Koblods!

Stad lügik vpa valöpo emekom obis bepükön kodis de atos, e efinobs me sek at, das 1) väpük obsik no ebinom säto nefikulik, e das 2) din obsik no pedukom säto plagiko.

If evelo väpÜk kanik sembal polensumom valemo, mütom binön leo nefikulik. Nefikul (o. b. foms galmatik nemödik e tikavik, vöds so nemödik äs mögik, vödafomam tikavik) binom bizug lebalik, keli kanapük kanom labön feleigü netapüks; e bi nelijänapük labom ä glamati vemo balik ä pakami gletikum ka püks votik valik, vp. mütom vedön nefikulikum levemo, if ovikodom püki et. Ab kadem sötom jäfön dini at, e obs kanobs te suflagön; deno votikos binos tefü nefikulam, kelosi kanobs e sötobs dunön: vobön 1) al mekön kösömik stüli klülik e nekompligik e 2) al fomön pianiko pükakösömi tefü stuks, sepets, gebam pläpodas e l., ab pükakösöm tikavik e lakapälnik, pükakösöm kel vitom lönugis motapükik valik, e kel votom sepetis poedik e kompligik, sodas tik omsik pasepetom tikaviko e baliko in sets blefik. Pükakösöm somik fimik mütom sibinön, büfo vödabuks lefulnik^[1] kanoms palautön, (vödabuk mütom pafomön yufü e ma literat sembal sibinöl), e nen vödabuks lefulnik obinos nemögik nenoleles penön „bevünetiko“: nen lönugs motapükik. - Sugivs at tel binoms ebo glezeil bal bleda at, e sikodo lekomedobs omi flenes obsik valik, pato bi logobs ya, li skiliko e läbiko glezeil at pefölom in laltügs votik nüma at. Bled at blinom tikis ut nulik e flukik, kels edefoms vpadine liedö jü anu.

I binobs betikälik tefü glezeil votik bleda: flan plagik dina. Ven memobs, das väpük sembal opöfüdom jäfelefe gledilo, (ibo plo literat poedik u nolavik no obinom gudik, bi no okanom sepetön tikadistinis smalik nen binön tu fikulik e vödaliegik), binos milagnik logön, das jäfels so nemödik binoms in klubs, das pepladoms ti seo. Mütobs beginön fetanami ko oms, pükatön in tedaklubs e givön omes nitedi vpa dubü jonön omes, li pöfüdik vp. obinom füdo omes, e das binos plo oms, das vobobs. No cedobs, das sötobs mekön omis lenadön vpi; nogo vp. binom tu fikulik omes, e dubü atos opölüdoms nitedi; ab mütobs plänön omes, das pük no erivom nogo fomi okik finik, das vob gletik defom nogo, ab das vob at pomekom vifikumo, if yufoms obis dubü monaläpols. Ven tedaflams gletik e liegik laboms te nitedi, givoms viliko moni. - Binos ebo fetanam at ko jäfelef, keli bled at blüfom beginön, e sikodo mütobs valik yufön ziliko steifis omik ma suflags in laltügs löpik.

Lenpükobs atoso pato olis, koblods obsik, läsiedels klubas votik, bi klödobs, das ols okanols gudiküno suemön tikis obsik e pakön omis bevü kopanals, äso komedam olsik olujafom zeladüno bonedelis. Spelü lasum flenik vödas at disapenobs lestimiko.

Cifef vpakluba de Köbenhavn.

NOETS.

1. O. b. vödabuks, kels no ninoms vödis mödikum ka vödabuks nuik, ab mödikumosi dö vöd alik.

Se Volapük: Popabled e ninsadabled 1890, Nüm: 6, Pad: 22.