Klotem tu lonedik
"Li meböl das sötob läsön ovigo in matazäl flena obik, Loiseau?" söl Dupuis äsagom ofmatele okik du bofiks äsiadoms al vendalafidön.
"Mebob atosi lebeno," läd ägepükof, "e sikodo eksämob adelo zälaklotemi olik e enotedob das binom tu pedegeböl. Äbinosöv pötik bonedön votiki lä teladel."
"Ovisitob teladeli odelo, e obegob omi mekön spidiko klotemi nulik plo ob."
Söl Dupuis äbinom skital; ädilekom fablüdi veütik in kel vobels mödik ävoboms; älabom bonedelis no te in Flentän, ab i in selän e kludo äbinom ai jäfik.
Älödom in dom smalik, ab jönik, pebumöl nilü vobacema fablüda, e litöps kela ädäloms lenlogami ovü gad lejönik. Stök telid doma pälödom fa lümot skitala, lád Rosel, ofbäledan vimik kel älöfof te kati okik penemol[1] Volapük, ab kel älabof deno stümi semik plo söl Dupuis bi äcedom omi äs tedali vemo skilik. Pösod votik te bal älödof in dom, Catherine, ofkukel tälenik, kel ädünof lä söl e läd Dupuis sis matazäl omsik, ab kel älabof ladälodi vemo nelesumik, pato ven ek äkömom in kuköp ofik kö äsölof nen dälön aikele nintlidön.
Äso isagom ofmatele okik, skital del posik ävisitom teladeli, ävälom klöfi jönik e äbüdom tedele mekön foviko zälaklotemi, o. b. guni, blötakloti e bliti.
"No labob anu livüpi letön oli sumön mafis," äsagom, "bi binob vemo jäfik. Li kanol vobön nen mafs nulik?"
"Lesi! lesi! söl," teladel ägesagom. "Esumob mafis olik muls kil büo e niludob das no evotol sis tim at."
"Benö! Mebolös das onedob klotemi at ovelüdelo!"
"Olabol omi, söl, bömetob atosi ole."
Vig bal äfegolom e velüdelo, segun bömet teladela, klotem nulik päpolom in dom söla Dupuis du at ävisitom vobacemis fablüda al sulogön vobelis e givön büdis lätik oka büfü mogolön al matazäl flena okik.
Skital ävilom klotamön foviko oki e änotedom, ko nekoten vemik, das teladel ipökom tefü mafs, e das blitagoaps e lamaveads guna äbinoms tu lunedik, no tu vemo, zemets ze lul; ab klotem no äkanom papolön somo e änedom menodami.
Söl Dupuis äsumon[2] e guni e äblinom omis ofmatele okik.
"Löfäb," äsagom[3] ofe, "begob oli kötön stofi boso al smalön nemödo - zemets ze fol e lul - lamaveadis guna e blitagoapis at, bi teladel emekom omis tu lonedik."
Läd Dupuis älabof, gödel at, ladälabidi vemo badik - ba no islipof gudiko dü neit büfik - e ägepükof nelesumiko:
"Li cogol? Ob, kötön stofi at! Leno! Atos binon vob teladelik e no vob vomik! No kanob e no vilob dunön atosi!"
Skital ägesagom nosi e ämogolom, mopolöl klotemi. Ämeditom du timil, e ksänöl slebi, ägolom nokön len yan läda Rosel lümot oma.
"Nütlidolöd!" vög ofbäledana ätonom.
Söl Dupuis ämanifom yani e äglidom löfliko lümoti okik; ab läd Rosel äjinof no notedön pliseni lüsona ofik; äbinof vemo lügik bi Volapük inüslugom lefadi etanöl loeti e, kodü atos, ivedom vemo malädik. Skital äsötom lielön konami jena neläbik at, äkoliedom ladliko kati, do no älöfom vemo nimi badugik at kel iralom omi ofeno, e fino äplöpom sagön:
"Motil löfik, äbinoböv vemo danik ole if ävilolla duinön düni gletik obe...."
"Binos nemögik anu,' läd ägepükof büfü sevön kisi lüson ofa ädesänom demanön ofe. "Volapük pöfik binom tu malädik; ven udenusaunom, oduinob leviliko düni aikimik ole, ab sötol valädön jü kat löfik oba plöpom semofön lefadi!"
