Jv/Kakawin Arjunawiwāha/Pupuh 4
Pupuh 4 - Basantatilaka 
1.
- a. akweh tĕkapnya rumuwat brata Paṇḍuputra
- b. lunghā ng diwangkara gumantyani kang śaśāngka
- c. tamtām aninghali wilāsanikang surastri
- d. oyut mahânuluhi lĕs sumilib kameghan
2.
- a. lwirnya-n kĕdö mulati gātra sang arya Pārtha
- b. mingmang mamañcana kabañcana deni kungnya
- c. mary ānahângidu-ngidung humiring laranya
- d. tunggal makangsi makĕcap mamĕṭik-mĕṭik jĕng
3.
- a. wwantĕn mañumbana puḍak ginuritnya Pārtha
- b. ndan suswa-suswani kinolnya hana n liningling
- c. rakryan wĕdinta tan akun lĕwu panghawista
- d. eman kitâbapa niragraha masku lingnya
4.
- a. līlā hanâmati-mati wruh amet wilāsa
- b. manglālanângapiti rakwa tangan sang arya
- c. edan mahânukupakĕn karikang susunya
- d. kadyângrĕngö wuluh aghāṣa hatinya mūrcha
5.
- a. len tang marêng natar agoṣṭi mahângiring doh
- b. denyâwisik-wisik awor guyu śabda mesi
- c. mañjing muwah manĕmu leśya muritnya kāri
- d. ngkānê kisapwanira rakwa wĕkasnya ngūni
6.
- a. swecchā hana n tĕhĕr asanghulunan lĕkasnya
- b. mĕnggĕp kĕnĕp hinilagan kapitunggal angher
- c. kenken mingis kadi pacĕh tĕkap ing kaśaktin
- d. wwantĕn katon midĕm-idĕm cala tan tinanggap
7.
- a. ambĕknikang kapitĕmĕn mangarang hanê heng
- b. śokângure kadi pangāśraya ring śāśāngka
- c. toh hyang wulan ndak aminang pwa raras lawan rūm
- d. ndak syuh samādhinira sang wiku wītarāga
8.
- a. nā ng lingnya sang prawara Phālguna niṣkalĕngka
- b. pañcendriyâwĕdi tumon wiṣayanya ngūni
- c. wruh mangrĕngö wruh umulat juga tan wikalpa
- d. maryângaweṣa ri hĕningnira saprahara
9.
- a. sangsipta sampun alĕk ambĕkikang surastrī
- b. anghing tigang wĕngi lawasnya mawanti-wanti
- c. enak pwa dhīranira tan kawĕnang winighnan
- d. mantuk ta yâpapatihan hati mesi Pārtha
10.
- a. prapta pwa yâsuma panambah i sang hyang Indra
- b. enak tĕkapnya mawarah gumĕlar kramanya
- c. saswarga harṣanira kapwa manādhukāra
- d. akweh mangañjali ri deśaning Indrakīla