kalama sin/28

by jan Ke Tami, kulupu pi ma Win

ma tomo Win

tan jan Ke Tami tan kulupu pi ma Win

 

tenpo sike pini la mi Ke Tami en jan ante pi toki pona li tawa ma sama. mi kama kulupu lon ma tomo Win. ma Win li lon ma suli Esalasi li lon ma kulupu Elopa. mi ale li musi li mu li toki pona.

pini pi tenpo kulupu la mi toki tawa jan kulupu mute li pana e toki ni tawa ilo mi. ni la mi pana e toki tawa sina. a. o sona. ken ona en wawa ona pi toki pona li sama ala li ken lili li ken suli. taso pilin la sina ken sona e ijo pi toki ona.

kute pona.

 

---

 

toki

jan Peton: toki.

jan Peja: toki.

jan Masije: toki.

jan Palento: toki.

jan Sonatan: toki.

jan Luna: toki.

jan Jakopo: toki.

jan Pulo: toki.

jan Molisi: toki.

 

nimi sina li seme?

j.Peton: mi jan Peton.

j.Peja: nimi mi li jan Peja.

j.Masije: mi jan Masije.

j.Palento: nimi mi li jan Palento.

j.Sonatan: mi jan Sonatan.

j.Luna: mi jan Luna.

j.Jakopo: mi jan Jakopo.

j.Pulo: mi jan Pulo.

j.Molisi: mi jan Molisi.

 

sina kama tan seme?

j.Peton: a a. mi kama tan ma seme anu tan pi kama mi li seme.

 

sina kama tan ma seme?

j.Peton: suli la mi kama tan ma Juwese. taso ma tomo Win la mi kama tan ma Netalan. tenpo pini lili la mi lon ma Netalan.

j.Peja: mi kama tan ma Sopisi. taso mi awen lon ma Netalan.

j.Masije: mi tan ma Posuka. taso mi lon ma Alan lon tenpo ni.

j.Palento: mi tan ma Mewika.

j.Sonatan: mi tan ma Tosi.

j.Luna: mi kama tan ma Tosi tan ma tomo Munken.

j.Jakopo: mi tan ma Esalasi. taso mi tan ma tomo Win ala.

j.Pulo: mi kama tan ma Tosi.

j.Molisi: mi kama tan ma Tosi.

 

sina kama toki pona lon tenpo seme?

j.Peton: open la mi kama sona e toki pona lon tenpo sike suno #MALLL (2015) anu seme. ijo sama ni. taso tenpo mute la mi kepeken ala toki pona tan ni: mi kulupu ala. tenpo sike suno pini wan la mi kama sona sin e toki pona anu seme. mi kama sin lon kulupu. ni la mi toki e ni: mi jan sin a a. mi awen jan sin.

j.Peja: mi kama sona e ona lon tenpo sike suno 2020. pini pi 2020.

j.Masije: mi kama sona e toki pona lon tenpo sike suno wan.

j.Palento: mi open kama sona toki pona e tenpo sike tu.

j.Sonatan: mi kama sona e toki pona lon tenpo lon tenpo open pi jaki Kolona.

j.Luna: mi kama sona toki pona lon tenpo sike pini.

j.Jakopo: mi kama sona e toki pona lon sike suno pini.

j.Pulo: tenpo mun wan pini.

j.Molisi: aaa, a a. mi sona ala pona e ni. ken la tenpo sike pini nanpa tu wan anu seme.

 

tan seme la sina awen toki pona

j.Peton: tan seme la mi awen toki pona. lon la mi pilin e ni: toki pona li moku e kon mi. a a. ona li awen lon pilin mi. ona li kama lon insa mi. mi ken ala weka e ona tan mi. ni la ona li moku e tenpo mi e pilin mi e pali mi. taso moku ni la mi pilin pona. mi pilin pona tawa toki pona. mi pilin pona tan kulupu pi toki pona. mi pilin pona tan jan mute pi toki pona. mi kama sona e ijo mute tan jan mute tan ma mute. tan ni la toki pona li moku e mi. taso kin la mi moku e toki pona. ni li pona.

j.Peja: toki pona li pona tawa mi. jan pi toki pona li pona kin. toki tawa jan ni li pona tawa mi. taso toki pona li tok pi pana e sona ante tawa mi. mi li toki insa pi toki pona. mi kama sona e ijo ante pi tenpo toki pona. toki insa mi li pona.

j.Masije: toki li pna mute tawa mi. kin la kulupu pi toki pona li pona mute.

j.Palento: mi awen toki e jan pona mi. toki li musi.

j.Luna: toki pona li musi. toki pona li pona tawa mi. ni li toki pona. a a. toki pona li toki pi kulupu pi jan pona pi jan musi.

j.Jakopo: tan seme a. toki pona li musi tawa mi. mi ken toki tawa jan pona. mi ken kute e kalama sin a a. mi ken lukin e ijo pona mute.

j.Molisi: tan seme la mi awen. mi awen tan ni: toki pona li musi mute. tenpo ale pi toki pona la mi toki e "a a a" mute. mi musi mute. mi ken toki kepeken toki pona la mi pilin pona li pilin musi lon tenpo ale. ni li wawa a. toki ante li pali ala e ni tawa mi. mi olin e toki Epanja e toki Nijon. mi sona lili e toki Nijon. taso toki ni li pona mute tawa mi. taso ona li musi ala e pilin mi sama ni. toki pona taso li pali e ni.

