L'è ona contro Bosinaa
L'è ona contro Bosinaa
L'è ona contro Bosinaa
su quell baloch che ha criticaa
e senza reson la fa el dotor
sui mod di donn che va a vapor.
Chi v'ha insegnaa mò de componn
'na bosinaa sui mod di donn?
Besognarav, a 'sto pont chì,
componn vœuna tutt i dì.
Se tutt i dì ch'è staa creaa
semper se ved di novitaa;
se veden on dì in ona fegura
che fa stremì, che mett pagura;
on olter bott no l'è pu quella
en vedii on'oltra pussee bella.
I sò vestin muden caratter
come i comegh sul tajater;
donch l'è fadiga trada via
a fà el dotor su 'sta pazzia.
Savii che i mod de prima usanza
vegnen de Londra, e de la Franza,
e quai vœulta de la Spagna
de l'Italia o de l'Alemagna;
el gust siel brutt, siel mò bell
el giornalett el da el modell.
E chi pò spend, e chi ghe n'ha
se fann on vant prest de copià.
Savii che i donn di noster dì
hann l'ambizzion de comparì
e tant in strada come in cà
hann piasè a fass remirà
e fass tegnì (per dì pu giust)
donn de ton, donn de bon gust.
Ed ogni moda, a mè consej,
ghe par da ess semper pu bei.
Cossa v'importa, o sur mincion,
che porten sui brasc quii duu lampion,
che vaghen ligaa come i salam
con la zentura de coram,
che porten in coo quell capellasc
guarnii de gall, con tant besciasc?
Èl fors on delitt, sur avocatt,
se porten sul front quatter malfatt,
se sconden el goss con quell collaa
a vapor anch sgonfiaa?