Jv/Kakawin Arjunawiwāha/Pupuh 19
Pupuh 19 - Mṛtatodaka 
1.
- a. sojar sang prabhu haywa cinapalan
- b. sĕmbah ning śaraṇāgata ri haji
- c. yan yogyā wĕlin ing suraduhitā
- d. herĕn ring rahina-n kadi kawawa
2.
- a. ndi-n lunghā rasaning gula hinĕmu
- b. de sang nātha haris-harisĕn atah
- c. göng ny ārĕmbha patik haji huluna
- d. sambegan saphalākĕna rumuhun
3.
- a. lakṣmī tulyanikang suraduhitā
- b. yan ring śakti mangāśraya ri haji
- c. sang nātha pwa ya siddhi kṛtawara
- d. acchedyâmaraṇâṣṭaguṇa hana
4.
- a. kīrtintângawaśêng bhuwana kabeh
- b. sa-Brahmāṇḍa huwus kahaliwatan
- c. ring Wiṣṇwanda Śiwāṇḍa paḍa kumöl
- d. tan hopĕn tikang Indrapada kawĕs
5.
- a. āścaryâtiśayanta mapa kunĕng
- b. dening ng indriyawigraha matapa
- c. yan sātus yuga yoga haji ginöng
- d. Rudrânugraha tan sipi kawĕnang
6.
- a. māskw indung warahangkw i kita harah
- b. unggwankw ātapa tan sipi saphala
- c. lambungning Himawān hana ta gihā
- d. ping pat guntur atīta kaḍĕḍĕtan
7.
- a. Rudrârādhana nirmala satata
- b. sambega pwa bhaṭāra kawĕlasĕn
- c. sāsing sadhya kasiddha pinalaku
- d. bhūh swargādi pawehnira huluna
8.
- a. mwang śaktingku rahasya wĕkas iki
- b. ring jihwāgra pawehnira saphala
- c. Brahmā Wiṣṇu kawĕs ya kakawaśa
- d. nghing rakryan wruha haywa ta wawahan
9.
- a. nā lingnya-n pawarah kadi kahuwan
- b. dening pet siwi tan wruh ing ulaha
- c. syūh rĕmpū hṛdayanya minanisan
- d. ngke rāga-n sakalâmuhara hala
10.
- a. ndan sang Paṇḍusutâmiḍĕngĕrakĕn
- b. engĕt rakwa sirê samayanira
- c. mör ngkānêng gupura-n tĕka mangadĕg
- d. guntur bhraṣṭa huwus dinĕdĕlira
11.
- a. makrak tang sakaḍatwan awurahan
- b. akweh strī katiban ring umah ĕmas
- c. kagyat sang Maṇimāntakanṛpati
- d. jātī wismṛti gadgada mangadĕg
12.
- a. sang konĕng sumalah sira sakarĕng
- b. mör mĕngpöng pasalahnya wahu minge
- c. sang Pārthâmapag ing gaganatala
- d. ndah manggĕh kasilib ni musuh ira