 

o toki e ma tomo Win. ma tomo Win li seme tawa sina

j.Peton: ma tomo Win li seme tawa mi. tenpo pini suli la mi kama lon ma tomo Win lon tenpo nanpa wan. mi en mama meli mi li kama. mi lukin e ijo mute. tenpo ale la mi pilin e ni: ma tomo Win li suli li suwi. tomo suli mute li lon. ona li pona lukin mute. ona li wawa mute. kalama musi mute li lon. sitelen tawa pona mute li lon. jan pona mute li lon. mi olin. a mi ken ala toki e ni: mi olin e ma tomo. taso ona li pona mute tawa mi.

j.Peja: ma tomo Win. mi lukin e tomo Win pi tenpo wan lon tenpo ni. tomo Win li pona tawa mi. tenpo suno pini la kon li wawa mute. mi mute li ala lukin mute lon li ala tawa mute lon tomo ni. taso tenpo suno ni, mi mute li tawa mute. tomo ni li pona tawa mi. mi tawa ma Esalasi pi tenpo pini tawa ma tomo Salzburg. ma tomo Salzburg li lon nena Alp. mi tawa lon ona, poka jan pona mi. taso ma Win li ma tomo pi suli mute li ma tomo pi jan mute. ale li pona tawa mi.

j.Masije: ma tomo Win li pona mute. ma tomo Wijen li lukin pona. kulupu jan pi toki pona li pona mute kin. mi musi. mi kama sona mute e toki pona. mi toki mute tawa jan ante,

j.Palento: mi la ma tomo Win li pona lukin li musi.

j.Sonatan: suli la ma tomo Win li ma pi kulupu pi toki pona. ni la ona li pona mute.

j.Luna: ni li pona. ni li suli. ni li seli mute lon tenpo suno nanpa wan. ni li musi kin.

j.Jakopo: a ma tomo Win li suli a. ijo mute li lon. jan pona mi li lon. jan pi kulupu mama mi li lon. ona li pona a.

j.Pulo: mi pona e ma Win. tomo mi li insa ma Win.

j.Molisi: a ma tomo Win li wawa lukin. ona li jo e tomo mute sama ni: tenpo pini la kulupu wawa, kulupu pi jo e mani mute, kulupu wawa li pali e tomo ni li wile pana lukin tawa jan ale e ni: mi mute li jo e wawa mute li joe e mani mute. mi mute li suli a. ni la tomo ni li awen jo e kon ni e kon wawa ni. ni la mi pilin e ni: ona li majuna li wawa li jo e kon pi wan taso. ni li wawa a. taso kin la tomo sin li lon. mi pilin e ni: tomo sin en tomo majuna li lon poka la ni li pana e kon namako e kon pona tawa mi. kon pi pona tawa mi. ike a, a.

 

jan seme pi tenpo kulupu li pona tawa sina?

j.Peton: jan ale pi tenpo kulupu li pona tawa mi. taso jan Ke Tami li pona mute tan ni: ona li pali mute tawa tenpo kulupu. jan Ke Tami li weka la tenpo kulupu li kama ala. jan ante mute kin li pali tawa kulupu. taso jan Ke Tami li alasa e tomo li alasa e ijo ni: mi ken pali e ona. ni la jan Ke Tami li pona mute tawa mi. a a. jan Ke Tami: sina pona a a.

j.Peja: mi sona ala e jan pi pona ala tawa mi. a a. mi kama sona e jan mute pi toki pona. jan ale li jo e ijo pona. jan ale li pona tawa mi tan ijo mute. mi kama sona e jan Ke. mi pali e musi tan nimi jan Ke: mi nimi e ona "jonke". mi kama sona e jan Luna e jan Masije. jan mute. mi ken ala toki e jan wan. jan ale li pona tawa mi.

j.Masije: mi toki lili lon ilo Siko. mi pilin e ni: ma Wijen li ma pona. mi pilin e ni: toki la, kulupu pi ma Wijen li pona.

j.Palento: jan ante li musi li pona. pona tawa mi. pona mute tawa mi. tenpo kulupu li musi mute.

j.Sonatan: jan ale li pona mute. taso sina jan suli tawa kulupu ni. sina pali e mute tawa kulupu ni. ni la sina jan nanpa wan pi kulupu ni.

j.Luna: jan ale li pona tawa mi. tan ni la mi ken toki tawa jan ale kepeken toki pona. jan pi ma mi la mi ken ala kepeken toki pna. tan ni la jan ale li pona.

j.Jakopo: jan mute. jan Peton li pona tawa mi. jan Molisi li pona tawa mi. jan Ke Tami li pona tawa mi a a.

j.Pulo: mi pona li jan ale.

