Kiöp hät binom?
Flen obik Célestin labom egelo zigadis legudi, e no memob ekolkömön omi nendas labom zigadi pelitöl in mud okik.
Sembalna, enütlidob in cem omik legödelo, za düp mälid; du tim pegeböl fa ob al dagolön nütlidöpi, ilitom zigadi sembal, e ven ärivob bedi omik - ibo äbinom nogo in bed - päzümom ya dubü fog smoka.
Votikna islipom ko zigad in mud e ifiladom möbemi lölik cema okik. Ven nilels äkömoms al savön omi äbinom ya ti nenotlugik.
Célestin ägolom nevelo in doms u tops kö smokön penedalos, e sevob das binom nebaladik ko bal ofnökas okik, läd bäledik e liegik, kelofi no vilom visitön bi no kanof sufön smoki; sägo ofnök at esagof das osägelütof nefi nedanik ofa.
In Fransän, lelodavabs patik palesävoms plo smokels, kels no padaloms smokön in vabs votik. No nedob sagön das ven Célestin tävom, välom ai smokelavabis.
Äyelo pävüdom fa flen sembal al yagön in fot nilü Orleans, e äblibom uso du dels mödumik. Gued flena omik seistom len jol fluma Loire e ninom foeti mödik; Célestin, nen lüvön zigadi okik, litöl votimi sosus balim päfinom, äjutom lievis, lulievis e felitis nenumik, äfidom e ädlinom äsliko pösods fol, e äslipom äsilko sudikan sombal[1] - segun pükedavöd Fransänik.
Yedo fin valikosa zitom e Célestin äsötom getävön al Paris. Lelodastejöp nilikünü dom flena omik binom in zifil Meung, e ven yagel fenik ärivom omi äbinos düp 11id vendela: lezug äl Orléans e Paris änakömom in stejöp.
Célestin ilabom ze timi lemön bilieti okik ven pämofom fa lelodacalel in vab sembal kel, liedo! no äbinom smokelavab.
Lezug ämovegom foviko.
Flen neläbik oba äbinom in vab dagik, bi bal litapolas pänösom e votik ägivom liti te neveütik.
In gul bal, man bäledik sembal äslipom bösetiko; in gul votik vom sembal äslipof i. Célestin no ädalogom omis, e äsiadom oki visü man.
“Milö!” äsagom loviko oke, “jinos obe das siadob obi su bos!”
Ag! isiadom oki su hät tävela, e hät disü vät flena obik ivedom leo platik.
Kisi dunön? Pos emeditön du timik sembal, Célestin äsludom manifön seiliko gläti yana e jedön häti plö vab.
Me kaut vemik, bi ädledom dagalön bäledani, äbeginom disön gläti, ven lut kalodik änütlikdom e vom äbeginof snidön bösetiko.
“Sülö!” äsevokof, “glät pamanifom! olabob zelado kögi! Kikolös gläti foviko, sol.”[2]
“Läd,” Célestin äsagom plütiko, “vipob smokön zigadi, e dledob das smok böladamom oli.”
“Smokön, söl! Vipol smokön! Li binos mögik! No, no! Begob oli no dunön atosi, bi smok mekom obi egelo malädik. If vipol smokön, valädolös du timil sembal. Lezug orivom suno Les Aubrais, e uso olüvob omi. Ven umogolob, okanol smokön so mödo ka ovipol.”
Musam at idagalom leo täveli bäledik. Nem stejöpa Les Aubrais pato äkodom omi stanön.
“Les Aubrais!” äsevokom, “li rivobs Les Aubrais? No tävob fagikumo!”
“No, nogo, söl,” vom ägepükof, “ab binom stejöp nilikün; obinobs uso suno.”
Tävel äbeginom konletön päkemi okik: älabom bäsetis tel disü bam, päkedilis kil in filad ovü kap okik, lömijülis tel e spatini bal. Ädetovom tävamahäti[3] okik e - äsukom häti oka.
Célestin neläbik no äkinom mufön, bik ädledom das bäledan dalogom häti evedöl - ag! leo platik.
“Kiöp hät obik kanon binön?” tävel äsagom, beginöl vedön tlepik, bi lezug änilom äl stejöp.
Äsükom valöpo e natiko ätuvom nosi.
Célestin päbegom mufön nemödiko al jonön das hät nepetuvöl no äbinom in gul omik. Flen obik ämufom, ab älabom kudi lumufön häti peplatöl disü ok, e tävel ätuvom nosi su bam.
“Li älabol häti olik ven äkömol in lezugavab?” vom äsäkof.
Man älogedom ofi zuniko e ädesänom sagön ofe vödis neplidik, ven lezug ästopom.
“Les Aubrais! Les Aubrais!” lelodacalels äsevokoms. “Tävels plo Orléans cenoms de lezug!”
Läd bäledik ädeksänof de vab pos esükön denu häti nen sek, e tävel, kel ipladom denu tävasmahäti su kap okik, äsötom i mogolön, bi tim stopama ifegolom.
Sosus bofiks ilüvoms vabi lezug äbeginom mogolön e Célestin, kel älabom zuni legletik tefü oftävel kel no idälof ome smokön, äsludom vinditön oki. Äsumom häti peplatöl e, jonöl omi tävele kel iblibom su selodamöp, äsevokom - “Söl löfik, hät at li binom olik?”
“Lesi!” man ägepükom; “kiöp äbinom?”
“Läd at isiadof oki su om!”
Tävel ävedom ledik dubü zun, e büfo lezug ilüvom stejöpi, Célestin älabom kötenöfi dalogön mani flapön me lömijüls okik tel, vomi neläbik kel no äsevof kikod tävel äflapom ofi.
NOETS. (Vükifonät)
Se Kosmopolan 1892, Nüm: 6, Pads: 84-87.