦤ꧀ꦫꦩ꧀ꦥꦸꦁꦏꦸꦭꦧꦝꦺꦮꦁꦱꦸꦭ꧀ꦩꦭꦶꦃ꧉’"​

^50:6 ꦱꦁꦥꦿꦶꦔꦺꦴꦤ꧀ꦧꦚ꧀ꦗꦸꦂꦔꦤ꧀ꦢꦶꦏ꧈​"ꦩꦁꦏꦠ꧀ꦠ꧈​ꦧꦥꦏ꧀ꦩꦸꦏꦸꦧꦸꦂꦫꦼꦤ꧀ꦩꦶꦠꦸꦫꦸꦠ꧀ꦗꦚ꧀ꦗꦶꦩꦸ꧉"​

^50:7 ​꧊ꦪꦸꦱꦸꦥ꦳꧀ꦧꦚ꧀ꦗꦸꦂꦧꦸꦝꦭ꧀ꦲꦉꦥ꧀ꦔꦸꦧꦸꦂꦧꦥꦏ꧀ꦤꦺ꧉​ꦥꦼꦒꦮꦺꦥꦼꦒꦮꦺꦏꦿꦠꦺꦴꦤ꧀ꦏꦧꦺꦃ꧈​ꦥꦫꦱꦼꦱꦼꦥꦸꦃꦭꦤ꧀ꦥꦫꦥꦼꦁꦒꦼꦝꦺꦤꦺ​꧊ꦩꦺꦱꦶꦂ꧈​ꦏꦼꦫꦶꦒ꧀ꦭꦩ꧀ꦥꦶꦠ꧀ꦩꦺꦭꦸꦔꦼꦠꦼꦂꦫꦏꦺ​꧊ꦪꦸꦱꦸꦥ꦳꧀ꦔꦸꦤ꧀ꦠꦥ꧀ꦥꦏꦺꦭꦪꦺꦴꦤꦺꦧꦥꦏ꧀ꦤꦺ꧉​

^50:8 ꦧꦿꦪꦠ꧀ꦠꦺ꧈​ꦱꦼꦢꦸꦭꦸꦂꦱꦼꦢꦸꦭꦸꦂꦫꦺꦭꦤ꧀ꦱꦤꦏ꧀ꦏꦢꦁꦔꦺꦲꦺꦴꦫꦲꦤꦱꦶꦁꦏꦺꦫꦶ꧈​ꦏꦧꦺꦃꦥꦝꦩꦺꦭꦸꦔꦸꦤ꧀ꦠꦥ꧀ꦥꦏꦺꦭꦪꦺꦴꦤꦺ​꧊ꦪꦏꦸꦧ꧀꧉​ꦩꦸꦁꦧꦺꦴꦕꦃꦧꦺꦴꦕꦃꦭꦤ꧀ꦏꦺꦮꦤ꧀ꦲꦶꦔꦺꦴꦤ꧀ꦲꦶꦔꦺꦴꦤ꧀ꦱꦶꦁꦏꦫꦶꦲꦤꦲꦶꦁꦠꦤꦃ​꧊ꦒꦺꦴꦱꦺꦤ꧀꧉​

^50:9 ꦥꦽꦗꦸꦫꦶꦠ꧀ꦱꦶꦁꦤꦸꦩ꧀ꦥꦏ꧀ꦏꦿꦺꦠꦥꦼꦫꦁꦭꦤ꧀ꦱꦶꦁꦤꦸꦩ꧀ꦥꦏ꧀ꦗꦫꦤ꧀ꦲꦸꦒꦥꦝꦩꦺꦭꦸ꧉​ꦔꦤ꧀ꦠꦶꦲꦶꦫꦶꦁꦲꦶꦫꦶꦁꦔꦤ꧀ꦤꦺꦱꦶꦁꦔꦸꦤ꧀ꦠꦥ꧀ꦥꦏꦺꦭꦪꦺꦴꦤ꧀ꦢꦮꦧꦔꦼꦠ꧀꧉​

