musi pi kala ko tan jan Itan
jan nanpa luka tu tan jan Tepo
jan Tepo: jan ale o, kama pona tawa tenpo kalama sin, pi tenpo esun ni. mi jan Tepo. sina kute e mi lon tenpo pini. mi tan ma pona pi toki pona. tenpo ni la, jan Itan li lon poka mi. jan Itan o, o toki.
jan Itan: n, toki a! mi jan Itan li ijo tan anpa nanpa. sama jan mute pi kalama sin la, mi kin li tan ma pona lon ilo Siko.
j.Tepo: pona! kalama sin ni la, pilin mi la mi tu li toki lon poka la mi ken toki e sitelen tawa e lipu pona.
j.Itan: lon.
j.Tepo: mi tu li lukin e lipu seme e sitelen tawa seme lon tenpo pini poka. a, jan Itan o, sina lukin e sitelen tawa seme?
j.Itan: a, tenpo pini lili la, mi lukin e sitelen tawa te “musi [pi] kala ko” to. sitelen tawa ni la, jan li lon li jo ala e mani. taso jan ante li wile wawa e mani tan ona. a a.
j.Tepo: a, “wawa e mani”? ni li toki seme?
j.Itan: a, ni li wile wawa e mani tan ona. sina sona ala sona?
j.Tepo: a, wile li wawa.
j.Itan: wile ona li wawa. pona.
j.Tepo: ona li wile mute. ona li wile e… mi kama sona.
j.Itan: lon, lon. tan wile ni la, jan pi mani ala li ken kama jo e mani kepeken nasin la, ona li kepeken nasin ni, tan ni: ona li jo ala e nasin ante ken. sina sona ala sona?
j.Tepo: a, ken. n, jan pi mani ala li wile e mani la, nasin li lon. taso, ken la nasin ni li pana e mani tawa jan wan, li weka e mani ante ale, tan jan ante.
j.Itan: lon. tawa ona la, nasin pi mute lili li lon, tawa “kama jo e mani”. ni la, pona. mi wile toki kin e ni: kulupu pi jan ante kin li lon. ona la mani mute en wile ike li lon. ona li wile lukin e ni: jan pi mani ala li musi e musi ike, tan wile mani ona.
j.Tepo: a. musi ni li ike la, ni li pona tawa jan mani: ona li lukin e musi ike. musi ni li musi tawa jan mani li musi ala tawa jan pi mani ala, anu seme…
j.Itan: a a, lon, lon. nasin tawa ni la, ona li pana e musi tu tawa jan mute pi mani ala, e musi lili e musi suli tawa ona. musi suli ni pi kulupu ike li sama musi pi jan lili. taso jan pi musi ni li musi la, ona li pakala lili la, ona li kama moli a!!
j.Tepo: moli! a!
j.Itan: lon, a a!
j.Tepo: ni li wawa.
j.Itan: ni li musi wawa tan ni: sina pakala la, sina moli.
j.Tepo: pakala lili la sina moli ale. ni li… ni li wawa mute li ike wawa.
j.Itan: lon, lon. ona li ike.
j.Tepo: ni la jan li wile musi ni tan seme?
j.Itan: a a, tan ni: ona li wile mute e mani. sina sona e ni.
j.Tepo: wile mani mi li lili la mi wile ala moli tan musi…
j.Itan: lon. taso, ona li ken ala pali e ijo ante. ona o pali e ni.
j.Tepo: a. nasin ante ala la ona li ken kama e mani anu seme? ni li nasa.
j.Itan: nasa mute. a, mi o awen toki: jan kama ale li kama jo e nanpa li jo ala e nimi lon tenpo musi. nimi pi musi ni li te “musi pi kala ko” to. mi toki lon tenpo kin e ni.
j.Tepo: a. nimi ni li tan seme? mi kute ala e “kala”…
j.Itan: n, mi sona ala e tan pi nimi ni. taso, ona li musi tan ma pi sitelen tawa ni.
j.Tepo: a.