"Podunos lespidiko," söl Dupuis äsagom. "Begob oli te kötön boso stofi at al smalön nemödo - zemets ze fol u lul - lamaveadis gluna e blitogoapis. Logolös, mot löfik; teladel emekom omis tu lonedik; sötob läsön adelo in matazäl flena obik Loiseau, e...."
"Li labol ladäli nonik?.... E li kanol pükön dö matazäl u dö zäl aikimik ven nim pöfik at..."
Skital no älilom fini seta bi imogonom donü sleb ko zun gletik.
Täno ätikom dö ofkukel; ab äbinos vemo pöligik lenpükön ofkukeli ven äbinof jäfik in kuköp.
Yedo, bi tim äfegolom, älanimom oki e ägolom len yan kuköpa, ab nen kinön nütlidön.
"Catherine!"
"Kisi vilol?" äsäkof lüdäliko.
"Kömolös du minut te bal, vilob begön oli kötön..."
"Kötön kisi?"
"Kötön nemödo - zemets fol u lul - blitagoapis e lamaveadis at kelis teladel emekom tu lonedik. No kanob gebön onis somo."
"Labob iso ni jimi ni nadi, e lemäno labob anu livüpi nonik. Sötob jäfön zendelafidi, klud...."
Söl Dupuis äkikom yani bösetiko, ädenugolom in cem okik, äjedom guni e bliti su bed e ämogolom vutafuliko in vobacems fablüda.
Minuts lul no ifegoloms nogo, ven ofmatel skitala änütlidof dusiko in cem, polöl jimi gletik e bogi smalik ninöl nadis, fadis, e. l.
Imeditof das ipölof nevilön mateli okik menodön klotemi oma; ipidof ejonön lüdäli ome e äkomöf[4] al kötön stofi tu lonedik. Vob at pämekom spidiko; zemuts lul päkötoms se blitagoaps e lamaveads guna e läd Dupuis äsetlidof, pekotenöl demü vobad okik.
Bevüno, läd Rosel ilabof läbi logön kati, Volapük, semofön lefadi kel ätupom omi so vemo; pos epladön nimi su bed smalik oma, ätikof dö lüson ofik e beg oma.
"Binom vo man gudik e ladälik," äsagof oke. "Vilob kotenamön omi; nu Volapük löfik oba binom denu saunik e slipom stiliko; kanob, nen pölig, blibön mobinik du düpafoldil bal."
Äsumof jimi, nadi e fadi, e ädeksänof slebi.
Düpafoldil bal poso, blitagoaps e lamaveads gona söla Dupuis päblefoms denu de zemets lul e pädenupladoms su bed, du läd bäledik ägeksänof in löd okik, tköl das lüson ofa äbinomöv vemo kotenik ven änotedomöv das lümot löfik oma ibefulof vipi oma.
Ag! klotem neläbik no ifinom pavobadön! Läd Rosel ärivof stöki balid ven yan kuköpa pämanifom e Catherine - lesi! Catherine of it - äpubof ko jim gletik in nam. I of imeditof das söl Dupuis äbinom masel vemo gudik e meilädik e das äbinosöv pötik e pöfüdik befulön vipi pesepetöl fa om.
"Esagom zemets lul," ämurof ksänöl slebi, "atos podunos spidiko e söl Dupuis oblinom kotenik. Täno ofögivom obe bi ebinob boso nelesumik kol om."
E Catherine ekötof lanimäliko zemetis lul stofa se lamaveads guna e blitagoaps. Täno ägegolof in kuköp okik gäliko, tiköl dö kontenöf masela ven änotedomöv das ofkukel idunof vobi keli idemanom ofe.
Glok gletik fablüda äglokom düpi balsid ven skital, pestilöl boso me visit omik in vobacems, ägekömom in cem okik.
"Oblüfob denu klotemi obik," äsagom nütlidölo. "Ba te ejinom obe tu lonedik e ba okanob gebön omi nen menodams."
Ab sosus söl Dupuis pöfik ävilom klotamön oki änotädom foviko ko stun gletik das goaps blita no ärivoms disikumo ka kiens e das lamaveads guna ätegoms töbo lamaflegis omik!!
Vitim plidöfa nepötik ofmatela, lümota e ofkukela okik, skital neläbik no äkanom läsön in matazäl flena omik Loiseau bi zälaklotem vönik oma äbinom tu pedegeböl e bi klots nulik ivedoms tu blefik.
NOETS. (Vükifonät)
Se Kosmopolan 1892, Nüm: 7, Pads: 102-104.