^50:10ꦱꦠꦼꦏꦤꦺꦲꦶꦁꦢꦺꦱ​꧊ꦄꦠꦢ꧀꧈​ꦲꦶꦁꦥꦁꦒꦺꦴꦤ꧀ꦤꦤ꧀ꦤꦺꦮꦺꦴꦁꦤꦸꦠꦸꦒꦤ꧀ꦢꦸꦩ꧀꧈​ꦱꦮꦺꦠꦤ꧀ꦤꦺꦏꦭꦶ​꧊ꦪꦂꦢꦺꦤ꧀꧈​ꦧꦚ꧀ꦗꦸꦂꦢꦶꦲꦤꦏ꧀ꦏꦏꦺꦥꦼꦠꦔꦶꦱ꧀ꦱꦤ꧀ꦱꦶꦁꦱꦺꦴꦫꦧꦔꦼꦠ꧀꧉​ꦲꦤꦲꦶꦁꦏꦺꦴꦤꦺꦴ​꧊ꦪꦸꦱꦸꦥ꦳꧀ꦔꦢꦤ꧀ꦤꦶꦲꦸꦥꦕꦫꦥꦼꦔꦸꦧꦸꦂꦫꦤ꧀ꦥꦶꦠꦸꦁꦢꦶꦤ꧉​

^50:11ꦮꦺꦴꦁ​꧊ꦏꦺꦤꦲꦤ꧀ꦱꦶꦁꦥꦝꦤ꧀ꦢꦼꦊꦁꦲꦸꦥꦕꦫꦥꦼꦔꦸꦧꦸꦂꦫꦤ꧀ꦲꦶꦁ​꧊ꦄꦠꦢ꧀ꦩꦲꦸꦥꦝꦩꦸꦤꦶ꧈​"ꦮꦃ꧈​ꦲꦥꦶꦏ꧀ꦠꦼꦩꦼꦤ꧀ꦥꦼꦠꦔꦶꦱ꧀ꦱꦤ꧀ꦤꦺꦮꦺꦴꦁ​꧊ꦩꦺꦱꦶꦂꦏꦸꦮꦶ꧉"​ꦩꦸꦭꦤꦺꦥꦁꦒꦺꦴꦤ꧀ꦤꦤ꧀ꦩꦲꦸꦢꦶꦗꦼꦤꦼꦁꦔꦏꦺ:​꧊ꦄꦧꦺꦭ꧀​꧊ꦩꦶꦗ꦳ꦿꦲꦶꦩ꧀꧉​

^50:12ꦩꦼꦁꦏꦺꦴꦤꦺꦴꦲꦤꦏ꧀ꦲꦤꦏ꧀ꦏꦺ​꧊ꦪꦏꦸꦧ꧀ꦲꦼꦁꦒꦺꦴꦤꦺꦔ꧀ꦭꦏꦺꦴꦤ꧀ꦤꦶꦲꦥꦱꦶꦁꦢꦶꦮꦼꦭꦶꦁꦔꦏꦺꦧꦥꦏ꧀ꦤꦺ꧉​

^50:13ꦭꦪꦺꦴꦤꦺꦢꦶꦒꦮꦩꦼꦚꦁꦠꦤꦃ​꧊ꦏꦺꦤꦲꦤ꧀ꦭꦤ꧀ꦢꦶꦏꦸꦧꦸꦂꦲꦶꦁꦒꦸꦮ​꧊ꦩꦃꦥꦺꦭ꧈​ꦱꦮꦺꦠꦤ꧀ꦤꦺ​꧊ꦩꦩꦿꦺ꧈​ꦲꦶꦁꦥꦊꦩꦃꦲꦤ꧀ꦱꦶꦁꦢꦶꦠꦸꦏꦸ​꧊ꦄꦧꦿꦲꦩ꧀ꦱꦏ​꧊ꦌꦥ꦳ꦿꦺꦴꦤ꧀꧈​ꦮꦺꦴꦁ​꧊ꦲꦺꦠ꧀꧈​ꦏꦁꦒꦺꦴꦏꦸꦧꦸꦂꦫꦤ꧀꧉​