j.Molisi: jan ale li pona tawa mi. a a. jan ale li pona tawa mi tan ni: ona li toki kepeken toki pona. ni li wawa mute. taso pona mute la jan Peton li lon. tenpo meso la mi sona e ona tan ma pona pi toki pona lon ilo Siko. ni la mi ken lukin e ona lon ma tomo ni la mi pilin pona mute tan ni. kin la jan Ke Tami li pona mute tan ni: ona li pana e ijo mute tawa tenpo kulupu. ni li wawa mute tawa mi. jan Ke Tami: tan seme la jan ale li awen toki e ni. jan Molisi: a a. sina pona mute. sina pali e ni kepeken nasin pona. a a ni li lon.

jan Ke Tami: o pini. o pini. a a a.

j.Molisi: mi o pini a a a.

 

sina kama tawa tenpo kulupu tan seme?

j.Peton: tan seme la mi kulupu. lon la mi pilin e ni: tenpo ale la mi toki pona kepeken ilo taso. lon lon la mi toki pona ala. taso tenpo ale la mi wile toki pona lon poka pi jan ante lon poka pi sijelo pi jan ante anu seme. ni la mi kama kulupu. mi lon ma Elopa lon tenpo lili. mi pilin e ni: a ni li kama. mi o ni.

j.Peja: mi toki pona. mi toki ala kepeken uta ala. mi toki pona pi tenpo wan pi tenpo ni kepeken uta.

j.Palento: mi wile toki kepeken jan ante pi toki pona. mi kama sona li toki pona. mi wile kama sona mute. lon a a a.

j.Sonatan: mi kama tawa tenpo kulupu tan ni: tenpo pini la mi pali e ijo mute kepeken toki pona li sitelen e ona li toki e ona lon ilo Siko. taso mi wile kin e ni: mi o kulupu lon lon. mi lon kulupu wan. mi o toki tawa jan ante lon poka mi. ni li lon tenpo ni. ni la mi pilin pona.

j.Jakopo: tan seme. mi wile toki tawa jan pi toki pona lo ma lon. toki lon ilo li pona kin. taso toki kepeken uta lon ma li pona a.

j.Pulo: mi pona e toki pona li pona e toki e toki pona.

j.Molisi: tan ni: mi wile lukin e jan ante pi toki pona. mi wile kepeken toki pona. ni li lon. tenpo suno pini la kin la tenpo suno ni la mi kepeken mute e toki pona. ni li ken ala lon tenpo mute. sina ken toki tawa jan ante kepeken linluwi. taso toki li tawa jan ante lon ma lon a a li wawa ante li pona mute tawa mi.

 

nimi seme pi toki pona li pona nanpa wan tawa sina?

j.Peton: nimi seme pi toki pona li pona nanpa wan tawa mi. nimi mute li pona. a a tenpo mute la mi kepeken nimi te "tokana" to. ona li musi a. ante la pu la nimi te "mu" to li pona mute. nimi "musi" li pona mute. tenpo mute la mi toki e ni: a ijo ni li te "suwi" to. ni li musi tawa mi.

j.Peja: a… nimi "kasi".

j.Masije: nimi "pona" li pona mute tawa mi. nimi ante li pona lili a a. nimi "pona" li pona mute

j.Palento: nimi mi nanpa wan. a. "pakala". a a a. "pakala" li pona tawa mi. a a a.

j.Sonatan: nimi mute li pona. nimi musi pona li ken musi e mi la nimi "kijetesantakalu" en nimi "sutopatikuna" li musi e mi. kin la nimi "suwi" li pona tawa mi. nimi "kepeken" li pona tawa mi.

j.Luna: nimi "mun" li pona tan ni: ona li sama nimi mi. nimi "a" li pona. en nimi "musi" li pona". a. nimi "tonsi" li pona mute kin. pona mute mute.

j.Jakopo: nimi "akesi" li pona. nimi "musi" li pona. ona li pona.

j.Pulo: nimi la mi pona e "pipi". nimi li suwi.

j.Molisi: nimi pi pona nanpa wan tawa mi li "ma". mi toki e ni tan ni: nimi "ma" li jo e pilin sama ni: nimi mute tan toki ante li ken wan li ken nimi wan lon toki pona. ni la nimi pi toki pona li jo e wawa ni li toki e ijo mute mute lon kalama lili. ni la nimi "wa". a. mi pakala. nimi "ma" la ni li wawa pi nanpa wan tawa mi. mi ken pilin e kon ale pi nimi "ma" lon kalama tu taso: "ma" a a a.

 

---

 

a, tenpo kulupu pi toki pona li pana e pilin pi pona suli tawa mi. taso ona li lon tenpo weka lon tenpo sike pini. pona la tenpo sike sin li lon li kama e tenpo kulupu sin.

mi kama kulupu lon ma tomo Mase. ma Mase li lon ma suli Netalan li lon poka pi ma Tosi lon poka pi ma Pesije. mi wile pana sin e toki tawa sina. taso sina wile kute e seme tan jan kulupu, ona o toki e seme. o pana e wile sina tawa mi.

pini toki.