j.Itan: ma ni li jo e musi ni pi jan lili. mi sona ala e tan pi nimi ona. taso, ni li nimi.
j.Tepo: a, jan lili li musi e musi pi kala ko lon tenpo mute.
j.Itan: lon.
j.Tepo: a, sina toki e ni: musi suli pi jan ike la jan pi mani lili musi e musi pi jan lili.
j.Itan: lon.
j.Tepo: ni li ante wan: pakala lili la moli. mi sona.
j.Itan: a a, ni li lon. musi lili la kulupu ike li kulupu e jan mute pi wile mani, kepeken nasin ni: ona li toki e ni tawa ona:
te “sina wile ala wile musi e musi lili lon poka mi? sina anpa la sina o pana e mani sina tawa mi. mi anpa la mi o pana e mani mi tawa sina.”
ni li musi nanpa wan ona. tan ona li ni: ona li wile kulupu e jan pi mani ala. sina sona ala sona?
j.Tepo: a, jan li mani ala, la ken suli la ona li wile musi e musi ni. ni li ken weka e mani. taso ni li ken pana e mani.
j.Itan: lon.
j.Tepo: nasin ante li lon ala la ona li wile musi e musi lili ni, la ken la ona li wile e musi suli.
j.Itan: lon! mi toki e ni lon tenpo kama, a. musi suli la jan pi mani ala li kama jan musi a, (lon tenpo pini) li kama lon ma ante pi sona ala ona. jan musi ale li kama lon tomo wan. kulupu ike li toki e ni tawa ona:
te “sina lon musi pi kala ko. sina jan musi. ni la sina ken ala jan musi ala li ken ala tawa weka. tenpo suno ale la musi sin li kama tawa sina. sina anpa e musi mi ale la mi pana e mani mute mute mute a tawa sina.”
ni li musi suli.
j.Tepo: a.
j.Itan: sina toki e ni lon tenpo pini lili: tan pi musi lili li tawa ni: jan li kama tawa musi suli (tan ni: ona li wile e mani…). mi poka pini e toki mi. jan li musi e musi lili la tenpo mute la ona li musi e musi suli. lon. ni li toki lon. pilin mi la, sitelen tawa ni li toki e nasin jaki suli pi kulupu jan pi ma ni. mani li ijo suli pi nanpa wan. ni li jaki. nasin pona la, olin en jan en soweli en kasi li suli nanpa wan.
pona. ni li toki ale mi. wile mi la sina sona e kon pi toki mi. taso, ken la jan ale ala li sona. taso ni li awen pona.
j.Tepo: a.
j.Itan: lon.
j.Tepo: n. sina toki e ni: tenpo suno ale la musi li kama tawa jan pi musi suli.
j.Itan: lon.
j.Tepo: ken la sina ken toki e ni: musi ni li seme?
j.Itan: n. mi ken toki e ni. musi nanpa wan la, jan ale li lon linja. wile [pi] musi ni la, ona o tawa poka ante pi ma ni. taso, meli suli li lon. meli suli li lukin e jan musi la, jan musi li ken ala tawa. taso meli suli li tawa lukin tawa ante la, jan musi li ken tawa lili. taso ona li kama lukin e ona, ona li tawa la, ona li moli. a a.
j.Tepo: a! mi lukin ala e sitelen tawa ni. taso, taso: jan pona mi li pana e sitelen mute pi meli suli ni,
j.Itan: a, lon a a!
j.Tepo: li pana e toki musi lon poka. ni la mi sona e ni: meli suli li lon. n, ona li ilo anu seme?
j.Itan: lon. ona li ilo.
j.Tepo: meli ilo. lukin ona li ilo. sitelen musi wan la lukin ona li tawa nasa lili.
j.Itan: lon. sina jan linluwi la, sina ken ala weka tan meli ni.
j.Tepo: a a a lon! lon. sitelen li lon ale lon ilo. ken ala weka.
j.Itan: taso, toki mi li kama suli. ni la mi wile sona e ni: tenpo pini poka la sina lukin e seme? sina lukin e sitelen tawa seme anu lipu seme anu seme?