^50:14ꦱꦮꦶꦱ꧀ꦱꦺꦫꦩ꧀ꦥꦸꦁꦔꦸꦧꦸꦂꦧꦥꦏ꧀ꦤꦺ꧈​​꧊ꦪꦸꦱꦸꦥ꦳꧀ꦧꦚ꧀ꦗꦸꦂꦧꦭꦶꦩꦼꦚꦁ​꧊ꦩꦺꦱꦶꦂ꧈​ꦧꦼꦧꦉꦁꦔꦤ꧀ꦏꦫꦺꦴꦥꦫꦱꦼꦢꦸꦭꦸꦂꦫꦺꦭꦤ꧀ꦮꦺꦴꦁꦏꦧꦺꦃꦱꦶꦁꦥꦝꦩꦺꦭꦸꦔꦸꦤ꧀ꦠꦥ꧀ꦥꦏꦺꦭꦪꦺꦴꦤ꧀꧉​

^50:15ꦧꦉꦁꦧꦥꦏ꧀ꦤꦺꦠꦶꦭꦂꦢꦺꦴꦚ꧈​ꦱꦼꦢꦸꦭꦸꦂꦱꦼꦢꦸꦭꦸꦂꦫꦺ​꧊ꦪꦸꦱꦸꦥ꦳꧀ꦥꦝꦉꦫꦱꦤ꧀ꦤꦤ꧀꧈​"ꦪꦺꦤ꧀​꧊ꦪꦸꦱꦸꦥ꦳꧀ꦲꦶꦱꦶꦃꦔꦼꦤ꧀ꦝꦼꦩ꧀ꦱꦼꦔꦶꦠ꧀ꦏꦫꦺꦴꦏꦶꦠꦭꦤ꧀ꦩꦊꦱ꧀ꦥꦶꦪꦭ꧈​ꦱꦶꦁꦧꦶꦪꦺꦤ꧀ꦏꦶꦠꦭꦏꦺꦴꦤ꧀ꦤꦶ꧈​ꦱꦶꦁꦒꦮꦺꦱꦼꦁꦱꦫꦤꦺ꧈​ꦲꦮꦏ꧀ꦏꦺꦝꦺꦮꦺꦲꦶꦏꦶꦩꦼꦱ꧀ꦛꦶꦕꦶꦭꦏ꧉"​

^50:16ꦩꦸꦭꦤꦺꦧꦚ꧀ꦗꦸꦂꦥꦝꦏꦺꦴꦁꦏꦺꦴꦤ꧀ꦤꦤ꧀ꦤꦼꦩꦺꦴꦤ꧀ꦤꦶ​꧊ꦪꦸꦱꦸꦥ꦳꧀꧈​ꦠꦼꦩ꧀ꦧꦸꦁꦔꦺ꧈​"ꦱꦢꦸꦫꦸꦁꦔꦺꦧꦥꦏ꧀ꦠꦶꦭꦂꦢꦺꦴꦚꦤꦶꦁꦒꦭ꧀ꦮꦼꦭꦶꦁꦏꦁꦒꦺꦴꦏꦺꦴꦮꦺꦩꦼꦁꦏꦺꦤꦺ꧈​

^50:17‘ꦏꦭꦸꦥꦸꦠ꧀ꦠꦤ꧀ꦤꦺꦥꦫꦱꦼꦢꦸꦭꦸꦂꦩꦸꦩꦫꦁꦏꦺꦴꦮꦺꦲꦥꦸꦫꦤꦼꦤ꧀!ꦩꦸꦭꦤꦺꦲꦏꦸ꧈​ꦥꦫꦲꦧ꧀ꦢꦶꦤꦺꦄꦭ꧀ꦭꦃ꧈​ꦲꦶꦪꦄꦭ꧀ꦭꦃꦱꦶꦁꦢꦶꦧꦼꦏ꧀ꦠꦺꦤ꧀ꦤꦶꦢꦺꦤꦶꦁꦧꦥꦏ꧀꧈​ꦱꦏꦺꦃꦲꦺꦏꦭꦸꦥꦸꦠ꧀ꦠꦤ꧀ꦏꦸꦩꦫꦁꦏꦺꦴꦮꦺꦲꦥꦸꦫꦤꦼꦤ꧀꧉’"​ꦏꦿꦸꦔꦸꦥꦶꦮꦼꦭꦶꦁꦔꦺꦱꦼꦢꦸꦭꦸꦂꦱꦼꦢꦸꦭꦸꦂꦫꦺꦩꦲꦸ​꧊ꦪꦸꦱꦸꦥ꦳꧀ꦧꦚ꧀ꦗꦸꦂꦤꦔꦶꦱ꧀꧉​

