Löf in gad
Äbinos flolatim. Sol äkidom violis smalik, lols ledik äfloloms; äbinos vamik e stilik. In gad nilü domayan disü vinabims jiblods tel äsiedofs; bäledikün, Amalie, äbinof jisöl doma; meditöl älogedofsili klilik; matel ofik igolom spatön. Votik, Betty, äbinof jipul yunik e jönik; äsiedof kipöl namis zi bal kienas okik. Süpito äsutovof kapi:
„Sagolös obe Amalie, liko ädunol, ven ämatapömetol?“
„Ven ämatapömetob?“
„Si, kisi om äsagom, e kisi ol äsagol?“
„Vö - no memob osi.“
„Zelado, sötol memön osi.“
„Betty, binol cil gletik; klödob ti, das desänol it matapömetön!“
„No, ibo klödob das ya ematapömetob.“
„Kisi sagol Betty? klödol, das...“
„No nolob, va ematapömetob ävendelo; ibo nek obas äsagom vödi sembal; te älogobs. . . . . .“
„Te älogols?“
„Si, kapälol obi. . . .; lölikos äjenos somo: ädelo du ol äsiedol lä pianofod, e matel olik äkikom logis okik lilöl pledi olik, liötan äkömom is al ob in gad. Äsiadom oki us, kiöpo ol siedol anu; no nolob ti, kis äzitos; ab äseistom lami okik zi ob.“
„Si ädalol ome dunön somo, Betty?“
„Si, äsiedob legudiko somo; ab süpito balib omik gletik, müedik äbinom nilü mud obik. Iklödob egelo, das balib somik äbinom nelesumik, ab leno, leno! Täno äsumom kidi sembal.“
„Li äsumom te bal?“
„Si, äsumom te bal; ibo ägetom votikis, no äbinoms nemödik. Ab suno jidünel äkömof ko lit; täno bofiks äsustanobs e äningolobs al ols; no li älogol, li ledik logods obsik äbinoms? No li klödol, das binob ematapömetöl?“
„Ab no li äsagom vödi sembal?“
„Si ven ämogolom, äpedom nami obik e äsagom: ‚odelo opükob ko matel jibloda olik‘; äsagom ol; vö äbinos kleilik.“
„Olilobs, kisi matel obik osagom, ven kömom al dom. Ab logolös, us kömom, e no binom soalik; liötan binom ko om.“
„Li kanol logön, mütos deno binön matapömet. - O God! kisi dunön? oningonob.“
„Binos tu latik, binoms ya is.“
Us liötan ästanom ko balib gletik, müedik, e in leiklot okik lejönik. Äglidom militiko, e yuniks tel ätökoms logedis; äkapäloms balvoto.
Zelado, mütos binön matapömet.
Se Volapük: Popabled e ninsadabled 1890, Nüm: 6, Pad: 23.