kalama sin #14
tenpo Santa li kama
tan jan Itan, tan jan Tepo
ijo kute ale, o toki. mi jan Itan li open e kalama sin nanpa Santa. wile mi la tenpo Santa sina li pona mute. a, kalama sin li kalama ni: tenpo Santa la jan Tepo en mi li ante toki e toki musi pi toki Inli tawa toki pona la ni o pona tawa kalama sin ni. nimi ona li "tenpo Santa li kama". o kute pona!
tenpo Santa li kama
tenpo Santa li kama a, la ale tomo
la ala li tawa. kin soweli ala.
jan li awen e len noka lon supa seli.
ken la jan Santa o kama tan lupa sewi.
jan lili li awen lon ma lape la
kili suwi li kama lon lawa ona a.
mama en mi a, li len e lawa
li open e lape suli wawa,
la tan poka tomo la kalama li kama
la mi tawa wawa li alasa e nasa.
mi tawa sama suno tan lupa lukin
li open e len lupa li weka e sinpin.
suno mun li lon nena pi ko lete sin,
li pana e suno lon ijo anpa kin,
la ijo li kama a lon lukin mi
li soweli tu tu, li supa tawa lili.
jan majuna wawa li lawa e ona,
la ni li jan Santa! tan ni la mi sona!
ona li mu tawa soweli ona
la soweli ale li tawa lon poka.
"soweli Pisen o! soweli Tase o!
"soweli Siken o! soweli Tanse o!
"o tawa lon sewi! o kama lon nena!
"tenpo lon la o weka! mi ale o weka!"
lipu kasi li tawa lon kon tawa nena
la lipu li waso tawa sewi li weka.
sama la soweli li tawa e poki
lon sewi, e jan Santa lon monsi.
tenpo kama, lili la ni li lon kute:
kalama pi noka soweli mute.
mi tawa e lukin li sewi e lawa
la tan lupa seli la jan Santa li kama.
len ona ale li selo soweli
li jaki pimeja tan lupa seli.
ona li jo e poki pi ijo musi
li jan esun lukin li open e poki.
pilin pona li lon lukin ona.
sinpin ona li suwi. ona li pona.
ona li pilin pona la jan ante li sama.
linja uta li sama ko lete lon anpa.
jan Santa li uta e ilo kon seli
li pana e kon ni lon sike lon sewi.
sinpin li suli. sijelo li sama.
mu musi la sijelo li tawa nasa.
ona li musi li suli li suwi.
mi lukin e ona la mi mu,u musi.
ona li lukin e mi la mi sona e ni:
ona li wile ala moli e mi.
ona li pali taso li toki ala
li pana e ijo sin tawa len noka.
li luka e poka pi uta ona
li tawa sewi lon lupa seli.
li tawa tomo tawa, li mu tawa soweli
la ona ale li weka tawa sewi.
tan weka la mi kute e toki ni ona:
"tenpo Santa en pimeja sina o pona!"
