Jv/Kakawin Nītiśāstra/Pupuh 13

Pupuh XIII - śārdūlawikrīḍita

1.

• wwang tan wring śruti rūpa lingga mangucap śāstreng sabhā maṇḍala
• himpĕr wwang manikĕp matangga magalak ngkāneng alas durgama
• tambangnyeki bĕsarnikā gagangikang tuñjung talinyāmikut
• durān sambhawa teki yan kawĕnangāngde hasyaning wwang mihat

2.

• wwantĕn durgama wiṣṭining bhuwana dīn yan tan prayatneriya
• ring go yan malungid sungunya magalak, ring wwang maweng sañjata
• mwang tang rājakulān mawāni gulungeng śardūlawikriḍita
• tĕkwan lwah madalĕm asantĕr amulĕk , strī rakṣakān bhiṣaṇa

3.

• sang bwat sewaka ring wwang uttama-jana mwang sang wiśeṣeng jagat
• kady anggāni malintanging tasik iwĕh mombak magöng bhiṣaṇa
• sākṣāt wwang dumilat ri laṇḍĕpi tĕwĕk, sarpenaras kādbhuta
• himpĕr wwang mamĕkul śarīranikanang śardūlawikriḍita

4.

• yan ring deśa taman haneki sira ng angdon sañja munggweriya
• tan wwantĕn kula wandhu warga nguniweh tang mitra tapwan hana
• sang wijñeng aji tan haneriya tuhun tistis tan iṣṭālaya
• tan yogyāmbahĕn ing sarāt jagat ikāngde sangśayeng wwang mara

5.

• ring wadhwādhika ring swawarga yan anūt karmeng ulah sang tuhan
• yogyān kawruhaneki kāsihana de swāminya tan giṇḍala
• mangkā mitra sĕḍĕng manĕmwa lara yogyāninditān kawruhi
• lāwan strī suruding dhana nda huningān de sang kakūngnyāwĕlas

6.

• nāhan hetuni sang widagdha puruṣāngambil ri kanyottama
• yadyan sora ri rūpa yan guṇawati śuddha ng kulanyobhayān
• mwang strī sor guṇa, rūpa dibya manulus pantĕs wruheng sasmita
• tan hopĕn sira sang surūpa guṇawān mwang kanya janmottama

7.

• mangkā tāmŗta sangka ring wiṣa ya towin yogya rakwālapĕn
• mwang tan rukmi sakeng awidya tuwi tan milwālayanyāgĕlĕh
• ring śāstrādi sakeng aśuddha-kula towin yogya rakwālapĕn
• strī ratnān mĕtu ring wwang alpajananā yogyālapĕn śobhita

8.

• ring strī yan pinakottamā dwiguṇa ring bhuktinya sangkeng pumān
• lāwan buddhinikā caturguṇa mapĕs jātinya tan karkaśa
• sangkeng sāhasa ṣaḍguṇānggĕhika tan krūra ng manah mardawa
• yan ring sanggama kāṣṭabhāga sira sang swāminya kokteng aji

9.

• ring wwang wastu ng iwĕh hinuttama hane dehanya nityenĕnĕb
• sangkeng lobhanikāngalap guṇa muwah ring harṣa tan kagraha
• yekāngde hilanging sakawruhika ring purwātĕmah wigraha
• ndā tan kagraha rakwa teki wĕkasan śirṇābalik nirguṇa

10.

• wwang mūrkāmbĕk anĕmwakĕn phala magöng sangkeng kaduṣṭakraman
• siddhe sādhyanika nda tan kataman ing lajje dukāning para
• tan tolih ri sadoṣa len kaluṣa tan ketung wimohāngliput
• bheda mwang muni-pakṣa rakwa satatāngdohi ry ulah mangkana

11.

• ring wwang śakti mabhoga ṣaḍ-rasa lĕwih tañ campur ing bhakṣaṇa
• śakteng maithuna tan saheng wara winī manggĕh surūpāhalĕp
• lāwan yan sĕḍĕnging dhaneśwara wibhub nang dāna nityolahĕn
• yekā kājar i purwakarma phalaning sthirāpagĕh ring brata

]]