Kalif Harun Alraschid

Ven kalif Harum Alraschid ebinom vöno yagöl, ekolkömom bäledani, kel eplanom nötabimi: »Stupan kimik binom bäledan at«, kalif esagom kopanales oka; »dunom, äsif binom-la nog yunan e ojuitom-la flukis bima at«. Bi kopanels oma esmiloms leigo dö bäledan at, kalif egolom al om e esäkom bäledi oma. »Plu ka yels jöls; sölal!« egepükom, »ab Gode lobi, nog so saunik äs kilsayelan«. »Lio lonedo ibo olifol nog ma ced ola«, kalif efovom, »das, binöl so bäledik planol nog bimis yunik, kels poloms vemo lato flukis? Kikod mekol ole vobi so vanlik?« »O söl', man bäledik esagom, »kotenob, ven eplanob bimis, nes kudön, va ob u votik ojuitom flukis ota. Binos gidik dunön, kelosi fats obas edunoms. Eplanoms bimis, kelas flukis fidobs; bi klu ejuitobs vobi fatas, kikod sötobs binön glötikum visü poslifels obas ka ets ebinoms visü obs. Tikob, kelosi fat no juitom, son oklöpom.« Harun Alraschid givöfik, kele gepük at eplidom, elegivom bäledane mödi gölüdabas. »Kim kanom sagön nu«, bäledan yofik efovom, »das evobob vanliko adelo, bi bim yunik, keli eplanob, polom foviko del balid flukis so mödik? Sikod binos velatik, kel dunom gudikosi, pomesedom ai säto.«

Se Volapük: Gased al pakam Volapüka 1894, Nüm: 4, Pad: 7.