L'Autore ad una sua figlia
Carlo Maria Magg (1630-1699)
L'Autore a ad una sua figlia
L'Autore ad una sua figlia mandandole un componimento
Mandè jer quell mè straffoj.
L'hoo revist: nol var nagott!
Ma mi sont on cert foj foj!
Vorev fa tuttcoss a on bott!
Prest e ben de rar se pò,
chè la pressa spess la falla;
quand la cossa è mettuu giò,
ghe vœur temp de remondalla.
L'è on impiaster de la pressa;
a fà ben l'hii de strascià;
e no fee la dottoressa
con vorella fà scusà.
La remand. Fegh fantasia,
chè in duu lœugh l'è rappezzada:
inscì, almanch, la passa vià
per menestra rescoldada.
Questa chì l'è mò a la bona,
ma quell'oltra l'è in poncion;
perchè questa la buffona,
e quell'oltra dis de bon.
Questa chi l'è mò de legg
comè el liber del Bertold,
e l'è mej quand pu l'è pegg,
perchè el rid fa passà el cold.
Cossa fee con sta scalmana
con i bind fin sott i zij,
con cent lira de sottana,
e a soppressa in di fornij?
Andarii tutt lasagnent,
sguansg a fiamma, front che gronda,
pett che batt a man sbrojent,
bocca averta e brasc che donda.
Còr e pagn bon per genee!
La set tocca, e el cold no molla;
e, ostinaa comè on giudee,
no vorii mandamm la tolla?
I nost tos hin tutt in ton,
ma i sò donn hin tanc taccogn,
e ghe fan di repetton
perchè fan el sò besogn!
E mi corri a intend el cas
per podè dà la sentenza;
e, in quell'att, me stoppi el nas,
e pœu predegh la pazienza.
Vorev Rœusa ona quej sira
in la furia de sti lid!
Perchè, almanch, s'el coll ghe tira,
la tirass i pee del rid.
Pur, de crott el ghe n'è vun!
L'è Angerott, che ben me pesa!
L'è campee del lœugh comun,
e el ghe balla a la franzesa...
Vorev dì: ch'el fa correnta...
ma già soo che sii intendevra!
Gh'è de bon ch'el se sostenta
coi nozzinn, e no l'ha fevra.
L'ha di collèr assossenn,
e al ventricol gh'è del fœugh;
e, jersira, ghe mettènn
on boffett sansii a sò lœugh.
El ciapott, tutt al contrari,
g'ha miss vomet per dedree...
sta mattina, l'è sui ari,
e el s'n'incaga del spiziee!