^50:18ꦱꦼꦢꦸꦭꦸꦂꦱꦼꦢꦸꦭꦸꦂꦫꦺꦤꦸꦭꦶꦥꦝꦠꦼꦏꦝꦺꦮꦺꦭꦤ꧀ꦱꦸꦗꦸꦢ꧀ꦗꦺꦁꦏꦺꦁꦲꦤꦲꦶꦁꦔꦉꦥ꧀ꦥꦺ​꧊ꦪꦸꦱꦸꦥ꦳꧀ꦏꦫꦺꦴꦏꦤ꧀ꦝ꧈​"ꦲꦏꦸꦢꦢꦺꦏ꧀ꦤꦧꦠꦸꦂꦠꦸꦏꦺꦴꦤ꧀ꦩꦸ꧉"​

^50:19ꦤꦁꦔꦶꦁ​꧊ꦪꦸꦱꦸꦥ꦳꧀ꦩꦁꦱꦸꦭ꧀ꦭꦶ꧈​"ꦲꦗꦏꦸꦮꦠꦶꦂ꧉​ꦲꦏꦸꦢꦸꦢꦸꦄꦭ꧀ꦭꦃ꧉​

^50:20ꦏꦺꦴꦮꦺꦮꦶꦱ꧀ꦥꦝꦔꦿꦤ꧀ꦠꦩ꧀ꦤꦶꦤ꧀ꦢꦏ꧀ꦏꦏꦺꦥꦶꦪꦭꦩꦫꦁꦲꦏꦸ꧈​ꦤꦁꦔꦶꦁꦒꦸꦱ꧀ꦠꦶꦄꦭ꧀ꦭꦃꦥꦶꦪꦩ꧀ꦧꦏ꧀ꦱꦶꦁꦔꦺꦴꦮꦃꦲꦶꦤꦶꦪꦠ꧀ꦩꦸꦱꦶꦁꦲꦭꦩꦲꦸ꧈​ꦢꦶꦒꦮꦺꦱꦿꦤꦩꦶꦠꦸꦭꦸꦁꦔꦶꦮꦺꦴꦁꦲꦏꦺꦃ꧈​ꦱꦶꦁꦥꦝꦲꦸꦫꦶꦥ꧀ꦱꦲꦶꦏꦶꦲꦶꦏꦶ꧈​ꦩꦼꦂꦒꦊꦭꦏꦺꦴꦤ꧀ꦱꦶꦁꦏꦼꦥꦸꦁꦏꦸꦂ꧉​

^50:21ꦲꦗꦱꦸꦩꦼꦭꦁ꧉​ꦲꦏꦸꦱꦶꦁꦲꦉꦥ꧀ꦔꦺꦴꦥꦺꦤ꧀ꦤꦶꦲꦸꦫꦶꦥ꧀ꦩꦸꦭꦤ꧀ꦲꦸꦫꦶꦥ꧀ꦥꦺꦲꦤꦏ꧀ꦲꦤꦏ꧀ꦩꦸ꧉"​ꦩꦼꦁꦏꦺꦴꦤꦺꦴ​꧊ꦪꦸꦱꦸꦥ꦳꧀ꦲꦼꦁꦒꦺꦴꦤꦺꦤꦼꦤ꧀ꦠꦽꦩ꧀ꦩꦏꦺꦱꦼꦢꦸꦭꦸꦂꦱꦼꦢꦸꦭꦸꦂꦫꦺꦔꦁꦒꦺꦴꦠꦼꦩ꧀ꦧꦸꦁꦥꦔ꧀ꦭꦶꦥꦸꦂꦱꦶꦁꦔ꧀ꦭꦼꦗꦂꦫꦏꦺꦲꦠꦶ꧈​ꦔꦤ꧀ꦠꦶꦏꦧꦺꦃꦥꦝꦊꦒ꧉​

^50:22​꧊ꦪꦸꦱꦸꦥ꦳꧀ꦠꦼꦠꦼꦥ꧀ꦩꦁꦒꦺꦴꦤ꧀ꦲꦶꦁꦠꦤꦃ​꧊ꦩꦺꦱꦶꦂ꧈​ꦏꦫꦺꦴꦱꦤꦏ꧀ꦱꦼꦢꦸꦭꦸꦂꦫꦺ꧈​ꦔꦤ꧀ꦠꦶꦲꦸꦩꦸꦂꦱꦠꦸꦱ꧀ꦱꦼꦥꦸꦭꦸꦃꦠꦲꦸꦤ꧀꧉​