j.Tepo: n. tenpo pini lili la mi lukin e sitelen tawa pi jan nanpa luka tu. ni li nimi len ona. ona li jan pi alasa sona. jan suli ike li pali e ike. ni la jan ni li jan suli pona li alasa e sona pi pali ike ni, la ona o kepeken nimi mute, tawa len. anu seme?
j.Itan: a.
j.Tepo: ni la ona li jan nanpa luka tu lon tenpo mute. tenpo ante la ona li jan “Pon. Se Pon.”
j.Itan: a, lon. “Se Pon”… toki ni la mi sona ala a. taso mi wile kama sona. pilin mi la mi sona ala e sitelen tawa ni. ona li sitelen tawa anu…
j.Tepo: ona li sitelen tawa. ona li kama lon tenpo pini lili. mi o toki e ijo pi sitelen tawa ni. ken la sina lukin ala e sitelen tawa ni. taso ken la sina ken pilin e kon musi tan toki mi.
j.Itan: n, mi kute.
j.Tepo: a, open la, n… tenpo mute la jan ni li alasa e jan ike suli ante. tenpo ni la ona li wile ala li wile lape taso, lon tenpo kama, lon poka meli.
j.Itan: n.
j.Tepo: taso, n, seme li kama? ona li tawa ma lape pi jan moli. tan sitelen tawa la mi sona ala e ni: jan moli ni li seme. taso, nimi la jan moli ni li suli tawa jan Se Pon. taso, taso: ma li pakala seli li lukin moli e jan Se Pon. tan seme? ona li sona ala. ona li pilin e ni: “lon la jan ike li wile alasa e ona li wile moli e ona, tan pali ona. taso, ona li sona ala e ni: jan ike li sona e ma ona.
j.Itan: n.
j.Tepo: pilin ona la, jan ike li sona ala e ni: ona li lon ma ni. ilo pakala li kama pakala e ona la ona li pilin nasa li pilin e ni: ken la meli pona poka ona li toki e ma ona tawa jan ike.
j.Itan: a, ike a.
j.Tepo: ni la ona li weka tan meli.
j.Itan: a.
j.Tepo: ike a. mi pilin ike tan ni. tenpo li tawa…
j.Itan: lon, lon… tenpo toki pi mi tu li suli a.
j.Tepo: a, mi awen toki lon sitelen tawa. ni li ike ala…
j.Itan: a, lon a a!
j.Tepo: ni ike ala. tenpo kalama li suli la…
j.Itan: lon, lon: ni li pona suli.
j.Tepo: …jan li ken kute lon tenpo suli e toki pona!
j.Itan: a a!
j.Tepo: ni li pona tawa mi. sitelen tawa la, tenpo li tawa. tenpo kama la, ni li pali pi jan pona. jan suli pona li wile pali e ilo moli wawa, tan ni: ona li wile moli e jan la ona li wile moli e jan wan taso, li wile ala e ni: jan poka li kama moli kin.
j.Itan: n.
j.Tepo: jan pi ike ala o moli ala.
j.Itan: lon, lon.
j.Tepo: taso, ken la jan ike li lon kulupu pi jan pona la mi wile moli e jan ike la mi o moli e jan poka pona. ni li ike. ni la ona li pali e ilo moli wawa. ilo moli ni… li kepeken nasin nasa.
j.Itan: a a a.
j.Tepo: ona li lili mute mute mute. lili lili a. ona li tawa insa sijelo.
j.Itan: a!
j.Tepo: insa sijelo jan. ona li lukin e ni: jan ni li jan seme? lon sijelo la…
j.Itan: a, linja lili li lon?
j.Tepo: linja lili li lon! ona li linja mute li… ken la ni li sama nanpa. ona li toki e ni: jan ni li seme? linja lawa li kule seme. jan ante la, nanpa ni li ante. ilo li lukin e nanpa ni. ona li…
j.Itan: ona li ante e ona anu seme?
