nasin pona lipu
tan jan Lakuse
o kama pona lon kalama sin! mi jan Lakuse. sama jan pali mute la mi kin li tan kulupu pi ma pona lon ilo siko. mi jan pi toki pona. lon tenpo esun ni la kalama sin li kama kalama sin sona, mi kama pana e sona. mi jan pi kama sona. mi tawa tomo sona suli lon tenpo ni a. tomo sona suli, la mi kama sona e ijo ante mute, taso lon poka pi jan sona wan, la mi kama sona e ijo tan tenpo pini lipu. tenpo ni la, mi ale li kepeken lipu lon nasin ante mute. sina kute e kalama ni la, sina kute e lipu kalama. sina kama sona e toki pona, la ken suli la sina kama sona kepeken lipu toki. lipu pu en lipu ku kin li lipu. taso tenpo pini la, kulupu li kepeken lipu lon nasin ante. lipu li mani a. jan mute li sona ala lukin e lipu. kin la, jan li wile pali e lipu la, ni li wile e mani mute, e ijo mute, e jan mute. jan wan li wile kama e lipu walo tan kasi, anu tan soweli. jan ante li wile tawa e lipu walo ni tawa jan pali- tenpo ni la tomo tawa li lon ala anu seme? ni la, jan o tawa noka, anu ona o tawa kepeken soweli. jan pali ni o kepeken telo pimeja o kepeken luka ona. ona li lukin e lipu mama li sitelen e nimi pimeja lon lipu sin. ken la ona li wile sitelen e sitelen kule pi pona lukin kin. sitelen kule li musi li ken namako e sitelen nimi tawa ni: nimi li sama lukin tawa jan, anu soweli, anu kasi, anu sewi. ante la, sitelen musi li ken lon poka sitelen toki li ken sitelen e ijo lon toki. ni la lipu li pona mute lukin. jan mani li esun e lipu la lipu o pona mute a lukin. tawa ni la pali li moku e tenpo mute, la jan pali ni li ken lape mute li pana e pakala lon lipu sin. ni la, mama en lipu sin li kama ante lili. tenpo li kama li weka, la lipu sin li kama lipu mama tawa lipu sin sin. pakala li awen, pakala sin li kama.
tenpo ni la, jan sona mute li lukin weka e pakala tan lipu majuna. ona li wile alasa e lipu ante mute pi toki sama li wile pana e lipu pona. taso kin la jan sona mute ante li open pilin e ni: ken la, pakala lili ni li pakala ala. lon la, jan pali sitelen li pakala, taso jan lon tenpo pini kin li lukin e pakala ni li awen kepeken lipu pi pakala mute lon nasin pona. ni la mi o toki ala e ni: pakala li lon lipu. mi o toki e ni: lipu ante mute li tawa toki wan. jan li lukin e lipu ante mute la ona li ken sona pona e toki wan ni.
tenpo pini la ni li nasin, o kute a: jan pali li sitelen e toki, li pana e ona tawa kulupu. ona li pana e toki la, jan pali li lawa ala e toki ona. jan ante mute li ken kepeken toki ni. jan pali ante li ken namako e toki mama, li ken pali e toki sama li wile ala toki e ni: toki ni li tan jan pali nanpa wan. ala. jan li ken ala lawa e toki. ni la, tenpo mute la, jan wan li pali e toki, jan ante li namako e ona, jan ante li pana e nimi sin e toki sin tawa ona. ni li awen li awen li awen. pini la, jan ala li pali e toki. kulupu li pali e toki!
toki ni li kama pakala anu seme? ala. ona li awen pona. ona li pakala ala. taso la ona li namako. mi kama toki sin. mi o toki ala e ni: pakala li lon lipu. mi o toki e ni: lipu mute pi ante mute li kama e toki wan. jan sona Paul Zumthor en jan sona Bernard Cerquiglini li pana e nasin ni tawa tomo sona suli. ona li pona mute.
ni ale li toki mi. wile la sina ale li kama sona e ijo sin tan kalama mi. mi jan Lakuse, ni li kalama sin. o awen pona, mi tawa.
