Kushtetuta e Shqipërisë/Pjesa e dymbëdhjetë

Kushtetuta e Republikës së Shqipërisë
Pjesa e dymbëdhjetë (Komisioni Qendror i Zgjedhjeve)
nga Komisioni Kushtetues i Republikës së Shqipërisë

Komisioni Qendror i Zgjedhjeve është një organ i përhershëm që përgatit, mbikëqyr, drejton dhe verifikon të gjitha aspektet që kanë të bëjnë me zgjedhjet dhe me referendumet dhe shpall rezultatet e tyre.

Komisioni përbëhet nga 7 anëtarë, të cilët zgjidhen për një mandat 7-vjeçar. Dy anëtarë zgjidhen nga Kuvendi, 2 nga Presidenti i Republikës dhe 3 anëtarë të tjerë nga Këshilli i Lartë i Drejtësisë.
Përbërja e Komisionit Qendror të Zgjedhjeve përtërihet çdo tre vjet sipas procedurës së përcaktuar me ligj.
Anëtarësia në Komision nuk pajtohet me asnjë veprimtari tjetër shtetërore dhe politike.
Subjektet elektorale caktojnë përfaqësuesit e tyre pranë Komisionit. Ata nuk kanë të drejtë vote.
Anëtari i Komisionit gëzon imunitetin e anëtarit të Gjykatës së Lartë.
Komisioni ka buxhetin e vet.