j.Tepo: a, ona li ante ala. ona li lukin taso. taso: jan pona li wile moli e jan la ona li pana e nanpa pi jan ike, tawa ilo. ilo li lukin e nanpa. nanpa li sama, la ona li moli e jan. nanpa li sama ala, la ona li moli ala. taso ona li awen.
j.Itan: a… ni la, ona li wile pana e ijo lili lili lili ni tawa jan ale anu seme?
j.Tepo: lon! ni li lon jan pona la, jan pona ni li luka, li pilin e jan pona ante la ilo li tawa jan pona ante.
j.Itan: lon!
j.Tepo: tenpo kama la ilo li lon jan ale a! ni la, jan ike li luka e jan, la ilo li kama tawa ona, li lukin e ona, li moli e ona.
j.Itan: lon.
j.Tepo: taso, lon la, jan pali ilo li wile e pona. taso ilo ni li ken pali e ike suli. ona li ken moli e jan ale kepeken tenpo lili. ni li ike a. a a a!
j.Itan: a, lon. tenpo pini lili la ma pi jan ale li kama sona e ni. jan mute li ken kama moli tan jaki sijelo.
j.Tepo: ni li lon. jaki nanpa luka luka luka tu wan, a a… a, mi pakala e nanpa: luka luka luka tu tu li kama tawa ma ale a, kepeken tenpo lili.
j.Itan: ike a.
j.Tepo: ni li wawa mute. sitelen tawa la, jan pali pi ilo moli ni, li ike. li jan ike.
j.Itan: lon!
j.Tepo: taso jan pona li sona ala e ni. jan ike ni li pana e ilo moli tawa jan ante, tawa jan ike, jan ike ante. tan ni la ona li kama tawa jan ike. jan ike suli ante— jan ike ni: li wile moli e jan mute mute, lon ma ale.
j.Itan: a, ona li sona e ken pi ilo lili anu seme?
j.Tepo: lon: ona li sona e ken pi ilo ni.
j.Itan: a, ike a.
j.Tepo: pilin mi la ona li kama sona tan jan pali ike.
j.Itan: taso awen la ona li pana.
j.Tepo: a, jan ike pali li pana tawa jan ike suli.
j.Itan: n.
j.Tepo: mi sona ala e tan. ken la mi lukin pona ala e sitelen tawa. ken la mi sona ala e ijo suli. taso, mi sona e ni: jan ike suli li wile moli e jan mute mute lon ma ale. lon la mi sona ala e ni: ni li tan seme? taso, li wile e moli suli. ma ale a.
j.Itan: lon la lukin mi la, sitelen tawa pi mi tu kin li sama lili tan ni: ona li toki e ni: jan suli anu kulupu suli li wile moli e jan lili anu kulupu lili. mi sona ala.
j.Tepo: lon! jan suli li wile anpa e jan lili.
j.Itan: tenpo ale la ni li kama, anu seme a a?
j.Tepo: a a a, lon tenpo ale a.
j.Itan: lon, lon.
j.Tepo: n, mi o toki e pini pi sitelen tawa. pini la, jan Se Pon li kama sona e ni: jan ike ni li lon ma lili lon telo suli, lon weka. ona li kama sona e ma ni li tawa ni li kama sona e ni: lon ma ni la jan ike li pali e ilo moli lili mute mute mute.
j.Itan: n.
j.Tepo: ona li kama sona e ni: ona o pakala ale e ma. ma ni o weka. ma ni li weka ala la, ilo lili li awen lon ma li kama tawa jan ale a.
j.Itan: a, lon.
j.Tepo: pakala.
j.Itan: ni la ona li wile pona e jan tawa moli ona, anu seme?
j.Tepo: a, ni li ken ala. sitelen tawa ni la ilo lili li kama tawa jan la ona li ken ala weka lon tenpo ale.
j.Itan: lon, lon…
j.Tepo: ni li nasa tawa mi: mi sona e ilo, la mi pilin e ni: ilo ante li ken anpa e ilo lili moli ni lon jan ale.
j.Itan: a.
j.Tepo: taso, ken la sitelen tawa ni la ni li lon ala.