^50:23ꦲꦶꦱꦶꦃꦩꦼꦤꦁꦔꦶ​꧊ꦌꦥ꦳ꦿꦲꦶꦩ꧀ꦢꦸꦮꦺꦥꦸꦠꦸ꧉​ꦲꦸꦒꦩꦼꦤꦁꦔꦶꦭꦲꦶꦂꦫꦺꦲꦤꦏ꧀ꦲꦤꦏ꧀ꦏꦺ​꧊ꦩꦏꦶꦂ꧈​ꦥꦸꦠꦸꦤꦺ​꧊ꦩꦤꦱꦾꦺ꧉​

^50:24ꦏꦤ꧀ꦝꦤꦺ​꧊ꦪꦸꦱꦸꦥ꦳꧀ꦏꦫꦺꦴꦱꦼꦢꦸꦭꦸꦂꦱꦼꦢꦸꦭꦸꦂꦫꦺ꧈​"ꦲꦺꦴꦫꦱꦸꦮꦺꦩꦼꦤꦺꦃꦲꦏꦸꦧꦏꦭ꧀ꦩꦠꦶ꧈​ꦤꦁꦔꦶꦁꦒꦸꦱ꧀ꦠꦶꦄꦭ꧀ꦭꦃꦧꦏꦭ꧀ꦔꦺꦴꦥꦺꦤ꧀ꦤꦶꦏꦺꦴꦮꦺꦏꦧꦺꦃꦭꦤ꧀ꦔꦶꦫꦶꦢ꧀ꦏꦺꦴꦮꦺꦩꦼꦠꦸꦱꦏꦤꦼꦒꦫꦏꦺꦤꦺ꧈​ꦩꦼꦚꦁꦤꦼꦒꦫꦱꦶꦁꦮꦶꦱ꧀ꦢꦶꦗꦚ꧀ꦗꦺꦏ꧀ꦏꦏꦺꦩꦫꦁ​꧊ꦄꦧꦿꦲꦩ꧀꧈​​꧊ꦆꦱ꧀ꦏꦏ꧀ꦭꦤ꧀​꧊ꦪꦏꦸꦧ꧀꧉"​

^50:25ꦱꦼꦢꦸꦭꦸꦂꦱꦼꦢꦸꦭꦸꦂꦫꦺꦧꦚ꧀ꦗꦸꦂꦥꦝꦢꦶꦏꦺꦴꦤ꧀ꦱꦸꦩ꧀ꦥꦃ꧈​ꦠꦼꦩ꧀ꦧꦸꦁꦔꦺ꧈​"ꦱꦸꦩ꧀ꦥꦃꦲ꧈​ꦪꦺꦤ꧀ꦱꦩꦱꦒꦸꦱ꧀ꦠꦶꦄꦭ꧀ꦭꦃꦔꦶꦫꦶꦢ꧀ꦏꦺꦴꦮꦺꦩꦼꦠꦸꦱꦏꦠꦤꦃꦏꦺꦤꦺ꧈​ꦧꦭꦸꦁꦏꦸꦧꦏꦭ꧀ꦏꦺꦴꦏ꧀ꦒꦮꦥꦶꦱꦤ꧀꧉"​

^50:26​꧊ꦪꦸꦱꦸꦥ꦳꧀ꦧꦚ꧀ꦗꦸꦂꦠꦶꦭꦂꦢꦺꦴꦚꦲꦶꦁꦠꦤꦃ​꧊ꦩꦺꦱꦶꦂ꧈​ꦒꦼꦤꦼꦥ꧀ꦲꦸꦩꦸꦂꦱꦠꦸꦱ꧀ꦱꦼꦥꦸꦭꦸꦃꦠꦲꦸꦤ꧀꧉​ꦭꦪꦺꦴꦤꦺꦤꦸꦭꦶꦢꦶꦗꦼꦧꦢ꧀ꦢꦶꦭꦤ꧀ꦢꦶꦊꦧꦺꦴꦏ꧀ꦏꦏꦺꦲꦶꦁꦠꦽꦧꦼꦭ꧉​