L' salüt
L' salüt.
O mi bi crëps, bi gragn y alc
Salüc ves mëni cënt y mile,
Da gran ligrëza pëti salc
Ciaran ai spic che röia al cil.
N salüt dër bel a te, gran Piz,
Alberch chirí da certa jënt!
De düc i crëps es' tö le plü spiz,
Tra düc es' 'ci le plü alt sc' i ne mënt'.
T' es bel, t' es gran, ci ós' mai deplü?
Bel lize y alt, n' es' pa contënt?
Mo crëie me pos' chësc tan sigü:
Tüa ciüria fej gran dann a jënt.
N salüt a te, bel Pisciadú!
To aspet desmostra gran confort;
T' es ligher, gran y bel, odü
Dër bëgn da jënt de vigni sort.
Concordia insëgnes' ai Ladins;
Fodom, Gherdëna, Fascia, döt
Marou te prëia da bugn vijins,
Che vigni mal sî da d' ëi tut.
Insciöche benigno vedl espert
De n dër bun cör te vëigon rion
Y conscidran da vigni pert
La jënt che vá da mac saltan.
Salüt 'ci a te, de Crespëna sas,
Bel lerch y lunch, bel liciorënt!
Chël bel comun dl “col fosch” sas'
Da defëne cuntra vigni vënt.
Tü brac deslariá nes sigurëia
Da vigni mal dl Ozidënt
Insciöche la oma ch' abracia
Cun bela pora le pice nascënt.
Salüt, Sassongher, ince a te!
Mo dí, ciodí bel su iló
T' un stas' tan scerio? mai chël rí
Pro te che plej ai crëps chiló!
Na burta ciüria cür to ce
Por le plü y manacia a düc to sënn
Cun gran tempesta y gran tempié;
Porcí chësc molamënt, dí sëgn!
Ós' forsc les Ganes tres pluré,
Les beles Ganes da zacan?
Sparides éres, le messun doré,
Mo forsc ciamó les vëigon gnon.
Porcí molé, porcí chësc sënn?
Él forsc les stries che ne bala plü
A mesanöt y dër dassënn
Dessot a te te Val incö?
No, No, Sassongher, no pité!
Ciamó val' stries incina che t' os;
Te ciasa, en te dlijia, a bun marcé
Tröp plü co zacan odëi t' un pos'.
O mi bi crëps, bi gragn y alc!
Salüc ves mëni cënt y mil;
Da gran ligrëza pëti salc
Ciaran ai spic che röia al cil.