j.Itan: a a a, ike a. ken la lon sitelen tawa [pi] tenpo kama ona.
j.Tepo: ken, ken, ken. sitelen tawa kama la ale li ken. a a a.
j.Itan: a a. pona. mi o pini… anu seme?
j.Tepo: a, mi pini ala.
j.Itan: a, lon, lon. o awen toki.
j.Tepo: lon ma la ona li kama sona e ni: “ale o pakala”, li toki e ni tawa jan lawa. jan lawa li toki e ni: “a, mi wile ala. taso, mi ken pali e ni. ni la… a: kiwen suli li awen e ma. ni la ona o tawa tomo lawa pi kiwen suli o weka e kiwen suli ni. kiwen suli li lon la ilo pakala li ken ala tawa insa ma li ken ala pakala e ilo. ni la ona o weka e kiwen ni. taso, jan ike li lon, li alasa e jan Se Pon lon pali ni, li utala e ona.
j.Itan: wa.
j.Tepo: kin la, ona li pana e ilo lili moli tawa jan Se Pon. ilo ni li moli e meli ona taso.
j.Itan: a a a! ike a! ike a a…
j.Tepo: a a a! ni la, ona li toki e ni: mi ken ala weka tan ma ni. mi o moli lon ma ni. ni la, ilo pakala suli li kama li moli e ona.
j.Itan: o awen lili. mi sona ala—
j.Tepo: a?
j.Itan: mi sona ala e ijo ni: jan olin taso pi jan seme li kama moli? pi jan...
j.Tepo: jan Se Pon.
j.Itan: jan Se Pon?
j.Tepo: lon.
j.Itan: ona li jan pona anu seme?
j.Tepo: lon. ona li jan pona. mi toki e meli ona lon open. ni li meli sama.
j.Itan: lon. ike a.
j.Tepo: ike. ni la ona li kama moli. taso, pona la, meli ona li awen a. jan lili kin.
j.Itan: a a, pona.
j.Tepo: a, pilin mi la ni li ale. ken la mi weka e ijo suli. taso mi sona pona ala e sitelen tawa ni.
j.Itan: mi pilin kin… mi pilin sama. mi sona ala e ijo ante toki la mi ken pini. lon.
j.Tepo: ni li ken. a, kalama ni li awen lon tenpo suli. taso ni li ike ala. ni li pona tawa jan kute. n…
j.Itan: lon. a, mi sona e ni: jan Juli li toki e ni: sina wile pali e kalama sin la sina o pali. sina o kama tawa ma mi lon ilo Siko o pali kin tawa kalama sin.
j.Tepo: lon, lon. jan ale li ken pali e kalama sin. ni li jan tawa mi taso ala. sina sona e toki pona la o kama tawa ma mi pi ilo Siko. linja li lon poka kalama. o toki tawa mi! mi wile e pali sina!
j.Itan: lon, lon.
j.Tepo: jan pali mute ala li lon la, ken la kalama sin li lon tenpo esun ale ala! ni li ike mute.
j.Itan: a a a! ken la mi o ante e nimi ona tawa “kalama sin lon tenpo esun ale ala”, a a.
j.Tepo: aa, lon… mi wile ala wile e ni. ni o kama ala. ni la o kama o pali kin a a.
j.Itan: ala, ala. kalama li lon ala [tenpo] esun sin la, mi wile pana e ona. ken la mi ken toki e… mi sona ala, e… e tomo mi, e tomo tawa mi, e ijo sama, mi sona ala.
j.Tepo: mi sona ala. ijo o lon.
j.Itan: a a, lon.
j.Tepo: pona.
j.Itan: mu.
j.Tepo: mu! o mu.
j.Itan: o mu. sina ale o mu. ni la, a, pona tawa sina ale tan kute sina. ni li ijo suli tawa mi kin. a… lon. o awen pona!
j.Tepo: sina ale li pona. o pona.
|
This work is licensed under the Creative Commons Attribution-ShareAlike 4.0 International (CC BY-SA 4.0) license.
|